Qaddaꞌnoonni Borruwa Horoonsiꞌnanni Gara
1. Attammoonni borruwano agurranna wole hiittee qixxaawo horoonsiꞌra dandiineemmo?
1 Lowo manni hagiirsiissannotanna gara ikkinoha halaalu qaale jw.org aaninni nabbawa baxanno. (Mek. 12:10) Ikkollana, qaddaꞌnoonni borruwa horoonsidhine egentinoonni? Tini webisayitenke aaninni lowore macciishshate kaaꞌlitanno. Qaddaꞌnoonni borruwanni horo afiꞌra dandiineemmohu hiittoonniiti?
2. Qaddaꞌnoonni borruwa gillete xiinxallora woy maatete magansiꞌranke yannara horoonsiꞌra dandiineemmohu hiittoonniiti?
2 Gillete Woy Maatete Xiinxallora: Qaddaꞌnoonniha Qullaawa Maxaafa, metseetta woy wole borro doogo haꞌneemmo wote woy qaete heeꞌne addi addi looso loosiꞌnanni heeꞌnenni macciishsha yannanke danchu garinni horoonsiꞌrate kaaꞌlitannonke. (Efe. 5:15, 16) Maatete Magansiꞌranke duuchu garita ikkitanno gede assiꞌrate qaddaꞌnoonni borrono macciishshanna macciishshineemmo wote borrono adhine laꞌnanni harunsa dandiineemmo. Gillete xiinxallo assiꞌneemmo yannara qaddaꞌnoonni borro macciishsha, nabbawate dandoonke woyyeessiꞌra hasiꞌneemmoha woy wole afoo ronsanni heeꞌnoommoha ikkiro lowo geeshsha kaaꞌlitannonke.
3. Soqqanshonke qoqqowira qaddaꞌnoonni borronni ayi hoꞌro afiꞌra dandaanno?
3 Soqqameemmo Wote: Soqqanshonke qoqqowira noohu nabbawate yanna noonsakkihu gede asse hedanno manni qaddaꞌnoonni borro macciishsha hasiꞌrannoha ikkara dandaanno. Woy soqqammeemmo wote wole afoo coyiꞌranno manninni xaandeemmoha ikkanno; kuni manni “uminsa afiinni” coyiꞌnanna macciishshiro Maganu Mangiste sokka adhara dandaanno. (Looso 2:6-8) Mitu mitu qooxeessira mannu macciishsha budu gede asse laꞌꞌanno. Lawishshaho, Mongi yinanni budira mannu albi xaggensa aja ilamara kulannohu odeesseeti; qoleno macciishshino coye dancha gede qaagate dandoo noonsa. Afiriku mannihu batinyu budirano mannu xagge odeessinanna macciishsha baxanno.
4. Qoqqowinkera noo manna kaaꞌlate ninkeneeto mayine xaꞌma hasiissannonke?
4 Soqqanshoꞌne qoqqowira mite qaddaꞌnoonni borro qaete annira umisi afiinni fantinisiro baxannoha lawannoꞌne? Qaddaꞌnoonni borro ii-meelletenni sonkisiro horoonsiꞌra ikka? Qaddaꞌnoonni borro CD-ra qolle galchine hasatto noosi manchira borronte ledo aa dandiineemmo? Qaddaꞌnoonni maxaafa, biroshere, metseete woy tiraakte mannaho uyinummoro elloommo borro gede assine kiira dandiineemmo. Qaddaꞌnoonni borro qixxeessinoonnihu uminkeranna Maganu Mangisteha halaalu guma wixate horoonsiꞌnammoraati.—1 Qor. 3:6.