Hexxoꞌne Kaajjishidhe

1. Yihowa hiittee hexxo uyinonke?

YIHOWA dhagge ikkitannota hegere heeshsho hexxo uyinonke. Mitootu reyannokki biso uddidhe hegerera iima heeꞌrate hexxitanno. (1 Qor. 15:50, 53) Rooru manni kayinni guuta ordu fayyimma afiꞌrenna hagiirraamma ikke uullate aanna hegerera heeꞌrate hexxanno. (Aju. 21:3, 4) Hegere heeshsho afiꞌneemmohu iimano ikko uullate aanano ikko muxxe ikkitino hexxo noonke.

2. Hexxonke mayi aana xintantinote? Hatto yineemmohu mayiraati?

² Qullaawu Maxaafi giddo “hexxo” yaanno qaali “danchu coyi ikkanno yine hexxa” yitanno tiro afiꞌrino. Hexxonke huluullammannire diafidhinote; mayira yiniro tenne hexxo uyinonkehu Yihowaati. (Rom. 15:13) Isi eino qaale anfoommo; qoleno isi eino qaale woꞌmanka woyite wonshannota anfoommo. (Kir. 23:19) Isi coyiꞌrinore baala wonshate hasattono wolqano noosita ammanneemmo. Hexxonke haaqeete halcho diꞌꞌikkitino; taje nootenna woꞌmitannote.

3. Konni birxichira maa ronseemmo? (Faarso 27:14)

³ Iimi Anninke baxannonke; hattono isi addaxxinammosira hasiꞌranno. (Faarso 27:14 nabbawi.) Hexxonke kaajjishiꞌranke iillannonke qarra dandiine saꞌneemmo gedenna albillitte dayirino dayiro waajjineemmokki gedenna hagiirrinke baikki heeꞌneemmo gede kaaꞌlitannonke. Hanni hexxonke agarooshshe ikkitannonkehu hiittoonniitiro laꞌno. Hanni balanxe hexxonke mokkollichunna gulleete gede ikkitannonkehu hiittoonniitiro laꞌno. Hakkiinni hexxonke kaajjishiꞌra dandiineemmohu hiittoonniitiro ronseemmo.

HEXXONKE MOKKOLLICHU GEDEETI

4. Hexxonke mokkollichu gede ikkitinohu hiittoonniiti? (Ibiraawoota 6:19)

⁴ Soqqamaasinchu Phaawuloosi Ibiraawootu Kiristaanira borreessino sokkara hexxonke mokkollichu gede ikkitinota coyiꞌrino. (Ibiraawoota 6:19 nabbawi.) Isi duucha hige baaru aana haꞌrino daafira, mokkollichu markaawe shashshafantannokki gede assannota afino. Mitte hige Phaawuloosi markaawetenni haꞌranni heeꞌrenna wolqaataamu dambali kai. Hakkiinni isi markaawe laaqanno manni markaawe kinnate tuꞌmitannokki gede mokkollonsa wayi giddo tuganna laino. (Soq. 27:29, 39-41) Mokkollichu markaawe shashshafantannota hoolannonte gede, hexxonkeno dambalu gedee qarri amadannonke woyite Yihowawiinni xeertiꞌneemmokki gede kaaꞌlitannonke. Albillitte dancha yanna daggannota ammannoommo daafira, hexxonke qarru amadannonke woyite wodanaaꞌmineemmo gede kaaꞌlitannonke. Yesuusi dartu iillannonketa kule qorowisiisinonketa qaango. (Yoh. 15:20) Hakko daafira, albillitte afiꞌneemmo atoote hiincanke heeshshote doogora kaajjine heeꞌneemmo gede kaaꞌlitannonke.

5. Yesuusi reyara kae noo yannara hexxo kaaꞌlitinosihu hiittoonniiti?

⁵ Hanni Yesuusi shetinse shinannisita afinoha ikkirono hexxo ammaname heeꞌranno gede kaaꞌlitinosihu hiittoonniitiro laꞌno. Soqqamaasinchu Pheexiroosi Phenxeqosxete barra 33 M.D. Faarsote maxaafinni qummi asse Yesuusi wodanaaꞌminota leellishshannota mitte kaajja masaalo coyiꞌrino; masaalo togo yitanno: “Reyannohu maaliꞌyano hexxo afiꞌranno . . . Lubboꞌya jeennaateho diaguratto; Qullaawakki waammate giddo hoqara worte dilaꞌꞌatto. . . . Ane ledo heeꞌrakkira hagiirriꞌya woꞌma ikkanno.” (Soq. 2:25-28; Far. 16:8-11) Yesuusi reyannota afinoha ikkirono, Maganu reyotenni kayisannositanna galagale iima Annisi ledo hagiirrunni heeꞌrannota horo dihuluullamino.—Ibi. 12:2, 3.

