1921 Mittu Xibbi Diri Albaanni

ARFAASA 1, 1921 Agarooshshu Shaera, chaachaaroota Qullaawu Maxaafi Rosaano togo yine xaꞌminoonni: “Tayixe loosate quqquxammoommo loosi hiikkonneeti?” Tenne xaꞌmora dawaro qolloonnihu sabbaka hasiissannonsata kultannota Isayaasi 61:1, 2 qummi assineeti. Qummeeshshu togo yaanno: “Gadadantinorira dancha duduwo duduwate . . . Kaaliiqi buure soyinoe. . . . Maganinkeha rabbate barra kuleemmo gede [soyinoe].”

WAAJJITANNOKKI SAWAAKOOTA

Qullaawu Maxaafi Rosaano sabbakate loosonsa umo fushshate, waajjitannokkire ikka hasiissinonsa. Korkaatuno insa jooguulleho “dancha duduwo” duduwa calla ikkikkinni bushuulleho “rabbate barra” kula hasiissannonsa.

Kanaadaho heeꞌrinohu Roduu Jooni Henirii Haskini mannu giwisirono waajjikkinni sabbakino. Isi 1921 badheessu woggara, mittu Metodistete ammaꞌno qeesichinni xaadino. Roduu Haskini togo yee isi ledo hasaawa hanafi: “Atinna ani Qullaawu Maxaafi daafira dancha hasaawa hasaawa hasiissannonke. Sumuu yaa hoongoommo coyi heeꞌriro nafa, hasaawanke agurre keerunni babbaxxa dandiineemmo.” Kayi coyi hatto diꞌꞌikkino. Roduu Haskini hakkawoyite ikkinore kulanni togo yiino: “Shiima daqiiqa hasaambummohu gedensaanni, [qeesichu] hanqe saanqa lowo geeshsha ganino daafira, saanqu hincilaallo uulla giggiltuha lawinoe.”

Qeesichu “Hadhe ammaninokki manna disabbakaa?” yee boolaqiꞌri. Roduu Haskini kayinni cuqqi curuqqino diyiino; isiwiinni baxxe haꞌri woyite kayinni wodanisinni, ‘Dihasaawanni noommonku ammanoottokkihu ledootiyya!’ yee hedino.

Qeesichu layinki soodo beetekiristaanete sabbakanni, Roduu Haskini suꞌma hunino. Roduu Haskini togo yiino: “Isi konne katama soꞌrisiisaano baala rooru soꞌrisiisaanchi dayinona qorophe yiino; qoleno ane shinanni gede kulino.” Ikkirono Roduu Haskini tenne waajje sabbaka diagurino; isinni lowo mannira farciꞌrino. Togo yiino: “Soqqanshoꞌyanni lowo geeshsha hagiidhoommo. Mitu manni isinni, ‘Ati Maganu mancho ikkoottota anfoommo!’ yiinoe; qoleno hasiisannoheri heeꞌriro uyineemmohe yiinoe.”

HOJJUNNA MAATETE XIINXALLO

Mannu Qullaawu Maxaafi yaannore roore huwatanno gede kaaꞌlate, Qullaawu Maxaafi Rosaano xa Baqqi Yiiyye! yineemmo metseetera Qullaawu Maxaafi xaꞌmonna dawaro ganyite qixxeessite fushshitanno. Qoleno annuwunna amuuwu oosonsa ledo hasaabbara yine wedellootaho qixxeessinanniti Qullaawu Maxaafi xaꞌmuwa no. Annuwunna amuuwu “oosonsa tenne xaꞌmuwa xaꞌmite, oosonsa Qullaawu Maxaafi giddonni dawaro afidhanno gede kaaꞌlitannonsa.” “Qullaawu Maxaafi giddo meꞌꞌe maxaaffa no?” yitannote gedee xaꞌmuwa ooso Qullaawu Maxaafi daafira xinta ikkinore affanno gede kaaꞌlitannote. “Mittu mittunku addu Kiristaanchi dartu iillaera dandaanno yee heda hasiissannosi?” yitannote gedee xaꞌmuwa kayinni wedellootu waajjitannokki sawaakoota ikkitanno gede kaaꞌlitannonsa.

