Yihowa Woꞌmanka Woyite Gara Ikkinore Assannota Addaxxitinanni?

1-2. (a) Xaa yannara batinyu mannira silxaane noonsare addaxxa qarra ikkitannonsahu mayiraati? (b) Konni birxichira maa ronseemmo?

XAA YANNARA batinyu mannira silxaane noonsare addaxxa qarra ikkitannonsa. Kuni manni silxaane noonsari dureeyyetenna wolqaataammaho roorsidhe buxane miiccanna laꞌꞌanno. Qullaawu Maxaafi xawise kulanni, “mittu woloota kade gashshanno” yaanno. (Ros. 8:9) Qoleno kuni manni mite ammaꞌnote massagaano lowoha busha coye assitanna laꞌꞌanno. Tini mitu mannira Magano addaxxa qarra ikkitannonsa gede assitino. Hakko daafira mittu manchira Qullaawa Maxaafa xiinxallinseemmo woyite, isi Yihowanna uullate aana Yihowa shoominore addaxxa rosanno gede kaaꞌla shaaꞌꞌa looso diꞌꞌikkitannonke.

² Hige Yihowanna dirijjitesi addaxxa rosa hasiissannonsari Qullaawu Maxaafi rosaano calla diꞌꞌikkitino. Halaalu mine lowo diro keeshshinoommorino Yihowa woꞌmanka woyite gara ikkinore assannota dea dihasiissannonke. Ikkirono mito woyite, Yihowa addaxxa qarra ikkitannonke gede assannori kalaqamara dandaanno. Konni birxichira ammananke fonqolannoha sase coye laꞌneemmo. (1) Mite Qullaawu Maxaafi xagge nabbambeemmo woyite, (2) Yihowa dirijjite biddishsha uyitannonke woyite, hattono (3) Albillitte fonqolu iillannonke woyite.

QULLAAWA MAXAAFA NABBABBINANNI WOYITE YIHOWA ADDAXXE

3. Mite Qullaawu Maxaafi xagge Yihowa addaxxa qarra ikkitannonke gede assitara dandiitannohu hiittoonniiti?

³ Maganu Qaale nabbambeemmo woyite, Yihowa mito manna assinotanna isi assinoha mito coye huluullammeemmoha ikkara dandaanno. Lawishshaho Kiirote maxaafira, Yihowa mittu Israeelichi Sambatunni haqqe hiiqqiꞌrino daafira shinanni gede hajajinota kulloonni. Lowo diri gedensaanni layinki Saamueeli maxaafira, Yihowa Moote Daawiti foorinohanna lubbo shiinoha ikkirono maarinosita kulloonni. (Kir. 15:32, 35; 2 Sam. 12:9, 13) ‘Yihowa shiima lawanno cubbo loosino mancho shinanni gede hajaje, foorinohanna lubbo shiinoha Daawiti maarinohu mayiraati?’ yine hendeemmoha ikkara dandaanno. Hanni tenne xaꞌmora dawaro afiꞌrate Qullaawa Maxaafa nabbambeemmo woyite heda hasiissannonkeha sase coye laꞌno.

4. Kalaqama 18:20, 21 nna Marro 10:17 noo xagge Yihowa yoo taalo ikkitinota albinni roore addaxxineemmo gede assitannonkehu hiittoonniiti?

⁴ Qullaawu Maxaafi mitte xagge daafira woꞌmankare tittire kulannokki woyiti no. Lawishshaho, Daawiti loosino cubbira addinta maaro einota anfoommo. (Far. 51:2-4) Kayinni Sambatu seera diigi manchina? Isi assinorira gaabbino? Hakkuyira albaanni Yihowa seera diigino? Kuni manchi hakkuyira albaanni qorowisiinseennasi lashshi assino woy giwino? Qullaawu Maxaafi tenne daafira kulannori dino. Ikkirono Yihowa “halaalaancho” Magano ikkinota horo dihuluullammeemmo. (Mar. 32:4) Yihowa yoo yaannohu baalanka coye laeeti; mannu ooso kayinni wolootu daafira macciishshitinohu gara ikkinokki coyi, woloota mulla kae giwa woy wolu coyi taalo yoo yitannokki gede assannonsa. (Kalaqama 18:20, 21; Marro 10:17 nabbawi.) Yihowanna biddishshisi daafira ronsummo kiiro, yoosi taalo ikkitinota albinni roore addaxxineemmo. Qullaawa Maxaafa nabbambeemmo woyite xaa yannara dawaro afiꞌra dandiineemmokki xaꞌmuwa heedhunkero nafa, Yihowa “assanno coyi baalunku halaalaancho” ikkinota seekkine anfoommo.—Far. 145:17.

