Muli yannara daggannote woyyitino alamera heeꞌrate xaanni qixxaawa dandaatto

Muli Yannara Daggannota Haaro Alame!

Maganu baatto kalaqinohu hajajamanno manni ise aana hegerera heeꞌranno gedeeti. (Faarso 37:29) Isi umi minaannanna minaama Addaaminna Heewani biifado Edeni Gannatera worino; qoleno insanna oosonsa baatto loosse shaqqishshanno gedenna towaattanno gede kulinonsa.—Kalaqama 1:28; 2:15.

Xa noo alame, hunda Maganu hedino Gannatewiinni lowo geeshsha baxxitinote. Ikkollana, Maganu hedinore diagurino. Isi hunda hedino garinni baatto gannate assannohu hiittoonniiti? Saꞌu birxichuwara ronsummonte gede, Maganu baatto dihunanno. Hatteentenni ammanamino manni ise aana heeꞌranno gede assanno. Maganu hedinore wonshanno woyite, uullate aana heeshsho hiittoota ikkitanno?

Uulla woꞌma gashshannoha mitto gashshoote

Muli yannara, Maganunnihu gordu gashshooti mannu ooso baala gashshanno woyite, baatto mannu baalunku sumuu yee hagiidhanni heeꞌranno bayicho ikkitanno; qoleno mannu hakkawoyite danchanna hagiirsiisanno looso loosanno. Maganu uulla woꞌma gashshanno gede Yesuusi Kiristoosi shoomino. Xaa yannara batinye gashshaano manninsa daafira diheddanno; Yesuusi kayinni gashshino mannira woyyannore assanno. Isi baxillunni gashshanno; qoleno isi shaqqadoho, maarannohonna taashshanno Mooteeti.—Isayaasi 11:4.

Alame woꞌmate noo manni mitto ikkanno

Gannatete noo manni jaallansa ledo sagale itanni no.

Baattote aana heeꞌrannohu haaru dagoomi sirchunninna gaꞌretenni dibebbeehamanno. Mannu sirchi baalunku mitto manna ikkanno. (Yohaannisi Ajuuja 7:9, 10) Baattote aana heeꞌranno manni baalunku Maganonna manna baxannoha ikkanno; qoleno mannu baalunku Maganu hunda hedino garinni qaensa ikkitino baatto towaatate mitteenni sumuu yee loosanno.—Faarso 115:16.

Mannu kalaqamu ledo sumuu yee heeꞌranno

Maganu Mangiste baatto gashshitanno woyite, Kalaqaanchu kalaqamu dano heedhannokki gede assanno. (Faarso 24:1, 2) Yesuusi uullate aana noo waro, waajjishshanno hombobalatte sammi yitanno gede asse Maganu uyinosi wolqanni maa assa dandaannoro leellishino. (Maarqoosi 4:39, 41) Kiristoosi gashshooti yannara, mittu manchino kalaqamu dano gawajjitannoe yee diyaadanno. Qoleno Maganu Mangiste gashshitanno woyite, mannunna saada sumuu yite heedhanno; hattono mannu qooxeessa didaafanno.—Hoosei 2:18.

Guuta ordu fayyimmanna falakkino sagale

Mannu baalunku guuta ordu fayyimma afiꞌranno. Dhiwamoommo yaannohu, geedhannohunna reyannohu diheeꞌranno. (Isayaasi 35:5, 6) Mannu umi minaanninna minaama Edeni Gannatete heeꞌri qooxeessi gedeewa baxisannonna biifino qarqarira heeꞌranno. Haaro alamera, baatto Edenete gede lowo sagale fushshitanno; hakko daafira, uullate aana heeꞌranno manni baalunku sagale duuwanno. (Kalaqama 2:9) Hundite Maganu daga Israeelete gede, Gannatete heeꞌranno manni baalunku ‘sagale duuwa geeshsha itanno.’—Leewaawoota 26:4, 5.