6. Mittu rodii hexxote daafira mayino?

⁶ Hexxonke batinyu ammanate roduuwinke qarra cincite saꞌanno gede kaaꞌlitinonsa. Hanni Ingilaandete gobbara heeꞌrannohu ammanamino rodii Liinaard Chiini woꞌnaalsha laꞌno. Umihu Alamete Oli yannara isi olaho haꞌra giwino daafira usurroonnisi. Lamu agani geeshsha iso callichosi usurroonnisi; hakkiinni wolqate looso loosanno gede giddeessinoonnisi. Isi gedensoonni togo yee borreessino: “Iillinoe qarrinni hexxonke iillannonke qarra dandiine saꞌneemmo gede lowo geeshsha kaaꞌlitannonketa huwatoommo. Yesuusi, soqqamaasinenna masaalaano dancha lawishsha ikkitinonke; qoleno Qullaawu Maxaafi giddo dhagge ikkitanno hexxo noonke. Kuni baalunku lawishshi albillitte kaajja hexxo heedhannonke gedenna qarra dandiine saꞌneemmo gede jawaante ikkannonke.” Hexxo Liinaardira mokkollichu gede ikkitinosi; ninkerano mokkollichu gede ikkitankera dandiitanno.

7. Qarru hexxonke kaajjitanno gede assannohu hiittoonniiti? (Roomu Sokka 5:3-5; Yaiqoobi 1:12)

⁷ Fonqolo dandiine saꞌnummoro, Yihowa kaaꞌlannonketanna iso hagiirsiinsoommota huwanteemmo; tini qolte hexxonke kaajjado ikkitanno gede assitanno. (Roomu Sokka 5:3-5; Yaiqoobi 1:12 nabbawi.) Qoleno hexxonke umo halaale macciishshinummo waritenni roore kaajjado ikkitanno. Sheexaanu qarru iillaanke woyite hexxo mudhinammora hasiꞌranno; kayinni Yihowa kaaꞌlannonke daafira iillannonke qarra baala qeelle saꞌꞌa dandiineemmo.

HEXXONKE GULLEETE GEDEETI

8. Hexxonke gulleete gede ikkitinohu hiittoonniiti? (1 Teselonqe 5:8)

⁸ Qullaawu Maxaafi hexxonke gulleete gede ikkitinotano kulanno. (1 Teselonqe 5:8 nabbawi.) Olamaanchu umoho gullee wodhasi diinu umosi gawajjannokki gede agartannosi. Ninkeno ayyaanaamittete ola olammeemmo woyite, Sheexaanu surrenke gawajjannokki gede gargadha hasiissannonke. Isi hedonke daafatenna ninke fonqolate lowo coye horoonsiꞌranno. Gullee olamaanchu umi gawajjamannokki gede agartannonte gede, hexxonkeno Yihowara ammanamme heeꞌneemmo gede hedonke agartanno.

9. Maganu uyino hexxo ammanannokki manni hiittoo heeshsho heeꞌranno?

⁹ Hegere heeshsho hexxonke hayyootanna wodanchineemmore ikkineemmo gede kaaꞌlitannonke. Hexxonke kaajjado ikka hoogguronna maalaamittete coye calla hendeemmoha ikkiro kayinni hegere heeshsho hexxonke hambammora dandiineemmo. Hanni hunda Qorontoosi heeꞌrinohu mitu Kiristaani daafira laꞌno. Insara Maganu uyinote lowo geeshsha hasiissanno hexxo yaano kaote hexxo daafira noonsa ammana baꞌino. (1 Qor. 15:12) Phaawuloosi kao noota ammanannokki manni maalaamittete coye calla hedannota borreessino. (1 Qor. 15:32) Xaa yannara noohu Maganu uyino hexxo ammanannokkihu batinyu manni, xaa heeshshonsa calla hagiirru noota assiꞌrate yee dandiire baala assanno. Ninke kayinni Maganu albillittete uyinonke hexxo addaxxineemmo. Hexxonke gulleete gede hedonke agartannonke; qoleno Yihowa ledo noonke jaalooma huntannonte meessaneeto calla baxate hasattonni agartannonke.—1 Qor. 15:33, 34.

