XIINXALLOTE BIRXICHO 3
Yesuusi Wiꞌlinota Kultanno Xaggenni Maa Ronseemmo?
“Yesuusino wiꞌli.”—YOH. 11:35.
FAARSO 17 ‘Kaaꞌla Hasiꞌreemmo’
GUULCHOa
1-3. Yihowa manni wiꞌlanno gede assannonsari maa ikkara dandaanno?
MULI yanna giddo wiꞌloottohu mamooteeti? Mito woyite hagiirru batinyinni wiꞌlineemmo. Kayinni duucha woyite wiꞌlineemmohu xissiisiꞌneemmo daafiraati. Lawishshaho shiiꞌneemmo woyite wiꞌlineemmo. Loreeli yinanniti Yunayitidi Isteetisete heedhanno rodoo togo yite borreessitino: “Qaaqqoꞌya shiiꞌroomma daafira mito woyite lowo geeshsha xissiisiꞌreemmahura mitturino sheshifachishannoeri nooha dilawannoe. Togoo woyite xissoꞌya haweemmaha dilawannoe.”b
2 Wiꞌlineemmo gede assannonkeri wolurino heeꞌrara dandaanno. Jaappaanete heedhannoti Hiiroomi yinanni suwisaancho togo yitino: “Mito woyite soqqanshonniwa hasaawiseemma manni dancha duduwo macciishsha giwanno daafira dadilleemma. Hakko daafira mito woyite, Yihowa halaale macciishsha hasiꞌranno manninni xaadeemma gede kaaꞌlaera wiꞌlanni huucciꞌreemma.”
3 Aterano aleenni kulli roduuwira iillinori gedeeri iille egenninohe? Ninke giddo batinyeho togoori iille egenninonke. (1 Phe. 5:9) Yihowa ‘hagiirrunni magansiꞌra’ hasiꞌneemmo; ikkollana mito woyite shiiꞌne dadillineemmo daafira, hexxo mudhineemmohura woy Yihowara ammanama qarra ikkitannonke gede assanno fonqoli iillannonke daafira wiꞌlineemmo woyiti no. (Far. 6:6; 100:2) Togoo qarri tuncu yaannonke woyite dandiine saꞌneemmo gede kaaꞌlannonkeri maati?
4. Konni birxichira maa ronseemmo?
4 Yesuusi lawishshinni rosa dandiineemmo. Yesuusi lowo geeshsha xissiisiꞌrino daafira ‘wiꞌlino’ woyiti no. (Yoh. 11:35; Luq. 19:41; 22:44; Ibi. 5:7) Hanni isi hiittee hiittee yannara wiꞌlinoro laꞌno. Qoleno tenne xaggenni maa ronseemmoro laꞌneemmo. Hattono wiꞌlineemmo gede assannonke qarra dandiine saꞌneemmo gede kaaꞌlannonkeri maatiro ronseemmo.
YESUUSI JAALLASI DAAFIRA WIꞌLINO
Yesuusi gede shiidhe xissiisidhinore kaaꞌle (Gufo 5-9 lai)e
5. Yohaannisi 11:32-36 noo xaggenni Yesuusi daafira maa ronseemmo?
5 Hawadi woggara 32 M.D. Yesuusi jaali Aliaazaari dhiwame reyi. (Yoh. 11:3, 14) Aliaazaarira Maariyaaminna Maarta yinanniri lame meya roduuwi noosi; Yesuusi tenne maate lowo geeshsha baxanno. Kuri meenti baxanno rodoonsa shiiꞌrino daafira lowo geeshsha xissiisiꞌrino. Aliaazaari reyihu gedensaanni, Yesuusi Maariyaaminna Maarta heeꞌrannoha Biitaaniyu qacha haꞌrino. Maarta Yesuusi daanni noota macciishshituti isinni xaadate rakke fultu. Ise, “Mootichaꞌya, ati kawiicho heeꞌroottoha ikkoommero rodiiꞌya direyanno” yitu woyite mageeshshi geeshsha xissiisidhinoro heda dandaatto. (Yoh. 11:21) Yesuusi Maariyaaminna wolootu wiꞌlitanna laihu gedensaanni, isino ‘wiꞌlino.’—Yohaannisi 11:32-36 nabbawi.
