‘Goofimarchu Geeshsha Dodde’

1. Ninke baalunku maa assa hasiissannonke?

SHOTA ikkitinokkita afootto qolchansho hakko iso dhiwamoottoha woy daafuroottoha ikkiro qolchama hasiꞌrattoni? Hasiꞌra hoogattora dandaatto. Soqqamaasinchu Phaawuloosi kayinni addu Kiristaani baalunku dodanni noota coyiꞌrino. (Ibi. 12:1) Baalunku yaano aju akkali dhuku noosihuno ikko noosikkihu Yihowa aanno baꞌraaꞌra adha hasiꞌriro jeefote geeshsha cince doda hasiissannosi.—Mat. 24:13.

2. Layinki Ximootewoosi 4:7, 8 kultanno garinni Phaawuloosi afoo wonshe coyiꞌra dandiinohu mayiraati?

² Phaawuloosi ‘qolchanshosira goofimarchu geeshsha dodino’ daafira afoo wonshe coyiꞌra dandiino. (2 Ximootewoosi 4:7, 8 nabbawi.) Ikkina Phaawuloosi coyiꞌranni noohu hiitte qolchansho daafiraati?

PHAAWULOOSI COYIꞌRINO QOLCHANSHO HIITTOOTE?

3. Phaawuloosi coyiꞌrino qolchansho hiittoote?

³ Phaawuloosi mito woyite lowo geeshsha hasiisanno roso lawishshunni rosiisate hundi waro Giriikete gobbara godoꞌlinanni ispoorte horoonsiꞌrino. (1 Qor. 9:25-27; 2 Xim. 2:5) Isi duucha hige Kiristaanu heeꞌranno heeshsho lekkate qolchammanni qolchansho ledo heewisiisino. (1 Qor. 9:24; Gal. 2:2; Fil. 2:16) Mittu manchi heeshshosi Yihowara sayise oye cuuamanno woyite ‘qolchama’ hanafanno. (1 Phe. 3:21) Isi jeefote geeshsha dodiro Yihowa hegere heeshsho baꞌraaꞌra aannosi.—Mat. 25:31-34, 46; 2 Xim. 4:8.

4. Konni birxichira maa ronseemmo?

⁴ Seeda qolchansho qolchantannorenna Kiristaanu heeshsho mitto assannonsari maati? Mitto assannonsari duuchuri no. Hanni kuri giddo sase laꞌno. Umihunni, gara ikkitino doogora doda hasiissannonke. Layinkihunni, jeefote marre iillineemmowa illachisha hasiissannonke. Sayikkihunni, dondeemmo woyite iillannonke qarra cinca hasiissannonke.

GARA IKKITINO DOOGORA DODDE

5. Hiitte doogora doda hasiissannonke? Mayira?

⁵ Qolchantannori baꞌraaꞌra adhitannohu qolchanshote heewo qixxeessitinori dodde yitinonsa widoonni higge dodduro callaati. Ninkeno hegere heeshsho baꞌraaꞌra adha hasiꞌnummoro, Kiristaanu doogora doda yaano Kiristaanu heeꞌranno heeshsho heeꞌra hasiissannonke. (Soq. 20:24; 1 Phe. 2:21) Sheexaanunna isi lawishsha harunsitannori kayinni Kiristaanu doogora doda agurre insa ledo dondammora yaano “aalimalete heeshsho” heeꞌnammora hasidhanno. (1 Phe. 4:4) Insa ninke dondanni heeꞌnoommota heeshshote doogo arrassitanno; hattono insa heedhanno heeshsho woyyitinotenna wolapho afiꞌnannite yite coyidhanno. Kayinni tini kaphoho.—2 Phe. 2:19.

6. Birayani lawishshinni maa ronseemmo?

⁶ Sheexaanu faale harunsite doddannori mulenni doodhitino doogo wolapho afidhanno gede assitannonsata ikkitukkinni borojje assitannonsata huwattanno. (Rom. 6:16) Hanni Birayani yinanni rodii lawishsha laꞌno. Maatesi isi Kiristaanu heeꞌranno heeshsho heeꞌranno gede rosiissinosi. Isi kayinni wedellichu noo yannara tini heeshsho hagiirraamo assitannosita huluullamino. Konnira, Birayani Sheexaanu biddishshi garinni heedhannori ledo doda doodhino. Isi togo yiino: “Wolapho afiꞌreemmo yee doodhoommo heeshsho addi addi araado xaxxabbe amaddannoe gede assitannoeta dihuwatoommo. Sunu sununni jingilli assitanno xagga adhanna ago quwa sayise aga hattono amanyoote baꞌino heeshsho heeꞌra hanafummo. Gale hosanni lowo geeshsha gawajjitannote jingilli assitanno xaggara borojjicho ikkummo. . . . Hasattoꞌya wonshiꞌrate jingilli assitanno xagga daddala hanafummo.” Gedensoonni Birayani Yihowa biddishshi garinni heeꞌrate doodhino. Hattono busha doogosi agure 2001 cuuamino. Xa isi Kiristaanu heeꞌranno heeshsho heeꞌranni noo daafira addu hagiirre afiꞌrino.b

