Surrete Xisso Waaddannonsare Kaaꞌla Dandiinanni Gara

Hatto Yaa Mayyaate?

Jaalanke surrete dhibbi waadannosi woyite kande amandeemmori baꞌꞌankera dandaanno. Ikkollana amaddinosi xisso dandee heeꞌranno gede kaaꞌline isi daafira hendeemmota leellisha dandiineemmo. Hiittoonni?

Tini Kaaꞌlitannohu Hiittoonniiti?

‘Macciishshate rahoottoha ikki.’—YAIQOOBI 1:19.

Jaalakki kaaꞌla dandaattote qara doogga giddo mitte, isi hasaaphanno woyite seekke macciishshate. Isi coyiꞌranno coyira baalaho dawaro qola hasiissannohehu gede assite heddooti. Coyiꞌrannore macciishshitanni noottota afanno gede assi; hattono mararattosita leellishi. Qarrasi huwatate woꞌnaali; hattono isi togooho yaate muddantooti. Isi hedikkinni gedensoonni gaabbannore coyiꞌrara dandaannota deꞌooti.—Iyyoobi 6:2, 3.

“Waajjaleeyye [“yaaddinore,” Haaro Alame Tiro] jawaachishshe.”—1 TESELONQE 5:14.

Jaalikki yaadara woy ditidhoommoho yee hedara dandaanno. Mayite coyiꞌrattoro afa hoogittoro nafa, isi daafira hedattota kulittosiro sheshifataranna jawaatara dandaanno.

“Jaalu woꞌmanka woyite jaalaholla; roduuno qarru barra iillanno.”—LAWISHSHA 17:17.

Mitore assite kaaꞌlisi. Kaaꞌleemmosi gara afoommo yite hedantenni, maa assine kaaꞌlinasira hasiꞌrannoro iso umosi xaꞌmi. Jaalikki mayi hasiisannosiro kuꞌla qarra ikkitusiro, mitteenni mitore assa lawishshaho fultine lekkatenni milli yaa dandiitinannita kulisi. Woy mitore hirte abba, mine feya, woy wole looso loosse kaaꞌla dandaattota kulisi.—Galatiyu Sokka 6:2.

“Manna baala dandee.”—1 TESELONQE 5:14.

Jaalikki hasaawa hasiꞌrannokki yanna heedhara dandiitanno. Hakko daafira isi coyiꞌra hasiꞌranno woyite hasaaphannore macciishshate qixxaawoottoha ikkoottota kulisi. Jaalikki dhiwannosi daafira xissiisannohere coyiꞌrara woy assara dandaanno. Isi dinyeꞌne barra sayisara woy hifatamara dandaanno. Iso kaaꞌlannore assatto woyite cinci, hattono qarrasi huwatate woꞌnaali.—Lawishsha 18:24.

Jaalakki Irkisakki Lowore Kaaꞌlitara Dandiitanno

“Jaalaꞌya hasidhannoe yanna baalantera noommaseta affara hasiꞌreemma. Qarrase tira dandeemmakkiha ikkirono, woꞌmanka woyite ise hasaaphitanna macciishshate woꞌnaaleemma. Mito woyite hasaaphitanna macciishshannoha afiꞌrase calla beedho afidhanno gede assitannose.”—Sagale giwisannose gede assitannoti quwa saꞌino yaaddo waaddannose jaala nooseti Feera.a

“Jaalaꞌya giddo mitte roore shaqqadotenna manna jawaachishshannote. Ise minisera woshshite dancha sagale koyissinoe. Ise baxillenna shaqqille leellishshinoe daafira, giddoꞌyata fushshe hasaapha shota ikkitinoe. Tini qolte baasa jawaachishshinoe!”—Quwa saꞌino yaaddo waaddannoseti Hayuuni.

“Cinca lowo geeshsha hasiissannote. Minaamaꞌya koffi assannoe coye assitanno woyite, ise hatto assitinohu dhiwannose daafiraati ikkiina busha ikkitino daafira diꞌꞌikkino yee hedeemmo. Tenne qaagaꞌya hanqeemmosekki gedenna shaqqille leellisheemmose gede kaaꞌlitinoe.”—Quwa saꞌino yaaddo waaddannose minaama noosihu Jeekoobi.

“Minaamaꞌya lowo geeshsha kaaꞌlitannoe hattono jawaachishshannoe. Yaaddo lowo geeshsha waaddannoe woyite, ise assa hasiꞌreemmokkire asseemmo gede horo dixixxiibbannoe. Hatto yaano ise mito woyite assa baxxanno coye nafa anera yite agurtanno woyiti no. Ise umise horo agurtannotanna shaqqado ikkitino daafira ise geya ikkannoehu dino.”—Yaaddo waaddannosihu Eniriiko.