Yihowa Mannasi Laꞌꞌanno

1. Yesuusi Yihowa harunsaanosi agarannonsa gede huucciꞌrinohu mayiraati?

YESUUSI reyara albaanni noo hashsha iima noo Annisiwa mitte baxxitino huuccatto huucciꞌrino. Isi Yihowa harunsaanosi agarannonsa gede huucciꞌrino. (Yoh. 17:15, 20) Hige Yihowa woꞌmanka woyite mannasi towaatannotinna agarannoti egennantinote. Ikkirono Yesuusi Sheexaanu harunsaanosi tiyyiꞌre giwannonsata afino. Qoleno Yesuusi Daawuloosi siannonsa woyite gargadhate Yihowa kaaꞌlo hasiissannonsata huwatino.

2. Faarso 33:18-20 kultanno garinni qarru iillannonke woyite waajja hasiissannonkekkihu mayiraati?

² Xaa yannara Sheexaanu alame addu Kiristaanira lowo qarra iillishshanno. Iillannonke qarri hexxo mudhineemmo gedenna Yihowara ammanama qarra ikkitannonke gede assara nafa dandaanno. Kayinni konni birxichira ronseemmonte gede waajjineemmo gede assannonkeri dino. Yihowa towaatannonkenna agarannonke qoleno iillannonke qarra laꞌꞌanno; hattono isi ninke kaaꞌla hasiꞌranno. Hanni Yihowa ‘waajjitannosire laꞌꞌannota’ leellishannoha lame Qullaawu Maxaafi lawishsha xiinxallino.—Faarso 33:18-20 nabbawi.

CALLIMMA MACCIISHSHANTANNONKE WOYITE

3. Callimma macciishshantannonkehu hiittoo woyite ikkara dandaanno?

³ Halaꞌlado Yihowa magansidhanno maate wido ikkinummorono mito woyite callimma macciishshantannonke. Lawishshaho wedellu rosu mine ledonsa rossannorira ammanansa daafira kultanno woyite woy haaro songo hadhanno woyite callimma macciishshantansara dandiitanno. Ninke giddo mito dadillisannori woy yaachishannori waadankera dandaanno; qoleno togoo hedo qeeꞌlate ninke callootinke sharrama hasiissannonkeha lawankera dandaanno. Qarrinke dileellannonsa yine yaandeemmo daafira wolootaho giddonketa hasaaphate hobbi ruxxi yinammora dandiineemmo. Qoleno mito woyite, addinta ane daafira hedannohu dino yine hendammora dandiineemmo. Callimma macciishshantannonke gede assanno coyi ikkihano ikkiro tini wolqa baꞌneemmo gedenna yaandeemmo gede assitankera dandiitanno. Yihowa horo togo ikkinammora dihasiꞌranno. Hatto yineemmohu mayiraati?

4. Masaalaanchu Eeliyaasi “ani callu gatoommo” yiinohu mayiraati?

⁴ Hanni ammanamino manchi Eeliyaasi lawishsha laꞌno. Iso Elzaabeeli shitannosita kulte waajjishiishshinosi; hakko daafira isi lubbosi gatisiꞌrate xooqanna 40 barra sainosi. (1 Mot. 19:1-9) Jeefote isi godu giddo heeꞌre “Ani callu gatoommo” yee Yihowawa raarino. (1 Mot. 19:10) Hatte gobbara wolootu masaalaano no; Abidiyu Elzaabeeli shite guddannokki gede 100 masaalaano maaxe gatisino. (1 Mot. 18:7, 13) Ikkina Eeliyaasira callimma macciishshantinosihu mayiraati? Isi Abidiyu maaxe gatisino masaalaano xa shine gundoonni yeeti ikka? Yihowa Qermeloosi Ilaalira halaalaancho Magano ikkasi leellishihu gedensaanni nafa wolootu isi ledo Yihowara soqqama hooggino daafiraati ikka? Isi mageeshshi qarri giddo noommoro afinohu dino woy ane daafira hedannohu dino yeeti ikka? Qullaawu Maxaafi Eeliyaasira togoori macciishshaminosihu mayiraatiro xawise dikulanno. Kayinni Yihowa Eeliyaasira callimma macciishshantinosihu mayiraatironna iso kaaꞌlannohu hiittoonniitiro afinota dihuluullammeemmo.

