Ninke Baalunku Qullaawu Maxaafi Rosaano Cuuantanno Gede Kaaꞌla Dandiineemmo

1-2. Mittu Qullaawu Maxaafi rosaanchi ayyaanaamittetenni lophe cuuamanno gede kaaꞌla dandiitannori ayeooti?

EMII yinanniti Fijii gobbara heedhanno rodoo togo yitino: “Qullaawa Maxaafa xiinxallanni rosoommare lowo geeshsha baxoomma. Rosoommari halaale ikkinota afoomma. Kayinni ayyaanaamittetenni lophe cuuamoommahu roduuwunniwa aana hanafumma gedensaanniiti.” Emii woꞌnaalshinni, mittu Qullaawu Maxaafi rosaanchi songote giddo noo roduuwi kaaꞌlitusiro ayyaanaamittetenni lophe cuuamara dandaannota ronseemmo.

² Mittu mittunku halashshaanchi songo lophitanno gede kaaꞌla dandaanno. (Efe. 4:16) Vaanuati yinanni gobbara heedhannoti Leelaani yinanni suwisaancho togo yitino: “‘Mitto qaaqqo lossannohu qacha woꞌmaho’ yinanni yaatto no. Manna rosaano assano hatto labbannoe; mittu manchi halaalu minira daanno gede kaaꞌlitannotino songo woꞌmate.” Maatete miilla, jaallasinna rosu mini rosiisaano mittu qaaqqi lophanno gede lowore kaaꞌlitanno. Insa hatto assitannohu qaaqqo jawaachishshenna hasiisannosi roso rosiisseeti. Hatteente gede halashshaanono Qullaawu Maxaafi rosaano amaalte, jawaachishshenna dancha lawishsha ikkite ayyaanaamittetenni lophite cuuantanno gede kaaꞌla dandiitanno.—Law. 15:22.

3. Aana, Doriininna Leelaani yinanni roduuwi coyidhinorinni maa rosootto?

³ Qullaawa Maxaafa xiinxallissanno roduuwi wolootu roduuwi kaaꞌlitannonsata giwa hasiissannonsakkihu mayiraati? Hanni Moldoovaho heedhannoti Aana yinanniti baxxitino suwisaancho yitinore laꞌno: “Qullaawu Maxaafi rosaanchi ayyaanaamittetenni lophanno gede hasiisannosire baala wonsha mittu manchira duha ikkitara dandiitanno.” Hatte gobbankura baxxino suwisaancho ikke soqqamannohu Doriini yinanni rodii togo yiino: “Duucha woyite halashshaano ani hede egennoommokkire Qullaawu Maxaafi rosaano wodanira coannore coyidhanno.” Leelaani, wolootu kaaꞌlitannonke woyite maahoyye yaa hasiissannonkehu mayiraatiro coyidhanni togo yitino: “Qullaawu Maxaafi rosaanchi roduuwu baxillenna shaqqille leellishshannosi gara laꞌꞌasi Yihowa manna ikkinoommota afanno gede kaaꞌlitannosi.”—Yoh. 13:35.

4. Konni birxichira maa ronseemmo?

⁴ Ikkollana togo yitine heddinanniha ikkara dandaanno: ‘Ani xiinxalliseemmokkihu Qullaawu Maxaafi rosaanchi ayyaanaamittetenni lophanno gede hiitto asse kaaꞌleemmo?’ Hanni mittu halashshaanchi ledosi Qullaawa Maxaafa xiinxallinseemmo gede koyisinkeronna mittu rosaanchi gambooshshe daa hanafiro maa assa dandiineemmoro laꞌno. Hattono songote cimeeyye Qullaawu Maxaafi rosaano ayyaanaamittetenni lophite cuuantanno gede kaaꞌla dandiitanno gara laꞌneemmo.

QULLAAWU MAXAAFI XIINXALLORA KOYINSANNIꞌNE WOYITE

5. Mittu rodii ledosi Qullaawa Maxaafa xiinxallisatto gede koyisihero ate qeechi maati?

⁵ Qullaawu Maxaafi xiinxallo yannara, rosaanchu Maganu Qaale wodanchanno gede roore kaaꞌlannohu rosiisaanchosiiti. Mittu rodii ledosi xiinxallisatto gede koyisihero, ati isi kaaꞌlaancho ikkoottota deꞌooti. (Ros. 4:9, 10) Xiinxallote yannara dancha gede kaaꞌlate maa assa dandaatto?

