Yihowa Qinaannohe Gede Kaaꞌlannohe

1-2. (a) Qarru iillannonke woyite dhagge assiꞌra hasiissannonkekkihu mayiraati? (b) Konni birxichira maa ronseemmo?

YIHOWA manna ikkinoommo daafira qarru iillannonke woyite dhagge diassiꞌneemmo. Qullaawu Maxaafi kulannonte gede “Maganu gashshoote eate lowo qarra adha [hasiissannonketa]” anfoommo. (Soq. 14:22) Iillannonkehu mitu qarri Maganu abbannoti haaro alame dagga geeshsha woꞌmunni woꞌma baꞌꞌannokkita anfoommo; hatte yannara “reyo woy dadillu woy wiꞌla woy shetto . . . diheedhanno.”—Aju. 21:4.

² Yihowa qarru iillannonketa dihoolanno. Ikkirono isi qarra dandiine saꞌneemmo gede kaaꞌlannonke. Soqqamaasinchu Phaawuloosi Roomaho heeꞌranno Kiristaanira mayinoro wodanchi. Isi umo isiranna ammanate roduuwisira iillinonsaha batinye qarra kulino. Hakkiinni isi togo yee borreessino: “Ninke kayinni baxinonkehu isi widoonni konne coye baala woꞌmunni woꞌma qeelle saꞌneemmo.” (Rom. 8:35-37, NW) Togoo yaa Yihowa qarru iille noohe yannara nafa qinaannohe gede kaaꞌlannohe yaate. Hanni Yihowa Yooseefira qinaannosi gede kaaꞌlinosihu hiittoonniitironna ateno kaaꞌlannohehu ma garinniitiro laꞌno.

HEDEWEELCHO HEEꞌNOOMMO GARI SOORRAMANNO WOYITE

3. Yooseefi heeshsho hedeweelcho soorrantinohu hiittoonniiti?

³ Yaiqoobi beettosi Yooseefi lowo geeshsha baxanno. (Kal. 37:3, 4) Hakko daafira bayiruuddu roduuwisi Yooseefi lowo geeshsha hinaassu. Insa faro afidhuti Yooseefi Miidiyaami daddalaasinera hirtu. Kuri daddalaasine lowo xibbe kiilo meetire xeertidhe nootewa Gibitse massite Yooseefi Feriooni agaraasine roorrichi Phoxifaarira hirtino. Yooseefi heeshsho hedeweelcho soorrantino; annisi lowo geeshsha baxannosi beetti Gibitsete mittu manchi borojjicho ikkino!—Kal. 39:1.

4. Yooseefira iillinosi gedee qarri iillankera dandaannohu hiittoonniiti?

⁴ Qullaawu Maxaafi ‘baalunku mannira bushu coyi iillanno’ yaanno. (Ros. 9:11, Holii Bayibili Iiziyi tu Ridi) Mito woyite “manna baalaho” iillanno qarri iillannonke. (1 Qor. 10:13) Woy Yesuusi rosaano ikkinoommo daafira qarru iillannonke. Lawishshaho mannu qacifatankera, giwankera woy ammanankenni kainohunni darammeemmo gede nafa assankera dandaanno. (2 Xim. 3:12) Iillannonke qarri ikkihano ikkiro Yihowa qinaannonke gede kaaꞌlannonke. Isi Yooseefira qinaannosi gede kaaꞌlinosihu hiittoonniiti?

5. Phoxifaari Yooseefira qinaannosi gede kaaꞌlinosihu aye ikkinota huwatino? (Kalaqama 39:2-6)

⁵ Kalaqama 39:2-6 nabbawi. Phoxifaari Yooseefi dandoo noosi wedellichanna diinaggaawe loosannoha ikkinota wodanchino. Qoleno Phoxifaari, Yooseefi togooha ikkinohu mayiraatiro afino. Isi, Yihowa Yooseefira ‘assiri baalu qinaannosi’ gede assinota afino.b Gedensoonni Phoxifaari Yooseefi gamba yiino soqqamaancho assiꞌrinosi. Qoleno isi minisi woꞌmaho hajajaancho assiꞌrinosi. Tini mayi guma abbituyya? Phoxifaari dureessa ikkino.

6. Yooseefira, iillinosi coyi daafira mayi macciishshaminosi?

⁶ Hanni Yooseefira mayi macciishshaminosiro hedate woꞌnaali. Isi baalunku coyinni roore hasiꞌrannori maati? Phoxifaari naadasiranna baꞌraasasiraati? Isi roore hasiꞌrannohu borojjimmatenni fule annisiwa higa ikkara dandaanno. Yooseefira Phoxifaari mini giddo roorre baala uyinoonnisiha ikkirono, isi Yihowa magansiꞌrannokki manchi borojjichooti. Yihowa, Phoxifaari Yooseefi borojjimmatenni fushshanno gede diassino. Yooseefira albillitte rooru qarri iillannosi.