10. Hexxo Sheexaanu kaphinni agartannonkehu hiittoonniiti?

¹⁰ Qoleno hexxonke Yihowa hagiirsiisate sharramanke waagu dinoote yine hendeemmokki gede agartannonke. Lawishshaho mitu manni togo yee hedara dandaanno: ‘Ani hegere heeshsho afidhannori wido horo diꞌꞌikkeemmo. Ani tennera ikkado diꞌꞌikkoommo. Maganu biddishsha agadha horo didandeemmo.’ Suꞌmira Iyyoobi jawaachisheemmo yee dayinohu Elfaazi Iyyoobira togoore coyiꞌrinota qaagge. Elfaazi togo yiino: “Mannu fayyaaleessa ikkara dandaannoni?” Qoleno isi Magano togo yiino: “Kuneeti, Maganu qullaawoota sokkaasinesi nafa diammaꞌnanno; isi albaanni gordu kalaqami nafa keeraancho diꞌꞌikkino.” (Iyo. 15:14, 15) Kuni waajjo kaphooti! Togo yine hendammora hasiꞌrannohu Sheexaane ikkinota qaango. Isi togoo coye calla hendeemmoha ikkiro hexxonke baꞌannota afino. Hakko daafira togoo kapho macciishshitooti; hattono Yihowa uyino hexxo illachishi. Isi hegere heeshsho afiꞌrattora hasiꞌrannotanna tenne mixo wonshiꞌratto gede kaaꞌlannoheta huluullantooti.—1 Xim. 2:3, 4.

HEXXOꞌNE KAAJJISHIꞌRA AGURTINOONTE

11. Hexxonke woꞌmita geeshsha cince agadha hasiissannonkehu mayiraati?

¹¹ Hexxonke kaajjishiꞌra woꞌmanka woyite shota ikkitanno yaa diꞌꞌikkino. Maganu uyino hexxo wonshanno yanna cincine agadha hoongammora dandiineemmo. Ikkirono Yihowa woꞌmanka woyite heeꞌrannoha ikkino daafira ninkera seeda labbanno yanna isira haranchote. (2 Phe. 3:8, 9) Isi hedinore wonshanno; kayinni isi hedinore wonshannohu ninke hendoommo yannara ikka hoogara dandaanno. Ikkina Maganu uyino hexxo wonshanno yanna cincine agadhineemmo woyite hexxonke kaajjishiꞌneemmo gede kaaꞌlankera dandaannori maati?—Yai. 5:7, 8.

12. Ibiraawoota 11:1, 6 kultanno garinni hexxonna ammana mayi xaadooshshe afidhino?

¹² Hexxonke woꞌmitanno gede assannohuwa Yihowawa shinqummoro, hexxonke kaajjado ikkitanno gede assiꞌra dandiineemmo. Isinni, hexxo heedhannonke gede Yihowa noota ammananna isi “iso hasiꞌranno [mannira] baꞌraaꞌra aannota ammana” hasiissannonke. (Ibiraawoota 11:1, 6 nabbawi.) Yihowa albinni roore xawe leellinkero, isi eino qaale wonshannota albinni roore addaxxineemmo. Hanni Yihowa ledo noonke jaalooma kaajjishiꞌne hexxonke kaajjado ikkite heedhanno gede assiꞌra dandiineemmo doogga laꞌno.

13. Maganunniwa shiqa dandiineemmohu hiittoonniiti?

¹³ Yihowa huucciꞌri hattono Qaalesi nabbawi. Yihowa laꞌꞌa dandiineemmokkiha ikkirono, isiwa shiqa dandiineemmo. Isi huuccattonke macciishshannota addaxxine isiwa huucciꞌra dandiineemmo. (Erm. 29:11, 12) Qoleno Qaalesi nabbambenna hiincine Maganu yaannore macciishsha dandiineemmo. Yihowa alba isira ammanantinore towaatino gara nabbambummoro hexxonke albinni roore kaajjitanno. “Qullaawa Maxaaffa giddo borreessinoonnire baala rosiisankera borreessinoonni. Qullaawa Maxaaffa widoonni afiꞌneemmo cincanna jawaante hexxo uyitannonke.”—Rom. 15:4.

