“Meyate Umi Labbaaho”

1. Mitte rodoo mine assidhara albaanni iseneeto mayite xaꞌma hasiissannose?

BAALUNKU Kiristaanira umu guuta ikkinoho Yesuusi Kiristoosaati. Ikkirono mitte Kiristaancho mine assidhanno woyite isera umo ikkannohu guuta ikkinokki minaannaseeti. Tini maahoyye yee gala duucha woyite shota ikkitannosekki gede assitanno. Hakko daafira ise ayera assidhannoro heddanno woyite iseneeto togo yite xaꞌma hasiissannose: ‘Kuni rodii albillitte dancha maatete umo ikkannota leellishannori maati? Heeshshosi giddo ayyaanaamittete coye balaxisiisanno? Hattooha ikka hoogiro, isira assiꞌrummahu gedensaanni isi dancha maatete umo ikkanno yeemma gede assinoeri maati?’ Umise daafirano togo yite xaꞌma hasiissannose: ‘Maatenkera kaaꞌlitannoti hiitti akatta nooe? Cinceemmatenna shaqqadote? Yihowa ledo danchu jaaloomi nooe?’ (Ros. 4:9, 12) Mitte rodoo mine assidhara albaanni doodhitannori adhamase hagiirraame ikkitanno gede woy ikkitannokki gede assara dandaanno.

2. Konni birxichira maa ronseemmo?

² Lowo miliyoone ikkannori meya roduuwinke minaanninsara maahoyye yee gale dancha lawishsha ikkino. Tennera insa lowo geeshsha galanteemmonsa! Kuri ammanaminori meya roduuwi ledo Yihowara soqqama lowo geeshsha hagiirsiissannonke! Konni birxichira aante noote sase xaꞌmora dawaro afiꞌneemmo: (1) Minaamuwaho qarra ikkansara dandaannohu mitu coyi maati? (2) Minaama minaannisera maahoyye yite gala doodhitannohu mayiraati? (3) Kiristaana ikkino minaanninna minaama maahoyye yee galate daafira Yesuusi, Abigayeeli hattono Yesuusi ama ikkitinote Maariyaami lawishshinni maa rosa dandaanno?

KIRISTAANA IKKINO MINAAMUWIRA QARRA IKKANSARA DANDAANNORI MAATI?

3. Adhantinorira qarru iillansara dandaannohu mayiraati?

³ Adhanna adhama guuta Maganu eltooti; mannu kayinni guuntete xeꞌne noonsareeti. (1 Yoh. 1:8) Maganu Qaali “adhantannore lowo qarri amadannonsa” yee adhantinore qorowisiisannohu iseraati. (1 Qor. 7:28) Hanni minaamuwaho qarra ikkansara dandaannoha mito coye laꞌno.

4. Minaama minaannisera maahoyye yite galturo woffi assine laꞌnanniseha lawannose gede assannoseri maa ikkara dandaanno?

⁴ Mitte minaama lophitino gari minaannisera maahoyye yite galturo woffi assine laꞌnannie yite heddanno gede assasera dandaanno. Ameerikaho heedhannoti Marisooli yinanni rodoo togo yitino: “Lophoommahu, meyaati baalunku coyinni labbaahu ledo taalo ikka hasiissannose yine rosiinsanni qooxeessiraati. Umimmate silxaane heedhanno gede assinohu Yihowa ikkinota, minaamuwu minaanninsara hajajama hasiissannonsatanna minaamuwaho mini giddo ayirradu qeechi noonsata afoomma. Ikkirono umimmate silxaanera gara ikkitino lao heedhannoe gede assiꞌra qarra ikkitannoe woyiti no.”

