Soqqanshonke Isilanchimma Woyyeessiꞌra—Hasaawa Uurrisannore Coyiꞌranno Mannira Dawaro Qola

Hasiissannohu Mayiraati? Hanni mitte kalaqamu dano daggara noota afootto yine hendo. Mannu gatanno base xooqe fula hoogiro reye goofaraati. Tenne qachikki mannira marte kultanni heedheenna, kultanni nootto manchi coyidheno gudittokkinni mereero eꞌꞌe loosu batiꞌre noosita kulannohe. Hakkawote iso gatisate assitanni noottore hakkawontenni agurte haꞌrattokkiti egennantinote. Qooxeessinkera heeꞌrannohu lowo manni kulleemmonsa sokka heeshsho gatissannota buuxinokki daafira macciishsha giwanno. Qaensa marreemmo yannara, duuchu coyinni hedonsa bebbeehantinoha ikkara dandaanno. (Mat. 24:37-39) Woy gara ikkinokki duduwo macciishshitinohura calla taqaawwantankera dandiitanno. (Mat. 11:18, 19) Ninkeno busha guma laaltinote wole ammaꞌno gedeere ikkinoommohu gede assite laꞌannoha ikkara dandaanno. (2 Phe. 2:1, 2) Qaete anni umi qara hasatto noosikkiha ikkiro, ranke hexxo mudha dihasiissannonke.

Tenne Assa Dandiinanni Gara:

Minunni mine hadhine soqqamate fultinara albaanni, shiima yanna gaaꞌmitine mannu hasaawa uurrisate coyiꞌrara dandaanno coye hedde; hattono hattoo coyi kairo mayitine dawartinanniro assaabbe.
Qaete anni taqaawwama jammariro, shaqqillunni hasaawisate woꞌnaalle. Konne mancho naada, miteekkite tennera kaaꞌlitara dandiitanno. Lawishshaho qaete anni, “Ani wonanni Magano ammaꞌne noommoho” yiiro, togo yaa dandiitinanni: “Ninke wonanni ayyaanaamittete coyiꞌra hasatto noohunni ate gedee manninni xaada halchine heeꞌnoommo.” Mito wote qaete anni simmeete woy noo gara huwantoommota leellishannore coyiꞌranke, hasaawu uurrannota hoolate kaaꞌlitanno. Lawishshaho loosu batiꞌre noosita kulinkero, togo yaa dandiineemmo: “Hige loosu amade nooheta afoommona, tenne borro oyehe haꞌrammora yeeti.” Qaete anni hasaawa hasiꞌrannokkita kulinkero, xaꞌmo xaꞌmano danchate. Togo yaa dandiineemmo: “Hasiꞌrattokkihu Qullaawu Maxaafi yaannoreetinso ammaꞌnote coyeeti?”
Wodancha heedhoꞌne. Yihowa mannu isi yaannore macciishshanno gede giddeessannokkita deꞌinoonte. (Marro 30:19) Mittu mittunku manchi ayyaanaamittete halaafinatesi umisi duqqa hasiissannosi. (Gal. 6:5) Qaete anni yiinota calla yee giwannoha ikkiro, agure haꞌra woyyitanno. Konni garinni hedosi ayirrinseemmota leellishanke, albillitte wolu halashshaanchi farciꞌranno wotira doogo fantara dandiitanno.—1 Phe. 3:15.

Konni Aganira Togo Assate Woꞌnaalle:

Hasaawa uurrisannore coyiꞌranno manchinni xaaddiniro, isiwiinni baxxitinihu gedensaanni mayitine qoltinoommero roore woyyannoro soqqanshote miiliꞌne ledo hasaabbe.