7. Maatewoosi 7:13, 14te hiittenne lame doogo kulloonni?

⁷ Gara ikkitino doogora doda lowo geeshsha hasiissannote. Sheexaanu ninke baalunku ‘heeshshote widira massitannote’ ruukkashsho doogora doda agurre batinyu alamete manni dodannote halaꞌlado doogora dondammora hasiꞌranno. Tini doogo lowo manni dodannotenna injiitannote. Kayinni “baote widira” massitannote. (Maatewoosi 7:13, 14 nabbawi.) Gara ikkitino doogora dodatenna hatte doogonni fullummokkinni heeꞌrate Yihowa addaxxanna isi yaannonkere macciishsha hasiissannonke.

DOOGO ILLACHISHSHE HATTONO WOLOOTAHO GUFICHO IKKITINANNIKKI GEDE QOROPHE

8. Mittu qolchamanno manchi gufiꞌre uwiro maa assanno?

⁸ Seeda doogo qolchantannori gufidhannokki gede albansaanni noo doogo illachishshanno. Ikkirono, ledonsa dodanni noohu hedeweelcho ganeenna ubbara woy bobboodda kartansara dandiitanno. Kayinni, insa ubburo nafa rakke kaꞌe doddanno. Insa gufidhanno gede assinonsare ikkikkinni qeelte adhitanno baꞌraaꞌra illachishshanno.

9. Gufiꞌne umbummoro maa assa hasiissannonke?

⁹ Coyiꞌneemmorinni woy assineemmorinni soꞌro loonseemmo daafira dondanni heeꞌne duucha woyite gufiꞌnammora dandiineemmo. Woy ledonke doddannori loossino soꞌro gawajjitankera dandiitanno. Togoori nooreentilla. Korkaatuno, ninke baalunku guuntete xeꞌne noonkereeti; hattono dondanni heeꞌnoommohu heeshshoniwa massitannote ruukkashsho doogoraati. Hakko daafira, mimmitinke ledo “kiphi kiphi” yinammora dandiineemmo. Phaawuloosi “kuꞌu koꞌoye koffi” assiꞌneemmo woyiti noota coyiꞌrino. (Qol. 3:13) Ikkirono, gufiꞌneemmo gede assinonkere illachisha agurre afiꞌneemmo baꞌraaꞌra illachinsho. Gufiꞌne umbummoro nafa kaꞌne dondo. Gufisinoke manchira hanqine, umboommowiinni kaꞌne doda gimbummoro baꞌraaꞌra adha didandiineemmo. Qoleno, hegere heeshsho afiꞌrate ruukkashsho doogora doddanni noorira guficho ikkinammora nafa dandiineemmo.

10. Wolootaho guficho ikkineemmokki gede qoropha dandiineemmohu hiittoonniiti?

¹⁰ Ledonke doddannore gufinseemmokki gede qorophineemmoti wole doogo ani yoommoti calla ikkito yaantenni dandaamannoha ikkiro insa doorsha ayirrisate. (Rom. 14:13, 19-21; 1 Qor. 8:9, 13) Hatto assinummoro addu qolchansho qolchantannoriwiinni baxxinoommore ikkinoommota leellinsheemmo. Insa heewisantannohu mimmitinsa ledooti; hattono mittu mittunku baꞌraaꞌra umisira calla adhate sharramanno. Insa roorsite uminsa daafira heddanno. Hakko daafira insa qolchate yite ledonsa doddannore xiibbara nafa dandiitanno. Ninke kayinni mimmitinke ledo diheewisammeemmo. (Gal. 5:26; 6:4) Mixonke dandaami deerrinni lowo manni ninke ledo jeefote geeshsha dode baꞌraaꞌra adhanno gede kaaꞌlate. Hakko daafira Phaawuloosi qullaawu ayyaaninni “mittu mittunku woleho woyyannore hedo ikkinnina, umisira woyyannore calla laoonke” yee amaalino amaale harunsate woꞌnaalleemmo.—Fil. 2:4.