5. Mitu labballira, meentu daafira noonsati Qullaawa Borro ledo sumuu yitannokki lao hiittenneeti?

⁵ Qoleno mitte mancho assidhinohu meyaati labbaahura woriidite yee hedanno manchira ikkara dandaanno. Wodiidi Ameerikira heedhannoti Ivooni yinanni rodoo togo yitino: “Qooxeessinkera meyaati sagale ittannohu labbaahu ite kaihu gedensaanniiti. Sagale qishannorinna mine feyannori shiimmaadda seenneeti, labballo ooso towaatannori kayinni amuuwahonna meya roduuwansaati; labballu ooso mini giddo mootoolle ikkitinohu gede assine kullanninsa.” Iisiyaho heedhannoti Yingilingi yinanni rodoo togo yitino: “Ninke afiinni meyati worba woy dandoo nooseta ikka dihasiissannose yitanno sokka afidhino yaatto no. Insa loosi mini giddo looso loosate; hattono minaanninsara hedonsa coyiꞌranno gede difajjinanninsa.” Togoohu baxillu noosikkihunna Qullaawa Borro ledo sumuu yitannokki lao noosi minaanni, minaamasi heeshsho qarraataame assanno; isi Yesuusi lawishsha diharunsino hattono Yihowa dadillisanno.—Efe. 5:28, 29; 1 Phe. 3:7.

6. Minaamuwu Yihowa ledo noonsa jaalooma kaajjishiꞌrate ma assa hasiissannonsa?

⁶ Sai birxichira laꞌnummonte gede, Yihowa Kiristaancho ikkino minaanni maatesira ayyaanaamittetenna maalaamittete hasiisannonsare wonshara hasiꞌranno. (1 Xim. 5:8) Ikkirono mine assidhino rodoo loosu batiꞌriserono, barru baala Maganu Qaale nabbawatenna hiincate hattono Yihowara giddoseta kulte huucciꞌrate yanna gaaꞌma hasiissannose. Togo assa shota ikka hooggasera dandiitanno. Minaamuwaho loosu batiꞌrannonsa daafira togo assate yanna woy wolqa dinonke yee hedara dandaanno; ikkirono togo assate yanna gaaꞌma lowo geya hasiissannote. Mayira? Yihowa mittu mittunku isi ledo dancha jaalooma kalaqiꞌnammoranna jaaloominke baikki heeꞌnammora hasiꞌranno daafiraati.—Soq. 17:27.

7. Minaama minaannisera maahoyye yee gala shota ikkitannose gede assannoseri maati?

⁷ Minaama guuta ikkinokki minaannisera maahoyye yee galate sharrama hasiissannoseti egennantinote. Ikkirono Qullaawu Maxaafi minaannisera maahoyye yite gala hasiissannoseta kulannohu mayiraatiro huwatturonna ammanturo minaannisera maahoyye yee gala diqarrissannose.

MINAAMA MINAANNISERA MAAHOYYE YITE GALA DOODHITANNOHU MAYIRAATI?

8. Efesooni Sokka 5:22-24 kultannonte gede, Kiristaancho ikkitino minaama minaannisera maahoyye yite gala doodhitannohu mayiraati?

⁸ Kiristaancho ikkitino minaama minaannisera maahoyye yite gala doodhitannohu Yihowa hatto assitara hasiꞌranno daafiraati. (Efesooni Sokka 5:22-24 nabbawi.) Ise iimi Annase addaxxitanno; korkaatuno isi baalanka coye assannohu baxillunni ikkinotanna isera kaaꞌlaare ikka hoogoommero hatto assi yaannosekkita affino.—Mar. 6:24; 1 Yoh. 5:3.

9. Mitte rodoo minaannise silxaane ayirrisase maaho kaaꞌlitanno?

⁹ Alame meentu Yihowa biddishsha lashshi assanno gedenna minaannira maahoyye yine gala woffi assitanno yee hedanno gede jawaachishshanno. Togoo hedo tareessitannori kayinni baxillaancho Maganonke diaffinoreeti. Yihowa muxxe ikkitinore meya oososi insa woffi assannore assitara horo dihajajannonsa. Mitte rodoo Yihowa uyinose qeecha wonshate diinaggaabbe loossannoha ikkiro minise giddo keeru heeꞌranno gede assitanno. (Far. 119:165) Tini minaannase, ise umosenna oosose kaaꞌlitanno.

