Wedella Roduuwa, Songote Giddo Halaafinate Adhate Sharrantinanni Heedhinoonni?
1. Mittu wedellichu rodii 1 Ximootewosi 3:1 noo amaale harunsa mamoote jammariro woyyanno?
1 ‘Sharramannohu ayee manchino dancha looso halchanno.’ (1 Xim. 3:1) Tini xiqise labballu roduuwi songote giddo soqqamate mabte afiꞌrate sharrantanno gede jawaachishshannote. Togo assate lowille ikkitina geeshsha agara hasiissannoꞌneni? Togoo sharro wedellu heedhinenni jammartiniro roore woyyate. Konni garinni qajeelsha afiꞌra dandiitinanni, hattono naggi yitinanni wote songote soqqamaano ikkate ikkado ikkitinoonnita leellishshinanni. (1 Xim. 3:10) Cuuantinoonniri labballu roduuwi tennera sharrama dandiitinannihu hiittoonniiti?
2. Uminke xiqime agurreemmore ikkate mayi kaaꞌlannonke? Togoore ikkinoommota leellisha dandiineemmohu hiittoonniiti?
2 Meessi Xiqime Agura: Songote giddo halaafinate adhate sharrama, maarage afiꞌrate ikkikkinni danchu loosira sharrama ikkitinota habbinoonte. Konni daafira, roduuwaꞌne kaaꞌlate hasatto heedhannoꞌne gede assidhe. Tenne assa dandiitinanni doogga giddo mitte, Yesuusi lawishsha heeshshi gotti assitine assaawate. (Mat. 20:28; Yoh. 4:6, 7; 13:4, 5) Wolu manni hajo umiꞌnete gede assitine laꞌinara kaaꞌlannoꞌne gede Yihowa huuccidhe. (1 Qor. 10:24) Songoꞌne giddo noo geerra woy bisu xeꞌne noonsare mitore assitine kaaꞌla dandiitinakka? Umiꞌne fajjonni Mangistete Addaraashe hoowe giddonni hayisso mide hoola, ishine feya woy wolere togoore assa dandiitinanni? Tiokiraasennihu Soqqanshote Rosi Mine woloota riqibbine kifile shiqishate qixxaabbinanni? Togo assitiniro umiꞌne fajjonni woloota kaaꞌla lowo geeshsha hagiirsiissannoꞌneta huwattinanni.—Looso 20:35.
3. Ayyaanaamittete jawaante lowo geeshsha hasiissannohu mayiraati? Ayyaanaamitte lossiꞌra dandiinannihu hiittoonniiti?
3 Ayyaanaamittete Jawaante: Songote giddo soqqantannorira roore hasiisannori baxxitino egenno woy kalaqamu dandoo ikkitukkinni ayyaanaamittete jawaanteeti. Ayyaanaamittete jawaante noosi manchi mitto coye laꞌꞌannohu Yihowanna Yesuusi laꞌanno garinniiti. (1 Qor. 2:15, 16) Kuni manchi “ayyaanu guma” yinanni akatta noosiho. (Gal. 5:22, 23) Qoleno wongeelu looso diinaggaawe loosannohonna Maganu Mangiste hajo balaxisiisannoho. (Mat. 6:33) Gilletenni xiinxallate gade heedhuꞌnero, ayyaanaamittete akatta lossiꞌra dandiitinanni. Togoo gade heedhannoꞌne gede Qullaawa Maxaafa barru baala nabbawa, mitte mittenta Agarooshshu Shaenna Baqqi Yiiyye! yinanni metseetta nabbawa, hattono gambooshshe qixxaabbine haꞌra hasiisannoꞌne. (Far. 1:1, 2; Ibi. 10:24, 25) Phaawuloosi aju beetti Ximootewosi ayyaanaamittesi lossiꞌranno gede togo yee amaalino: ‘Rosiisatto roso seekkite hixamanyi.’ (1 Xim. 4:15, 16) Tiokiraasennihu Soqqanshote Rosi Mine kifile uyiniꞌnero seekkitine qixxaabbine shiqishate woꞌnaalle. Soqqanshote qixxaabbine fulle, hattono ganyitine sabbakke. Ayyaanaamittete mixo lawishshaho Beeteelete soqqanshora woy Seenne Adhitinokki Roduuwira Qixxaawinohu Qullaawu Maxaafi Rosi Minira eate mixo fushshidhine tennera kaaꞌlannoꞌnere asse. Ayyaanaamittete jawaante ‘wedellimmate yannara dagganno yortowiinni xooqqinanni’ gede kaaꞌlitannoꞌne.—2 Xim. 2:22.
