Nabbawaano Xaꞌmitanno Xaꞌmo
Qullaawu Maxaafi xaarate daafira mayyaanno?
Xaarate yaa “eꞌnoonni qaale wonshinannita leellishate woy buuxisate faajjete kaajjinshe coyiꞌrate. Kuni qaali mulluri gede assine laꞌnanniha diꞌꞌikkino; duucha woyite togoo qaale eꞌnannihu Magano naqaashshe assineeti.” Togoo qaale eꞌnannihu coyiꞌne woy borreessine ikkara dandaanno.
Mitu manni, Yesuusi “coyidhinanniri addahoro “Ee”, kaphohoro “Deeꞌni” yiiyye. Hakkuyi kaꞌi coyi bushuwiinni daannoho” yiino daafira xaara soꞌrote yee hedanno. (Mat. 5:33-37) Yesuusi Muse Seeri mitu coyira xaara hasiissannota kulannotanna mite Maganu soqqamaano xaartino woyiti noota afino. (Kal. 14:22, 23; Ful. 22:10, 11) Qoleno Yesuusi Yihowa umisi xaarinota afino. (Ibi. 6:13-17) Hakko daafira Yesuusi horonta xaara dihasiissannoꞌne yaanni nooha diꞌꞌikkino. Hatteentenni isi kaꞌnirira woy haafa yine xaarrannikki gede qorowisiisanni no. Woꞌmanka woyite, eꞌnoommo qaale agadha hasiissannonke; korkaatuno Yihowa hatto assinammora hasiꞌranno.
Ikkina xaaratto gede kullihero maa assa hasiissannohe? Umihunni, asseemmo yite xaarattore assa dandaattoronna teꞌee buuxi. Tenne buuxa hoogittoro xaara hoogakki danchate. Maganu Qaali, “Xano wonshattokkiha ikkiro kayinni xaꞌna hoogittoro woyyate” yee qorowisiisannonke. (Ros. 5:5) Layinkihunni xaarattori ledo xaadooshshe afiꞌrinoha Qullaawu Maxaafiha xintu seera xiinxalli; hakkiinni Qullaawu Maxaafinni qajeelino tiiꞌꞌikki yaannohere assi. Tennera kaaꞌlannohu mitu Qullaawu Maxaafihu xintu seeri hiikkonneeti?
Maganu fajjo ledo sumuu yitannota mite xaaro. Lawishshaho Yihowa Farciꞌraasine adhantanno woyite mimmitoho qaale eꞌanno. Konni garinni qaale ea xaarate. Idayichunna idayicho Maganunna mannu albaanni, “lamunku lubbotenni noo geeshsha” (Mitu minaanninna minaama adhamanno woyite konne qaale noo gedeenni diyaanno; ikkirono insa Maganu albaanni qaale eanni no) mimmito baxara, ayirrisaranna towaatara qaale eanno. Hakkuyi gedensaanni insa minaannanna minaama ikkanno; adhamansano geedonnita ikka hasiissanno. (Kal. 2:24; 1 Qor. 7:39) Kuni adhammanni woyite eꞌnanni qaali Maganu fajjo ledo sumuu yaannoho.
Maganu fajjo ledo sumuu yitannokkita mite xaaro. Mittu Kiristaanchi olu uduunne qodhe gobbate gaaramate woy Maganoho noosi ammana agurate dixaaranno. Hatto assa Maganu hajajo diigate. Kiristaanu “tenne gobbare” woy alame wido diꞌꞌikkino; hakko daafira tenne alame gibboranna gaancera anga diwodhineemmo.—Yoh. 15:19; Isa. 2:4; Yai. 1:27.
Tiiu fajjeenna xaarrannita mite xaaro. Mite xaaro xaarate, Yesuusi “Qeesaariha Qeesaarira uuyye; Maganunniha Maganoho uuyye!” yee amaalinonke amaale seekkine heda hasiissannonkeha ikkara dandaanno.—Luq. 20:25.
Hanni mittu Kiristaanchi mitte gobba qansicha ikkate woy paaspoorte fushshiꞌrate forme wonshanni, hatte gobbara ammaname heeꞌrate qaale ea hasiissannosita huwatino yine hendo. Hatte gobbara ammanamme heeꞌrate xaarrannihu mitu coyi Maganu Seeri ledo sumuu yaannokkiha ikkiro, Qullaawu Maxaafinni qajeelino tiiꞌꞌisi xaaranno gede difajjannosi. Ikkirono hatte gobba gashshaano tiiꞌꞌisi ledo sumuu yaanno garinni eanno qaale biddi assanno gede fajjitaasiha ikkara dandaanno.
Konni garinni biddi assinoonni qaale ea Roomu Sokka 13:1 noohu xintu seeri ledo sumuu yitannota ikkitara dandiitanno; qummeeshshu, “Mannu baalu aleenni noo gashshaanora hajajama hasiissanno” yaanno. Hakko daafira mittu Kiristaanchi Maganu gashshaanote hajajammanni gede kulino daafira konni garinni xaara qarra diafidhino yee hedara dandaanno.
Qoleno xaaratto woyite mito uduunnicho horoonsiꞌratto gede woy mitto malaate leellishatto gede xaꞌminahera dandiinanni; togoo woyiteno Qullaawu Maxaafinni qajeelino tiiꞌꞌikki yaannore assa danchate. Hundi waro heeꞌrinohu Roomu manninna Iskuteesi yinanni manni bisensanni xaaranno; insa konni garinni xaartannohu coyidhino coyi halaale ikkinota olu maganinsa albaanni leellishateeti. Giriikete manni kayinni xaaranno woyite angansa iimira qole kayisanno. Tini insa coyiꞌnannirenna assinannire afanno magani nootanna mannu ooso isi albaanni xaꞌmantannore ikkitinota huwattinota leellishshanno.
Hige mittu Yihowa soqqamaanchi kaphu ammaꞌno ledo xaadooshshe afiꞌrinohu gobbate malaatinni xaarannokkiti egennantinote. Ikkina yoote mine Qullaawa Maxaafa amadde halaale ikkinore kulte xaaratto gedella xaꞌminihe? Togoo woyite hatto assate doodha dandaatto; korkaatuno Qullaawu Maxaafi ammanantinoti Maganu soqqamaano xaarate malaate horoonsidhinota kulanno. (Kal. 24:2, 3, 9; 47:29-31) Konni garinni xaaratto woyite halaale coyidhe Maganu albaanni qaale eꞌanni noottota qaaga hasiissannohe. Xaꞌminanniheta baalanta xaꞌmo ammanante qolate qixxaawa hasiissannohe.
Yihowa ledo noonke jaalooma lowo geeshsha naandeemmo daafira aye coyeno xaarrammora albaanni huuccatto assiꞌne seekkine heda hasiissannonke; qoleno xaaratto coyi tiiakki bushiishannokkihanna Qullaawu Maxaafihu xintu seeri ledo sumuu yaannoha ikkasi buuxiꞌra hasiissannohe. Xaarattoha ikkiro, eootto qaale agadha hasiissannohe.—1 Phe. 2:12.