Annuwanna Amuuwa—Oosoꞌne Yihowa Baxxanno Gede KaaꞌLensa

1-2. Heeꞌnoommo gari soorramanno woyite mitu Qullaawu Maxaafihu xintu seeri ninkera baxxitino tiro afiꞌrannohu hiittoonniitiro xawisi.

LOWO GEESHSHA biifino idayichinna idayicho sargensa barra, Qullaawu Maxaafi aana xintantinota adhamate daafira kultanno lallawo shiqinshanni woyite seekke macciishshanno. Hakko barra shiqinshoonni lallawo insara haaro diꞌꞌikkitino. Hakko barrinni hanafe kayinni tini lallawo insara baxxitino tiro afidhinote. Mayira? Xaate insa tenne lallawora kulloonnire loosu aana hosiisanno.

² Kiristaana ikkino minaanninna minaama ooso ilanno woyiteno coyi hattooti. Insa lowo diro ooso lossiꞌrate daafira kultanno lallawo duucha hige macciishshinoha ikkara dandaanno. Xa kayinni insa konne roso loosu aana hosiisaraati. Xa insa ooso ile lossiꞌraraati. Tini dishaaꞌꞌa qoossooti! Heeꞌnoommo gari soorramanno woyite mito Qullaawu Maxaafiha xintu seera roore harunsineemmo. Israeelete mootoolla assitara hajanjoonninte gede, Yihowa magansidhannori ‘heeshshonsa diro baala’ Qullaawa Borro nabbabbannohunna hiincitannohu mittu korkaati konneeti.—Mar. 17:19.

3. Konni birxichira maa ronseemmo?

³ Annuwanna amuuwa, kiꞌne Kiristaanu afiꞌrannote jawa qoosso giddo mitte afidhinoonni; tinino oosoꞌnera Yihowa daafira rosiisate. Kayinni oosoꞌnera Maganu daafira halaale ikkinore calla kultine agura dihasidhinanni. Oosoꞌne iso lowo geeshsha baxxanno gede kaaꞌla hasidhinanni. Oosoꞌne Yihowa baxxanno gede kaaꞌlate maa assa dandiitinanni? Konni birxichira, kaaꞌlannoꞌneha shoole Qullaawu Maxaafiha xintu seera ronseemmo. (2 Xim. 3:16) Qoleno mito Kiristaana ikkino annuwanna amuuwa, Qullaawu Maxaafi amaale harunsansa kaaꞌlitinonsa gara laꞌneemmo.

ANNUWANNA AMUUWA KAAꞌLANNOHA SHOOLE XINTU SEERA

4. Annuwunna amuuwu oosonsa Yihowa baxxanno gede assite lossidhanno gede kaaꞌlannonsahu mittu xintu seeri hiikkoyeti? (Yaiqoobi 1:5)

⁴ Xintu seera 1: Yihowa biddishsha hasidhe. Yihowa oosoꞌne iso baxxanno gede kaaꞌlate hasiissannoꞌne hayyo aannoꞌne gede huuccidhe. (Yaiqoobi 1:5 nabbawi.) Isi gedeehu kaajju amaalaanchi dino. Togo yineemmo gede assannonkehu duuchu korkaati no. Hanni konni giddo lame laꞌno. Umihunni Yihowa lowo woꞌnaalshi noosi annaati. (Far. 36:9) Layinkihunni isi aannonke amaale woꞌmanka woyite kaaꞌlitannote.—Isa. 48:17.

5. (a) Yihowa dirijjite annuwanna amuuwa kaaꞌlate maa qixxeessitino? (b) Viidiyo leellishshannonte gede, roduu Amoriiminna minaamasi oosonsa lossidhino gara laꞌine maa rossinoonni?

⁵ Yihowa Qaalisinna dirijjitesi widoonni oosoꞌne iso baxxanno gede assitine lossidhinanni gede kaaꞌlitannoꞌneta, Qullaawu Maxaafi aana xintantinota falakkinota ayyaanaamittete sagale qixxeessinoꞌne. (Mat. 24:45) Lawishshaho “Maate Kaaꞌlannore” yaanno birxichi hunda kaaꞌlitannota lowo amaale afiꞌra dandiitinanni; kuni birxichi lowo diro Baqqi Yiiyye! yinanni metseetera aante aantete fulanni keeshshino; xa kayinni jw.org webisayitenkera fulanni no. Qoleno annuwunna amuuwu oosonsa lossidhanno woyite Yihowa amaale harunsitanno gede kaaꞌlitannonsati jw.org aana fultinoti batinye viidiyubbanna qaalu xaꞌmuwa no.b—Law. 2:4-6.