6. Yesuusi Aliaazaari reyi yannara wiꞌlinohu mayiraati?
6 Yesuusi hatte yannara wiꞌlinohu mayiraati? Qullaawa Borro Seekke Huwata (Ingilizete Afoo) yaanno maxaafi togo yiino: “Jaalisi Aliaazaari reyonna Aliaazaari roduuwi xissiisiꞌrino gara laꞌꞌasi Yesuusino ‘xissiisiꞌrannonna wiꞌlanno’ gede assitinosi.”c Yesuusi muxxe jaalisi Aliaazaari dhiwami woyite qarramino garanna reyara kainota afiti hiitto ikkinoro hedanni nooha ikkara dandaanno. Qoleno, Maariyaaminna Maarta rodiinsa reyenna manchitino gara laꞌꞌasi wiꞌlanno gede assitinosiha ikkara dandaanno. Atino muli jaalakki woy maatekki miila shiiꞌroottoha ikkiro, togoori macciishshaminoheti dihuluullissannote. Hanni tenne xaggenni ronseemmoha sase roso laꞌno.
7. Yesuusi jaallasi daafira wiꞌlasi Yihowa daafira maa rosiissannonke?
7 Yihowa mayi macciishshamannonkero afanno. Yesuusi Annisi ‘ewelumma gudise’ leellishino. (Ibi. 1:3) Yesuusi wiꞌli woyite, Annisira mayi macciishshamannosiro leellishino. (Yoh. 14:9) Shiidhe xissiisidhe noottoha ikkiro, Yihowara xissokki leeltannositanna isino xissiisiꞌrannota huluullantooti. Isi dadillunni hiiqqamino wodanakki sissa hasiꞌranno.—Far. 34:18; 147:3.
8. Yesuusi shiiꞌnoommo manna kayisannota huluullammeemmokkihu mayiraati?
8 Yesuusi shiidhinoonni manna kayisa hasiꞌranno. Yesuusi wiꞌlara albaanni Maartara, “Rodiikki reyotenni kaꞌꞌanno” yiinose. Maarta Yesuusi coyiꞌrinore ammantino. (Yoh. 11:23-27) Maarta ammanantinota Yihowa soqqamaancho ikkitino daafira, lowo diri albaanni masaalaanchu Eeliyaasinna Elsai reyitinore kayissinota affinoti dihuluullissannote. (1 Mot. 17:17-24; 2 Mot. 4:32-37) Qoleno ise Yesuusi hakkuyira albaanni reyitinore kayisinota macciishshitukki digattino. (Luq. 7:11-15; 8:41, 42, 49-56) Atino shiiꞌrootto manni reyotenni kaꞌꞌannota addaxxa dandaatto. Yesuusi shiidhe dadillitino jaallasi sheshifachishanni wiꞌlasi, reyitinore kayisate quqquxamannota leellishshanno!
9. Yesuusi gede shiidhe xissiisidhinore kaaꞌla dandaattohu hiittoonniiti? Lawishsha kuli.
9 Shiidhe xissiisidhinore kaaꞌla dandiineemmo. Yesuusi Maartanna Maariyaami ledo wiꞌlinoha calla ikkikkinni, insa hasaaphanna macciishshinonsa hattono sheshifachishannore coyiꞌre jawaachishinonsa. Ninkeno shiidhe xissiisidhinore sheshifachishanna jawaachisha dandiineemmo. Awustiraaliyaho heeꞌrannohu Daani yinannihu songote cimeessi togo yiino: “Minaamaꞌya shiiꞌrummohu gedensaanni kaaꞌlo hasiissinoe. Batinyu minaannuwinna minaamuwi hashsha barra dagge hasaapheemmo woyite macciishshitannoe. Insa xissoꞌya fushshe hasaapheemmo gede kaaꞌlitinoe; hattono wiꞌlanna laꞌe disaalfattino. Qoleno insa mitore assite kaaꞌlitinoe; lawishshaho makeena hayishshiꞌra, suuqete mitore hidha hattono sagale qishiꞌra hoogeemmo woyite kuri coyibba assite kaaꞌlitinoe. Qoleno insa duucha woyite huuccatto ledoꞌya assidhanno. Insa ‘qarru barra iillitannore’ addu jaallanna roduuwa ikkansa leellishshinoe.”—Law. 17:17.
