Qaagatto?

Muli yannara fultinota Agarooshshu Shae metseetta seekkite nabbawootto? Hanni aante noo xaꞌmuwara dawaro qolate woꞌnaali:

Faarso 103:8 Yihowahu ‘bagamannokki baxilli batiꞌra’ ikkinota kultanno; tini maa buunxeemmo gede assitannonke?

Yihowa bagamannokki baxillisinni soꞌronke gatona yaannonketa anfoommo. Faarso 103:8 isi baxillisinni kaaꞌlannonketano buuxissannonke. Ninkeno isi faale haꞌra hasiꞌneemmo.—w21.01, qool. 21.

Yihowa umimmate silxaane xintinohu mayiraati?

Yihowa umimmate silxaane xintinohu maatesi baxanno daafiraati. Tini qixxaawo isiti ammanantino maate keeru nootanna qinaabbinota ikkitanno gede assitino. Tenne qixxaawo ledo sumuu yaanno garinni heeꞌrannohu mittu mittunku maatete miili, mitto coye murannohunna hakkonne coye assinanni gede massagannohu ayetiro afino.—w21.02, qool. 3.

Kiristaanu sokka sonkanni appilikeeshiine horoonsiꞌranno woyite qoropha hasiissannonsahu mayiraati?

Mittu Kiristaanchi togoo appilikeeshiine horoonsiꞌrannoha ikkiro, jaalla assiꞌranno mannano hayyotenni doodha hasiissannosi. Lowo manni noo gaamo giddora ea dancha jaalla doodha qarra ikkitanno gede assitanno. (1 Xim. 5:13) Qoleno mitootu tenne appilikeeshiine widoonni buunxoonnikkire tareessitara woy roduuwu maamaranke daddaloho horoonsidhara dandiitanno daafira qoropha hasiissannonke.—w21.03, qool. 31.

Yihowa, Yesuusi lowo geeshsha qarrame reyara fajjinohu mitu korkaati maati?

Yesuusi haqqaho sutame reyinohu umi korkaati, Yihudu manna rumote giddonni fushshateeti. (Gal. 3:10, 13) Layinki korkaati Yihowa Yesuusa Kakkalaanote Biilo ikkanno woyitira qajeelsateeti. Sayikki korkaati, Yesuusi reyote geeshsha ammanaminoha ikkasi, mannu ooso buutote qarri iillinsarono Maganoho ammanantinore ikka dandiitannota leellishshanno. (Iyo. 1:9-11)—w21.04, guf. 16-17.

Soqqamatto woyite manna mine marte hoogittoro maa assa dandaatto?

Insa roore mine heedhara dandiitanno yannara marte hasaawisate woꞌnaala dandaatto. Qoleno addi addi bayicho sabbakate woꞌnaali. Hakkiinnino sae addi addi garinni sabbaka lawishshaho sokka borreessite farciꞌra dandaatto.—w21.05, guf. 15-16.

Soqqamaasinchu Phaawuloosi “Seeru widoonni seeraho reyommo” yaasi mayyaate? (Gal. 2:19, NW)

Muse Seeri mannu ooso guuntete xeꞌne noonsata anfanni gede assino; hattono Israeele Kiristoosiwa iillishino. (Gal. 3:19, 24) Tini Phaawuloosi Kiristoosa ammane adhanno gede assitinosi. Konni garinni Phaawuloosi, ‘seeraho reyino;’ xaate isi konni seerinni galannoha diꞌꞌikkino.—w21.06, qool. 31.

Yihowa cincate dancha lawishsha ikkinonkehu hiittoonniiti?

Yihowa suꞌmasi hunnoonnita, aliidimmasi gimboonnita, mite oososi finqiltinota, daawuloosi kapho, baxanno soqqamaanosi qarrantannota, jaallasi reyo, bushuullu manna miiccannota, mannu ooso maaeellenna baatto huntannore cincino.—w21.07, guf. 9-12.

Yooseefi cincate dancha lawishsha ikkinohu hiittoonniiti?

Yooseefi roduuwisi miiccinosita cince heeꞌrino. Iso kaphunni kassansoonnisi hattono Gibitsete lowo diro usuramino.—w21.08, qool. 12.

Hage 2:6, 20-22 hiittee shafama daafira kulloonni?

Daga Maganu Mangiste sokka macciishsha gibburono batinyu manni halaalu minira dayino. Muli yannara daga baꞌanno woyite jeefote shafama shafantanno.—w21.09, guf. 15-19.

Soqqammeemmo woyite hexxo mudha hasiissannonkekkihu mayiraati?

Yihowa isira soqqamate assineemmore laꞌꞌanno hattono hagiidhanno. Hexxo mudha hoongummoro hegere heeshsho afiꞌneemmo.—w21.10, qool. 25-26.

Leewaawoota fooliishsho 19, “Heeshshoꞌne baalatenni qullaawoota ikke” yitanno amaale loosu aana hosiinseemmo gede kaaꞌlitannonkehu hiittoonniiti? (1 Phe. 1:15)

Tenne hedo haaꞌnoonnihu Leewaawoota 19:2 ikkikki digatino. Leewaawoota fooliishsho 19te, 1 Pheexiroosi 1:15 noo amaale barru barru heeshshonkenni harunsa dandiineemmo gara kulannohu batinyu lawishshi no.—w21.12, guf. 3-4.