Masaalaanote Haꞌruma Hadhe—Mikkiyaasi
1. Mikkiyaasi mayyee hedinoha ikkara dandaanno? Sabbakino sokka mulla coye ikkite digattino yineemmohu mayiraati?
1 ‘Goofimarchu daannohu mamarootika?’ Masaalaanchu Mikkiyaasi Isiraeeletenna Yihudu gashshootira Yihowa baote firde faradannota duduwi yannara hatto yee hedikki digatino. Isi Yihowa togoo firde faradanno yee sabbakasi mulla coye ikkite digattino. Samaariyu baꞌꞌannota kulannohu Yihowa qaali, 740 K.A. Mikkiyaasi lubbote noo yannara woꞌmino. (Mik. 1:6, 7) Gedensaanni 607 K.A. Yerusaalamete katami diigame baino. (Mik. 3:12) Yannankera Yihowa firde woꞌmitannota agadhine heeꞌnoommori Mikkiyaasi lawishsha harunsa dandiineemmohu hiittoonniiti?
2. Yihowa barra cincatenni agadhine heeꞌnenni ma assa hasiissannonke? Tini maaho kaaꞌlitanno?
2 Cinca Hasiissanno: Mikkiyaasi togo yee borreessino: “Ani kayinni, Yihowa hexxotenni agadheemmo. Gatisaanchoꞌya Magano cincatenni agadheemmo.” (Mik. 7:7) Ikkirono, Mikkiyaasi goofimarchu daannota calla agadhe sammi yee diofollino. Isi Yihowa masaalo kulanni jaatanaawe heeꞌrino. Ninkeno Yihowa barra agadhine heeꞌnoommohura, “keeraanchu amanyooti noonkerenna Maganoho galloommore ikkinoommota leellishannoha qullaawa looso” loonsanni heeꞌra hasiissannonke. (2 Phe. 3:11, 12) Yihowa cincasi, mannu maaro eanno faro fantanno. (2 Phe. 3:9) Konni daafira, Qullaawu Maxaafi masaalaanote faale haꞌne cincaaleeyye ikkineemmo gede aannonke amaale harunsa hasiissannonke.—Yaq. 5:10.
3. Yihowa qullaawa ayyaanasi aannonke gede huucciꞌra hasiissannonkehu mayiraati?
3 Yihowa Wolqa Addaxxe: Mikkiyaasi uyinoonnisi loosi kabbaade ikkirono, konne looso loosate Yihowa aannosi wolqa addaxxino. (Mik. 3:8) Yihowa Qaali wolqa afiˈrate Iso addaxxineemmo gede seekke amaalannonkehu dimullaati. Isi daafurtinorira shaqqillunni wolqasi oye loososi loossanno gede assanno. (Far. 84:5, 7; Isa. 40:28-31) Ati heeshshokkinni tenne qamasse laootto? Yihowa wolqaataamo ayyaanasi oye kaaꞌlannohe gede ganyite huucciꞌratto?—Luq. 11:13.
4. Mikkiyaasi heeꞌrino heeshsho ninkera dancha lawishsha ikkitannonkehu hiittoonniiti?
4 Mikkiyaasi heeshshosi giddo Maganu fajjo balaxisiisino. Isi amanyootu maaeelle batidhino alame giddo heeꞌrirono ammaname heeꞌrino. Isinte gede, ninkerano ammananke fonqolannori barru baala tuncu yaannonke. Konni daafira “Maganinke Yihowa suꞌminni hegerenni hegere geeshsha haꞌrate” murciꞌne kaꞌno.—Mik. 4:5.