YESUUSI OLLIICHISI DAAFIRA WIꞌLINO
10. Luqaasi 19:36-40 geeshsha kulloonni ikkito xawisi.
10 Yesuusi Niisaani 9, 33 M.D Yerusaalame iillino. Isi katama iilla rahita lowo manni gamba yiino; hattono iso Mootensa asse adhate mannu uddanna abbe albaasiinni doogote karino. Hatti lowo geeshsha hagiirsiissanno yannaati. (Luqaasi 19:36-40 nabbawi.) Ikkollana hakkiinni aane ikkinori Yesuusi rosaano heddinokkire ikkara dandaanno. “Yesuusi Yerusaalame iille laihu gedensaanni katamu daafira [wiꞌlino].” Isi wiꞌlanni, Yerusaalamete heeꞌranno mannira iillanno qarri daafira masaalino.—Luq. 19:41-44.
11. Yesuusi Yerusaalamete heeꞌranno manni daafira wiꞌlinohu mayiraati?
11 Yesuusi mannu anga fane haaꞌrinosiha ikkirono, gobbasira heeꞌrannohu rooru manni Maganu Mangiste sokka macciishsha hasiꞌrannokkita afino daafira baasa dadillino. Konnira Yerusaalamete katami diigame baꞌꞌanno; hattono baotenni gatannohu Ayihudete manni qafadame wole gobba haꞌranno. (Luq. 21:20-24) Hige ma assinanni Yesuusi balaxe kulinonte gede batinyu manni iso giwino. Heeꞌratto qooxeessira noohu rooru manni Maganu Mangiste sokka macciishshanno? Halaale rosiisate sharrantanni heedheennanni macciishshe adhanno manni shiima calla ikkiro, Yesuusi wiꞌlinota kultanno xaggenni maa rosatto? Hanni wole sase roso laꞌno.
12. Yesuusi olliichisi daafira wiꞌlasi Yihowa daafira maa rosiissannonke?
12 Yihowa mannaho hedannoho. Yesuusi wiꞌlasi Yihowa mannaho mageeshshi geeshsha hedannoro qaangeemmo gede assitannonke. Yihowa, “baalunku aagintaawe higara” ikkinnina “ayino baꞌꞌara” dihasiꞌranno. (2 Phe. 3:9) Xaa yannara olliichinke mannira dancha duduwo wodaninsara coanno garinni kulate sharramme, banxeemmonsata leellisha dandiineemmo.—Mat. 22:39.d
Yesuusi gede, sabbakate pirogiraameꞌne biddi assidhe (Gufo 13-14 lai)f
13-14. Yesuusi manna mararannota leellishinohu hiittoonniiti? Ninke kuni akati heeꞌrannonke gede assiꞌra dandiineemmohu ma garinniiti?
13 Yesuusi diinaggaawe sabbakino. Isi afiꞌri faro baala horoonsiꞌre sabbake manna baxannota leellishino. (Luq. 19:47, 48) Yesuusi tenne assanno gede kakkayisinosiri maati? Isi manna mararanno daafiraati. Mito woyite batinyu manni Yesuusi rosiisannore macciishsha hasiꞌre daanno daafira, isinna rosaanosi “sagale ita nafa didandiitino.” (Maq. 3:20) Qoleno Yesuusi macciishshannosi manni giddo mittoho injaannosihu hashsha ikkino daafira, hashsha nafa rosiisate maahoyye yiino. (Yoh. 3:1, 2) Umi qara Yesuusi rosiisinore macciishshinohu rooru manni isi rosaano diꞌꞌikkino. Kayinni Yesuusi macciishshinosi mannira baalaho seekke farciꞌrino. Ninkeno xaa yannara afiꞌnummo faro baala horoonsiꞌne mannu baalu dancha duduwo macciishshanno gede assa hasiꞌneemmo. (Soq. 10:42) Tenne assate, soqqammeemmo gara biddi assiꞌra hasiissannonkeha ikkara dandaanno.