Addi addi dani laalo, akaakiltenna daabbo.

Addu keere afiꞌne teense heeꞌneemmo

Maganu Mangiste uulla woꞌma gashshitanno woyite, mannu baalunku keere heeꞌranno; qoleno kuꞌu kuꞌuyira danchare assanno ikkinnina gawajjannore diassanno. Olu diheeꞌranno, hattono silxaanesi doogimale horoonsiꞌrannohu diheeꞌranno; qoleno heeshshote hasiisannore afiꞌrate yee daafurannohu diheeꞌranno. Qullaawu Maxaafi togo yee hexxo aanno: “Mannu annu annunkunni kaasiꞌrino balasenna woyinete caali hunda, harshammi yite fooliishshidhanno; masisannonsari diheeꞌranno.”—Mikiyaasi 4:3, 4.

Dancha qaenna hagiirsiisanno looso

Mitte mittente maatera uminsa mini heeꞌrannonsa; hattono qaenkenni fushshine shorrinanninke yee diyaadanno. Qoleno hatte yannara loonseemmo loosi baalunku guma afiꞌrinoho. Qullaawu Maxaafi kulannonte gede, Maganu abbannote haaro alamera heedhannorira “assidhannori baalu qinaannonsa.”—Isayaasi 65:21-23.

Wole baalanka rooranno roso

Qullaawu Maxaafi, “Kaaliiqa egennino mannino baatto woꞌmanno” yaanno. (Isayaasi 11:9) Maganu Mangiste giddo heeꞌranno manni, gawalo nookkite Kalaqaanchinsa Yihowa hayyonni rosanno; qoleno isi kalaqinohu dhagge ikkanno kalaqami daafira rosanno. Insa egennonsanni olu uduunne diseekkitanno woy manna digawajjitanno. (Isayaasi 2:4) Hatteentenni, mimmitu ledo sumuu yite heedhanno garanna baatto towaata dandiitanno gara rossanno.—Faarso 37:11.

Gawalo nookki heeshsho

Maganu barru baala tashshi yaannanke heeꞌnammora hasiꞌrino daafira, baatto kalaqi woyite baalankare haja asse seekke kalaqino. Isi mannu ooso baattote aana hegerera heedhara hedino. (Faarso 37:29; Isayaasi 45:18) Maganu tenne hedosi wonshate, “reyo coꞌo asse hunanno.” (Isayaasi 25:8) Qullaawu Maxaafi “Reyo woy dadillu woy wiꞌla woy shetto kunni kaꞌa diheedhanno” yaanno. (Yohaannisi Ajuuja 21:4) Maganu mannu baalunkura yaano tenne busha alame hunanno woyite gatise sayisanno mannirano ikko haaro alamera reyotenni kaꞌꞌannohura kiirre tunqannikki mannira hegerera heeꞌranno faro fanannonsa.—Yohaannisi 5:28, 29; Soqqamaasinete Looso 24:15.

Mannu reyotenni kaino fiixansanna jaallansa hanqafiꞌre no.

Xa nafa lowo miliyoone ikkanno manni, daggara kaꞌe noote Maganu Mangiste giddo heeꞌrate qixxaawanni no. Insa guuta ikka hooggurono, Maganu haaro alamera heeꞌrara hasiꞌranno manni gedeere ikkate sharrantanni no. Hiittoonni? Maganu Yihowarenna isi soyinohu Yesuusi Kiristoosi daafira rosatenniiti.—Yohaannisi 17:3.

Tenne alame goofimarcho gatte saꞌe muli yannara daggannote haaro alamera heeꞌra dandaatto gara ledde rosi. Mittu Yihowa Farciꞌraasinchi Hegerera Hagiidhitanni Heeꞌra Dandaatto! yaanno maxaafinni Qullaawa Maxaafa woxe baaxxittokki xiinxallisannohe gede kuꞌli.