Rosiisate Horoonsiꞌneemmo Uduunne
1 Yihowa farciꞌraasine angate ogimma afiꞌrino manchi gedeere ikkitinohu hiittoonniiti?
1 Angate ogimma afiꞌrino manni addi addi uduunne horoonsiꞌranno. Mito uduunne sae sae baxxino loosira horoonsiꞌranno, wole uduunne kayinni woꞌmanka wote horoonsiꞌranno. Worba ogeeyye lowo geeshsha hasiisannonsa uduunne ayewoteno anga dihoogganno; insa konne uduunne seekkite horoonsidhanno. Qullaawu Maxaafi baalunku Kiristaani soqqanshote qixxaawinohanna “saalfatannori nookki loosaasincho” ikkanno gede jawaachishanno. (2 Xim. 2:15) Sabbakate kaaꞌlannonkehu qaru uduunnichi maati? “Manna rosaano assate” horoonsiꞌneemmohu qaru uduunnichi—Maganu Qaaleeti. (Mat. 28:19, 20) Konni daafira “halaalaancho qaale garunni horoonsiꞌrate” fullankoommore ikka hasiissannonke. Qoleno, baalunku Kiristaani mannaho halaale rosiisate dancha gede horoonsiꞌra rosa hasiissannonsahu, duuchanka wote rosiisate horoonsiꞌneemmohu wolu uduunnino no.—Law. 22:29.
2. Rosiisate horoonsiꞌneemmohu qaru uduunni hiikkoyeti?
2 Rosiisate Horoonsiꞌneemmoha Qara Uduunne: Qullaawa Maxaafa agurranna wole hiikkoye uduunne horoonsiꞌra hasiissannonke? Qullaawu Maxaafi halaale rosiisate kaaꞌlannonkehu wolu uduunnichi Qullaawu Maxaafi Addinta Mayyee Rosiisanno? yaanno maxaafaati. Qullaawa Maxaafa xiinxallinseemmo mannira konne maxaafa xiinxallinse gundummohu gedensaanni, Qullaawu Maxaafiha xintu seera harunsate kaaꞌlannonsaha “Maganu Baxillinni Fultinikki Heedhe” yaanno maxaafa xiinxallinseemmo. Konni daafira konne lamenka maxaafa xiinxallisate seekkine horoonsiꞌra hasiissannonke. Qoleno mite mite biroshereno rosiisate horoonsiꞌra hasiissannonke. Qullaawu Maxaafi xiinxallo hanafisiisate kaaꞌlannonkehu qaru uduunni giddo mitte Maganuwiinni Dayinoha Dancha Duduwo! yitanno biroshereeti. Qoqqowinkera nabbawa dandaannokki manni heeꞌriro woy insa coyidhanno afiinni gari borro qixxeessinoonnikkiha woy horonta borro nookkiha ikkiro Maganu Yaannore Macciishshi woy Maganu Yaannore Macciishshite Hegerera Heeꞌri yitanno birosherubba horoonsiꞌra dandiineemmo. Qullaawa Maxaafa xiinxallinseemmo manni Yihowa dirijjitere afanno gede rosiisate horoonsiꞌneemmohu qaru uduunnichi Xaa Yannara Yihowa Fajjo Assitanni Noori Ayeooti? yitanno biroshereeti. Manna rosaano assate kaaꞌlitannonketi mite viidiyubba no; lawishshaho, Qullaawa Maxaafa Xiinxalla Hasiissannohu Mayiraati?, Mangistete Addaraashenkera Maa Maa Assinanni? nna Maganoho Suꞌmu Noosi? yitannote; kuri viidiyubba seekkine horoonsiꞌra hasiissannonke.
3. Albillitte fultannoti Maganu Mangiste Soqqanshonke maa assate kaaꞌlitannonke?
3 Albillitte fultannoti Maganu Mangiste Soqqanshonke rosiisate kaaꞌlitannonketa qara borruwa dancha gede assine horoonsiꞌrate kaaꞌlitannonke. Konne uduunne seekkine horoonsiꞌrate sharrammeemmoha ikkiro, “umikkinna rosiisatto rosi aana illachishi; togo assattoha ikkiro umokkino macciishshannohe mannano gatisatto” yitanno amaale harunsinanni heeꞌnoommo yaate.—1 Xim. 4:16.