6. Qullaawu Maxaafi xiinxallora koyinsannihe woyite Lawishsha 20:18te nooha xintu seera harunsa dandaattohu hiittoonniiti?

⁶ Xiinxallisate qixxaawi. Rosiisaanchu rosaanchu daafira mitore kulannohe gede balaxxe xaꞌma dandaatto. (Lawishsha 20:18 nabbawi.) Togo yite xaꞌma dandaatto: “Hanni Qullaawu Maxaafi rosaanchikki daafira kulattoe? Xiinxallitinannihu hiikkonne birxichooti? Konni birxichinni isira rosiisattora hasiꞌroottori maati? Xiinxallote yannara assa hasiissannoeri woy assa hasiissannoekkiri maati? Rosaancho jawaachishate assa dandeemmori maati?” Rosaanchisi fojo kulannohekkiti egennantinote; kayinni kulannoheri kaaꞌlahera dandaanno. Joyi yinanniti misiyoone ikkite soqqantanno rodoo ledose Qullaawa Maxaafa xiinxallissanno roduuwira togoore kultanno. Ise togo yitino: “Ledoꞌya xiinxallissannorira kuleemmansari insa rosaancho kaaꞌlate kaꞌanno gedenna xiinxallote yannara mayitannoro heddanno gede kaaꞌlannonsa.”

7. Xiinxallote koyinsihero qixxaawa hasiissannohehu mayiraati?

⁷ Xiinxallote koyinsihero xiinxallissinanni birxicho balaxxe qixxaawittoro danchaho. (Izi. 7:10) Aleenni kullihu Doriini yinanni rodii togo yiino: “Ledoꞌya xiinxallisannohu balaxe qixxaawasi hagiirsiissannoe. Hatto assiro isi kaaꞌlannore coyiꞌra dandaanno.” Qoleno rosaanchu lamunku seekkitine qixxaabbinoonnita huwatanno; tini qolte isira dancha lawishsha ikkitanno. Xiinxallissinanni birxicho seekkite qixxaawate yanna hoogittoro nafa, qara qara hedo laꞌꞌate woꞌnaali.

8. Xiinxallote yannara huuccatto danchu garinni assa dandaattohu hiittoonniiti?

⁸ Qullaawa Maxaafa xiinxallinsanni woyite huuccatto lowo geeshsha hasiissannote; konnira huuccatto assatto gede koyinsihero mayyaattoro balaxxe hedi. Hatto assittoro huuccattokki roore jawaachishshannota ikkitanno. (Far. 141:2) Jaappaanete heedhannoti Hanaye yinanni rodoo Qullaawu Maxaafi rosiisaanchose koyisseenna daggino rodoo assitino huuccatto qaagge togo yitino: “Huuccitino huuccatto Yihowa ledo kaajju jaaloomi nooseta leellishshanno; anino ise gede ikka hasiꞌroomma. Qoleno ane suꞌma gante huuccituta lowo geeshsha hagiidhoomma.”

9. Yaiqoobi 1:19 kultanno garinni, xiinxallisate koyinsihero dancha gede kaaꞌlate maa assa dandaatto?

⁹ Xiinxallote yannara rosiisaancho kaaꞌli. Nayijeeriyaho heedhannoti Omamuyoobi yinanniti baxxitino suwisaancho togo yitino: “Ledonke xiinxallissannori seekkite harunsitannoha ikkiro, tini lowore kaaꞌlitanno. Insa lowore kaaꞌlitannoha ikkirono, roore anga xiinxallisannohu rosiisaancho ikkinota huwattino daafira lowore dicoyidhanno.” Mamoote coyiꞌra hasiissannoheronna maa coyiꞌrattoro afa dandaattohu hiittoonniiti? (Law. 25:11) Rosiisaanchunna rosaanchu hasaabbanno woyite seekkite macciishshi. (Yaiqoobi 1:19 nabbawi.) Dancha gede kaaꞌla dandaattohu hatto assittoro callaati. Coyiꞌrattora albaanni seekkite heda hasiissannoheti egennantinote. Lawishshaho, lowore coyiꞌra, rosiisaanchu coyiꞌranni heeꞌreenna mereero ea woy wole birxicho kayisse hasaawa dihasiissannohe. Ikkollana haranchore coyidhe, lawishsha horoonsidhe, woy xaꞌmo xaꞌmite rosaanchoho rosannori xawe leellannosi gede kaaꞌla dandaatto. Mito woyite rosiisaanchu coyiꞌrinori aana ledattori hoogara dandaanno. Kayinni rosaancho naadittoronna ayyaanaamittetenni lophate assannorira galatittosiro tini lowo geeshsha kaaꞌlitannosi.

