XIINXALLOTE BIRXICHO 43
Addu Hayyo Qoonqose Naggi Assite Woshshitanni No
“Egenno [“hayyo,” NW] dooggatenna gudumaaleho qoonqose naggi assite woshshitanno.”—LAW. 1:20.
FAARSO 88 Doogokki Rosiisie
GUULCHOa
1. Xaa yannara batinyu manni Qullaawu Maxaafi kulanno amaale daafira mayyaanno? (Lawishsha 1:20, 21)
BATINYE gobbuwara hagiirraammu Maganu Mangiste halashshaano lowo manni saꞌꞌanno doogora mannaho borro uyitanna laꞌꞌa rosantinote. Atino konni gari soqqansho soqqante egennootto? Hatto ikkiro lawishshu maxaafi giddo nooha hayyo mannu amaalese macciishshanno gede woshshitannota kulanno lawishsha qaagoottoti dihuluullissannote. (Lawishsha 1:20, 21 nabbawi.) Qullaawu Maxaafinna borruwanke giddo “addu hayyo” yaano Yihowa hayyo no. Mannu heeshshote doogora haꞌra hanafate balaxe tenne hayyo afiꞌra hasiissannonsa. Mannu borronke adhanno woyite tashshi yaannonke. Kayinni adhannohu baalanka manna diꞌꞌikkino. Mitu manni Qullaawu Maxaafi rosiisannore afa dihasiꞌranno. Wolootu kayi osoꞌlitannonke. Insa Qullaawu Maxaafi yannankera dikaaꞌlannoho yite heddanno. Wolootu kayinni Qullaawu Maxaafi roso harunsanno manni kaajjadohonna woloota mishannoho yite hedde, Qullaawu Maxaafi amanyootu daafira rosiisannore mishshanno. Ikkirono Yihowa shaqqillunni xaa geeshsha baalunku manni addu hagiirre afiꞌranno faro fane no. Hiitte doogganni?
2. Xaa yannara addu hayyo afiꞌra dandiineemmohu hiikkiinniiti? Rooru manni kayi maa assa doodhino?
2 Yihowa mannu addu hayyo yitannore macciishshanno gede assanno doogga giddo mitte Qaalesi Qullaawa Maxaafaati. Konne maxaafa baalunku manni afiꞌranno yaa dandiinanni. Qullaawu Maxaafi aana xintantino borruwankena? Yihowa maassiꞌrinonke daafira borruwanke 1,000 saꞌꞌanno afiinni qixxeessinoonni. Macciishshe adhannohu yaano borruwanke nabbawannohunna rosinore loosu aana hosiisanno manni lowo horo afiꞌranno. Ikkirono rooru manni addu hayyo yitannore macciishsha dibaxanno. Insa mitto coye assate kaꞌanno woyite umonsa addaxxitanno woy jaallansa yitannore macciishshitanno. Insa ninke Qullaawu Maxaafi rosiisannore harunsa doodhinoommo daafira woffi assite nafa laꞌankera dandiitanno. Konni birxichira mannu togoore assannohu mayiraatiro ronseemmo. Hanni balanxe Yihowa aanno hayyo afiꞌra dandiineemmohu hiittoonniitiro laꞌno.
YIHOWA AFA HAYYO AFIꞌNANNI GEDE ASSITANNO
3. Addu hayyo afiꞌrate maa assa hasiissannonke?
3 Hayyote yaa anfoommo coye horoonsiꞌne dancha doorsha doodhate dandooti. Ikkirono addu hayyo hakkiinni saꞌinote. Qullaawu Maxaafi, “Kaaliiqa waajja egennote [“hayyote” NW] umoho. Qullaawa Magano egennittoro wodancha afiꞌratto” yaanno. (Law. 9:10) Hakko daafira mitto shota ikkinokki coye assate kaꞌneemmo woyite, assiꞌneemmo coyi Yihowa hedo ledo sumuu yaannoha yaano ‘Qullaawu Magani daafira noonke egenno’ aana xintaminoha ikka hasiissannosi. Qullaawa Maxaafanna Qullaawu Maxaafi aana xintantino borruwanke seekkine xiinxalline tenne assa dandiineemmo. Hatto assineemmoha ikkiro addu hayyo noonketa leellinshanni heeꞌnoommo.—Law. 2:5-7.
