Addinta Maaro Eate Yaa Mayyaate?

1-2. Akiaabinna Minaase mereero noo badooshshi maati? Hiikkuri xaꞌmuwara dawaro afiꞌneemmo?

HANNI biꞌree waro heedhinori lame mootoolla xagge laꞌno. Mittu Israeelennita tonne gaꞌre amadino gashshooti mooteeti; mittu kayinni Yihudunnita lame gaꞌre amadino gashshooti mooteeti. Insa addi addi yannara heedhinore ikkiturono, mitto assannonsari lowori no. Lamunku Yihowara finqiltino, hattono mannasi cubbu giddora eessitino. Lamunku kaphu maganna magansidhino, hattono lubbo shitannoreeti. Ikkollana, lamunku mereero badooshshu no. Lamunku giddo mittu heeshshosi diro woꞌma bushare assanni heeꞌrino; layinkihu kayinni loosino cubbira aagintaawe maaro eino daafira gatona yinoonnisi. Insa ayeooti?

² Mittu Israeelete moote Akiaabiiti; mittu kayinni Yihudu moote Minaaseeti. Konni lamunku manni mereero noo badooshshinni, mitte lowo geeshsha hasiissanno hajo daafira yaano maaro eate daafira lowore ronseemmo. (Soq. 17:30; Rom. 3:23) Maaro eate yaa mayyaate? Maaro eꞌnoommota leellinsheemmohu hiittoonniiti? Cubbo loonseemmo woyite Yihowa gatona yaankera hasiꞌneemmo daafira, tenne bande afa hasiissannonke. Tenne xaꞌmuwara dawaro afiꞌrate, tenne lame mootoolla xagge xiinxallineemmo; qoleno insa assitinorinni maa ronseemmoro laꞌneemmo. Hakkiinni Yesuusi maaro eate woy aagintaawate daafira mayinoro ronseemmo.

MOOTE AKIAABI ASSINORINNI RONSEEMMORE

3. Akiaabi hiittoo mooteeti?

³ Akiaabi Israeelennita tonne gaꞌre amadino gashshootira lamalki mooteeti. Isi aliyye widoonni noohu dureessu Sidooni katami moote ilino beetto Elzaabeeli adhino. Akiaabi Elzaabeeli adhasi, Israeele jiro afidhanno faro fantinoha ikkara dandaanno. Ikkollana tini adhama Israeelete Yihowa ledo noonsa jaaloomi roore baꞌꞌanno gede assitino. Elzaabeeli Baꞌꞌaali magansidhannote; ise Akiaabino hattee maaeela ammaꞌno halashshanno gede kakkayissino; Baꞌꞌaali magansidhannori magansidhanno woyite foortanno, hattono qaaqquulle kakkaltanno. Elzaabeeli mootitte ikkite noo yannara Yihowa masaalaano keere diafidhino. Ise insa giddo batinye shiishiishshino. (1 Mot. 18:13) Akiaabi umisi “albi mootoolla baalantenni roore Kaaliiqi giwanno coye [assanno]” manchooti. (1 Mot. 16:30) Yihowa Akiaabinna Elzaabeeli assitinore lashshi asse diagurino. Isi insa assitannore baalankare afino. Ikkirono Yihowa maarosinni mannisi qorophanno gedenna rahe doogonsa biddi assiꞌranno gede kulara masaalaancho Eeliyaasi soyino. Akiaabinna Elzaabeeli kayinni yinoonnire macciishsha gibbino.

4. Yihowa Akiaabi ma garinni qorichishannota kulino? Akiaabi hiitto ikkiyya?

⁴ Jeefote, Yihowa cinca gooffu. Isi Akiaabiranna Elzaabeelira qorichannonsa gara kulara Eeliyaasi soyino. Yihowa hattee maate coꞌo assine shinanni gede yoo yiino. Akiaabi Eeliyaasi kulinosi sokka macciishshiti baasa masino! Kuni booꞌnaleessu manchi ‘umosi shollishasi’ dhagge ikkitannote.—1 Mot. 21:19-29.

5-6. Akiaabi addinta maaro einokkita leellishannori maati?