10. Woꞌnaalshikki Qullaawu Maxaafi rosaancho kaaꞌlara dandaannohu hiittoonniiti?

¹⁰ Woꞌnaalshakki kulisi. Hasiisannoha ikkiro, rosaanchoho halaale macciishshootto gara, qarra ikkinohere qeelte saootto gara woy Yihowa kaaꞌlinohe gara haransite kula dandaatto. (Far. 78:4, 7) Togoo woꞌnaalshi rosaancho kaaꞌlasira dandaanno. Kuni woꞌnaalshi ammanasi jawaattanno gede woy ayyaanaamittetenni lophe cuuamanno gede kaaꞌlasira dandaanno. Hattono iillanni noosi fonqolo qeele saꞌꞌanno gara afate kaaꞌlasira dandaanno. (1 Phe. 5:9) Biraazilete heeꞌrannohu Gabireeli yinannihu suwisaancho ikke soqqamanno rodii Qullaawa Maxaafa xiinxalli woyite kaaꞌlinosire qaage togo yiino: “Roduuwu kultinoe woꞌnaalsha macciishshummo woyite, Yihowara qarrinke leellannota wodanchoommo. Insa qarra ikkinonsare qeela dandiitu geeshsha anino qeela dandeemmo.”

QULLAAWU MAXAAFI ROSAANCHI GAMBOOSHSHE DAANNO WOYITE

11-12. Gambooshshe dayinoha Qullaawu Maxaafi rosaancho anga fanne haaꞌra hasiissannonkehu mayiraati?

¹¹ Qullaawu Maxaafi rosaanchi ayyaanaamittetenni lophe cuuamate, ganye songote gambooshshe daanna gambooshshunni horo afiꞌra hasiissannosi. (Ibi. 10:24, 25) Rosiisaanchisi iso gambooshsheho mite yee koyisasira dandaanno. Isi gambooshshe daanno woyite, daa agurannokki gede baalunku jawaachisha dandiineemmo. Tenne assa dandiineemmohu hiittoonniiti?

¹² Rosaancho anga fantine haadhe. (Rom. 15:7) Rosaanchu gambooshshe daanno woyite anga fanne haaꞌneemmosiha ikkiro, gambooshshe woꞌmanka woyite daara dandaanno. Saalanno gede assitinikkinni faasiiqqine keere haadhesi hattono wolootu ledo egensiissesi. Iso wolu manni towaatanni noohu gede assitine heddinoonte; rosiisaanchisi gambooshshe barrisiꞌrinoha woy wole looso loosanni nooha ikkara dandaanno. Rosaanchu coyiꞌranno woyite seekkitine macciishshe hattono heddinannisita leellishshe. Rosaancho anga fantine haaꞌraꞌne kaaꞌlitannosihu hiittoonniiti? Hanni boodu diri albaanni cuuaminohunna xa songote soqqamaancho ikke soqqamanni noohu Dimitiri yinanni rodii woꞌnaalsha laꞌno. Isi gambooshshe mite yee haꞌri woyitita qaage togo yiino: “Waajje Gambooshshu Addaraashera gobbaanni uurre noommoha lae, mittu rodii shaqqillunni Addaraashe ledosi eꞌꞌeemmo gede assinoe. Lowo roduuwi dagge keere haadhinoe. Tenne lae dhagge assiꞌroommo. Tenne lowo geeshsha baxoommo daafira, gambooshshu mayi barru baalalla heeꞌra yee halchoommo. Togoo coye horo wolewa afe diegennoommo.”

13. Akatiꞌne Qullaawu Maxaafi rosaano kaaꞌlannohu hiittoonniiti?

¹³ Dancha lawishsha ikke. Akatiꞌne Qullaawu Maxaafi rosaanchi halaale afiꞌrinota ammananno gede kaaꞌlasira dandaanno. (Mat. 5:16) Moldoovaho heedhannoti Vitaali yinanni suwisaancho togo yitino: “Songote giddo noo roduuwi heedhanno heeshshonna akattansa hittootero wodanchoomma. Tini Yihowa Farciꞌraasine addinta Maganu ledo qaaffannore ikkitinota ammaneemma gede assitinoe.”

