Masaalaanote Haꞌruma Hadhe—Iyyueeli
1. Sabbankeemmo yannara Iyyueeli gede shooshaqoota ikka dandiineemmohu hiittoonniiti?
1 Masaalaanchu Iyyueeli ayeeti? Isi “Baatueeli beetto” ikkasi calla kulino. (Iyu. 1:1) Kuni shooshaqu masaalaanchi luphi asse kulinohu Yihowa uyinosi sokkaati ikkinnina umisire diꞌꞌikkino. Isinte gede ninkeno, soqqanshonke yannara mannu jajannonke gede woy naadannonke gede assiꞌrantenni Yihowanna Qaalisi aana illachishanno gede assineemmo. (1 Qor. 9:16; 2 Qor. 3:5) Qoleno, dudumbeemmo sokka jawaante uyitannonke. Iyyueeli masaalo diinaggaambe sabbankeemmo gedenna hexxo heedhannonke gede kaaꞌlitannonkehu hiittoonniiti?
2. Yihowa barri gambise daasi ma assineemmo gede kakkayisannonke?
2 “Yihowa Barri Gambise Dayino.” (Iyu. 1:15): Tenne masaalo borreessinoonnihu lowo kumi diri albaanni ikkirono, ninke heeꞌnoommohu tini masaalo jeefote gumulantanni noo yanna giddooti. Tini alame roore bushshanni haꞌrase, hattono soqqanshonke yannara mannu kulleemmore lashshi assannohanna haariimannoha ikkansa tenne busha alame bao gambissinota leellishshanno. (2 Xim. 3:1-5; 2 Phe. 3:3, 4) Goofimarchu gambise dayinota seekkine assaambeemmoha ikkiro, heeshshonke giddo soqqanshonke balaxisiisate baqete korkaati noonketa huwanteemmo.—2 Phe. 3:11, 12.
3. Bayiru qarri gambisanni daanno wote soqqansho roore hasiissannohu mayiraati?
3 “Yihowa Mannisira Golo Ikkanno.” (Iyu. 3:16): Tenne xiqisera kulloonni shafama, Yihowa bayiru qarri yannara faradannota baote firde kultannote. Hattee yannara Yihowa ammanantino soqqamaasinesi gatisannonsata afanke sheshifachishannonke. (Aju. 7:9, 14) Sabbakate looso loonsanni Yihowa kaaꞌlonna irko afiꞌranke, albankeenni daannohu bayiru qarri yannara kaaꞌlitannonke ammananna jawaante heedhannonke gede assitannonke.
4. Hagiidhineemmohunna albillittete yanna yaandummokki agadhineemmohu mayiraati?
4 Mitu manni Iyyueeli masaalo bao daggannota calla kultannote yiirono, tini masaalo Maganu mannira hagiirsiissannoti gatote hexxo heedhannonsa gede assitanno. (Iyu. 2:32) Konnira “Hagiidhe, Maganiꞌne Yihowanni tashshi yooꞌne” yitannota Iyyueeli 2:23 aana noo amaale harunsinanni albillittete yanna yaandummokki agadhino, hattono Maganu Mangisteha dancha duduwo diinaggaambe dudumbo.