5. Guuntete xeꞌne taalo yoo yineemmokki gede assitannonkehu hiittoonniiti? (“Guuntete Xeꞌne Taashshote Daafira Gara Ikkitinokki Lao Heedhannonke Gede Assitanno” yitanno saaxineno lai.)

⁵ Guuntete xeꞌne noonkere ikkinoommo daafira taalo yoo yineemmohu woꞌmanka woyite diꞌꞌikkino. Maganu danisinni kalaqinonkere ikkinoommo daafira, mannu taalo yoo afiꞌrara halchineemmo. (Kal. 1:26) Ikkollana guuntete xeꞌne noonkere ikkinoommo daafira, baalanka coye buunxoommoha lawinkero nafa taalo yoo yaa hoongammora dandiineemmo. Lawishshaho Yihowa Nennewete manna maarino daafira Yoonaasi lowo geeshsha hanqinota qaango. (Yon. 3:10–4:1) Hanni Yihowa maaro abbitino guma hedde. Tini 120,000 saꞌꞌannohu maaro einohu Nennewete manni baotenni gatanno gede assitino! Wonanni hedosi biddi assiꞌra hasiissinosihu Yoonaasiiti ikkinnina Yihowa diꞌꞌikkino.

6. Yihowa mitto coye assinohu woy assara hedinohu mayiraatiro ninkera kulate giddeeti noosini?

⁶ Yihowa mitto coye assinohu mayiraatiro mannaho kulate giddeeti dinosi. Ikkirono Yihowa hundi waro soqqamaanosi, assinori woy assara hedinori daafira huluullinonsare coyidhara fajjinonsa woyiti no. (Kal. 18:25; Yon. 4:2, 3) Yihowa assara hedinore kulino woyitino no. (Yon. 4:10, 11) Ikkirono Yihowa assara hedinore ninkera kulate giddeeti dinosi. Isi Kalaqaanchonke ikkino daafira mitto coye assara albaanni woy assihu gedensaanni, ninke fajjo xaꞌmiꞌra dihasiissannosi.—Isa. 40:13, 14; 55:9.

BIDDISHSHA UYINANNIꞌNE WOYITE YIHOWA ADDAXXE

7. Qarra ikkannori mayi tuncu yaankera dandaanno? Mayira?

⁷ Yihowa woꞌmanka woyite gara ikkinore assannota woꞌmu wodaninkenni addaxxineemmoti dihuluullissannote. Ikkirono isi shoominota mannu ooso addaxxa qarra ikkitankera dandiitanno. Yihowa dirijjite giddo silxaane noonsari mitto coye assitannohu Yihowa biddishshanso uminsa biddishsha harunsiteeti ikka? yine huluullammeemmoha ikkara dandaanno. Hundi waro heeꞌrinohu mitu mannino hatto yee hedinoha ikkara dandaanno. Hanni gufo sasete kulloonni lawishsha laꞌno. Sambatunni haqqe hiiqqiꞌrino manchi fiixi, ‘Muse konne mancho shinanni gede hajajinohu Yihowa biddishsha seekke harunseeti?’ yee hedinoha ikkara dandaanno. Hitichu Ooriyo jaala ikkino manchi, Daawiti Ooriyo minaama ledo foorinotera hasiisannosi qorichinni gatate silxaanesi horoonsiꞌrino yee hedinoha ikkara dandaanno. Yihowa dirijjitesi giddonna songote giddo albisa ikkite soqqantara shoominore ammanannonsa; hakko daafira, insa addaxxinummokkinni Yihowa addaxxineemmo yaa didandiineemmo.

