‘Yihowa Hasidhannori Danchare Dihoogganno’

1. Daawitira iillinosi qarri maati?

DAAWITI lubbosi gatisiꞌrate xooqanni no. Wolqaataamu Israeelete moote Saaooli iso shaate murciꞌrino. Daawiti sagale hasiissusita, Noobi yinanni katama mare onte tima uyinannisi gede xaꞌmiꞌrino. (1 Sam. 21:1, 3) Gedensoonni isinna mannisi maaxamannoha mitto goda afiꞌrino. (1 Sam. 22:1) Daawitira togoo qarri iillinosihu hiittoonniiti?

2. Saaooli qarru giddo tugannosire assinohu ma garinniiti? (1 Saamueeli 23:16, 17)

² Daawiti mannu baxannosi daafiranna olaho duucha hige qeelinohura Saaooli lowo geeshsha hinaasino. Qoleno Saaooli Yihowara hajajama giwino daafira, Yihowa iso Israeelete moote ikkannota giwinotanna moote ikkara Daawiti doorinota afino. (1 Saamueeli 23:16, 17 nabbawi.) Saaooli Israeelete moote ikkino daafira lowo olantonna kaaꞌlanno manni noosi; hakko daafira Daawiti lubbosi gatisiꞌrate xooqa hasiissinosi. Addanka Saaooli, Maganu Daawiti moote assannota hooleemmo yee hedino ikka? (Isa. 55:11) Qullaawu Maxaafi tenne daafira kulannori dino; ikkollana huluullammeemmokkihu mittu coyi no: Saaooli qarru giddo tugannosire assanni no. Maganu ledo gaarantannori qeelamansa digattanno!

3. Daawitira qarru tuncu yiinosiha ikkirono macciishshaminosiri maati?

³ Daawiti silxaanete wojji yaannoha diꞌꞌikkino. Israeelete moote ikkate doodhinohu Daawiti umosi diꞌꞌikkino. Tennera doorinosihu Yihowaati. (1 Sam. 16:1, 12, 13) Saaooli Daawiti tiyyiꞌre giwino. Ikkollana Daawiti togoo qarri iillinosi daafira Yihowa dibushiishino; qoleno sagale hooginoteranna godu giddo maaxaminotera digungumino. Isinni baxissannota galatu faarso borreessinohu godu giddo maaxame noo yannara ikkara dandaanno; “Kaaliiqa hasidhannori . . . danchare dihoogganno” yaannoha cuꞌmote qummeeshsha haaꞌnoonnihuno tenne faarso giddonniiti.—Far. 34:10.

4. Hiikkuri xaꞌmuwa hasaambeemmo? Kuri xaꞌmuwa hasiissannota ikkitinohu mayiraati?

⁴ Xaa yannara batinye Yihowa soqqamaanora mito woyite sagalenna wolere heeshshote hasiisannore afiꞌra qarra ikkitannonsa.b Hakko iso fayya ubbu kawa batinye Yihowa soqqamaanora togoo qarri iillinonsa. “Lowo qarri” woy bayiru qarri gambise dayi kiiro kawii saino qarri iillannonketi dihuluullissannote. (Mat. 24:21) Hanni tenne wodanaho wodhine, aante noota shoole xaꞌmo hasaambo: Daawiti ‘danchare hooginokkihu’ ma garinniiti? Noonkerinni kassi yaa rosa hasiissannonkehu mayiraati? Yihowa towaatannonketa huluullammeemmokkihu mayiraati? Albillitte dagganno yannara xaanni qixxaawa dandiineemmohu hiittoonniiti?

“HOOGEEMMORI MITTURINO DINO”

5-6. Faarso 23:1-6 Daawiti Maganu soqqamaano “danchare dihoogganno” yaasi mayyaatero huwanteemmo gede kaaꞌlitannonkehu hiittoonniiti?

⁵ Daawiti Yihowa soqqamaano “danchare dihoogganno” yaasi mayyaate? Faarso 23 noota tenne hedo ledo sumuu yitanno yaatto xiinxallanke tenne huwatate kaaꞌlitannonke. (Faarso 23:1-6 nabbawi.) Daawiti tenne fooliishsho hanafinohu “Kaaliiqi allaalaanchoꞌyaati; hoogeemmori mitturino dino” yeeti. Daawiti hakkiinni aane geedanno coye qummi assino; kunino isi Yihowa Allaalaanchosi asse adhino daafira afiꞌrinoho falahinoho ayyaanaamittete atooteeti. Yihowa iso “keeraanchimmate doogora” massaginosi; hattono qarrunna faffote yannara ammaname kaaꞌlinosi. Daawiti Yihowahu “daffino qanchira” nooha ikkirono qarru iillannosita afino. Isi “reyo lawanno tunsichi giddoonni hige” haꞌranni noohu gede asse hede hexxo mudhino woyiti no; hattono isira diinu noosi. Ikkollana Yihowa Allaalaanchosi ikkino daafira Daawiti ‘diwaajjanno.’