⁵ Akiaabi hakkawoyite umosi shollishinoha ikkirono, hakkuyi gedensaanni assinori addinta maaro einokkita leellishanno. Isi gashshootisi giddonni Baꞌꞌaali ammaꞌno hunate diwoꞌnaalino. Mannu Yihowa magansiꞌranno gedeno dijawaachishino. Akiaabi assinohu wolu coyino isi addinta maaro einokkita leellishanno.

⁶ Gedensoonni Akiaabi Sooriyu daga ledo olamara kae heeꞌre dancha Yihudu moote Iyyoosaafixi kaaꞌlasira woshshiꞌri woyite, Iyyoosaafixi balaxe Yihowa masaalaancho amaaꞌlanno gede kulinosi. Akiaabi kayinni umi qara Yihowa masaalaancho amaaꞌla dihasiꞌrino; togo yiino: “Mittu Yimila beetti Mikaya yinannihu noona, isi anera bushare ikkinnina danchare himanannokki daafira iso dibaxeemmo.” Ikkirono insa masaalaancho Mikaya amaaꞌlitu. Akiaabi yiinte gede, kuni Maganu manchi isira busha duduwo kulisi! Bushu manchi Akiaabi aagintaawe Yihowa maarie yaa agure, masaalaancho amande usurranni gede assino. (1 Mot. 22:7-9, 23, 27) Akiaabi Yihowa masaalaancho usursiisinoha ikkirono, masaalo woꞌmitannota kayi hoola didandiino. Akiaabi hakkiinni olunniwa reyino.—1 Mot. 22:34-38.

7. Akiaabi reyihu gedensaanni Yihowa iso hiittoo manchooti yiino?

⁷ Akiaabi reyihu gedensaanni, Yihowa hakkonne mancho ma garinni laꞌꞌannoro coyiꞌrino. Danchu moote Iyyoosaafixi oluwiinni keere higita, Yihowa iso Akiaabi kaaꞌlinotera borooranno gede masaalaancho Iyu soyino. Yihowa masaalaanchi togo yiino: “Bushuulle kaaꞌlanna Kaaliiqa gibbannorira haꞌla danchateni?” (2 Dud. 19:1, 2) Hanni tenne hedi: Akiaabi godowinta maaro einoha ikkoommero, masaalaanchu iso Yihowa giwannoho busha manchooti yaannoni? Addanko, Akiaabi mito geeshsha gaabbinoha ikkirono, addinta maaro dieino.

8. Maaro eate daafira Akiaabi assinorinni maa ronseemmo?

⁸ Akiaabi assinorinni maa ronseemmo? Akiaabi, Eeliyaasi Yihowa maatesi qorichishara kainota kulisi woyite, mito geeshsha umosi shollishino. Hatto assasi danchate. Ikkollana isi gedensoonni assinori godowinta maaro einokkita leellishanno. Konni daafira, maaro eate yaa shiima yanna dadilla calla diꞌꞌikkitino. Hanni addinta maaro eate yaa mayyaatero huwatate kaaꞌlannonkeha wole lawishsha laꞌno.

MOOTE MINAASE ASSINORINNI RONSEEMMORE

9. Minaase hiittoo mooteeti?

⁹ Mitu lamu xibbi diri gedensaanni, Minaase Yihudu moote ikkino. Isi loosino cubbi Akiaabi cubbo nafa roorikki digatino. Qullaawu Maxaafi “[Minaase] Kaaliiqa hanqissannota lowo bunshe loosino” yaanno. (2 Dud. 33:1-9) Minaase wole daga magannara kakkallanni darga qixxeessino; wole agurina bonce seekkinoonnita kaphu magani misile Yihowahu qullaawu mini giddo nafa worino! Isi kiiꞌlannoho, hellee laꞌꞌannoho, hattono qaallooletenna ekera coyishshiishshannori ledo maꞌlannoho. Qoleno isi ‘keeraano lowo manna shiino.’ Bunshete bunshera isi “ilinoha beettosi [kaphu magannara] shilqote kakkalo asse shiqishino.”—2 Mot. 21:6, 7, 10, 11, 16.