6. Mittu anni isinna minaamasi Yihowa dirijjitewiinni afidhino biddishshi daafira mayino?

⁶ Batinyu annuwinna amuuwi Yihowa dirijjitesi widoonni qixxeessinonsa qixxaawo lowo geeshsha naaddannota coyidhino. Mittu Joo yinanni anni togo yiino: “Sase oosonke halaalu mine lossiꞌra shaaꞌꞌa looso diꞌꞌikkitinonke. Minaamaꞌyanna ani Yihowa kaaꞌlannonke gede woꞌmanka woyite huucciꞌneemmo. Qoleno duucha woyite hasiise noonke yannara ninkera kaaꞌlanno birxichi woy viidiyo fultannota huwantoommo. Woꞌmanka woyite Yihowa amaale addaxxineemmo.” Joonna minaamasi Yihowa qixxeessino qixxaawo oosonsa isiwa shiqqanno gede kaaꞌlitinonsata huwatino.

7. Annuwunna amuuwu oosonsara dancha lawishsha ikkate dandaaminsare baala assa hasiissannonsahu mayiraati? (Roomu Sokka 2:21)

⁷ Xintu seera 2: Lawishsha ikkitine rosiissensa. Ooso annuwinsanna amuuwinsa assitannore seekkite laꞌanno hattono duucha woyite insa lawishsha harunsitanno. Ikkirono guuta ikkino anninna ama dino. (Rom. 3:23) Kayinni annuwunna amuuwu oosonsara dancha lawishsha ikkate dandaaminsare baala assa hasiissannonsa. (Roomu Sokka 2:21 nabbawi.) Mittu anni oosote daafira coyiꞌranni togo yiino: “Ooso mulese noore gudisse xuuxxanno ispoonje gedeeti; insa asse yine rosiinseemmore ninke assineemmokkiha ikkiro tenne affanno.” Hakko daafira oosonke Yihowa baxxara hasiꞌnummoro ninkeno Yihowa lowo geeshsha baxanna iso banxeemmoti leeltanno gede assa hasiissannonke.

8-9. Andiriwunna Eema coyiꞌrinorinni maa rosootto?

⁸ Annuwunna amuuwu oosonsa Yihowa baxxanno gede rosiisa dandiitannoti duucha doogga no. Hanni Andiriwu yinannihu 17 diro ikkannosi rodii yiinore laꞌno: “Anniꞌyanna amaꞌya woꞌmanka woyite huuccatto assiꞌra hasiissannota ikkitinota kultannoe. Ani huuccatto assiꞌre kaoommoha ikkirono anniꞌya hashshu kiiro ane ledo huuccatto assiꞌranno. Anninkenna amanke ‘Hasidhini yanna geeshsha Yihowa huucciꞌra dandiitinanni’ yite woꞌmanka woyite qaagiissitannonke. Tini, huuccatto lowo geeshsha naadeemmo gede kaaꞌlitinoe; hattono Yihowa hobbi ruxxi yuummokkinni huucciꞌreemmo gedenna iso baxillaanchu anni gede asse laeemmo gede kaaꞌlitinoe.” Annuwanna amuuwa, Yihowa baxaꞌne oosoꞌne lowo geeshsha kaaꞌlitannota deꞌinoonte.

⁹ Hanni Eema yinanni rodoo woꞌnaalshano laꞌno. Annise maatensa agure haꞌri woyite baantannihu lowo asali nooha amansara calla agure haꞌrino. Eema togo yitino: “Amaꞌya duucha higge woxe hoogge shettino woyiti no; ikkirono ise woꞌmanka woyite, Yihowa soqqamaasinesi towaatannonsatanna hasiisannonsare wonshannonsata coyidhanno. Ise coyidhannore ammantannota leellishanno garinni heedhino. Amaꞌya anera rosiissannoere iseno assitanno.” Ninke maa ronseemmo? Annuwunna amuuwu qarru yannara nafa lawishsha ikkite oosonsa rosiisa dandiitanno.—Gal. 6:9.

10. Batinyu Israeelete annuwinna amuuwi oosonsa ledo hasaawa dandaannoti hiitti faro noonsa? (Marro 6:6, 7)

¹⁰ Xintu seera 3: Oosoꞌne ledo ganyitine hasaabbe. Yihowa hundi Israeele ganyite oosonsara isi daafira rosiissanno gede hajajinonsa. (Marro 6:6, 7 nabbawi.) Hakkawari anninna ama barru giddo oosonsa ledo hasaabbannotinna oosonsa Yihowa baxxanno gede rosiissannoti lowo faro noonsa. Lawishshaho mittu Israeelicha ikkino beetti gate annisira looso loosa woy gide mida kaaꞌlanni isi ledo lowo yanna sayisara dandaanno. Rodoosi qolte amasera uduunne gowa, suqqa woy mini giddo loonsanniha wole looso kaaꞌlitanni ise ledo lowo yanna sayissara dandiitanno. Annuwunna amuuwu konni garinni oosonsa ledo loossanno woyite, lowo geeshsha hasiissannota batinye hedo kayisse hasaawa dandiitanno. Lawishshaho insa Yihowa danchummanna maatensa kaaꞌlinohu hiittoonniitiro hasaawa dandiitanno.