4. Addu hayyo aannohu Yihowa callaati yineemmohu mayiraati?
4 Addu hayyo aannohu Yihowa callaati. (Rom. 16:27) Hayyote Buicho Yihowaati yineemmohu mayiraati? Umihunni, isi Kalaqaancho ikkino daafira kalaqamisi daafira baalankare seekke afino. (Far. 104:24) Layinkihunni, Yihowa assannohu baalunku coyi hayyosi leellishanno. (Rom. 11:33) Sayikkihunni, Yihowata hayyo noo amaale harunsanke woꞌmanka woyite kaaꞌlitannonke. (Law. 2:10-12) Addu hayyo afiꞌra hasiꞌnummoro konne sasenka qara halaale ammane adhanna mitto coye assinammora albaanni konne halaale balanxe heda hasiissannonke.
5. Mannu Yihowa addu hayyo Buicho ikkinota ammane adha hoogansa mayi guma abbitino?
5 Soqqanshonniwa xaandeemmohu batinyu manni kalaqamu dhagge ikkanno garinni kalaqaminota ammananno; kayinni kuni manni Kalaqaanchu noota kaadanno. Wolootu kayinni Maganu noota ammanneemmo yitannoha ikkirono Qullaawu Maxaafi yannankera kaaꞌlannokkiha lawannonsa daafira, uminsa doogo haꞌra doodhitino. Tini mayi guma abbitino? Mannu Maganu aanno hayyo agure uminsa doogo haꞌrino daafira alame woyyaabbino? Insa addu hagiirre woy huluullissannokki hexxo afidhino? Qooxeessinkera ikkanni noo coyi aante noo hedo halaale ikkase leellishanno: “Mannu egenno, wodanchanna hedo, Kaaliiqi yiinore ittissara didandiitanno.” (Law. 21:30) Addanko addu hayyo afiꞌrate alba Yihowawa higa lowo geeshsha hasiissannote! Rooru manni kayi hatto diassanno. Mayira?
MANNU ADDU HAYYO GIWANNOHU MAYIRAATI?
6. Lawishsha 1:22-25 kultanno garinni addu hayyo woshshitanno woyite macciishsha gibbannori ayeooti?
6 Batinyu manni addu hayyo “gudumaaleho qoonqose naggi assite woshshitanno” woyite dimacciishshanno. Qullaawu Maxaafi kulanno garinni hayyo giwannohu sasu gari manni no; insano, ‘egenno xeꞌinonsareeti, egenno mishshannoreetinna gowwootaho.’ (Lawishsha 1:22-25 nabbawi.b) Hanni kuni manni Maganu aanno hayyo giwannohu mayiraatironna ninkeno insa gedeere ikkineemmokki gede qoropha dandiineemmohu hiittoonniitiro laꞌno.
7. Mitootu ‘egenno xeꞌinonsare’ ikkite heeꞌra doodhitinohu mayiraati?
7 ‘Egenno xeꞌinonsari’ baalanka coye ammantanno hattono dogantanno. (Law. 14:15) Soqqammeemmo woyite togoo manna duucha hinge xaandeemmo. Hanni ammaꞌnote massagaano woy poletiku massagaano dogginonsahu lowo miliyoone ikkanno manni daafira hedi. Mitootu togoo massagaano lowo diro dogginonsata affanno woyite lowo geeshsha giirantanno. Kayinni Lawishsha 1:22 kulloonni manni uminsanni baxe egenno noonsakkire ikka doodhino. (Erm. 5:31) Insa wodaninsa yiinore assa baxxanno; hattono Qullaawu Maxaafi rosiisannore rosa woy Qullaawu Maxaafi biddishshira hajajama dibaxxanno. Batinyu manni Kanaadaho Kiwubeeki yinanniwa heedhannoti ammaꞌnosera laalaattannoti mitte mancho coyidhino hedo ledo sumuu yaanno; ise mittu Yihowa Farciꞌraasinchi hasaawisise woyite, “Qeesichinke doginkero tini isi soꞌrooti ikkinnina ninketa diꞌꞌikkitino!” yitino. Afanni heeꞌrenni egenno xeꞌinonsare ikkino manni gedeere ikka hasiꞌneemmokkiti egennantinote!—Law. 1:32; 27:12.