⁶ Ikkina Daawiti ‘danchare hooginokkihu’ ma garinniiti? Isira, Yihowawa gamba yee heeꞌranno gede kaaꞌlannosiri baalunkuri noosi. Isi hagiirraamo ikkannohu maalaamittete coye afiꞌranno daafira diꞌꞌikkino. Daawiti Yihowa uyinosi coyinni kassi yiino. Daawiti lowori gede asse laꞌꞌannohu Maganu aannosi atooteetinna isiwiinni afiꞌranno agarooshsheeti.

7. Luqaasi 21:20-24 kultanno garinni, umi xibbi diro Yihudaho heeꞌrino Kiristaanira iillinonsa coyi maati?

⁷ Daawiti coyiꞌrinori maalaamittete coye roorsiꞌra hasiissannonkekkihu mayiraatiro huwanteemmo gede kaaꞌlannonke. Noonkehu maalaamittete coyinni hagiidha dandiineemmo; kayinni heeshshonke giddo maalaamittete coye balaxisiisa dihasiissannonke. Umi xibbi diro Yihudaho heeꞌrinohu mitu Kiristaani konne lowo geeshsha hasiisanno halaale huwatino. (Luqaasi 21:20-24 nabbawi.) Yesuusi insa, “Yerusaalame diinu gaaddo doyissite” amaddanno yanna daggannota kule qorowisiisinonsa. Kuni coyi ikkanno woyite insa ‘ilaallate widira higge xooqa’ hasiissannonsa. Insa xooqquro heeshshonsa gatisidhanno; kayinni lowo coye agurte xooqa hasiissannonsa. Boodu diri albaanni fultinoti mitte Agarooshshu Shae togo yitino: “Insa gatensanna minensa agurte xooqqino; wole agurina minensa noo uduunne nafa diadhitino. Insa Yihowa agarannonsatanna kaaꞌlannonsata addaxxite, lowo geeshsha hasiisannonsaha lawanno coyinni roore Yihowa balaxisiissino.”

8. Umi xibbi diro Yihudaho heeꞌrino Kiristaanira iillinonsa coyinni hiikkonne kaajja roso ronseemmo?

⁸ Umi xibbi diro Yihudaho heeꞌrino Kiristaanira iillinonsa coyinni hiikkonne kaajja roso ronseemmo? Aleenni kulliti Agarooshshu Shae togo yitino: “Albillitte maalaamittete coyira noonke lao hiittootero leeltanno gede assanno fonqoli iillankera dandaanno; maalaamittete coye roorsiꞌneemmonso Maganoho ammanamme heeshsho afiꞌra roorsiꞌneemmo? Goofimarchu daanno woyite, iillannonke qarra dandiine saꞌꞌanna mito coye facci assine agura hasiissannonkeha ikkara dandaanno. Umi xibbi diro Yihudunni fule xooqino Kiristaani gede, ninkeno dandiinummore baala assate qixxaawa hasiissannonke.”c

9. Soqqamaasinchu Phaawuloosi Ibiraawootu Kiristaana amaalino amaale jawaachishshinohehu hiittoonniiti?

⁹ Yihudaho heeꞌranno Kiristaanira noonsare baalankare agure haꞌranna marinowa heeshsho haaro ikke hanafa mageeshshi qarra ikkitinonsaro heda dandiineemmo. Insara Yihowa heeshshote hasiisannonsare aannonsata addaxxate, ammana hasiissinonsa. Ikkollana insa hasiissannonsa kaaꞌlo afidhino. Roomu olanto Yerusaalame doyissitara ontu diri albaanni soqqamaasinchu Phaawuloosi Ibiraawootu Kiristaanira mite kaaꞌlitanno amaale kulinonsa. Isi togo yiino: “Woxu baxille qorophe; nooꞌnehu ikkoꞌne! Maganu, ‘Horo diagureemmohe; dicallachisheemmohe’ yiino. Kunnira hawaqiꞌne, ‘Kaaliiqi kaaꞌlaanchoꞌyaatina diwaajjeemmo. Mannu ma assannoe?’ yineemmo.” (Ibi. 13:5, 6) Roomu olanto dagge horritara albaanni Phaawuloosi amaalinota tenne amaale harunsino Kiristaana, haarote marinowa bikku heeshsho heeꞌra qarrissinonsakkiti dihuluullissannote. Insa Yihowa heeshshote hasiisannonsare aannonsata horo dihuluullantino. Phaawuloosi coyiꞌrinori ninkeno Yihowa hasiisannonkere aannonketa addaxxineemmo gede assannonke.