14 Pirogiraameꞌne biddi assidhe. Soqqammeemmo yanna soorrineemmokkiha ikkiro, dancha duduwo macciishsha hasiꞌranno manna xaada hoongammora dandiineemmo. Matilda yinanni suwisaancho togo yitino: “Minaanniꞌyanna ani babbaxxitino saatera sabbakate woꞌnaalleemmo. Soodo widoonni daddalu qooxeessira sabbankeemmo. Barru taalo lowo manni gobba heeꞌranno daafira borrote gaare horoonsiꞌne sabbankeemmo. Hawarro mannu minensa heeꞌranno daafira minunni mine haꞌre sabbaka dancha ikkitinota huwantoommo.” Ninkera injiitanno yannara calla sabbakantenni, mannunni roore xaada dandiineemmo yannara sabbakate pirogiraamenke biddi assiꞌra hasiissannonke. Hatto assinummoro Yihowa hagiidhannoti dihuluullissannote.
YESUUSI ANNISI SUꞌMI QULLAAMBERI YAACHISHEENNASI WIꞌLINO
Yaaddo amaddannoꞌne woyite, Yesuusi gede Yihowa eeggifattine huuccidhe (Gufo 15-17 lai)g
15. Luqaasi 22:39-44 kultanno garinni Yesuusi reyara albaanni noohu jeefote hashsha mayi ikkino?
15 Yesuusi Niisaani 14, 33 M.D hashsha Geetesemaane yinanniwa kaashshu base haꞌrino. Isi hakkiicho huuccattotenni Yihowara giddosita fushshe hasaaphino. (Luqaasi 22:39-44 nabbawi.) Yesuusi hattenne qarru yannara, “qoonqosi naggi asse wiꞌle lowo hindiiddonni [huucciꞌrino].” (Ibi. 5:7) Yesuusi hakkuyi reyara albaanni noohu jeefote hashsha huucciꞌrinohu mayi daafiraati? Isi huucciꞌrinohu Yihowara ammaname heeꞌratenna fajjosi assate jawaante aannosi gede gedeeti. Yihowa Beettisi qarrame heeꞌre huucciꞌrino huuccatto macciishshe sokkaasincho soye jawaachishinosi.
16. Yesuusi Geetesemaane yinanniwa kaashshu basewa huuccatto assiꞌranni heeꞌre yaadinohu mayiraati?
16 Yesuusi Geetesemaane yinanniwa kaashshu basewa huucciꞌranni heeꞌre wiꞌlinohu Magano xonino yinoonnisi daafira yaade ikkinoti dihuluullissannote. Qoleno isi Yihowara ammaname heeꞌranna Yihowa suꞌmi qullaawanno gede assa mageeshshi geeshsha hasiissannota ikkitinoro afino. Yihowara ammanama qarra ikkitannohe gede assanno fonqoli iillanni nooheha ikkiro, Yesuusi wiꞌlinota kultanno xaggenni maa rosatto? Hanni sase roso lende laꞌno.
17. Yihowa Yesuusi eeggifate huucciꞌrino huuccattora dawaro qolinota kultanno xaggenni maa ronseemmo?
17 Yihowa eeggifatte huucciꞌratto huuccatto macciishshanno. Yihowa Yesuusi eeggifate huucciꞌrino huuccatto macciishshino. Mayira? Korkaatuno, Yesuusiti qara hasatto Annisira ammaname heeꞌratenna suꞌmisi qullaawanno gede assate. Ninketino qara hasatto Yihowara ammaname heeꞌranna suꞌmisi qullaawanno gede assa ikkituro, isi kaaꞌlankera huucciꞌneemmo huuccatto macciishshanno.—Far. 145:18, 19.
18. Yesuusi qarrinke leellannosi gedee jaalanke ikkinohu ma garinniiti?
18 Yesuusi mayi macciishshamannohero afanno. Yaaddo amaddannonke woyite qarrinke leellannosi jaali hakko iso ninkera iillino gedee qarri iilleennasi dandee saino jaali heeꞌrinkero hagiidhineemmo. Yesuusi hattoo jaalaati. Isi wolqa ajjannonke woyitenna kaaꞌlo hasiissannonke woyite mayi macciishshamannonkero afino. Isira wolqiweelleemmoti leeltannosi; hattono kaaꞌlo “hasiissanno yannara” kaaꞌlannonke. (Ibi. 4:15, 16) Yesuusi Geetesemaane yinanniwa kaashshu basewa mittu sokkaasinchi kaaꞌlannosi gede maahoyye yiinonte gede, ninkeno Yihowa kaaꞌlankera qixxeessino qixxaawo horoonsiꞌra hasiissannonke; Yihowa borronke widoonni, viidiyotenni, lallawotenni, woy mittu songote cimeessi woy ayyaanaamittetenni gikki yiino jaalinke widoonni jawaachishankera dandaanno.