8. Soqqamaasinete Looso 16:4, 5 kulloonnirinna xaa yannara Kiristaanu songora assinanniri mereero noo xaadooshshi maati?

⁸ Yihowa xaa yannara dirijjitesita uullayidi kifile ‘ammanaminohunna wodanaamu borojjichi’ widoonni massaganni no. (Mat. 24:45, NW) Umi xibbi diro heeꞌrinohu aliidi bisi gede kuni borojjichino alamete doyichora nooha Maganu manna towaatanni no hattono songote cimeeyyera biddishsha aanni no. (Soqqamaasinete Looso 16:4, 5 (NW) nabbawi.b) Songote cimeeyye qolte biddishsha songote kultanno. Yihowa dirijjitenna songote cimeeyye uyitannonke biddishshira hajajamme, Yihowa assannori gara ikkinota addaxxineemmota leellinsheemmo.

9. Songote cimeeyye murtanno coyira sumuu yaa qarra ikkitankera dandiitannohu hiittoo woyiteeti? Mayira?

⁹ Mito woyite songote cimeeyye murtino coyira sumuu yaa qarra ikkitankera dandiitanno. Lawishshaho, muli diri kawa batinye songuwa wole songuwa ledo karsantanno gede assinoonni; hakko daafira mite songuwa bashshonsa worada agurte wolu woradi wido ikkitino. Mite songora, songote cimeeyye Gambooshshu Addaraashera nooha ofollinanni bayicho danchu garinni horoonsiꞌnanni gede assate mite halashshaano wole songo hadhanno gede xaꞌmitino. Wole songo haꞌneemmo gede kullinkero, jaallankenna maatenke noo songo agurre haꞌra qarra ikkitankera dandiitanno. Songote cimeeyye mitto mittonka halashshaancho hiitte songora gaantannoro, Maganu biddishsha aannonsani? Diaannonsa. Hakko daafira togoo biddishsha uyinanninke woyite hajajama qarra ikkitankera dandiitanno. Songote cimeeyye togoo coye murtanno woyite Yihowa ammanannonsa; ninkeno insa ammana hasiissannonke.c

10. Ibiraawoota 13:17 kultanno garinni songote cimeeyyera hajajama hasiissannonkehu mayiraati?

¹⁰ Songote cimeeyye murtino coyi ninke hasiꞌneemmo gedeeha ikka hoogiro nafa sumuu yaanna kaaꞌlama hasiissannonkehu mayiraati? Togo assinummoro Maganu manni mereero noo mittimma baꞌannokki gede kaaꞌlineemmo. (Efe. 4:2, 3) Songote giddo noohu baalunku cimeeyye murtino coyira maahoyye yee galannoha ikkiro songo kaajjitanno. (Ibiraawoota 13:17 nabbawi.) Yihowa ninke towaattara shoominorira hajajammeemmoha ikkiro baalunkunni roore iso addaxxineemmota leellinsheemmo.—Soq. 20:28.

11. Songote cimeeyye uyitannonke biddishsha albinni roore addaxxineemmo gede kaaꞌlannonkeri maati?

¹¹ Cimeeyye, songote hajo lainohunni mitto coye murate hasaabbanno woyite qullaawa ayyaana afiꞌrate huuccatto assidhannota qaangeemmoha ikkiro, uyitannonke biddishsha albinni roore addaxxa dandiineemmo. Qoleno, insa hasaabbanno hajo ledo xaado afiꞌrinoha Qullaawu Maxaafiha xintu seera seekkite xiinxallitanno hattono Yihowa dirijjite qixxeessitino biddishsha harunsitanno. Insati qara hasatto Yihowa hagiirsiisatenna mannasi danchu garinni towaatate. Kuri ammanantino labballi Yihowa mannasi towaattara uyinonsa qeecha garunni wonsha hoogguro xaꞌmannonsata affino. (1 Phe. 5:2, 3) Hanni tenne hedi: Tenne gaꞌretenni, ammaꞌnotenninna poletikunni bebbeehantino alame giddo Yihowa manni mitto ikke mitto halaalaancho Magano magansiꞌranni no. Kuni ikkara dandiinohu Yihowa dirijjitesi maassiꞌranni noo daafira callaati!