8. Hayyo afiꞌneemmo gede kaaꞌlannonkeri maati?
8 Qullaawu Maxaafi egenno xeꞌinonkere ikkikkinni ‘hedonkenni [“wodanchate dandoonkenni,” NW] jajjabbu gedeere ikkineemmo gede’ jawaachishannonkehu dimullaati. (1 Qor. 14:20) Qullaawu Maxaafiha xintu seera harunsineemmoha ikkiro hayyo afiꞌra dandiineemmo. Hatto assineemmoha ikkiro, kuni xintu seeri qarrunni ganteemmo gedenna dancha doorsha doodhineemmo gede kaaꞌlannonketa huwanteemmo. Tenne daafira woyyeessiꞌnoommore layiꞌranke hasiissannote. Qullaawa Maxaafa xiinxallanna gambooshshe haꞌra hanafittonku boode yanna saꞌinoha ikkirono heeshshokki Yihowara sayisse uyite cuuamoottokkiha ikkiro, ‘Tenne mixo wonshiꞌroommokkihu mayiraati?’ yite ateneeto xaꞌma dandaatto. Cuuammoommore ikkinummoro kayinni, dancha duduwo sabbakatenna rosiisate dandoonke woyyeessiꞌnanni heeꞌnoommo? Doodhineemmo doorshi Qullaawu Maxaafihu xintu seerinni massagammeemmota leellishanno? Wolootu ledo noonke aante lainohunni Maganu baxanno akatta noonketa leellinshanni heeꞌnoommo? Woyyeessiꞌra hasiissannonkeri noota huwantummoro, ‘hawanya mancho egennaamo assannoha’ Yihowa seera seekkine illachinsho.—Far. 19:7.
9. ‘Egennote aana haariintannori’ hayyo gibbannota leellishshinohu hiittoonniiti?
9 Maganu aanno hayyo giwannohu layinki manni ‘egennote aana haariimannoho.’ Mito woyite sabbankanni togoo manninni xaandeemmo. Insa manna qacifata baxxanno. (Far. 123:4) Qullaawu Maxaafi goofimarchu barra qacifatanno manni heeꞌrannota kule qorowisiisanno. (2 Phe. 3:3, 4) Keeraanchu manchi Looxi seenne huuccidhinori gede, yannankera noohu mitu manni Maganu aanno qorowishsha diꞌꞌillachishanno. (Kal. 19:14) Batinyu manni Qullaawu Maxaafiha xintu seera harunsitannore osoꞌlanno. Insa tenne assitannohu, “uminsa yorto maganiweelote hoode” haꞌra hasidhanno daafiraati. (Yih. 7, 17, 18) Qullaawu Maxaafi egennote aana haarintannori daafira kulannori kaadaasinetenna Yihowa giwannohu wolu manni akata seekke xawisanno!
10. Faarso 1:1 kultanno garinni egennote aana haariintannori gedeere ikkineemmokki gede qoropha dandiineemmohu hiittoonniiti?
10 ‘Egennote aana haarimanno manni’ gedeere ikkineemmokki gede qoropha dandiineemmohu hiittoonniiti? Tenne assa dandiineemmoti mitte doogo qacifatanno manniwa aana hoogate. (Faarso 1:1 nabbawi.) Hatto yaa kaadaasine yitannore dimacciishshineemmo woy insa borreessitinore mittoreno dinabbambeemmo yaate. Ninkeno qoropha hoongummoro minsheemmore ikkinammora hattono Yihowanna isi dirijjitesi widoonni aannonke biddishsha huluullama hananfammora dandiineemmo. Hakko daafira ninkeneeto togo yine xaꞌma hasiissannonke: ‘Haaro biddishsha woy xawishsha uyinanninke woyite gara ikkinokkire coyiꞌra rakkannoe? Albisa ikkite soqqantannori soꞌro xinqisiisiꞌreemmo?’ Bayichonkonni togoo hedo hooꞌlineemmoha ikkiro Yihowa hagiidhanno.—Law. 3:34, 35.
11. ‘Gowwootu’ Yihowaha amanyootu biddishsha ma garinni laꞌanno?
11 Egenno giwannohu sayikki manni ‘gowwootaho.’ Insa Maganunniha amanyootu seera gibbanno daafira gowwootaho. Insa uminsara gara lawinonsa coye assitanno. (Law. 12:15) Togoo manni hayyote Buicho ikkinoha Yihowa giwanno. (Far. 53:1) Insa soqqanshonniwa xaandeemmo woyite, Qullaawu Maxaafiha xintu seera harunsineemmo daafira duucha woyite mishshannonke. Kayinni insa woyyitino amaale uyitankera didandiitanno. Qullaawu Maxaafi, “Gowwaho egenno xeertidhe no; danchare hasaambanni woyiteno yee afannori dino” yaanno. (Law. 24:7) Gowwootu danchare coyidhe diaffanno. Yihowa ‘gowwu manniwiinni xoonqeemmo’ gede qorowisiisannonkehu iseraati.—Law. 14:7.