5. Yihowa Eeliyaasi callasi ikkinokkita buuxisinosihu ma garinniiti?

⁵ Yihowa Eeliyaasi duucha doogganni kaaꞌlinosi. Isi Eeliyaasi giddosita fushshe hasaaphanno gede jawaachishinosi. Yihowa, “Konniicho maꞌꞌassitanni nootto?” yee lame hige xaꞌminosi. (1 Mot. 19:9, 13) Lamente yannara Yihowa, Eeliyaasi giddosita fushshe hasaaphi woyite macciishshinosi. Yihowa Eeliyaasira ledosi nootanna lowo wolqa noosiha ikkinota afanno gede assino. Qoleno Yihowa Eeliyaasira Iso magansiꞌrannohu lowo manni noota buuxisinosi. (1 Mot. 19:11, 12, 18) Eeliyaasi giddosita fushshe Yihowara hasaaphihu gedensaanninna Yihowa kulinosire macciishshihu gedensaanni fooliishsho afiꞌrinoti dihuluullissannote. Yihowa Eeliyaasira lowo geeshsha hasiisannoha haammata looso uyinosi. Isi Azaheeli Sooriyaho moohanno gede Iyu qole Israeelete moohanno gede buurara kulinosi; hattono Elsai masaalaancho asse shoomanno gede kulinosi. (1 Mot. 19:15, 16) Yihowa Eeliyaasira konne looso oye dancha danchare hedanno gede kaaꞌlinosi. Qoleno muli jaala ikkannosi gede Elsai qixxeessinosi. Callimma macciishshantannohe woyite Yihowa kaaꞌlo afiꞌra dandaattohu hiittoonniiti?

6. Callimma macciishshantannohe woyite mayi daafira huucciꞌra dandaatto? (Faarso 62:8)

⁶ Yihowa iso huucciꞌratto gede koyisinohe. Isi iillannohe qarra afanno hattono woꞌmanka woyite huuccattokki macciishshannota buuxisinohe. (1 Tes. 5:17) Yihowa magansidhannosiri huuccatto macciishsha baxanno. (Law. 15:8) Callimma macciishshantannohe woyite mayi daafira huucciꞌra dandaatto? Eeliyaasi gede Yihowara giddokkita fushshite hasaaphi. (Faarso 62:8 nabbawi.) Yaachishinohe coyenna kuni coyi mayi macciishshamannohe gede assinohero hasaaphi. Callimma macciishshantannohe woyite maa assattoro afatto gede kaaꞌlahera Yihowa huucciꞌri. Lawishshaho rosu mine farciꞌratto woyite callimma macciishshantannohehanna waajjattoha ikkiro, ammanakki daafira kula dandaatto gede hasiissannohe jawaante afiꞌrate Yihowa huucciꞌri. Ammanakki xawisse kula dandaatto gede hayyo aahera nafa huucciꞌra dandaatto. (Luq. 21:14, 15) Gara ikkitinokki hedo waaddanni nooheha ikkiro ayyaanaamittetenni gikki yiino Kiristaanchira hasaapha dandaatto gede kaaꞌlahera Yihowa huucciꞌri. Yihowa hasaaphatto manchi kuꞌlattore wodanchanno gede kaaꞌlaasi gedeno huucca dandaatto. Giddokkita gudisse Yihowara hasaaphi; isi huuccattokkira dawaro qolino gara wodanchi; hattono wolootu kaaꞌlo maahoyye yite adhi. Hatto assittoro callimma macciishshantannohe gede assannore ajisha dandaatto.

