Suwisaano Ikka

Ayyaanaamittete mixo fushshiꞌnummoro wolqanke hayyotenni horoonsiꞌneemmo. (1Qo 9:26) Ayyaanaamittete mixo tini busha alame baꞌara albaanni noo yanna danchu garinni horoonsiꞌneemmo gede kaaꞌlitannonke. (Ef 5:15, 16) Maatete magansiꞌra yannara haaru soqqanshote dirira fushshidhinanni mixo daafira hasaawa dandiitinanni. Kiꞌne kaaꞌlate, tenne xiinxallote maxaafichora fushshiꞌra dandiitinannita mite mixo kulloonni; tenne mixo huuccatto assidhine heda dandiitinanni.—Ya 1:5.

Lawishshaho, ajayi ajeenna maateꞌne giddonni mittu woꞌma yanna suwisaancho ikkanno gede kaaꞌla dandiitinanni? Soqqanshote saate wonshiꞌra dandiitinannironna teꞌee huluullantiniro, suwisaano ikkite soqqantanni noore kiꞌnete gedee heeshsho heedhannore mito roduuwa amaaꞌle. (La 15:22) Maatete magansiꞌra assidhinanni yannara mitto suwisaancho koyissine qaalu xaꞌmo xaꞌma dandiitinanni. Hakkiinni assitinara heddinoonnire borreessitine wodhe. Alba suwisaano ikkitine soqqantinoonniha ikkiro, xa heedhinoonni gari suwisaano ikkitine soqqamate injaannoꞌneronna teꞌee hedde.

Maateꞌne giddonni mitu mitto agana woy hakkii saꞌino yanna kaaꞌlaano suwisaano ikkite soqqama dandiitanno? Dhuku anje nooꞌneha ikkiro barru baala shiima shiima saate soqqantinanni kaaꞌlaano suwisaano ikka dandiitinanni. Barra woꞌma loossinayi daafira woy roso rossinayi daafira lamalate mereero soqqansho fula dandiitinannikkiha ikkiro, ayyaanu heeꞌrannoha woy onte Qidaamenna Sambati noo agana doodha dandiitinanni. Kaaꞌlaancho suwisaancho ikkate heddinoonni yanna borreessitine amaxxe.—La 21:5.

WORBUULLE IKKE . . . SUWISAANO YITANNO VIIDIYO LAꞌINIHU GEDENSAANNI, AANTE NOO XAꞌMORA DAWARO QOLATE WOꞌNAALLE:

• Rodoo Aamandi woꞌnaalshi, Yihowa uminsa horo agurte suwisaano ikkitannore baxillunni towaatannonsata leellishannohu hiittoonniiti?