10. Kaarooli coyidhinorinni maa ronseemmo?

¹⁰ Guuta ikkinokki minaannisera maahoyye yite galtanno minaama umimmate silxaane heedhanno gede assinoha Yihowa baxxannotanna ayirrissannota leellishshanno. Wodiidi Ameerikira heedhannoti Kaarooli yinanni rodoo togo yitino: “Minaanniꞌya soꞌro loosara dandaannota afoomma. Qoleno isi soꞌro loosanno woyite asseemmari Yihowa ledo nooe jaalooma mageeshsha naadeemmaro leellishannoha ikkinota afoomma. Iimi Annaꞌya hagiirsiisa hasiꞌreemma daafira minaanniꞌyara maahoyye yee galate sharrameemma.”

11. Aneese yinanni rodoo gatona yitannota ikkitanno gede kaaꞌlinoseri maati? Ise coyidhinorinni maa ronseemmo?

¹¹ Minaama, minaanniꞌya dimararannoe hattono ane daafira dihedanno yite heddannoha ikkiro, iso ayirrisanna maahoyye yee gala qarra ikkitasera dandiitanno. Hanni Aneese yinanni rodoo hattoo coyi iillise woyite ma assitinoro laꞌno. Ise togo yitino: “Aaraaweemmakki gede qoropheemma. Baalunku soꞌro loonsammora dandiineemmota dideꞌꞌeemma. Mixoꞌya Yihowa gede mulla gatona yaate. Gatona yeemma woyite giddoyidi keere afiꞌreemma.” (Far. 86:5) Minaama gatona yitannoha ikkiro minaannisera maahoyye yee gala qarra diꞌꞌikkitannose.

QULLAAWU MAXAAFI GIDDO KULLOONNI LAWISHSHINNI MAA RONSEEMMO?

12. Qullaawu Maxaafi hiittoori Yihowa soqqamaano lawishsha kulanno?

¹² Mitootu, maahoyye yee galanno manni shashaho yite heddanno. Kuni kayi waajjo kaphooti. Qullaawu Maxaafi maahoyye yite galtinoriha worbuullu Yihowa soqqamaano lawishsha kulanno. Hanni Yesuusi, Abigayeelinna Maariyaami lawishshinni maa ronseemmoro laꞌno.

13. Yesuusi Yihowara maahoyye yee galannohu mayiraati? Xawisi.

¹³ Yesuusi Yihowara maahoyye yee galanno; hatto assannohu egenno woy dandoo ajjeennasi diꞌꞌikkino. Yesuusi huwatate qarrisannokki garinni xawise rosiisinohu egenno noosi daafiraati. (Yoh. 7:45, 46) Yihowa kalqe alame kalaqi woyite ledosi loosanno gede assinohu Yesuusira lowo dandoo noosita afino daafiraati. (Law. 8:30; Ibi. 1:2-4) Qoleno Yesuusi reyotenni kaihu gedensaanni Yihowa “roorre baala gordohonna baattote” uyinosi. (Mat. 28:18) Yesuusira lowo dandoo noosiha ikkirono Yihowa biddishsha hasiꞌranno. Hatto assannohu Annasi baxanno daafiraati.—Yoh. 14:31.

14. (a) Yihowa meentoho noosi laonni minaannuwu maa rossanno? (b) Minaannuwu Lawishsha 31te kulloonni hedonni maa rossanno?

¹⁴ Minaannuwu maa rossanno? Yihowa minaamuwu minaannuwaho maahoyye yee galanno gede assinohu meento labballoho woriidire asse laꞌꞌanno daafira diꞌꞌikkino. Yihowa Yesuusi ledo gashshitanno gede labballo calla ikkikkinni meentono doorasi tenne leellishshanno. (Gal. 3:26-29) Yihowa Beettisira silxaane oye ammanannosita leellishino. Hatteente gede hayyichu minaannino minaamasira mite silxaane aanno. Maganu Qaali mitte qarooyye minaama daafira kulanni, ise mini looso loosiissannota, baatto hidhitannotanna towaattannota hattono daddaꞌlitannota xawisanno. (Lawishsha 31:15, 16, 18 nabbawi.) Ise coyiꞌrate qoosso noosekki gedee borojjicho diꞌꞌikkitino. Hatteentenni minaannise ammanannose hattono coyidhannore macciishshanno. (Lawishsha 31:11, 26, 27 nabbawi.) Minaanni minaamasi konni garinni ayirrisannoha ikkiro, isira maahoyye yee gala hagiirsiissannose.