10. Yihowa Minaase seejjinohu hiittoonniiti? Minaase maa assiyya?

¹⁰ Akiaabi gede Minaaseno, bunshesi aguranno gede Yihowa masaalaanosi widoonni kulinosiha ikkirono, mokkookke macciishsha giwino. Gedensoonni Yihowa “Asoori olanto Yihuda horritanno gede assi. Olantono Minaase qafadde sanosira qoroora gante camote cagaagenni usurte Baabilooni haadhe hadhu.” Minaase Baabiloonete gobbara usuru mine heeꞌre, loosino cubbi daafira seekke hedikki digatino. Isi Maganu albaanni ‘lowo geeshsha umosi shollishino.’ Isi hakkiinnino sainore assino. Minaase “Maganisi Kaaliiqiwa hige kaaꞌlannosi gede [huucciꞌrino].” Isinni Yihowawa hige ‘woxarate’ huucciꞌrino. Kuni bushu manchi heeshshosi biddi assiꞌranni no. Isi Yihowa “Maganisi” gede asse heda hanafino; hattono iso hige hige huucciꞌrino.—2 Dud. 33:10-13.

11. Layinki Duduwo 33:15, 16 kultanno garinni, Minaase addinta maaro einota leellishinohu hiittoonniiti?

¹¹ Gedensoonni Yihowa Minaase huuccattora dawaro qolino. Huuccattosi leellishshannonte gede, konni manchi wodani raga higinota Yihowa huwatino. Yihowa Minaase huuccatto macciishshe wirro mootimmasiwa higanno gede assino. Minaase addinta maaro einota leellishate dandaamisire baala assino. Isi assinori Akiaabi horo assinokkireeti. Isi amanyootesi biddi assiꞌrino. Kaphu maganna hunino, hattono mannu Yihowa magansiꞌranno gede jawaachishino. (2 Duduwo 33:15, 16 nabbawi.) Minaase lowo diro maatesira, ledosi gashshitannorira, hattono dagasira busha lawishsha ikke keeshshino daafira, tenne assate worbimmanna ammana hasiissinositi egennantinote. Minaase geedhihu gedensaanni kayinni, huninoha mito coye biddi assate woꞌnaalino. Isi beettisi beettira Iyyoosiyaasira dancha lawishsha ikkikki digatino; gedensoonni Iyyoosiyaasi dancha moote ikkino.—2 Mot. 22:1, 2.

12. Maaro eate daafira Minaase xaggenni maa ronseemmo?

¹² Minaase xaggenni maa ronseemmo? Isi umosi shollishino; kayinni hakkiinni sainoreno assino. Maaro afiꞌrate eeggifate Yihowa huucciꞌrino. Amanyootesino biddi assiꞌrino. Hunino coye biddi assate diinaggaawe loosino; qoleno Yihowa magansiꞌratenna wolootuno hatto assitanno gede kaaꞌlate dandaamisire baala assino. Minaase xagge jawa cubbo loossinori nafa maaro afidhara dandiitannota leellishshanno. Qoleno tini xagge Maganu Yihowa ‘shaqqadonna cubbono agurannoha’ ikkinota leellishshanno tajeeti. (Far. 86:5) Addinta maaro eꞌannori cubbinsara maaro afidhanno.

13. Maaro eate yaa mayyaatero afate kaaꞌlannonke lawishsha kuli.

¹³ Minaase loosino cubbira ‘Soꞌroommo’ yee calla diagurino. Tennenni maaro eate daafira kaajja roso ronseemmo. Hanni mitto lawishsha laꞌno: Shaete mine marte daabbo uuyyeꞌꞌe yiteenna, minu anni daabbote bayicho shiima bullee safare uyihero hagiidhatto? Hagiidhattokkiti egennantinote. Shaete mini anni ‘Daabbo gaꞌnate bullee hasiissannowe’ yiiherona? Hasiꞌroottoti daabbo ikkitino daafira, xaano hagiidha hoogattora dandaatto. Hatteente gede, Yihowa cubbo loosino manchi addinta maaro eara hasiꞌranno. Cubbo loosino manchi ‘Soꞌroommo’ yiiro hatti danchate. Loonsoonni cubbira dadilla maaro eate hasiisannoreeti; kayinni hatti calla diꞌꞌikkitanno. Woluri hasiisannori maati? Yesuusi coyiꞌrinohu mittu dhagge ikkanno lawishshinni lowore ronseemmo.