14. Yihowa wolootaho assino coye hiinca hasiissannonkehu mayiraati?

¹⁴ Yihowa eino qaale wonshino gara hiinci. Hanni Maganu Abirihaamiranna Saarara assinonsare laꞌno. Insa geedhino daafira ooso ila didandiino. Ikkollana Maganu insa qaaqqo ilannota kule qaale einonsa. (Kal. 18:10) Abirihaami ma assiyya? Qullaawu Maxaafi Abirihaami, ‘Sirchikki batiꞌranno yinoonninte gede lowo gosa anna ikkannota ammanino’ yaanno. (Rom. 4:18) Mannu hedora kuni coyi ikkannokkiha lawirono, Abirihaami Yihowa eino qaale wonshannota ammanino. Kuni ammanamino manchi hexxo dimudhino. (Rom. 4:19-21) Tini xagge mittu coyi horonta ikkannokkiha lawirono, Yihowa eino qaale woꞌmanka woyite wonshannota addaxxineemmo gede assitannonke.

15. Yihowa assinohere hiinca hasiissannohehu mayiraati?

¹⁵ Yihowa atera assinohere hedi. Maganu Qaalisi giddo borreessino hexxo woꞌmase kaaꞌlitinohehu hiittoonniitiro hedi. Lawishshaho Yesuusi Annisi heeshshote hasiisannohere aahera qaale einota kulino. (Mat. 6:32, 33) Qoleno Yesuusi Yihowa huuccidhannorira qullaawa ayyaana aannota kulino. (Luq. 11:13) Yihowa einoha konne qaaleno wonshino. Yihowa kiꞌnera einoha wole qaaleno wonshinohu hiittoonniitiro qaagginoonniha ikkara dandaanno. Lawishshaho isi, gatona yaahera, sheshifachishahera, hattono ayyaanaamittete sagale aahera qaale eino. (Mat. 6:14; 24:45; 2 Qor. 1:3) Maganu assinohere hiincattoha ikkiro, isi uyinohe hexxora noohe ammana albinni roore kaajjitanno.

HEXXOTENNI HAGIIDHE

16. Hexxonke muxxe eltooti yineemmohu mayiraati?

¹⁶ Hegere heeshsho hexxonke Maganu uyinonkete muxxe eltooti. Tini dhagge ikkitanno hexxo woꞌmitannota dihuluullammeemmo. Hexxonke mokkollichu gede ikkite, qarrunna dartu iillannonke woyite wodanaaꞌmineemmo gedenna reyo nafa waajjineemmokki gede kaaꞌlitannonke. Qoleno hexxonke gulleete gede ikkite hedonke agartannonke; tini busha coye gimbe dancha coye assineemmo gede kaaꞌlitannonke. Qullaawu Maxaafi aana xintantino hexxonke Maganunniwa shinqeemmo gedenna isi mageeshshi geeshsha baxannonkero huwanteemmo gede kaaꞌlitannonke. Woꞌmanka woyite hexxonke xabbe leeltanno gedenna kaajjado ikkitanno gede assiꞌranke lowo geeshsha kaaꞌlitannonke.

17. Hexxonke hagiidhineemmo gede assitannonkehu mayiraati?

¹⁷ Soqqamaasinchu Phaawuloosi Roomaho heeꞌranno Kiristaanira borreessino sokkara “Hexxotenni hagiidhe” yee jawaachishinonsa. (Rom. 12:12) Phaawuloosi ammaname heeꞌriro iima hegere heeshsho afiꞌrannota afino daafira hagiidha dandaanno. Ninkeno Yihowa eino qaale wonshannota addaxxineemmo daafira hexxonkenni hagiidha dandiineemmo. Faarsaanchu togo yee borreessino: “Maganosi Kaaliiqa hexxino manchira tashshi yoosi. Isi woꞌmanka woyite gondoorosi agaranno.”—Far. 146:5, 6.