15. Minaamuwu Yesuusi lawishshinni maa rosanno?

¹⁵ Minaamuwu maa rosanno? Yesuusi lowore loosinoha ikkirono, Yihowate umimmate silxaanera maahoyye yee gala woffi assitannosihu gede asse dihedino. (1 Qor. 15:28; Fil. 2:5, 6) Hatteente gede Yesuusi lawishsha harunsitannoti qarooyye minaama minaannisera maahoyye yee gala woffi assitannosehu gede assite diheddanno. Ise minaannase irkissanno; hatto assitannohu iso baxxanno daafira calla ikkikkinni, roorenkanni Yihowa baxxannonna ayirrissanno daafiraati.

16. Umi Saamueeli 25:3, 23-28 kultanno garinni Abigayeelira mayi qarri iillinose? (Aaniidi qoolira noo misile lai.)

¹⁶ Abigayeelira Naabaali yinanni minaanni noose. Isi umosi calla baxannoho, naaxxaleessahonna galatiweelo manchooti. Ikkirono Abigayeeli adhamase diigganno faro dihasidhino. Hasidhoommero ise Daawitinna mannisi minaannase shitara sammi yite agura dandiitanno. Ise kayinni Naabaalinna minisi manna gatisate dandiiture assitino. Abigayeeli olu uduunne qodhinohu 400 manniwa shiqatenna Daawiti ayirrinyunni coyishiishshe ammansiisate mageeshshi worbimma hasiissinosero heda dandiineemmo. Ise minaannise assino bunshera nafa xaꞌmantannota coyidhino. (1 Saamueeli 25:3, 23-28 nabbawi.) Daawiti, Yihowa tenne worba mancho horoonsiꞌre, lowo soꞌro loosannokki gede hasiissannosi amaale aanni noosita afino.

17. Daawitinna Abigayeeli daafira kultanno xaggenni minaannuwu maa rosanno?

¹⁷ Minaannuwu maa rossanno? Abigayeeli xiinxalla manchooti. Daawitino ise amaale macciishshasi kaaꞌlitinosi. Hatto assasi beebbaataamma manna shaannokki gede agartinosi. Hatteente gede mittu minaanni mitto coye assara kaꞌꞌanno woyite minaamasi yitannore seekke hedanno. Ise yitannore macciishshasi gara ikkinokkire assannokki gede agartasira dandiitanno.

18. Minaamuwu Abigayeeli lawishshinni maa rosanno?

¹⁸ Minaamuwu maa rosanno? Minaama, minaannise Yihowa Farciꞌraasincho ikka hoogirono woy Qullaawu Maxaafi biddishshi garinni heeꞌrannokkiha ikkirono, ise Yihowa baxasenna ayirrisase maatese kaaꞌlitanno. Ise Qullaawa Borro ledo sumuu yaannokki garinni adhamase diigganno faro dihasidhanno. Hatteentenni minaannase ayirrissenna isira maahoyye yite galte, isi Yihowa daafira rosa hasiꞌranno gede assate woꞌnaaltanno. (1 Phe. 3:1, 2) Minaannise dancha akatase lae soorrama hoogiro nafa, ise minaannisera maahoyye yite galte Yihowara ammanantino daafira Yihowa lowo geeshsha naadannose.

