Maganoho Hajajantannori Afidhanno Atoote

Masaalaanchu Muse, Maganu hajajo agadhineemmoha ikkiro, Isi aanno atoote afiꞌneemmota rosiisino. (Marro 10:13; 11:27) Maganoho hajajammeemmohu qorichishannonke yine waajjine diꞌꞌikkino. Maganunniti danchummasi iso banxeemmosinna hajajammeemmosi gede, hattono iso dadillisannore assa qorophineemmo gede assitannonke. “Magano baxate yaa hajajosi agadhate.”—1 Yohaannisi 5:3.

Maganoho hajajama atootesi afiꞌneemmo gede assitannonkehu hiittoonniiti? Hanni lame doogga laꞌno.

1. MAGANOHO HAJAJAMMEEMMOHA IKKIRO HAYYOOTA IKKINEEMMO

“Woyyannoꞌnere baala rosiiseemmoꞌnehunna, hadhinanni doogo kuleemmoꞌnehu Maganiꞌne Kaaliiqi aneeti.”—ISAYAASI 48:17.

Kalaqaanchinke, Maganu Yihowa ninke afinonke; hattono hasiisannonke biddishsha aannonke. Isi biddishshi hayyoota assankera hasiꞌneemmoha ikkiro, isi maa assinammora hasiꞌrannoro Qullaawa Borronni rosanna ronsoommo rosi garinni heeꞌra hasiissannonke.

2. HAJAJAMA HAGIIRRAAMMA IKKINEEMMO GEDE ASSITANNONKE

“Maassantinori Maganu qaale macciishshite hajajantannoreeti”—LUQAASI 11:28.

Xaa yannara, Maganu Qaalira hajajamannohu lowo miliyoone ikkanno manni addu hagiirre afiꞌre heeꞌranni no. Hanni Ispeenete gobbara heeꞌrannohu hanqo hooꞌlannokki manchi lawishsha laꞌno; kuni manchi wole agurina minaamasira nafa kaajjadoho. Isi mitto barra, masaalaanchu Muse borreessinota Yaiqoobi beetti Yooseefi joongilli daafira kultanno xagge nabbawi. Yooseefi borojjimmate hirroonnisi, hattono beebba usurroonnisi; ikkirono isi jooga, keere baxannohanna gatona yaannoha ikke heeꞌrino. (Kalaqama fooliishsho 37-45) Aleenni kullihu Ispeenete heeꞌranno manchi togo yiino: “Yooseefi xagge hedaꞌya jooga, shaqqadonna umoꞌya qeeꞌleemmoha ikkate sharrameemmo gede assitinoe. Hakko daafira, xa hagiirru noo heeshsho heeꞌranni noommo.”

Maganu Qaali, wolootu ledo ma garinni heeꞌra hasiissannonkero kulannoha wole biddishshano amadino. Tenne hajore aananno birxichira lende ronseemmo.