12. Songote cimeeyye cubbo loosino Kiristaanchi maaro einoronna teꞌee buuxxanno woyite maa heda hasiissannonsa?

¹² Cimeeyye songote keeraanchimma agartanno gede Yihowa jawa qeecha uyinonsa. Mittu Kiristaanchi jawa cubbo loosiro, Yihowa cimeeyye kuni manchi songotenni bohama hasiissannosironna teꞌee murtara hasiꞌranno. Cimeeyye assitanno coyi giddo mittu, cubbo loosino manchi addinta maaro einoronna teꞌee buuxate. Isi maaro eoommo yaara dandaanno; kayinni loosinoha busha coye addinta giwino? Konne cubbo wirro loosannokki gede murciꞌrino? Isi cubbo loosanno gede assitinositi busha hoshsha ikkitinoha ikkiro, togoo hoshsha agurate maahoyye yiino? Songote cimeeyye huuccatto assidhe Qullaawa Borro tenne hajo daafira yitannore buuxxanno; hattono cubbo loosino manchi loosino soꞌrora noosi lao huwatate woꞌnaaltanno. Hakkiinni kuni manchi songote miila ikke heeꞌrannoronna teꞌee murtanno. Mito woyite insa togoo manchi songotenni bohamanno gede assitara dandiitanno.—1 Qor. 5:11-13.

13. Jaalinke woy fiixinke songotenni bohamanno woyite mayine huluullammeemmoha ikkara dandaanno?

¹³ Songote cimeeyye addaxxa qarra ikkitannonke gede assara dandaannori maati? Songotenni bohaminohu jaalanke woy muli fiixanke ikka hoogiro cimeeyye murtino coyira sumuu yaa qarra ikka hooggankera dandiitanno. Kayinni, hanni songotenni bohaminohu jaalankeeti yine hendo. Hatto ikkiro cimeeyye baalanka coye buuxxinota huluullammammora woy insa addanka yoo Yihowa yaanno garinni yitinota huluullammammora dandiineemmo. Ikkina, songote cimeeyye murtino coyira gara ikkitino lao heedhannonke gede assiꞌrate kaaꞌlannonkeri maati?

14. Songote cimeeyye jaalinke woy fiixinke songotenni bohamanno gede assitanno woyite kaaꞌlannonkeri maati?

¹⁴ Boha Yihowa qixxaawo ikkitinotanna songo kaaꞌlitannota qaaga hasiissannonke; tini qixxaawo bohamino manchono kaaꞌlitara dandiitanno. Cubbo loose kae maaro ea giwino mancho songotenni boha hoongiro songo daafara dandaanno. (Gal. 5:9) Qoleno, loosino cubbi mageeshshi geeshsha jawa ikkinoro huwata hoogara dandaanno; hattono hedosinna assootesi biddi assire Yihowa hagiirsiisate gari hasatto hooggasira dandiitanno. (Ros. 8:11) Cimeeyye mittu Kiristaanchi bohamanno gede murtanno woyite coye seekkite buuxxannota addaxxa dandiineemmo. Hundi waro heedhinori Israeelete daanyooti gede, insa ‘yoo yitannohu Kaaliiqa hagiirsiisate ikkinnina manna hagiirsiisate ikkinokkita’ affino.—2 Dud. 19:6, 7.

XAA YANNARA YIHOWA ADDAXXA ALBILLITTETE YANNARA QIXXAAMBEEMMO GEDE KAAꞌLITANNONKE GARA

15. Xaa yannara albinni roore Yihowa biddishsha addaxxa hasiissannonkehu mayiraati?

¹⁵ Tenne alame goofimarchi gambise dayi kiiro, Yihowa assannori gara ikkinota albinni roore addaxxa hasiissannonke. Mayira? Bayiru qarri yannara rosaminokkiha woy kaaꞌlannokkiha lawanno biddishsha uyinankera dandiinanni. Yihowa annu annu deerrinni hasaawisannonkekkiti egennantinote. Isi biddishsha aannonkehu shoominori widoonni ikkara dandaanno. Hatti yanna ‘Kuni biddishshi Yihowahonso albisa ikkite soqqantanno roduuwi uminsanni fushshitinoho?’ yinanni huluullammeemmo yanna diꞌꞌikkitino. Hattee quuxxote yannara Yihowanna dirijjitesi addaxxatto? Xaa yannara uyinannihe biddishshira noohe lao hatte yannara Yihowanna dirijjitesi addaxxattoronna teꞌee leellishshannota ikkitara dandiitanno. Xaa yannara uyinanninke biddishsha addaxxattohanna bayichonkonni hajajamattoha ikkiro, bayiru qarri yannarano hatto assa diqarrissannohe.—Luq. 16:10.