19. Minaama minaannisera maahoyye yaa hasiissannosekkihu hiittoo woyiteeti?

¹⁹ Ikkollana minaannisera maahoyye yite galtannoti Kiristaancho ikkitino minaama, minaannise Qullaawu Maxaafihu xintu seeri ledo sumuu yaannokkire assi yiisero diassitanno. Lawishshaho, Yihowa Farciꞌraasincho ikkinokki minaanni minaamasi kaphitanno gede, moortanno gede woy wole Qullaawa Borro ledo sumuu yaannokkire assi yaasera dandaanno. Adhaminori meya roduuwino ikko baalunku Kiristaani roore ammanamannohu Yihowaraati. Mitte rodoo Qullaawu Maxaafi ledo sumuu yaannokkire assi yinisero giwa hasiissannose; hatto assitannokkihu mayiraatiro shaqillunni kayinni kaajjishshe xawisa hasiissannose.—Soq. 5:29.

20. Maariyaamira Yihowa ledo muli jaaloomi noose yineemmohu mayiraati?

²⁰ Maariyaami Yihowa ledo muli jaalooma kalaqidhino. Ise Qullaawa Borro seekkite affinoti dihuluullissannote. Ise Cuuaanchu Yohaannisi ama Elsaabeexi ledo hasaabbu woyite, Ibiraawootu Afiite Qullaawa Borro giddonni 20 saꞌanno hedo qummi assitino. (Luq. 1:46-55) Hanni tenneno hendo: Yooseefi Maariyaami huucciꞌrinoha ikkirono, Yihowa sokkaasinchi balaxe leellinohu isira diꞌꞌikkino. Sokkaasinchu umo Maariyaami xaaddotenni hasaawisinose; hattono Maganu Beetto iltannota kulinose. (Luq. 1:26-33) Yihowa Maariyaami seekke afinose; hattono Beettosi baxillunni towaatte lossitannota afino. Maariyaami Yesuusi reyihunna reyotenni kaihu gedensaannino, Yihowa ledo danchu jaaloomi heeꞌrannose gede assidhinoti dihuluullissannote.—Soq. 1:14.

21. Minaannuwu Maariyaami xaggenni maa rossanno?

²¹ Minaannuwu maa rossanno? Hayyicha ikkino minaanni, minaamasi Qullaawa Borro seekkite affinota ikkituro hagiidhanno. Isi ise roortanni nooe woy maatete umo ikkate woꞌnaaltanni no yee dihedanno. Hatteentenni Qullaawa Maxaafanna Qullaawu Maxaafiha xintu seera seekkite affino minaama maatesera atoote ikkitinota wodanchanno. Minaamara, minaannisenni roore egenno nooseha ikkiro nafa, maatete magansiꞌranna wole ayyaanaamittete coye albisa ikke massagate qeechi noosihu minaannaati.—Efe. 6:4.

22. Minaamuwu Maariyaami xaggenni maa rosanno?

²² Minaamuwu maa rosanno? Minaama minaannisera maahoyye yite gala hasiissannoseha ikkirono, ayyaanaamittese agadha hasiissannoseti ise umoseeti. (Gal. 6:5) Hatto assate hojju xiinxalloranna hiincate yanna gaaꞌma hasiissannose. Tini Yihowara noose baxillinna ayirrinyi baꞌꞌannosekki gede assiꞌratenna minaannisera hagiirrunni maahoyye yite galate kaaꞌlitannose.

23. Minaamuwu, minaannuwinsara maahoyye yee galansa insa umonsa, maatensanna songo kaaꞌlitannohu hiittoonniiti?

²³ Yihowa baxanno daafira woꞌmanka woyite minaannuwinsara maahoyye galanno minaamuwi hagiirrenna harshammo afiꞌranno; Yihowa qixxeessinota umimmate silxaane ayirrisannokkiri kayinni togoo hagiirre diafiꞌranno. Minaannuwinsara maahoyye yee galanno minaamuwi seennehonna wedellu labballira dancha lawishsha ikkanno. Togoo minaamuwi maatensa giddo calla ikkikkinni songote giddono baxillunna keeru heeꞌranno gede assanno. (Tit. 2:3-5) Xaa yannara Yihowara soqqamanno manni giddo rooru meya roduuwaati. (Far. 68:11) Ninke baalunku yaano labbaahuno meyatino songote giddo lowore kaaꞌla dandiineemmo. Aananno birxichira mittu mittunku hatto assa dandiineemmohu hiittoonniitiro ronseemmo.