MITTU MANCHI ADDINTA MAARO EINOTA BUUXA

14. Yesuusi coyiꞌrino lawishshira kulli beetti maaro einota leellishannore assa hanafinohu hiittoonniiti?

¹⁴ Yesuusi Luqaasi 15:11-32 qaetenni fule baino beettire kultannota jawaachishshanno xagge coyiꞌrino. Kuni beetti annisira finqile, qaetenni fule “xeerto gobba” haꞌrino. Isi marinowa maaeela heeshsho heeꞌrino. Qarru amadisita kayinni, assino bunshe heda hanafi. Annisi qaera noo waro dancha heeshsho heeꞌrinota wodanchi. Yesuusi yiino garinni konni beettira wodanisi raga higino. Hakko daafira, qaera hige annasi maaro xaꞌmiꞌrara kai. Kuni beetti lowo geeshsha soꞌrinota wodanchasi danchate. Kayinni tini calla ikkitannoni? Diꞌꞌikkitanno. Isi amanyootesi biddi assiꞌra hasiissannosi!

15. Qaetenni fule baino beetti addinta maaro einota leellishinohu hiittoonniiti?

¹⁵ Qaetenni fule baino beetti addinta maaro einota leellishannore assino. Isi seeda doogo haꞌre qaera higino. Hakkiinni annisinni xaaditi togo yii: “Annaꞌya, atenna Maganu albaanni bushoommo. Kunni kaꞌa ate beetto ikka dimaltinoe.” (Luq. 15:21) Kuni beetti bushinota maaxikki coyiꞌrasi wirro Yihowa ledo jaalooꞌma hasiꞌrinota leellishshanno. Qoleno isi assinori annasi xissiisinota wodanchino. Isi annasi hagiirsiisate aye coyeno assate qixxaawinoha ikkinota coyiꞌrino; wole agurina annisira qaxarante loossannori ledo kiirrisiro nafa giwannokkita kuꞌlino! (Luq. 15:19) Kuni lawishshi jawaachishshanno xagge calla diꞌꞌikkino. Tini xagge songote cimeeyyera lowo geeshsha kaaꞌlitannote. Konni lawishshira noohu xintu seeri, cimeeyye mittu jawa cubbo loosino manchi addinta maaro einotanna teꞌee buuxate woꞌnaaltanno woyite kaaꞌlannonsaho.

16. Mittu manchi addinta maaro einoronna teꞌee bade afa cimeeyyete shota ikka hooggansara dandiitannohu mayiraati?

¹⁶ Mittu jawa cubbo loosino manchi addinta maaro einotanna teꞌee bade afa songote cimeeyyera shota looso diꞌꞌikkitino. Mayira? Cimeeyye mannu wodanira noore afa didandiitanno; hakko daafira, insa cubbo loosino rodii loosino cubbo addinta giwa rosinota leellishshanno taje afiꞌrate woꞌnaaltanno. Mito woyite mittu manchi hashakkiꞌnanni cubbo loose heeꞌreenna mittoreno lawannosikkiha ikkiro, kuni manchi addinta maaro einoronna teꞌee huwata cimeeyyete roore qarrissansara dandiitanno.

17. (a) Loonsoonni cubbira ‘Soꞌroommo’ yaa calla addinta maaro ea ikkitinokkita leellishanno lawishsha kuli. (b) Layinki Qorontoosi 7:11 kultanno garinni, addinta maaro eino manchi maa assa hasiissannosi?

¹⁷ Hanni mitto lawishsha laꞌno. Mittu rodii lowo diro duucha hige soorranni keeshshino. Isi kaaꞌlinasira kuꞌla agure, cubbosi galtesi, jaallasinna cimeeyye affannokki gede maaxiꞌre keeshshino. Gedensoonni, cubbisi xawo fuli. Cimeeyye cubbo loosinota leellishshanno taje kultusita, assinore ammanino; isinni assinorira lowo geeshsha gaabbinoha lawino. Hakkeeshshi calla ikkannoyya? Tenne hajo laꞌanno cimeeyye kuni rodii maaro einota leellishshannota hakkiinni saꞌino taje afiꞌra hasiissannonsa. Kuni manchi cubbo loosinohu mitte hige calla diꞌꞌikkino; hatteentenni, lowo diro jawa cubbo loosanni heeꞌrino. Isi loosino cubbo umisi kulinoha ikkikkinni cimeeyye affinohu wole widoonniiti. Konni daafira cimeeyye konni manchi lao, hedosinna amanyootisi addinta soorraminota leellishshanno taje afiꞌra hasiissannonsa. (2 Qorontoosi 7:11 nabbawi.) Kuni manchi addinta maaro einota leellishannore assate seeda yanna hasiissannosiha ikkara dandaanno. Roore anga, kuni manchi addinta maaro einota leellisha geeshsha Kiristaanu songonni bohamanno.—1 Qor. 5:11-13; 6:9, 10.