Hakkawaro roore Qullaawu Maxaafi egenno noonsarira qixxeessinanniti Qullaawu Maxaafi xaꞌmonna dawarono no; tenne xaꞌmuwara dawaro noohu Qullaawa Borro Xiinxallo yinanni maxaaffa giddo umi maxaafiraati. Tini qixxaawo lowo kume ikkanno manna kaaꞌlitino; ikkirono, gedensoonni tenne xaꞌmuwa qixxeessa agurroonnita egensiinsoonni. Mayira?

HAARO MAXAAFA!

*Maganu Gingilaate* yinanni maxaafa

Nabbambanni qoola kultanno kaarde

Xaꞌmuwa amaddino kaarde

Hakkawaro dirijjitete giddo albisa ikkite loossanni noo roduuwi, haaro Qullaawu Maxaafi rosaano Qullaawu Maxaafiha xinta ikkino halaale dirimu dirimunni rossuro woyyannota huwattino. Konni daafira, Bocaasa 1921nni Maganu Gingilaate yinanni maxaafa fushshinoonni. Konne maxaafa adhannohu hasatto noonsa manni uminsa xiinxallannota Qullaawu Maxaafi xiinxallo hanafanno gedeno koyinsanni. Tini xiinxallo mannu “Maganu mannu oosora hegere heeshsho oye maassiꞌrannota” huwatanno gede kaaꞌlitino. Tenne xiinxallo gari hiittooti?

Mittu manchi konne maxaafa adhanno woyite, maxaafu giddonni hiikkonne qoola nabbawannoro kultannota shiinqa kaarde ledo uyinannisi. Aantanno lamalara, nabbawino qooli aana xintantino xaꞌmuwa amaddino kaarde uyinannisi. Hattee kaardera jeefote, tenne hiikkonne qoola nabbawannorono kullanni.

Tonaa lame lamala geeshsha lamalate kiiro, rosaanchoho qooxeessisira noo songo widoonni kaarde sonkannisi. Roore anga tenne kaarduwa sokkannori, geerra roduuwaati woy minunni mine hadhe soqqante affannokkireeti. Lawishshaho, Ameeriku gobbara, Pensiliveeniyaho, Milvali yinanniwa heedhannoti Ana Katriin Gardiner togo yitino: “Maganu Gingilaate yinanni maxaafi fulita, qaafa dandiitannokkiti rodooꞌya Tayli, xaꞌmo borreessinoonni kaarduwa mannaho sokkanni albinni roore soqqama dandiitino.” Hatti xiinxallo gooffanno woyite, rosaanchu Qullaawu Maxaafire albinni roore rosanno gede kaaꞌlate marre hasaawinsanni.

ALBILLITTE LOONSANNI LOOSO

Hakku diri goofita, Roduu Jooseefi Frankiliini Raazerfordi baalante songora sokka borreesse soyino. Isi sokkate giddo, “Tayixe loonsoommohu [Maganu] Mangiste loosi wolu diri baalunkunni roore halaꞌladoho, hattono dancha guma abbinoho” yiino. Isi lede togo yiino: “Xaano loonsannihu lowo loosi gate no. Wolootuno konne maassamino looso loossanno gede jawaachishshensa.” Qullaawu Maxaafi Rosaano tenne amaale harunsitinoti xabbe leeltino. Insa 1922nni, mittoreno waajjitukkinni Maganu Mangiste albinni roore egensiissino.

Waajjitannokki Jaalla

Qullaawu Maxaafi Rosaano mimmito kaaꞌlite rodiimmate baxille leellishshino. Aante noo xagge leellishshannonte gede, insa mimmitoho ‘qarru barra iillitannore’ waajjitannokki jaalla ikkitino.—Law. 17:17.

Maakisanyo, Onkoleessa 31, 1921nni Ameerikaho Tulsa yinanni katamira mitto kolishsho mancho faranjitte mancho ganino yine kassanse usurroonni. Hakkuyi gedensaanni, 1,000 saꞌanno faranjooti shiimu koliddu manni ledo gaaro kayissu. Olu bayichonko halaꞌle rooru koliddu manni heeꞌrannowa Giriinwuud yinanni qooxeessa iilli. Hakkiicho 1,400 saꞌanno minnanna daddalu suuqqa mulqiꞌne kaꞌne giirroonni. Reyino manni 36ho yinoonniha ikkirono, 300 meddi yaanno manni reyikki digatino. Gedensoonni konne gaaro Tulsa Sircho Gudate Ola yinoonni.