11. Kiristaana ikkino annuwinna amuuwi oosonsa ledo hasaawannoti mitte faro hiitteeti?

¹¹ Xaa yannara heeꞌnanni gari soorramino. Batinye gobbuwara annuwunna amuuwu barru giddo oosonsa ledo sayisannota gari yanna diafiꞌranno. Annuwunna amuuwu loosunniwa ooso kayinni rosu mine hossannoha ikkara dandaanno. Hakko daafira annuwunna amuuwu oosonsa ledo hasaabbanno faro hasiꞌra hasiissannonsa. (Efe. 5:15, 16; Fil. 1:10) Togo assate afidhanno faro giddo mitte maatete magansiꞌra yannaati. Aleksaanderi yinannihu mittu wedellichu rodii togo yiino: “Anniꞌya woꞌmanka woyite maatete magansiꞌra assiꞌneemmo gede mito coye biddi assanno; isi aye coyino maatete magansiꞌra assiꞌneemmota hoolankera dihasiꞌranno. Maatete magansiꞌra gedensaanni, hasiisannore baalankare kayinse hasaambeemmo.”

12. Maatete umi maatete magansiꞌra yannara dea hasiissannosikkiri maati?

¹² Ati maatete umootiro maatete magansiꞌra oosokki baxissannota ikkitanno gede maa assa dandaatto? Muli barra fultinota Hegerera Hagiidhitanni Heeꞌra Dandaatto! yitannota kaajja borro oosokki ledo xiinxalla dandaatto; tini borro oosokki ledo dancha gede hasaawate faro fantannohe. Oosokki giddonsatanna huluullinonsare fushshite kultahera hasiꞌrittoro, maatete magansiꞌra yanna insa mishate woy seejjate horoonsidhooti. Oosokki Qullaawa Borrohu xintu seeri ledo sumuu yaannokkire coyidhuro hanqitootinsa. Hatteentenni insa macciishshaminonsare maaxxukki kultinohetera galatinsa; hattono giddonsata waajjitukki kultannohe gede jawaachishinsa. Oosokki dancha gede kaaꞌla dandaattohu giddonsata afittoro callaati.

13. Annuwunna amuuwu oosonsa Yihowawa shiqqanno gede kaaꞌlate wole hiittee faro horoonsiꞌra dandiitanno?

¹³ Annuwanna amuuwa, barru giddo oosoꞌne Yihowawa shiqqanno gede kaaꞌla dandiitinanni faro hasidhe. Oosoꞌnera baxillaanchu Maganinke daafira rosiisate Qullaawa Maxaafa xiinxallissinanni yanna calla agara hasiissannoꞌne yaa diꞌꞌikkino. Hanni Liisa yinanniti mitte oosote ama coyidhinore laꞌno, ise togo yitino: “Qaaqquullinkera Yihowa daafira rosiisate qooxeessinkera noo kalaqama baala horoonsiꞌneemmo. Lawishshaho woshichinke godoꞌlanno gara laꞌe oosonke osoꞌlitanno woyite, ninke tenne faro horoonsiꞌne Kalaqaanchinke hagiirraamo ikkinotanna ninkeno hagiirraamma ikkinammora hasiꞌrannota rosiinseemmonsa.”

14. Annuwunna amuuwu oosonsa jaalla hayyotenni doodhitanno gede kaaꞌla hasiissannonsahu mayiraati? (Lawishsha 13:20)

¹⁴ Xintu seera 4: Oosoꞌne dancha jaalla doodhitanno gede kaaꞌlensa. Maganu Qaali doodhineemmo jaalla huntankera woy seekkitankera dandiitannota xawise kulanno. (Lawishsha 13:20 nabbawi.) Annuwanna amuuwa, oosoꞌne jaalla ayeootiro affinoonni? Insa ledo xaaddine yanna sayissine egentinoonni? Oosoꞌne Yihowa baxxannori ledo jaalooꞌmitanno gede kaaꞌlate maa assa dandiitinanni? (1 Qor. 15:33) Ayyaanaamittetenni worbuulle ikkitinore mito roduuwa kiꞌnenna oosoꞌne mitore assitinanni woyite ledoꞌne assitanno gede koyissine, oosoꞌne dancha jaalla doodhitanno gede kaaꞌla dandiitinanni.—Far. 119:63.