16. Muli yannara Yihowa yoo addaxxa qarra ikkitannonke gede assara dandaannori maati?

¹⁶ Qoleno Yihowa tenne busha alame jeefora yoo yaanno woyite hiitto ikkineemmoro seekkine heda hasiissannonke. Xaa yannara, tenne alame goofimarchi daara albaanni fiixinkeno ikko wolu batinyu manni Yihowara soqqama hanafanno yine hexxinanni heeꞌnoommo. Ikkollana, Yihowa Yesuusi widoonni Armagedooni oli yannara konni mannira jeefote yoo yaanno. (Mat. 25:31-33; 2 Tes. 1:7-9) Yihowa maaro afiꞌrannohunna afiꞌrannokkihu ayetiro doorreemmori ninke diꞌꞌikkinoommo. (Mat. 25:34, 41, 46) Ikkina hatte yannara Yihowa yoo gara ikkitinota addaxxineemmonso tini guficho ikkitannonke? Albillitte Yihowa woꞌmunni woꞌma addaxxa dandiineemmo gede, xaanni isira noonke ammana albinni roore kaajjishiꞌra hasiissannonketi egennantinote.

17. Yihowa tenne alame jeefora yaanno yoo kaaꞌlitannonkehu hiittoonniiti?

¹⁷ Hanni haaro alamera Yihowa yoo abbitino guma laꞌneemmo woyite hiitto ikkineemmoro hendo. Kaphu ammaꞌno baꞌanno hattono lowo diro mannu ooso buuto qarrantanno gede assitanni keeshshitinoti hafuuraame daddalu dirijjittanna poletiku gashshooti diheeꞌranno. Hatte yannara, xa barru baala yaandeemmo gede assannonkeri, yaano dhibbu, geedhimmanna reyo diheedhanno. Sheexaanunna agaaninte kume diro usurantanno. Insa finqilte abbitino qarri baꞌꞌanno. (Aju. 20:2, 3) Yihowa assannori gara ikkinota addaxxankenni hatte yannara lowo geeshsha hagiidhineemmo!

18. Kiiro 11:4-6 nna 21:5 noote Israeelete daafira kultanno xaggenni maa ronseemmo?

¹⁸ Haaro alamera Yihowa assannori gara ikkinota addaxxa qarra ikkitannonke gede assannori heeꞌra ikka? Hanni lawishshaho, Israeele Gibitsete borojjimmanni fultuhunni shiima yanna gedensaanni ikkinore laꞌno. Insa giddo mitu alba Gibitsete noo yannara ittanno sagale halchitino daafira gunguma hanaffino; hattono Yihowa uyinonsata menna yinanni sagale mishshino. (Kiiro 11:4-6; 21:5 nabbawi.) Ninkeno bayiru qarri gedensaanni insa gede ikkinammo ikka? Baatto haaroonsatenna sunu sununni gannate ikkitanno gede assate loosi mageeshshiha ikkannoro dianfoommo. Loonsannihu lowo loosi heeꞌrannotinna umi qara mitu qarra ikkanno coyi heeꞌrannoti dihuluullissannote. Hatte yannara Yihowa aannonkere minshe gungummammo ikka? Huluullammeemmokkihu mittu coyi no: Xaa yannara Yihowa qixxaawo naandeemmoha ikkiro, hatte yannarano roore naandeemmoti dihuluullissannote.

19. Konni birxichita qara hedo xaphi assite kuli.

¹⁹ Yihowa woꞌmanka woyite gara ikkinore assanno. Tenne ammana hasiissannonke. Qoleno albisa ikkite soqqantannore addaxxa hasiissannonke. Yihowa masaalaanchu Isayaasi widoonni coyiꞌrinore dea dihasiissannonke; Yihowa, “sammi yitine ane calla hexxitiniro, jawaante . . . afidhinanni” yiino.—Isa. 30:15.