“INTEEMMORINNA UDDIꞌNEEMMORI HEEꞌRINKERO IKKANNONKE”

10. Phaawuloosi ‘rosino’ coyi maati?

¹⁰ Phaawuloosi Ximootewoosirano togoo amaale amaalino; tini amaale ninkerano kaaꞌlitannote. Isi togo yee borreessino: “Inteemmorinna uddiꞌneemmori heeꞌrinkero ikkannonke.” (1 Xim. 6:8) Hatto yaa dancha sagale ita, dancha mine afiꞌra woy dancha dancha uddano hidha didandiineemmo yaateni? Phaawuloosi yaanni noohu hatto diꞌꞌikkino. Isi noonkehu maalaamittete coyinni kassi yaa hasiissannonketa kulanni no. (Fil. 4:12) Phaawuloosi ‘rosino’ coyi konneeti. Noonkehu muxxe coyi Maganinke ledo noonke jaaloomaati ikkinnina maalaamittete coye diꞌꞌikkino.—Imb. 3:17, 18.

11. Muse Israeelete mannira kulinorinni noonke coyinni kassi yaate daafira maa ronseemmo?

¹¹ Ninke hasiisannonke yine hendeemmorinna Yihowa ninkera hasiisanno yee hedannori mitto ikka hoogara dandaanno. Hanni Israeele halalla 40 diro heedhuhu gedensaanni Muse mayinonsaro laꞌno. Isi togo yiino: “Angaꞌnenni assitinoonni coyi baalunkura Maganiꞌne Kaaliiqi lowo atoote uyinoꞌne. Tenne halaꞌlado halallitte gobbara raataabbini yanna baalate towatanni agarinoꞌne. Kunni shoyilluu diri woꞌmu giddo Kaaliiqi kiꞌne ledo noo daafira, xeinoꞌneri mitturino dino.” (Mar. 2:7) Hakkuyi 40 diri giddo Yihowa Israeelete menna yinanni sagale uyinonsa. Insa Gibitsete gobbanni fultu woyite noonsa uddano digooffino. (Mar. 8:3, 4) Mitu Israeelete manni noonsa coyi gariha ikkinokkihu gede asse hedirono, Muse kayinni hasiisannonsa coyi baalu noonsata qaagiissinonsa. Yihowa noonke coyinni kassi yaa ronsummoro lowo geeshsha hagiidhanno; isi, noonke coyi shiima ikkiro nafa galanteemmore ikkinammoranna isi uyinonke elto gede assine laꞌnammora hasiꞌranno.

YIHOWA TOWAATANNOꞌNETA ADDAXXE

12. Daawiti umosi ikkikkinni Yihowa addaxxannota leellishannori maati?

¹² Daawiti, Yihowa baxxannosirira ammanaminoha ikkinotanna towaatannonsata afino. Daawiti 34^ki faarso borreessi woyite qarru giddo nooha ikkirono, isi Yihowa ‘sokkaasinchi ledosi’ noota ammanate illenni laino. (Far. 34:7) Daawiti Yihowa sokkaasincho diinu daannota agaranno olamaanchi ledo heewisiisanni nooha ikkara dandaanno. Daawiti umisi worba olamaanchooti, hattono moote ikkanno gede Yihowa qaale einosi; ikkirono isi diina qeelate, corqaayye olate dandoosi woy bise horoonsiꞌrate dandoosi diaddaxxino. (1 Sam. 16:13; 24:12) Daawiti Yihowa addaxxino; korkaatuno isi, Yihowa sokkaasinchi Magano ‘waajjitannori ledo heeꞌre agarannonsata’ afino. Hige ninke xaa yannara maalaletenni agarooshshe afiꞌneemmo yine dihendeemmo. Kayinni Yihowa addaxxitannori reyituro nafa hegere heeshsho afidhannota anfoommo.

13. Maagoogi Googi siꞌꞌi yannara tidhinoommokkire lambeemmohu mayiraati? Ikkollana beꞌe yineemmokki gede assannonkeri maati? (Aaniidi qoolira noo misile lai.)