12. Gowwootu gede ikka qorophineemmo gede kaaꞌlannonkeri maati?
12 Maganu aanno amaale gibbannori gede ikkikkinni ninke Maganu doogo hattono isiha amanyootu seera lowo geeshsha banxeemmo. Hajajama abbitanno guma hajajama hooga abbitanno gumi ledo heewisiisanke kuni baxilli lexxanno gede assiꞌrate kaaꞌlitannonke. Mannu gowwimmatenni Maganu amaale harunsa giwanno daafira uminsara abbiꞌranno qara hedate woꞌnaalle. Hakkiinni Maganoho hajajamootto daafira heeshshokki woyyaabbino gara hedi.—Far. 32:8, 10.
13. Yihowa amaalesi macciishshineemmo gede giddeessannonke?
13 Yihowa baalunku manni hayyo yitannore macciishshanno faro fanino; ikkollana isi hayyo yitannore macciishshanno gede aye manchono digiddeessanno. Ikkirono isi hayyo yitannore macciishsha gibbannori ma ikkitannoro kulino. (Law. 1:29-32) Yihowara hajajama gibbannori assootinsara ‘malino qoricha adhitanno.’ Konni garinni heeꞌransa yaaddonna qarra hattono galte hosse bao abbitannonsa. Yihowa amaale macciishshitannoriranna harunsitannorira kayinni togo yine qaale eꞌnoonninsa: “Ani yeemmare macciishshannohu kayinni, keere afiꞌranno. Yaaddo nookkiha harshammi yee heeꞌranno.”—Law. 1:33.
ADDU HAYYO KAAꞌLITANNONKE
Gambooshshunniwa dawaro qola ayyaanaamittetenni jawaanteemmo gede kaaꞌlitannonke (Gufo 15 lai)
14-15. Lawishsha 4:23tenni maa ronseemmo?
14 Maganu aanno hayyo harunsanke woꞌmanka woyite kaaꞌlitannonke. Xaa geeshsha ronsummonte gede Yihowa mannu baalunku hayyo afiꞌranno faro fanino. Lawishshu gedera, lawishshu maxaafi giddo woꞌmanka woyite kaaꞌlitannonke amaale uyinonke; tenne amaale loosu aana hosiinsummoro heeshshonke woyyaabbanno. Hanni hayyo noote tenne amaale giddo shoole laꞌno.
15 Wodanakki agadhi. Qullaawu Maxaafi, “Wodanu heeshshote buichootina, woꞌmunkurinni roorsite iso agadhi” yaanno. (Law. 4:23) Hanni wodananke agadhate maa assa hasiissannonkero hedi. Fayyimmankera kaaꞌlitanno sagale ita, ganyine ispoorte loosa hattono busha gade qoropha hasiissannonke. Lawishshu wodananke agadhateno hatto assa hasiissannonke. Maganu Qaale barru baala nabbambeemmo, gambooshsheho qixxaambeemmo hattono gambooshshe haꞌne dawaro qolleemmo. Hakkiinni saeno ganyine soqqansho fulleemmo. Qoleno amanyoote baino boohaarshiwiinni, busha hoshshawiinninna hedonke daafara dandaannohu wolu aye coyiwiinni xoonqe busha gade qorophineemmo.
Woxeho gara ikkitino lao heedhannonke gede assiꞌra, noonke coyinni kassi yine heeꞌneemmo gede kaaꞌlitannonke (Gufo 16 lai)
16. Lawishsha 23:4, 5 noo amaale yannankera lowo geeshsha kaaꞌlitannote yineemmohu mayiraati?
16 Nooherinni kassi yite heeꞌri. Qullaawu Maxaafi togo yee amaalannonke: “Jirote yite atenee orbaassooti . . . Jiro iima hige buuwanno allamurchi gede, ati laꞌanna hedeweelcho qoola assidhe buubbe baꞌanno.” (Law. 23:4, 5) Maalaamittete jiro geeddannota diꞌꞌikkitino. Ikkirono xaa yannara dureeyyeno buxaneno jiro afiꞌrate lowo geeshsha yaaddanno. Tini duucha woyite, suꞌnaado suꞌmansa, wolootu ledo noonsa aante wole agurina fayyimmansa nafa gawajjannore assitanno gede assitannonsa. (Law. 28:20; 1 Xim. 6:9, 10) Hayyo kayinni woxeho gara ikkitino lao heedhaanke gede kaaꞌlitannonke. Togoo lao hafuuraamma ikkineemmokki gedenna noonkerinni kassi yine heeꞌneemmo gede kaaꞌlitannonke.—Ros. 7:12.