19. Maganoho ammanama qarra ikkitannohe gede assanno fonqoli tuncu yiihero jawaante afiꞌra dandaattohu hiittoonniiti? Lawishsha kuli.
19 Yihowa ‘keeresi’ aannohe. Yihowa jawaachishannonkehu hiittoonniiti? Huuccatto assiꞌneemmo woyite isi, ‘mannu hedora aleenni ikkinoha Maganu keere’ aannonke. (Fil. 4:6, 7) Maganu aannonke keeri wodanaaꞌmineemmonna garunni hendeemmo gede assannonke. Hanni Luuzi yinanni rodoo lawishshi tini halaale ikkase leellishanno gara laꞌno. Ise togo yitino: “Duucha woyite callimma macciishshantanni waaddannoe. Tini mito woyite, Yihowa dibaxannoe yee hedeemma gede assitannoe. Hakka woyite bayichonkonni, Yihowara mayi macciishshaminoero kuꞌleemma. Huuccatto hedoꞌya biddi assiꞌreemma gede kaaꞌlitinoe.” Tenne rodoo woꞌnaalshi leellishannonte gede, huuccatto giddoyidi keere afiꞌneemmo gede kaaꞌlitannonke.
20. Yesuusi wiꞌlinota kultanno xaggenni maa ronsoommo?
20 Yesuusi wiꞌlinota kultanno xaggenni lowo geeshsha jawaachishannonna kaaꞌlanno roso ronsoommo! Shiidhe dadillitino jaallanke kaaꞌla hasiissannonketanna ninkeno shiiꞌneemmo woyite Yihowanna Yesuusi kaaꞌlitannonketa addaxxa dandiineemmota ronsoommo. Yihowanna Yesuusi manna marartannore ikkitinota leellishshino; ninkeno shaqqillunni sabbankeemmonna rosiinseemmo gede jawaachinshoonninke. Yihowaranna muxxe Beettisira qarrinke leellannonsata, wolqa hoongeemmo woyite marartannonketanna dandiine heeꞌneemmo gede kaaꞌlitankera hasidhannota afanke sheshifachishshannonke. Yihowa, ‘hindiiddo baala illensanni feyemmo’ yee uyinota hagiirsiissanno hexxo wonsha geeshsha ronsoommore loosu aana hosiisa agurroonke!—Aju. 21:4.
FAARSO 120 Kiristoosi Gede Jooguulle Ikke
a Yesuusi lowo geeshsha xissiisiꞌre wiꞌlino woyiti no. Konni birxichira Yesuusi wiꞌlinota sase yannanna ninke tennenni maa ronseemmoro laꞌneemmo.
b Mite suꞌmuwa soorrinoonni.
c Qullaawa Borro Seekke Huwata (Ingilizete Afoo) yaanno maxaafa Xiraaze 2, qoola 69 lai.
d Maatewoosi 22:39 ‘Olliicho’ yine tirroonnihu Giriikete Afii qaali qooxeessinkera heeꞌranno manna calla kulannoha diꞌꞌikkino. Kuni qaali manna baalanka kulannoha ikkara dandaanno.
e MISILLATE XAWISHSHA: Yesuusi Maariyaaminna Maarta sheshifachishanni no. Ninkeno shiidhinore sheshifachisha dandiineemmo.
f MISILLATE XAWISHSHA: Yesuusi Niqoodimoosi yinanni mancho hashsha rosiisate maahoyye yiino. Ninkeno mannaho Qullaawa Maxaafa insara injiitanno yannara xiinxallisa hasiissannonke.
g MISILLATE XAWISHSHA: Yesuusi Yihowara ammaname heeꞌrate kaaꞌlitannosi jawaante afiꞌrate huuccatto assiꞌrino. Ninkeno fonqolu iillannonke woyite hatto assa hasiissannonke.