14. Kiꞌne lawishshi mittu manchi ayyaanaamittetenni lophanno gede kaaꞌlara dandaannohu hiittoonniiti?

¹⁴ Rosaanchu cuuamate ikkado ikkanno gede rosinore loosunni leellisha hasiissannosi. Tenne assa shota ikka hooggasira dandiitanno. Ikkirono Qullaawu Maxaafi amaale harunsaꞌne kiꞌne kaaꞌlitinoꞌne gara laꞌꞌanno woyite isino kiꞌne lawishsha harunsara dandaanno. (1 Qor. 11:1) Hanni aleenni kullite Hanaye woꞌnaalsha laꞌno. Ise togo yitino: “Ani Qullaawu Maxaafinni rosanni noommare roduuwu loosunni leellishshanni no. Insa lae woloota jawaachisha, gatona yaanna baxille leellisha dandeemmahu hiittoonniitiro rosoomma. Insa woꞌmanka woyite wolootu daafira danchare coyidhanno. Anino insa lawishsha harunsa hasiꞌreemma.”

15. Lawishsha 27:17 mittu rosaanchi gambooshshe ganye daanno woyite isira jaala ikka hasiissannonkehu mayiraatiro anfeemmo gede kaaꞌlitannonkehu hiittoonniiti?

¹⁵ Jaalla ikkensa. Rosaanchu gambooshshe ganye daanno woyite, isira woꞌmanka woyite heddinannita leellishshe. (Fil. 2:4) Iso hasaawisa dandiitinanni. Heeshshosi giddo mito coye biddi assiꞌrino daafira galattinasira dandiitinanni; hattono umisi hajo giddora eꞌinikkinni Qullaawu Maxaafi xiinxallosi, maatesinna loosisi daafira xaꞌma dandiitinanni. Tini mimmitu ledo albinni roore egennantinanni gede kaaꞌlitaꞌnera dandiitanno. Rosaanchu jaala ikkitiniro ayyaanaamittetenni lophe cuuamanno gede kaaꞌlitinannisi. (Lawishsha 27:17 nabbawi.) Hanaye xa woꞌma yanna suwisaancho ikkite soqqantanni no. Ise mite yite gambooshshe hadhu woyitita qaagge togo yitino: “Songote roduuwi ledo jaala ikkumma kawa gambooshshe quqquxame agadha hanafoomma; daafure noomma woyite nafa gambooshshe dihoseemma. Kuri roduuwi ledo jaala ikka hagiirsiissinoe; hattono Yihowa magansidhannokkiri ledo nooe jaalooma agureemma gede kaaꞌlitinoe. Albinni roore Yihowawanna roduuwunniwa shiqa hasiꞌroomma. Hakko daafira cuuamate murciꞌroomma.”

16. Mittu rosaanchi gambooshshe daanno woyite borsannokki gede kaaꞌlate wolere maa assa dandiitinanni?

¹⁶ Mittu rosaanchi ayyaanaamittetenni lophanno woyitenna heeshshosi giddo mito coye biddi assiꞌranno woyite songote miila ikkinota afanno gede kaaꞌlesi. Iso wosinsidhine tenne assa dandiitinanni. (Ibi. 13:2) Moldoovaho heeꞌrannohu Deenisi yinanni rodii Qullaawa Maxaafa xiinxalli warita qaage togo yiino: “Roduuwu anenna minaamaꞌya insa ledo yanna sayinseemmo gede duucha higge koyissinonke. Insa Yihowa kaaꞌlinonsahu hiittoonniitiro kultinonke. Tini jawaachishshinonke. Insa ledo yanna sayisanke Yihowara soqqama hasiꞌneemmo gedenna isira soqqammummoro albillitte abbara qaale eino atoote afiꞌneemmota ammanneemmo gede assitinonke.” Qullaawu Maxaafi rosaanchi halashshaancho ikkihu gedensaanni, kiꞌne ledo soqqansho fulanno gedeno koyisa dandiitinanni. Biraazilete heeꞌrannohu Diyego yinanni halashshaanchi togo yiino: “Lowo roduuwi insa ledo soqqansho fuleemmo gede koyissinoe. Tini insa ledo dancha gede egennameemmo gede assitinoe. Hatto assaꞌya lowore roseemmo gede hattono Yihowawanna Yesuusiwa albinni roore shiqeemmo gede kaaꞌlitinoe.”

