Ammanansa Faale Hadhe
1. Ammanansa Faale Hadhe yaanno maxaafa xiinxalla kaaꞌlitannonkehu hiittoonniiti?
1 Ammanansa Faale Hadhe yaanno maxaafi Qullaawu Maxaafi giddo kulloonnita ammanaminohu 14 manni xagge kulanno. Konne maxaafa qixxeessinoonnihu kuri ammanantino mannoota seekkine egennate kaaꞌlannonke garinniiti; tini qolte insa heedhinorenna Yihowara soqqantanna ninkera iillannonke gedee qarri iillinonsare ikkitinota buuxate kaaꞌlitannonke. Qoleno kuni maxaafi, tenne xaggenni xaa yannara heeshshonkenni loosunni leellinsheemmo roso afiꞌneemmo gede kaaꞌlannonke.—Ibi. 6:12.
2. Ammanansa Faale Hadhe yaanno maxaafi amadore kuli.
2 Maxaafu Amado: Kuni maxaafi giddosi kulloonni manni mamaronna mama heeꞌrinoro bande afate kaaꞌlannonkeha yanna kulanno masimaranna kaartuwano afiꞌrinoho. Qoleno, mitte mittenti fooliishsho “Hiincate Kaaꞌlitanno Xaꞌmuwa” yaanno birxicho afidhino; kuni birxichi xagge hiincatenna ronsoommo coye loosunni leellishate kaaꞌlannonke. Kuni maxaafi mitte mittenti xagge xabbe leeltannonke gede assate seekkine xiinxalline qixxeessinoonnita batinye misillano afiꞌrinoho.
3. Tenne borro xiinxallineemmo wote horo afiꞌrate maa assa hasiissannonke?
3 Horo Afiꞌra Dandiinanni Gara: Konni maxaafira eote nooti Aliidi Bisi Soyino Sokka jawaachishshannote, togo yitanno: “Ikkinore wodanu illeꞌnenni laꞌe; adda ikke xawe leelloꞌne. Qullaawu Maxaafi giddo kulloonni mannira iillinonsari iillinoꞌnehu gede assitine hedde, qoleno insa laꞌinore laꞌꞌate woꞌnaalle. Insa iillinonsa qarra dandiite saꞌino garanna kiꞌne ikkitinoommero maa assitinanniro hedde.” Addaho wodanu illenni laꞌneemmo yaa ikkinokkire hendeemmo yaa ikkikkinni Qullaawu Maxaafi giddo noo xagge hendeemmo, hattono ninkeneeto insa bayicho worre hendeemmo yaate. Hatto assate yanna gaaꞌmine hiinca hasiissanno. (Neh. 8:8) Xiinxallo hananfannihu fooliishshote mereerinni ikkiro, massaganno rodii saꞌu lamalara ronsoonni roso 30 kayise 60 sokondi giddo qaagiissanno. Xiinxallo “Hiincate Kaaꞌlitanno Xaꞌmuwa” yaanno birxichiwa iillinikki fooliishshote mereeroho uurrinsanniha ikkiro, xiinxallote jeefora mitte woy lame xaꞌmo xaꞌma dandaanno.
4. Ammanansa Faale Hadhe yaanno maxaafa xiinxalla hasiissannonkehu mayiraati?
4 Heeꞌnoommohu ammananke hunannorinna hoshooshannori woꞌmino alame giddooti. Kuni maxaafinna isi xintaminohu Agarooshshu Shaera sae sae fulannohu “Ammanansa Faale Hadhe” yaanno birxichi, ammananke jawaachishshannote Yihowawiinni afiꞌnoommo eltooti. (Yaq. 1: 17) Konni Maxaafinni woꞌma horo afiꞌrate Songonnite Qullaawu Maxaafi Xiinxallo gambooshshe ganyine haꞌra hasiissannonke; hattono konne maxaafa xiinxallinanni yannara dandaami deerrinni hedonke coyiꞌrate qixxaambo!