7. Maarisiyo lawishshinni maa rosootto?

⁷ Yihowa baalunkura loonseemmoha kaajja looso uyinonke. Isi songote giddo uyinanninke looso loosateno ikko qanchoho soqqamate assineemmore baala laꞌꞌannotanna naadannota addaxxa dandiineemmo. (Far. 110:3) Konne looso diinaggaabbine loosaꞌne callimma macciishshantannoꞌne woyite kaaꞌlitannoꞌnehu hiittoonniiti? Hanni Maarisiyo yinannihu mittu wedellichu rodii woꞌnaalsha laꞌno.b Maarisiyo cuuamihunni shiima yanna gedensaanni muli jaallasi giddonni mittu sunu sununni halaalu mininni agure fulino. Maarisiyo togo yiino: “Isi Yihowa mininni agure fulanna laꞌꞌaꞌya aneneeto ammaneemmokki gede assitinoe. Heeshshoꞌya Yihowara sayise uyummo woyite eoommo qaale wonsheemmoronna Yihowa maate wido ikke heeꞌra dandeemmoro huluullama hanafoommo. Callimma macciishshantinoe hattono ane qarra afannohu dino yee hedoommo.” Maarisiyo kaaꞌlinosiri maatiyya? Isi togo yiino: “Soqqanshoꞌya halashshiꞌroommo; tini umiꞌya daafira calla hedeemmokki gedenna gara ikkitinokki hedo gargadheemmo gede kaaꞌlitinoe. Wolootu ledo soqqamaꞌya hagiirraamo ikkeemmo gedenna callimma macciishshantannoekki gede kaaꞌlitinoe.” Roduuwu ledo mitteenni xaande soqqama dandiineemmokkiha ikkiro nafa, borrote sokka borreessinenna silketenni insa ledo farciꞌranke jawaachishshannonke. Maarisiyo kaaꞌlinosiri woluri maati? Isi lede togo yiino: “Songote giddo uyinannie looso diinaggaawe loosoommo. Qoleno gambooshshunniwa uyinannie kifile seekke qixxaawe shiqisha hanafummo. Uyinannie loosi Yihowanna wolootu albaanni waagu nooeta wodancheemmo gede assinoe.”

BUUTOTE QARRI AMADEENNANKE HEXXO MUDHINEEMMO WOYITE

8. Buutote qarri iillannonke woyite mayi macciishshamankera dandaanno?

⁸ Tenne goofimarchu yannara qarru iillannonketa anfoommo. (2 Xim. 3:1) Ikkirono hendoommokki woyite hedeweelchu qarri amadankera dandaanno. Hedeweelcho angate anje amaddankera, buutote dhibbi amadinonketa kullankera woy shiiꞌne xissiisiꞌnammora dandiineemmo. Togoo woyite roorenkanni qarru aana aanaho iillannonke woyite woy mitte hige duuchu qarri iillannonke woyite yaandammoranna hexxo mudhinammora dandiineemmo. Ikkirono Yihowa laꞌꞌannonketanna iillannonke qarra baala isi kaaꞌlonni qeelle saꞌꞌa dandiineemmota qaango.

9. Iyyoobira iillinosiha mito qarra kuli.

⁹ Hanni Yihowa ammanamino mancho Iyyoobi kaaꞌlinosi gara laꞌno. Isira shiima yanna giddo calla lowohu buutote qarri iillinosi. Iyyoobira mittu barri giddo calla saadasinna soqqamaasinesi shine gundoonnita, wole agurina baxanno oososi nafa reyitinota kulloonnisi. (Iyo. 1:13-19) Iyyoobi tennenni lowo geeshsha xissiisiꞌre heeꞌreenna mulenni buutote dhibbi amadinosi. (Iyo. 2:7) Iyyoobi lowo geeshsha xissiisiꞌrino daafira “Heeshshoꞌya mishoommo; heeꞌrammora horontanni dihasiꞌreemmo” yiino.—Iyo. 7:16.