¹³ Muli yannara, Yihowa ninke gatisa dandaannota ammanneemmoronna teꞌee anfanni gede assanno fonqoli iillannonke. Maagoogi Googi yaano buusantino daga Maganu manna siꞌanno woyite, shitannonke yine yaandeemmoha ikkara dandaanno. Yihowara ninke gatisate dandoo noositanna gatisannonketa addaxxa hasiissannonke. Laꞌannonke daga tidhinoommokkirinna gatisannohu nookki geꞌreewi gede assite heddanno. (Hiz. 38:10-12) Qodhinoommo massaari dinonke hattono olaho diqajeelloommoreeti. Daga ninke shiimurinni qeeltannohu gede assite heddanno. Ninke Yihowa sokkaasine mannasi gatisate qixxaabbe noota ammanate illenni laꞌneemmo; daga kayinni ammanate ille noonsakki daafira sokkaasine laꞌꞌa didandiitanno. Insa gordu olanto ninke gatisate kaꞌanno woyite, lowo geeshsha dhagge assidhanno!—Aju. 19:11, 14, 15.

ALBILLITTETE YANNARA XAANNI QIXXAAWI

14. Albillitte dagganno yannara qixxaawate maa maa assa dandiineemmo?

¹⁴ Albillitte dagganno yannara xaanni qixxaawate maa assa dandiineemmo? Barrunni mitto barra maalaamittete coye agura hasiissannonke daafira quwa saꞌne baxa dihasiissannonke. Qoleno noonkerinni kassi yaanna Yihowa ledo noonke jaaloominni lowo geeshsha hagiidha hasiissannonke. Magano roore anfummo kiiro, isi Maagoogi Googi siꞌꞌi yannara ninke gatisate dandoo noosita albinni roore ammanneemmo.

15. Daawiti Yihowa irraawisannosikkita addaxxanno gede kaaꞌlinosihu Yihowa hakkuyira albaanni assinosi coyi maati?

¹⁵ Hanni Daawiti kaaꞌlinosiri woluri maatironna ninkeno iillannonke fonqolira qixxaambeemmo gede kaaꞌlannonkeri maatiro laꞌno. Daawiti togo yiino: “Kaaliiqi shaqqado ikkinota shiqqine [qamassine, NW] laꞌe; iso golosi assiꞌrino manchi baꞌraaꞌrinoho.” (Far. 34:8) Tini yaatto Daawiti Yihowa kaaꞌlannosita addaxxinohu mayiraatiro leellishshanno. Daawiti duucha woyite Yihowa addaxxanno; Maganisino horo irraawise diegenninosi. Daawiti wedellichu noo yannara jigeessunna wolqaataamu Filisxeemichi Goliyaadi ledo gaaramino; isi Gooliyaadi togo yiino: “Kaaliiqi techo ate angaꞌyara sayise aannohe.” (1 Sam. 17:46) Gedensoonni Daawiti Moote Saaoolira soqqamanni heeꞌreenna Saaooli iso duucha hige shaate woꞌnaalino. Yihowa kayinni “Daawiti ledo no.” (1 Sam. 18:12) Daawiti, Yihowa hakkuyira albaanni kaaꞌlinosi daafira, xa iillanni noosi qarrirano Yihowa addaxxa hasiissannosita afino.

16. Yihowa danchumma qamanse laꞌꞌa dandiineemmohu ma garinniiti?

¹⁶ Xaa yannara Yihowa biddishsha addaxxineemmoha ikkiro, isi albillitte dagganno yannara gatisannonketa albinni roore addaxxineemmo. Qoqqowunna woradu gambooshshe haꞌneemmo gede loosiisaanchonke fajjo xaꞌmiꞌrate woy baalanka gambooshshe haꞌratenna albinni roore soqqamate injaanno garinni loosiisaanchinke ledo hasaambe pirogiraamenke biddi assiꞌrate, Yihowa addaxxanna ammana hasiissannonke. Hanni loosiisaanchinke fajja giwinonkehunna loosunni fushshe huninonkehu gede assine hendo. Yihowa horo tuge agurannonkekkitanna woꞌmanka woyite heeshshote hasiisannonkere aannonketa addaxxineemmo? (Ibi. 13:5) Batinye woꞌma yanna soqqamaano woꞌnaalshi, Yihowa kaaꞌlo roore hasiissannonsa yannara isi kaaꞌlinonsata leellishanno. Yihowa ammanaminoho.

17. 2022hu diru qummeeshshi mayyaannoho? Kuni qummeeshshi malinoho yineemmohu mayiraati?

¹⁷ Yihowa ledonke noo daafira albillitte dagganno yanna waajjineemmo gede assannonkeri dino. Gashshootesi balaxisiinsummo geeshsha Maganinke horo tuge diagurannonke. Albillitte daggannote qarrissanno yannara qixxaawa hasiissannonketa qaangeemmo gedenna Yihowa tuge agurannonkekkita addaxxineemmo gede kaaꞌlate, Aliidi Bisi Faarso 34:10 2022ha diru qummeeshsha ikkitanno gede doorino. Qummeeshshu, ‘Yihowa Hasidhannori Danchare Dihoogganno’ yaanno.