Maganu Mangiste Egensiinsoommo Sane!
1. Mitto sane meddi yitanno yannara albaanni, Yihowa daga ma assitanno gede jawaachinshoonni?
1 “Kuneeti, Nugusu moohino! Kiꞌne isi farciꞌraasineeti. Hakko daafira, Nugusanna mangistesi mannaho egensiisse, egensiisse, egensiisse.” Roduu Raazerfordi mitto sane meddi yitanno yanna albaanni coyiꞌrinoti tini wodana kakkayissanno qaalla, hakkawaro nooti Yihowa daga Mangistesi sokka halaꞌlishshe dudubbanno gede jawaachishshinonsa. Ninkeno xaa geeshsha tenne assinanni heeꞌnoommo! Hundi Kiristaaninte gede, ninkeno Mangistenniha dancha duduwo “gordu woroonni noo kalaqami baalunkura” sabbankoommo. (Qol. 1:23) Sai sanira Maganu Mangiste egensiisate maa assinoommo? Tini Mangiste xintantunku 100ki diri woꞌmara kainote tenne yannarano egensiisa dandiineemmohu hiittoonniiti?
2. Borronke Maganu Mangiste egensiissanni keeshshitinohu hiittoonniiti?
2 Konni Albaanni Assinoommore: Maganu Mangistere duduwate lowo diro borro horoonsiꞌnanni keeshshinoommo. Qara metseetenke birxichi 1939nni hanafe, Yihowa Mangiste Egensiissannota Agarooshshu Shae yaannoha ikkanno gede assinoonni. Tini metseete duucha wote Maganu Mangiste mayimmanna albillitte ma assitannoro xawissanno. Baqqi Yiiyye! yinanni metseetenkeno mannu ooso hexxo Maganu Mangiste calla ikkitinota xawisse kultanno. Xaa yannara alamete aana tenne lamente metseetta geeshsha batinyu afiinni tirantanninna mannaho tuqqanni nooti wole metseete horonta dino!—Aju. 14:6.
3. Maganu Mangiste egensiisate horoonsiꞌnanni keeshshinoommoti mite mite doogga hiikkuriiti?
3 Yihowa daga Mangistesi egensiisate addi addi doogga horoonsidhanni keeshshitino. Umi qara raadoonete xaawanna mayikirafoone worroonni makeena horoonsiꞌne, hattono qaddaꞌnoonni nigiggire fanne farciꞌneemmo. Maganu Mangiste duduwanno manni kiiro boode ikkitinote hattee yannara, tini doogga dancha duduwo duuchawa iillishate kaaꞌlitinonke. (Far. 19:4) Muli yanna kawa, jw.org horoonsiꞌne Maganu Mangiste lowo miliyoone ikkanno mannira, loosonke hoolloonni gobba nafa gattukki dudumbanni heeꞌnoommo.
4. Maganu Mangiste egensiisate hiikkuri baxxitino doogga horoonsiꞌnanni heeꞌnoommo?
4 Yihowa daga Mangistesi sokka duduwate wole baxxitino dooggano horoonsidhino. Lawishshaho, 1990 mereedhi taaenni hananfe minunni mine haꞌne soqqammeemmotano agurranna paarkete, makeenna uurrinsanni basera, hattono daddalu bayicho farciꞌnanni keeshshinoommo. Muli yanna kawa, alamete deerrinni jajjabba katammara gudumaaleho baxxino garinni farciꞌrate qixxaawo assinoonni. Hakkiinni saeno, batinye songuwa borro worre doyissinanni gaarenna xarapheessa horoonsidhe killilensa giddo lowo manni haꞌranno dooggara farcidhanni no. Minunni mine haꞌre soqqama, sabbakate horoonsiꞌneemmota waanna doogo ikkitinota kayinni dideꞌneemmo.—Looso 20:20.
5. Haaru soqqanshote dirira maa assate faro afiꞌneemmo?
5 Konni Kaꞌa Assineemmore: Daannohu haaru soqqanshote diri Wocawaaru aganira hanafanno wote, batinyu roduuwi woꞌma yanna suwisaano ikkitanno. Kiꞌneno ikka dandiitinakka? Tenne dandaa hoogginiro, saꞌine saꞌine kaaꞌlaano suwisaano ikkitine affinakka? Suwisaancho ikka dandiitinirono hoogginirono, Yihowa Mangistesi egensiisate yitine umiꞌne xiqime agurtine woꞌma wolqaꞌnenni assitinannirira maassiꞌrannoꞌneta huluullantinoonte.—Mil. 3:10.
6. Birra 2014 baxxino agana assannohu maati?
6 Maganu Mangiste xintantinohu 100ki diri Birra 2014nni woꞌmanno. Konni garinni, hakko aganiti mannaho ellanniti Agarooshshu Shae Maganu Mangiste aana illachishshanno. Dandaami deerrinni, tenne metseete batinyu mannira elate sharrammo. Ee, mittu mittunku “Maganu Mangisteha dancha duduwo” maahoyye yee macciishshanno manni baalunkura ‘duduwanke’ agurroonke.—Looso 8:12.