Giriinwuud heeꞌrannohu kolishshu Qullaawu Maxaafi Rosaanchi Roduu Richaardi Jooseefi Hiili, hakkawoyite ikkinore kulanni togo yiino: “Gaaru kai hashsha, bashshonte gede songote gambooshshenke assiꞌne kaꞌnoommo. Songote gambooshshi gedensaanni, katamu mereero qawwe gannanna macciishshinummo. Gonxammo geeshsha qawwe gana diagurroonni.” Roowe, Ella 1nni, layinkiidi soodo coyi horo bushanni haꞌri. “Mitu manni daye ‘Gata hasiꞌnummoro Katamu Addaraashe haꞌra hasiissannonke’ yiinke.” Hakko daafira, Roduu Hiili minaamasinna onte oososi adhe Tulsa Katami Addaraashe xooqi. Hakkiicho, mito 3,000 ikkannohu koliddu manni mangiste ola uurrissara sokkino olanto agarteenna no.

Hatte taaera, faranjichu rodii Roduu Arteri Kilawus, worbimmatenni rodoosi kaaꞌlate kaino. Isi togo yiino: “Giriinwuud qooxeessira gaaru kainotanna mannu minna mulqiꞌranninna giira qasanni noota macciishshummoti, muxxe jaaliꞌya Roduu Hiili noo gara afate kaummo.”

Arter Kilawus Maganu Gingilaate yinanni maxaafinni 14 qaaqquulle rosiisino

Isi Roduu Hiili qae maranno woyite, mittu faranjichu olliichi qawwe adhe uurre no. Kuni olliichi Roduu Hiilira jaalaho; isira Arterino gaaro kayissannori wido lawinosi. Hakko daafira, “Konni manchi nafarira mayira dayootto?” yee hanqe coyiꞌri.

Arteri hakkawoyite ikkinore kulanni togo yiino: “Dawaroꞌya ammansiisa hoogoommesiro shee hooginoe. Roduu Hiilira jaala ikkoommotanna minisira duucha hige dayommota kulummosi.” Arterinna hakku manchi mulqidhannori Roduu Hiili jajja kissannokki gede agarte hooltino.

Hakkiinni Arteri, Roduu Hiilinna maatesi Katamu Addaraashera noota afi. Arterira olantote hajajaanchi furma gane fajjikkinni hakko noohu koliddu manni fula dandaannokkita kullisi. Arteri togo yiino: “Olantote hajajaancho xaade hasaawisa umise shota coye diꞌꞌikkitino. Hattee maate Addaraashetenni fushshe haaꞌre haꞌrammora hedoommota kulummosita, isi ‘Tenne maate seekkite agaranna towaata dandaatto?’ yee xaꞌmie. Anino hagiidhe ee yuummo.”

Arteri fajjote woraqata adhe, bayichonko Katamu Addaraashe haꞌri. Hakkiinni woraqata hakko noo polisichira uyi; polisichuno dhagge assiꞌre, “Olantote hajajaanchi umisi furma ganino woraqataatiwe! Techo kawiichinni manna fushshoottohu umihu ate ikkoottota afoo?” yii. Hakkiinni, Arterinna polisichu Roduu Hiilinna maatesi noowa martu. Baalunku Arteri makeena giddite qaera hadhino.

Roduu Arteri, Roduu Hiilinna maatesi keere noota buuxino. Wolootu Roduu Arteri worbimmanna rodiimmate baxillesi laꞌe dhagge assidhino. Isi togo yiino: “Hiili jajja agara kaaꞌlie olliichi Yihowa Farciꞌraasine albinni roore ayirrisannoha ikkino. Qoleno wolu batinyu manni, mereeronke sirchu babbadooshshi nookkitanna Maganu manni mereero heeꞌnoommori ninke baalunku taalo ikkinoommota lae halaale afa hasiꞌrino.”