4. Ammaꞌninanniha ikka mageeshshi geeshsha hasiissannote?
4 Ammaꞌninannire Ikka: Umi xibbi diro kaaꞌlo hasiissannonsa Kiristaanira sagale beekkara worroonni roduuwi ‘ikkadda’ yaano ammaꞌninannire ikkitino daafira, hawaariyaate loosu gate baꞌꞌanno yite mittoreno dihuluullantino. Tini, hawaariyaate roore hasiisanno coyi aana illachishshanno gede kaaꞌlitinonsa. (Looso 6:1-4) Kiꞌneno songote giddo uyinanniꞌne looso baalanka wolqaꞌne assitu deerrinni seekkitine loosse. Markaawe loosanno gede Maganu uyinosi biddishsha seekke harunsino manchiha Nohi lawishsha harunse. (Kal. 6:22) Ammaꞌninannire ikka Yihowa kaffi asse laꞌꞌannote, hattono ayyaanaamittetenni gikki yitinoonnita leellishshannote.—1 Qor. 4:2; “Qajeelshunni Afiꞌnanni Horo” yitanno saaxine lai.
5. Wedellu roduuwi songote giddo halaafinate adhate sharrama hasiissannonsahu mayiraati?
5 Masaalotenni kulloonninte gede Yihowa manna minisira gamba assate loosi rahe loosamanno gede assanni no. (Isa. 60:22) Diru dirunkunni mereerimunni mitte miliyoone boci boco ikkanno manni cuuamanni no. Haaru manni lexxi kiiro songote giddo halaafinate adhe loosannohu ayyaanaamittetenni gikki yiino labballi hasiisanno. Konni daafira Yihowara loonseemmo loosi woꞌminonkehu albinni roore xaati. (1 Qor. 15:58) Konnira wedella roduuwa, songote giddo halaafinate adhate sharrantinanni heedhinoonni? Hatto ikkiro lowo geeshsha dancha ikkino looso halchitinanni heedhinoonni yaate!
[Qoola 2 noo misile]
Haaru manni lexxi kiiro songote giddo halaafinate adhe loosannohu ayyaanaamittetenni gikki yiino labballi hasiisanno
[Qoola 3 noo misile]
Qajeelshunni Afiꞌnanni Horo
Cimeeyye wedellu roduuwira looso uyite qajeelsitunsaro kuri wedellooti lowo horo afidhanno. Mitte yannara mittu woradu aliidi laꞌꞌaanchi songote gambooshshi gedensaanni madirakete ofolle mitto halashshaancho jawaachishanni no. Hakkiinnino woradu aliidi laꞌꞌaanchi mittu shiimu beetti mulensa uurre noota afiti, iso hasiꞌre uurrinoronna teꞌee xaꞌmi. Kuni wedellichu rodii kayinni gambooshshu goofanno wote ayewoteno madirake feyanno gede maddamboonnisita kulisi. Annisinna amasi haꞌrara kae nooha ikkirono, isi kayinni uyinoonnisi looso loosikkinni haꞌra dihasiꞌrino. Woradu aliidi laꞌꞌaanchi tenne afiti hagiidhe madiraketenni dirri. Isi togo yiino: “Hatte songo cimeeyye, songonsara noorira wedellu roduuwira songote looso uyite danchu garinni qajeelsate rosi noonsareeti. Konni daafira, ani hatte songo towaateemmo wote cimeeyye songote soqqamaancho ikke shoomamanno gede shiqishidhannoha mitto wedellicha rodoo dihoogganno.”