SONGOTE CIMEEYYE ROSAANCHO KAAꞌLA DANDIITANNOHU HIITTOONNIITI?

17. Cimeeyye Qullaawu Maxaafi rosaano kaaꞌla dandiitannohu hiittoonniiti?

¹⁷ Qullaawu Maxaafi rosaano kaaꞌlate yanna gaaꞌme. Cimeeyye, Qullaawu Maxaafi rosaano baxxinannitanna insara heddinannita leellishaꞌne ayyaanaamittetenni lophite cuuantanno gede kaaꞌlitansara dandiitanno. Gambooshshunniwa Qullaawu Maxaafi rosaano ledo ganyitine hasaawa dandiitinanni? Insa suꞌmansa affinoonnita affanno woyite, roorenkanni gambooshshunniwa dawaro qola hanaffuro suꞌmansa woshshitine galattinanninsa woyite heddinanninsata affanno. Qullaawa Maxaafa xiinxallissanno roduuwi ledo xiinxallisate pirogiraameꞌne biddi assiꞌra dandiitinanni? Tini, rosaancho kiꞌne heddinoonnihunni aleenni kaaꞌlitasira dandiitanno. Nayijeeriyaho heeꞌrannohu Jaaki yinanni suwisaanchi togo yiino: “Batinye rosaano ane ledo insa Qullaawa Maxaafa xiinxallisara dayinohu cimeessa ikkinota affanno woyite dhagge assidhanno. Mittu rosaanchi, ‘Ninke sawaakooti horo togo diassitanno. Insa dureeyyeewanna woxe baatannonsa manniwa calla martanno’ yiino.” Kuni rosaanchi xa gambooshshe daanni no.

18. Cimeeyye 1 Pheexiroosi 5:2te kulloonni garinni uyinoonninsa looso loosa dandiitannohu hiittoonniiti?

¹⁸ Qullaawu Maxaafi rosiisaano qajeelsensa hattono jawaachishshensa. Cimeeyye, halashshaano dancha gede sabbakkannorenna rosiissannore ikkitanno gede kaaꞌlate qeechi nooꞌne. (1 Pheexiroosi 5:2 nabbawi.) Mittu rodii ate ledo heeꞌre Qullaawa Maxaafa xiinxallisa waajjiro, ati xiinxallisattora dandaattota kulisi. Aleenni kullihu Jaaki togo yiino: “Cimeeyye Qullaawu Maxaafi rosaanoꞌya daafira ganyite xaꞌmitannoe. Rosaanchoꞌya xiinxalliseemmo woyite mitu coyi leella hoogiero kaaꞌlitannoe.” Cimeeyye Qullaawu Maxaafi rosiisaano jawaachishatenna kaaꞌlate lowore assa dandiitanno. (1 Tes. 5:11) Jaaki lede togo yiino: “Songote cimeeyye jawaachishshannoe woyitenna diinaggaawe asseemmore naaddanno woyite lowo geeshsha hagiidheemmo. Insa coyidhannori fooggashsheenna angoonnihu qiidino wayi gede gabbi assannoe. Insa ane galatansa worba ikkeemmo gedenna Qullaawa Maxaafa rosiisate loosiꞌyanni albinni roore hagiidheemmo gede assitinoe.”—Law. 25:25.

19. Baalunku maa assine hagiidha dandiineemmo?

¹⁹ Xaa yannara Qullaawu Maxaafi xiinxallo hooggunkero nafa, wolootu roduuwi xiinxallissannore ayyaanaamittetenni lophitanno gede kaaꞌla dandiineemmo. Xiinxallinseemmo woyite lowore coyiꞌnummokkinni dancha gede qixxaamboommo hedo coyiꞌne rosiisaancho kaaꞌla dandiineemmo. Rosaano gambooshshe dagganno woyite jaallansa ikka dandiineemmo; hattono dancha lawishsha ikkineemmonsa. Songote cimeeyyeno rosaano kaaꞌlate yanna gaaꞌmite insa jawaachisha dandiitanno; qoleno rosiisaano qajeelsitannonsa, hattono galattannonsa. Assineemmori shiimare ikkiro nafa, mittu manchi iimi Annanke Yihowa baxannonna isira soqqamanno gede kaaꞌlanke lowo geeshsha hagiirsiissannonke!