10. Yihowa Iyyoobi iillinosi qarra dandee saꞌꞌanno gede kaaꞌlinosihu hiittoonniiti? (Aaniidi qoolira noo misile lai.)

¹⁰ Yihowa Iyyoobira iillinosire laꞌꞌanni no. Isi Iyyoobi baxanno daafira iillinosi qarra dandee saꞌꞌate hasiisannore uyinosi. Yihowa Iyyoobi hasaawise, Isi taalle nookki hayyo noosiha ikkinotanna kalaqamasi towaatannoha ikkinota qaagiissinosi. Isi batinye dhagge ikkitanno saada daafira kulinosi. (Iyo. 38:1, 2; 39:9, 13, 19, 27; 40:15; 41:1, 2) Qoleno Yihowa Eelihu yinannihu ammanamino wedellichi Iyyoobi jawaachishannosinna sheshifachishannosi gede assino. Eelihu Yihowa qarra cincite saꞌanno soqqamaasinesi woꞌmanka woyite kiisannonsata buuxisinosi. Qoleno Yihowa Eelihu Iyyoobi baxillunni amaalannosi gede assino. Eelihu kalqete alame Kalaqaancho Yihowa hendiro ninke garire ikkinoommokkita qaaganno gede asse, Iyyoobi umisi daafira quwa sae hedannokki gede kaaꞌlinosi. (Iyo. 37:14) Yihowa Iyyoobira looso uyinosi; isi cubbo loossinori sase jaallasira huuccatto assanno gede kulinosi. (Iyo. 42:8-10) Xaa yannara Yihowa qarru amadannonke woyite kaaꞌlannonkehu hiittoonniiti?

11. Qarru iillannonke woyite Qullaawu Maxaafi sheshifachishannonkehu hiittoonniiti?

¹¹ Yihowa Iyyoobi hasaawisi gede xaa yannara ninke xaaddotenni dihasaawisannonke; ikkirono isi Qaalisi Qullaawu Maxaafi widoonni hasaawisannonke. (Rom. 15:4) Isi albillittete hexxo oye sheshifachishannonke. Hanni qarru iillannonke woyite sheshifachishshannonketa mite Qullaawu Maxaafi hedo laꞌno. Yihowa Qullaawa Borro giddo, ayi coyino iillannonkehu buutote qarri nafa isi ‘baxilliwiinni badankera dandaannokkita’ buuxisinonke. (Rom. 8:38, 39) Qoleno isi, huuccattotenni ‘woshshidhannosirira baalaho mule’ noota buuxisinonke. (Far. 145:18) Yihowa iso addaxxineemmoha ikkiro iillannonke qarra dandiine saꞌneemmotanna qarru giddo heeꞌne nafa hagiirraamma ikka dandiineemmota kulinonke. (1 Qor. 10:13; Yai. 1:2, 12) Maganu Qaali albillitte afiꞌneemmoha hegere atoote hendiro iillannonke qarri shiima yanna calla keeshshannoha ikkinota qaagiissannonke. (2 Qor. 4:16-18) Yihowa iillannonke qarri baalaho kaima ikkinoha Sheexaane Daawuloosinna isi lawishsha harunsannoha busha manna hunannota kule huluullissannokki hexxo uyinonke. (Far. 37:10) Albillitte qarru iillannohe woyite dandiite saꞌꞌatto gede kaaꞌlitannoheta sheshifachishshannota mite Qullaawu Maxaafi hedo qaagatto?

12. Yihowa Qaalisinni horo afiꞌrate maa assinammora hasiꞌranno?

¹² Yihowa Qullaawa Maxaafa ganyine xiinxallatenna nabbamboommore seekkine hiincate yanna gaaꞌminammora hasiꞌranno. Ronsoommore loosu aana hosiinseemmo woyite ammananke kaajjitanno hattono albinni roore iimi Anninkewa shinqeemmo. Tini iillannonke qarra dandiine saꞌneemmo gede jawaante ikkitannonke. Qoleno Yihowa Qaalesi addaxxitannorira qullaawa ayyaanasi aannonsa. Kuni ayyaani qole aye fonqolono dandiine saꞌneemmo gede “jawa wolqa” aannonke.—2 Qor. 4:7-10.

13. “Ammanaminohunna wodanaamu borojjichi” qixxeessannoti ayyaanaamittete sagale iillannonke qarra dandiine saꞌneemmo gede kaaꞌlitannonkehu hiittoonniiti?