18. Bohamino manchi addinta maaro einota leellisha dandaannohu hiittoonniiti? Addinta maaro eiro maa afiꞌranno?

¹⁸ Bohamino manchi addinta maaro einota leellishate, songote gambooshshe ganye daa, hattono woꞌmanka woyite huuccatto assiꞌranno gedenna Maganu Qaale ganye xiinxallanno gede cimeeyye uyitinosi amaale harunsa hasiissannosi. Qoleno cubbu widira massannosi coyiwiinni xeertiꞌrate sharrama hasiissannosi. Yihowa ledo noosi jaalooma qoꞌlate dandaamisire baala assiro, Yihowa cubbosi gudise maarannositanna cimeeyyeno songo higanno gede kaaꞌlitannosita addaxxa dandaanno. Cimeeyye mittu manchi addinta maaro einotanna teꞌee buuxate woꞌnaaltanno woyite, mitte mittenti hajo addi addinni ikkitinota dideꞌanno; hakko daafira mitte mittenta hajo qorophite laꞌanno. Qoleno quwa saꞌe kaajjado yoo diyitanno.

19. Addinta maaro eate yaa mayyaate? (Hiziqeeli 33:14-16)

¹⁹ Kageeshsha ronsummonte gede, addinta maaro eate yaa loonsoommo cubbira soꞌroommo yaa calla diꞌꞌikkitino. Cubbo loosino manchi wodanasinna hedosi biddi assiꞌra hattono maaro einota leellishannore assa hasiissannosi. Tenne assate cubbo loosa aguranna Yihowa seerinni gala hasiissannosi. (Hiziqeeli 33:14-16 nabbawi.) Cubbo loosino manchi roore mitiiꞌma hasiissannosihu alba Yihowa ledo noosi jaalooma qoꞌlateeti.

CUBBAATAAMMU AAGINTAABBE HIGGANNO GEDE WOSHSHA

20-21. Jawa cubbo loosino mancho kaaꞌla dandiineemmohu hiittoonniiti?

²⁰ Yesuusi soqqanshosi yannara loosannoha mitto lowo geeshsha hasiisanno looso kulanni “Ani cubbaataammu aagintaabbe higganno gede woshshammora [dayommo]” yiino. (Luq. 5:32) Ninke hasattono tenne ikka hasiissannose. Hanni mittu muli jaalinke jawa cubbo loosino yine hendo. Tenne anfummoro maa assa hasiissannonke?

²¹ Loosino cubbo maaxate woꞌnaalleemmoha ikkiro, jaalanke gawajjinannilla heeꞌnoommo. Qoleno Yihowa baalankare laꞌꞌanni noo daafira, cubbo maaxa didandiinanni. (Law. 5:21, 22; 28:13) Songote cimeeyye kaaꞌlitasira hasidhannota qaagiissite jaalakki kaaꞌla dandaatto. Jaalikki loosino cubbo cimeeyyete kula giwiro, cimeeyyete ati kula hasiissannohe; hatto assakki jaalakki addinta kaaꞌla hasiꞌrattota leellishshanno. Jaalikki cimeeyyete kaaꞌlo afiꞌra hoogironna maaro ea hoogiro, Yihowa ledo noosi jaaloomi baꞌꞌaraati!

22. Aananno birxichira maa ronseemmo?

²² Kayinni mittu manchi seeda yanna jawa cubbo duucha hige loosanni heeꞌrino daafira cimeeyye bohamanno gede assiturona? Hatto yaa insa hakkoye mancho dimarartino yaateni? Aananno birxichira, Yihowa cubbaataamma shaqqillunni seejjanno garanna ninkeno isi faale haꞌra dandiineemmo gara ronseemmo.