15. Annuwunna amuuwu oosonsa dancha jaalla doodhitanno gede kaaꞌlate maa assa dandiitanno?

¹⁵ Hanni mittu Tooni yinanni anni lawishsha laꞌno. Isinna minaamasi oosonsa dancha jaalla doodhitanno gede kaaꞌlate assitinore kulanni togo yiino: “Aninna minaamaꞌya lowo diro ajano akkalano addi addi roduuwa mininkera koyinsayi keeshshinoommo. Insa ledonke sagale ittanno hattono maatete magansiꞌra assidhanno. Tini Yihowa baxxannorinna isira hagiirrunni soqqantannori ledo egennamate kaajja faro fantinonke. Woradu aliidi laꞌꞌaano, misiyoone ikkite soqqantannorenna woloota roduuwa mininkera koyisate qoosso afiꞌnoommo. Insa diinaggaabbenna uminsa horo agurte soqqantanno gari oosonke lowo geeshsha kaaꞌlinonsa hattono Yihowawa shiqqanno gede assinonsa.” Annuwanna amuuwa, oosoꞌne dancha jaalla doodhitanno gede kaaꞌlate murcidhe.

HEXXO MUDHITINOONTE!

16. Beettiꞌne Yihowara soqqama hasiꞌrannokkita kuliꞌnero maa assitinayi?

¹⁶ Insa kaaꞌlate lowore assitinayi heedhineenna oosoꞌne giddo mittu Yihowara soqqama hasiꞌrannokkitalla kuliꞌne? Dancha anna woy ama ikka dandiitinoonnikkihu gede assitine heddinoonte. Yihowa ninke baalunkura hattono oosoꞌnera doodhate dandoo uyinonke; hakko daafira oosoꞌne isira soqqama woy soqqama hooga doodhitara dandiitanno. Beettiꞌne Yihowara soqqama aguriro, barrunni mitto barra higara dandaanno daafira hexxo mudhitinoonte. Annisi mininni fule ballehino beetti lawishsha qaagge. (Luq. 15:11-19, 22-24) Kuni wedellichi keeraanchimmate doogonni xeertiꞌre keeshshino; kayinni gedensoo higino. Mitu manni ‘Hakku dilawishshaholla addanka ikkaareetini?’ yaara dandaanno. Ee ikkaareeti! Isinni Iile yinanni wedellichi lawishshi tenne leellishanno.

17. Iile lawishshi jawaachishannohehu hiittoonniiti?

¹⁷ Annisinna amasi assitinore kulanni Iile togo yiino: “Insa Yihowanna Qaalesi Qullaawa Maxaafa baxeemmo gede kaaꞌlate dandiiture baala assitino. Ikkirono wedellicha ikkummoti finqila hanafummo.” Iile lamu gari heeshsho heeꞌra hanafino; hattono annisinna amasi ayyaanaamittetenni iso kaaꞌlate assitinore baala adha giwino. Isi mininni fule haꞌrihu gedensaanni amanyoote baꞌino heeshsho heeꞌra hanafino. Ikkirono isi mito woyite jaallasi giddo mittoho Qullaawu Maxaafire kayise hasaawanno. Isi togo yiino: “Jaaliꞌyara Yihowa daafira kulummo kiiro anino roore Yihowa daafira heda hanafummo. Hakkiinni sunu sununni, amaꞌyanna anniꞌya daafure wixinohu wodaniꞌya giddo keeshshinohu Qullaawu Maxaafi halaali wixi lopha hanafi.” Gedensoonni Iile halaalu minira higino.c Anjesinni hanaffe isi Yihowa baxanno gede rosiisate sharrantinori annisinna amasi mageeshsha hagiidhitinoro hanni hedi!—2 Xim. 3:14, 15.

18. Oosonsa Yihowa baxxanno gede rosiisate sharrantanno annuwinna amuuwi daafira mayi macciishshamannohe?

¹⁸ Annuwanna amuuwa, Yihowa kiꞌnera iso magansidhannota haaro ilama lossate qoosso uyinoꞌne; tini kaajja qoossooti. (Far. 78:4-6) Kuni shaaꞌꞌa looso diꞌꞌikkino; ikkirono oosoꞌne kaaꞌlate dandiitinire baala assitinanni daafira lowo geeshsha galanteemmoꞌne! Oosoꞌne Yihowa baxxanno gede kaaꞌlatenna isi seejjonninna amaalenni lossiꞌrate sharrama agura hoogginiro, tini baxillaancho iimi Annanke hagiirsiissannota huluullantinoonte.—Efe. 6:4.