¹³ Yihowa kaaꞌlonni “ammanaminohunna wodanaamu borojjichi” batinye borro, viidiyubbanna muuziiqa qixxeessannonke. Kuri coyibba ammananke kaajjishiꞌratenna ayyaanaamittetenni baqqi yine heeꞌneemmo gede kaaꞌlitannonke. (Mat. 24:45, NW) Hasiissanno yannara shiqqannota tenne ayyaanaamittete sagale dancha gede sagaꞌla hasiissannonke. Yunayitidi Isteetisete heedhannoti mitte rodoo tenne ayyaanaamittete sagale baala naaddannota coyidhino. Ise togo yitino: “Yihowara soqqamoommahu 40 diri giddo ammanaꞌya fonqolannohu duuchu qarri iillinoe.” Isera buutote qarri iillinose; ahaahose dimbe makeena kadanni noo manchi shiino, annisenna amase buuto dhiwame reyino hattono ise lame hige kaanserete dhibbi amadinose. Ise tenne dandiite saꞌanno gede kaaꞌlinoseri maati? Ise togo yitino: “Yihowa woꞌmanka woyite towaatinoe. Isi ammanaminohunna wodanaamu borojjichi widoonni shiqishino sagale iillinoe qarra dandee saeemma gede kaaꞌlitinoe. Hakko daafira anino Iyyoobi yiinota yaa dandeemma. Isi, ‘reyammo geeshsha keeraanchimmaꞌya diagureemmo’” yiino.—Iyo. 27:5.

14. Yihowa qarru iillannonke yannara ammanate roduuwinke widoonni kaaꞌlannonkehu hiittoonniiti? (1 Teselonqe 4:9)

¹⁴ Yihowa mannisi qarru iillannonsa woyite mimmito baxannonna sheshifachishanno gede qajeelsinonsa. (2 Qor. 1:3, 4; 1 Teselonqe 4:9 nabbawi.) Eelihu lawishsha harunsite ammanate roduuwinke qarru iillannonke woyite ammanamme heeꞌneemmo gede ninke kaaꞌlate quqquxantanno. (Soq. 14:22) Hanni lawishshaho Diyana yinanni rodoora minaannise baasa dhiwamita songose roduuwi ise ayyaanaamittetenni kaajjite heedhanno gede jawaachishinosenna kaaꞌlinose gara laꞌno. Ise togo yitino: “Iillinoe qarri dishiimaho; kayinni Yihowa hattee qarrissanno yannara baxillunni towaatinonke. Songonke roduuwi lowore assite kaaꞌlitinonke. Insa dagge xaꞌmitinonke, silke dowwoltinonke hattono rimmi assite hanqaffe jawaachishshinonke; tini iillinonke qarra dandiine saꞌneemmo gede kaaꞌlitinonke. Makeena kada dandeemmakki daafira roduuwu gambooshshe haꞌreemma woyitenna soqqansho fuleemma woyite kaaꞌlitinoe.” Tenne baxillu noote ayyaanaamittete maate wido ikka ninkera lowo atooteeti!

YIHOWA BAXILLUNNI TOWAATANNONKE DAAFIRA GALANTEEMMOSI

15. Iillannonke qarra dandiine saꞌneemmota huluullammeemmokkihu mayiraati?

¹⁵ Ninke baalunkura qarru iillannonke woyiti no. Ikkirono kageeshsha ronsummonte gede qarru iillannonke woyite callootanke diꞌꞌikkinoommo. Baxillaanchu anni gede Yihowa woꞌmanka woyite laꞌꞌannonke. Isi ledonke no; eeggifante huucciꞌneemmota macciishshate qixxaawinoho hattono ninke kaaꞌlate quqquxamanno. (Isa. 43:2) Isi shaqqillunni hasiisannonkere baala qixxeessinonke daafira iillannonke qarra dandiine saꞌneemmota addaxxa dandiineemmo. Isi huuccattote qoosso, Qullaawa Maxaafa, falakkinota ayyaanaamittete sagalenna hasiissannonke yannara kaaꞌlitannonkere ammanate roduuwa uyinonke.

16. Yihowa towaatannanke heeꞌra dandiineemmohu hiittoonniiti?

¹⁶ Laꞌꞌannonkehu iimi Anni noonketa afa lowo geeshsha hagiirsiissannote! “Wodaninke isinni hagiidhanno.” (Far. 33:21) Isi ninke kaaꞌlate qixxeessino qixxaawo baala horoonsiꞌne, shaqqillunni towaatannonke towaanyora galanteemmosita leellisha dandiineemmo. Maganu towaatannanke heeꞌrate ninkeno dandiinummore baala assa hasiissannonke. Wole yaattonni Yihowara hajajamatenna gara ikkinore assate dandiinummore baala assineemmoha ikkiro, isi hegerera towaatannonke!—1 Phe. 3:12.