11. Qolchamaano maa heddanno? Mayira?

¹¹ Qolchamaano albansaanni noo doogo calla ikkikkinni marte iillitannowano illachishshanno. Insara marte iillitannowi illete leellannonsakkiha ikkirono, iillite baꞌraaꞌra adhitannota heddanno. Adhitanno baꞌraaꞌra hedansa cincite doddanno gede kaaꞌlitannonsa.

12. Yihowa maa aankera qaale eino?

¹² Yihowa heeshshote doogora dodanni noo mannisira jeefote geeshsha dodiro mitoho iima mitoho gannate ikkitanno uullara hegere heeshsho baraasansara qaale eino. Qullaawu Maxaafi albillitte afiꞌneemmo baꞌraarshi giddo gamare kulannonke; hakko daafira hatte yannara hagiirru woꞌmino heeshsho heeꞌneemmota heda dandiineemmo. Hexxonke seekkine illachinshummoro aye coyino gufise gatisannonketa hooꞌlinammora dandiineemmo.

QARRU HEEꞌRIRONO DODA AGURTINOONTE

13. Qolchamaano afidhinokkire ninke maa afiꞌnoommo?

¹³ Hundi waro Giriikete gobbara qolchansho qolchantannori mito woyite daafurtaranna xissansara dandaanno. Insa afidhino qajeelshinna jawaante qeeltanno gede kaaꞌlitannonsa. Ninkeno ma garinni doda hasiissannonkero qajeellanni heeꞌnoommo. Qoleno, ninke kaaꞌlannonkeri wolurino no. Wolqaataamu Magani jawaante aannonke. Yihowa addaxxineemmoha ikkiro isi qajeelsankera calla ikkikkinni jawaante aankera qaale eino.—1 Phe. 5:10.

14. Layinki Qorontoosi 12:9, 10te noo hedo iillannonke qarra dandee saꞌꞌate kaaꞌlitannonkehu hiittoonniiti?

¹⁴ Phaawuloosira batinyu qarri iillinosi. Iso xonnoonnistanna daraminotano agurranna dhuka baino woyiti no; hattono “mannimmasi utu gede” qasannori waadinosi. (2 Qor. 12:7) Phaawuloosi iillinosi qarri hexxo mudhanno gede assasira diwodhino; hatteentenni Yihowa addaxxate faro faninosihu gede asse laino. (2 Qorontoosi 12:9, 10 nabbawi.) Phaawuloosira togoo lao noosi daafira, Yihowa iillinosiha baalanka qarra dandee saꞌꞌanno gede kaaꞌlinosi.

15. Phaawuloosi lawishsha harunsinummoro, maa huwanteemmo?

¹⁵ Ninkeno ammanankenni kainohunni mannu mishankera woy darammeemmo gede assankera dandaanno. Qoleno, dhibbu waadannonkeha ikkara dandaanno. Ikkirono, Phaawuloosi lawishsha harunsinummoro iillinonke qarra Yihowa kaaꞌlannonketa anfeemmo faro gede assine laꞌneemmo.

16. Dhuku anje amadduherono maa assa dandaatto?

¹⁶ Dhibbu minira qolinohe? Woy milli yaattohu bisu xeꞌne noonsari ofoltanno gaarenniiti? Dhuku ajinohe woy ille dunkitinohe? Hatto ikkiro, wedellunna ordu fayyimma noonsari ledo doda dandaatto? Ee dandaatto! Batinyu akkallenna dhuku anje amaddinonsari heeshshote doogora doddanni no. Insa hatto assa dandiitinohu uminsa wolqanni diꞌꞌikkino. Insa Kiristaanu gambooshshe viidiyotenni woy silketenni harunsite Yihowa aanno wolqa afiꞌrate sharrantanno. Qoleno, akimete, towaatannonsa manniranna fiixinsara farcidhe manna rosaano assate looso loossanno.

17. Yihowa dhuku anje amaddinonsare ma garinni laꞌꞌanno?

¹⁷ Dhuku anje amaddinohe daafira heeshshote doogora doda didandeemmo yite hexxo mudhitooti. Yihowa ammanakkinna daafurokki hawannokki daafira lowo geeshsha baxannohe. Xa albinni roore Yihowa kaaꞌlo hasiissannohe; isino tuge diagurannohe. (Far. 9:10) Hatteentenni isi jaalakki ikkannohe. Mitte dhibbu waadannose rodoo togo yitino: “Dhibbu buuto waadannoe daafira albi geeshsha Yihowara soqqama didandeemma. Asseemmari shiimuri, Yihowa hagiirsiisannota afoomma daafira tashshi yaannoe.” Hexxo mudhitiniro callootaꞌne ikkitinoonnikkita qaagge. Phaawuloosi lawishsha harunse; hattono isi “wolqa afiꞌreemmohu wolqiweeleemmo woyite ikkinohura, . . . tashshi yaannoe” yee coyiꞌrinoha jawaachishanno qaale deꞌinoonte.—2 Qor. 12:10.