Coyiꞌnammora albaanni balanxe hedanke coyiꞌneemmo coyinni woloota gawajjineemmokki gede kaaꞌlitannonke (Gufo 17 lai)
17. Lawishsha 12:18 kulloonnihu “egennaamu arrawi” heeꞌrannokki gede assiꞌra dandiineemmohu hiittoonniiti?
17 Coyiꞌrattora albaanni balaxxe hedi. Qoropha hoongummoro coyiꞌneemmo coyi lowore gawajjara dandaanno. Qullaawu Maxaafi, “Dayi gede coyiꞌnanni coyi manna urdete gede qasanno; egennaamu arrawi kayinni hursanno” yaanno. (Law. 12:18) Wolootu soꞌro kulle heꞌma qorophineemmoha ikkiro keeru heeꞌranno gede assineemmo. (Law. 20:19) Coyiꞌneemmo coyi gawajjannoha ikkikkinni hursannoha ikkara hasiꞌnummoro, wodaninkera Maganu Qaali giddo noo halaali woꞌmanno gede assiꞌra hasiissannonke. (Luq. 6:45) Qullaawu Maxaafinni nabbamboommore hiincineemmoha ikkiro, coyiꞌneemmo coyi woloota dhaawannoha “egennote buicho” ikkanno.—Law. 18:4.
Yihowa dirijjite uyitannonke biddishshira hajajamanke soqqanshote dandoonke woyyeessiꞌneemmo gede kaaꞌlitannonke (Gufo 18 lai)
18. Lawishsha 24:6 noo amaale harunsanke soqqanshonkera kaaꞌlitannonkehu hiittoonniiti?
18 Biddishsha harunsi. Qullaawu Maxaafi aante noota kaaꞌlitanno amaale amaalannonke: “Olaho fulate albaanni amaalama hasiisanno; lowo mali heeꞌriro qeelle afiꞌnanni.” (Law. 24:6) Hanni tenne amaale harunsanke sabbakatenna rosiisate loosira kaaꞌlitannonkehu hiittoonniitiro hedi. Uminkera leellinonke garinni sabbakantenni uyinanninke biddishsha harunsate sharrammeemmo. Gambooshshunniwa kaajja amaale afiꞌneemmo; hakkiicho woꞌnaalshu noonsa roduuwi Qullaawu Maxaafi aana xintantino lallawo widoonninna wolu garinni qajeelsitannonke. Qoleno Yihowa dirijjite mannu Qullaawu Maxaafi rosiisannore huwatanno gede kaaꞌlitanno borruwanna viidiyubba qixxeessitanno. Ati konne uduunne danchu garinni horoonsiꞌnanni gara rossanni nootto?
19. Yihowa aanno hayyo daafira mayi macciishshamannohe? (Lawishsha 3:13-18)
19 Lawishsha 3:13-18 nabbawi. Yihowa Qullaawu Maxaafi giddo kaajja amaale borreessiisinonke daafira galaxxineemmosi. Togoo amaale hooggoommenkero hiikkineemmo? Konni birxichira lawishshu maxaafi giddo kulloonnita mite kaajja amaale ronsoommo. Hige woꞌmu Qullaawu Maxaafi giddo Yihowawiinni afiꞌnanniti kaajja amaale no. Woꞌmanka woyite heeshshonke baalatenni tenne amaale harunsate murciꞌno. Duuchu manni hayyo dinaadanno; ninke kayinni ‘hayyo seekke cuꞌmiꞌrannohu baꞌraaꞌrinoha’ ikkinota anfoommo.
FAARSO 36 Wodananke Agadhino
a Yihowa aanno hayyo alame uyitanno coye baalanka roortannote. Lawishshu maxaafi giddo, hayyo gudumaaleho qoonqose naggi assite woshshitannota dhagge ikkanno garinni lawishshunni kulloonni; konni birxichira tenne daafira xiinxallineemmo. Qoleno addu hayyo afiꞌra dandiineemmohu hiittoonniitiro, mitu manni hayyo yitannore macciishsha giwannohu mayiraatironna tenne hayyo macciishsha kaaꞌlitannonkehu hiittoonniitiro laꞌneemmo.
b Kiiro 22 (NW): “Kiꞌne egenno xeꞌinoꞌneri hambeꞌnenni heedhinannihu mamooti geeshshaati? Kiꞌne haarintinanniri, woloota haariintinannihu mamooti geeshshaati? Kiꞌne gowwootu, egenno gibbinannihu mamooti geeshshaati?”