Goofimarchu Daannohu Mamarooti? Yesuusi Yiinore
Sai birxichira, Qullaawu Maxaafi alamete goofimarcho yaannohu baatto woy mannu sirchi baꞌꞌannota kulate ikkinokkita ronsoommo. Hatteentenni, alamete goofimarcho yaa tini busha alamenna isera halantannori baalu baꞌanno yaate. Ikkina Qullaawu Maxaafi tini busha alame baꞌanno yanna kulanno?
YESUUSI GOOFIMARCHU DAAFIRA COYIꞌRINOHA LAME COYE WODANCHI:
“Barranna saate diaffinoonnina jaattine agadhe!”—MAATEWOOSI 25:13.
“[Hirqinoonni] yanna mamooteetiro diaffinoonnina feeffattine agadhe.”—MAARQOOSI 13:33.
Konni daafira, uullate aana tini alame baꞌanno yanna afinohu mittuno dino. Ikkollana, Maganu goofimarchu daanno ‘barranna saate’ hirqino woy murino. (Maatewoosi 24:36) Hatto yaa kayinni goofimarchu daara gambisinota anfanni gari horo dino yaateni? Deeꞌni. Yesuusi rosaanosi goofimarchu gambisinota leellishshanno ikkito wodanchitanno gede kulinonsa.
MALAATE
Yesuusi kulinoti addi addi ikkito ‘diru goofimarchira malaateho.’ Yesuusi togo yiino: “Gosa gosate aana, gashshootu gashshootu aana ola kayisanno. Addi addi darga hudenna baattote huxano ikkanno.” (Maatewoosi 24:3, 7) Qoleno Yesuusi, “dhibbu” woy taraabbe guddanno fayya daggannota coyiꞌrino. (Luqaasi 21:11) Yesuusi balaxe masaalino masaalo woꞌmitanna laootto?
Yannankera manna olu, hude, baattote huxanonna xoqolanno dhibbi baasa shetisino. Lawishshaho, 2004nni Hindete Wuqiyanoose giddo baatto baasa huxidheenna kaꞌino hombobalatte 225,000 manna shitino. Qoleno sasu diri giddo Koroonu fayya alamete doyichora 6.9 miliyoone ikkanno manna guddino. Yesuusi togoo ikkito alamete goofimarchi gambisinota leellishanno malaate ikkitinota coyiꞌrino.
“GOOFIMARCHU YANNA”
Qullaawu Maxaafi, alamete goofimarchi daara albaanni noo yanna, “goofimarchu yanna” yaanno. (2 Pheexiroosi 3:3, 4) Layinki Ximootewoosi 3:1-5, goofimarchu yannara mannu amanyooti anganni fulannota kultanno. (“Alamete Goofimarchi Daara Albaanni” yitanno saaxine lai.) Yannankera mannu umosi baxannoha, hafuuraamo, kaajjadonna baxillu nookkiha ikkinota wodanchootto? Tinino alamete goofimarchi lowo geeshsha gambise dayino yannara heeꞌnoommota leellishshanno.
Ikkina goofimarchu yanna mageeshsha keeshshitanno? Qullaawu Maxaafi, “shiima yanna” calla keeshshitannota kulanno. Hakkiinni, Maganu “baatto huntannore” hunanno.—Yohaannisi Ajuuja 11:15-18; 12:12.
BAATTO GANNATE IKKITANNO YANNA MULEETI!
Maganu tenne busha alame hunanno barranna saate balaxe mure kaino. (Maatewoosi 24:36) Ikkirono, Maganu ‘ayino baꞌꞌara dihasiꞌranno’; tini hagiirsiissannote. (2 Pheexiroosi 3:9) Maganu mannu ooso fajjosi rosse doogonsa biddi assidhanno gede faro fanino. Mayira? Korkaatuno, tenne alame goofimarcho gante saꞌne isi abbannote haaro alamera gannate ikkitino baattora heeꞌnammora hasiꞌranno.
Maganu, mannu Mangistesi giddo haaro alamera heeꞌrate maa assa hasiissannonsaro rosanno gede alamete doyichora sabbakate looso loonsanni gede assanni no. Yesuusi Maganu Mangisteha dancha duduwo, “gobba baalate” sabbankannita coyiꞌrino. (Maatewoosi 24:14) Alamete doyichora noori Yihowa Farciꞌraasine, Qullaawu Maxaafi giddo noo hexxo mannaho kultanninna sabbakkanni lowo biliyoone saate soqqantino. Yesuusi goofimarchu daara albaanni konne sabbakate looso uulla woꞌmate aana loonsannita coyiꞌrino.
Mannu gashshootira yanna gooffe daggino. Ikkollana, tini alame baꞌanno woyite gatte saꞌe Maganu qaale eino garinni Gannate ikkitanno uullara heeꞌra dandaatto. Aane noo birxichira hattee haaro alamera heeꞌrate maa assa hasiissannohero ronseemmo.
Yesuusi ‘goofimarchu barri’ daafira coyiꞌrino masaalo dancha yanna dagganno yine hexxineemmo gede assitannonke