18. Mitoho hiittoohu baxxino qarri iillannonsa?

¹⁸ Heeshshote doogora doddannorira mitoho wolu qarrino iillannonsa. Insa wolu manni huwatannokki qarri waadannonsa. Lawishshaho mito roduuwa yaaddo woy surrete dhibbi qarrisannonsa. Kuri ammanantinote Yihowa soqqamaanora iillannonsa qarri baxxinoho yineemmohu mayiraati? Lawishshaho mittu manchi anga hiiqqamiro woy milli yaannohu bisu xeꞌne noonsa manni ofollanno gaarenni ikkiro, iillinosi qarra mannu afaranna kaaꞌlasira dandaanno. Yaaddo woy surrete dhibbi waadannonsare kayinni xissonsa wolu manni afa hoogara dandaanno. Insara anga woy lekka hiiqqamino manchi gede xissannonsaha ikkirono, mannu taalo dimararannonsa.

19. Memfeboste lawishshinni maa ronseemmo?

¹⁹ Dhuku anje amaddinohehanna wolootaho qarriꞌya dileellinonsa yite hedattoha ikkiro Memfeboste lawishshi kaaꞌlahera dandaanno. (2 Sam. 4:4) Isira bisu xeꞌne noosi hattono Moote Daawiti miicinosi. Memfebostera qarru iillinosihu loosino soꞌronni diꞌꞌikkino. Ikkirono, isi tennera dicaaccaawino; hatteentenni noosiha dancha coye naadino. Memfeboste Daawiti alba shaqqillunni assinosirira galatino. (2 Sam. 9:6-10) Hakko daafira Daawiti miicisi woyite isi coye heeshshi gotti asse laino. Memfeboste Daawiti assinosirira dicaaccawino. Qoleno, isi Daawiti assinosirira Yihowa busha diassino. Hatteentenni Memfeboste Yihowa buurino moote kaaꞌlate assa dandaannore hedino. (2 Sam. 16:1-4; 19:24-30) Yihowa Memfebostehu kaajju lawishshi kaaꞌlannonketa afino daafira Qaalisi giddo borreessinanni gede assino.—Rom. 15:4.

20. Mito roduuwa yaaddo waaddannonsahu hiittoonniiti? Ikkirono maa dihuluullantanno?

²⁰ Mito roduuwa buutote yaaddo waaddannonsa daafira mannunniwa fula waajjitara dandiitanno. Insa lowo manni gamba yaannowa mara baxxannokkiha ikkirono, songote gambooshshe, woradunna qoqqowu gambooshshe hadhanno. Affinokki manna hasaawisa waajjitannoha ikkirono, soqqansho fulte manna hasaawissanno. Aterano togoo qarri nooeha ikkiro callakki ikkoottokkita deꞌooti. Duuchu roduuwi togoo qarra dandiite no. Woꞌma lubbokkinni assattori Yihowa hagiirsiisannota qaagi. Xaa geeshsha cincite noottohu Yihowa kaaꞌlanninna jawaachishshanni noohe daafiraati.c (Fil. 4:6, 7; 1 Phe. 5:7) Dhuku anje woy yaaddo waaddanni heedheennahe cincite soqqantanni noottoha ikkiro Yihowa hagiirsiissanni noottota huluullantooti.

21. Yihowa kaaꞌlonni ninke baalunku maa assa dandiineemmo?

²¹ Addu qolchanshonna Phaawuloosi coyiꞌri qolchansho mereero badooshshu no. Hundi waro lekkate qolchansho qolchantannori giddo baꞌraaꞌra adhannohu mitto mancho callaho. Kiristaanu doogora ammaname dodanno manni baalunku kayinni hegere heeshsho baꞌraaꞌra adhanno. (Yoh. 3:16) Addu qolchansho qolchantannori jawaatoota ikka hoogguro qeela didandiitanno. Ninke giddo duuchu dhuku anje noonsare ikkiturono cincite doddanni no. (2 Qor. 4:16) Yihowa kaaꞌlonni ninke baalunku jeefote geeshsha doda dandiineemmo!