COYI ROORE BUSHANNI HAꞌRANNO WOYITE

7. Yooseefira iillinosi qarri bushanni haꞌrinohu hiittoonniiti? (Kalaqama 39:14, 15)

⁷ Kalaqama fooliishsho 39 kultannonte gede, Phoxifaari minaama Yooseefi ille worte laꞌino; hattono iso soꞌrisiisate duucha higge woꞌnaaltino. Yooseefi kayinni horonta maahoyye diyiino. Jeefote ise Yooseefira lowo geya hanqitino daafira seyataera woꞌnaalino yite kaphunni kassassinosi. (Kalaqama 39:14, 15 nabbawi.) Tenne macciishshiti Phoxifaari Yooseefi usurranni gede assino; hakkiinni Yooseefi usurame boode diro keeshshino. (Kal. 39:19, 20) Yooseefi usurroonnihu hiittoowaati? Yooseefi “usuru” mine kulate horoonsiꞌrinohu Ibiraawootu afii qaali “bale” woy “qile” yineno tira dandiinanniho; tini Yooseefi usuraminohu tunsote ikkinotanna isi hexxo mudhinota leellishshanno. (Kal. 40:15) Qoleno Qullaawu Maxaafi mite yanna geeshsha Yooseefi, lekkasi cagaagetenni usurroonnitanna goowisira siwiilu shibo worroonnita kulanno. (Far. 105:17, 18) Yooseefira iillinosi qarri albinni roore bushanni haꞌrino. Isi addaxxinanni borojjichi usuranya ikkino.

8. Iillinonke qarri roore bushanni haꞌrirono maa addaxxa dandiineemmo?

⁸ Giddokkita kulte Yihowa huucciꞌrittorono iillinohe qarri roore bushanni haꞌrino yanna no? Togoo coyi iillankera dandaanno. Yihowa tenne Sheexaanu gashshino alame giddo qarru iillannonketa dihoolanno. (1 Yoh. 5:19) Ikkirono Yihowa iillannohere baala afannotanna towaatannoheta addaxxa dandaatto. (Mat. 10:29-31; 1 Phe. 5:6, 7) Qoleno isi “Horo diagureemmohe; dicallachisheemmohe” yee qaale eino. (Ibi. 13:5) Yihowa iillinohe qarri hexxo mudhatto gede assihero nafa dandiite saꞌꞌatto gede kaaꞌlannohe. Hanni Yihowa togoo yannara Yooseefi kaaꞌlinosi gara laꞌno.

9. Yooseefi usurame noo yannara Yihowa ledosi noota leellishannori maati? (Kalaqama 39:21-23)

⁹ Kalaqama 39:21-23 nabbawi. Yooseefi usurame noote qarru yannara nafa Yihowa qinaannosi gede kaaꞌlinosi. Hiittoonni? Phoxifaari assinte gede usuru mini roorrichi Yooseefi ammaninosi hattono ayirrisinosi. Mulenni usuru mini roorrichi usuru mine noo usuranyoota baalanka Yooseefi anga worino. Isinni Qullaawu Maxaafi, “Usuru mini roorrichino Yooseefi anga noore mittoreno dilaꞌꞌanno” yaanno. Xa Yooseefira loosannohu danchu loosi noosi. Tini dihendoonnite! Gashshaanchu minaama seyatino yine kassansoonni usuranyira togoo hadara hiitto aa dandiinanni? Qullaawu Maxaafi tenne xaꞌmora dawaro qolanni Kalaqama 39:23 togo yaanno: “Kaaliiqi ledosi noo daafira, assannori baalu qiniisi.”

10. Yooseefira baalunku coyi qiniinosiha lawinosikkihu mayiraatiro xawisi.

¹⁰ Hanni xaano Yooseefira mayi macciishshaminosiro hedi. Kaphunni kassanse usurrisihu gedensaanni isi baalunku coyi qinaannoe yee hedinoha lawannohe? Yooseefi roore hasiꞌranno coyi maati? Usuru mini roorrichi ayirrisasira hasiꞌranno? Yooseefi roore hasiꞌranno coyi usuru mininni fulate. Wole agurina isi, usuru mininni fulanni noo usuranyi Ferioonira kule usuru mininni fulanno gede assasira nafa xaꞌmino. (Kal. 40:14) Ikkirono hakku manchi bayichonkonni Ferioonira dikulino. Hakko daafira Yooseefi hakkuyi gedensaanni lame diro woꞌma usuru mine keeshshino. (Kal. 40:23; 41:1, 14) Ikkirono Yihowa Yooseefira qinaannosi gede kaaꞌla diagurino. Hiittoonni?

11. Yihowa Yooseefira hiittee baxxitino dandoo uyinosi? Tini Yihowa hedinori woꞌmanno gede assitinohu hiittoonniiti?

¹¹ Yooseefi usuru mine noo yannara Yihowa Gibitsete moote lame yaachishshanno haaqee haaqiiꞌranno gede assino. Feriooni tenne haaqee tiro afate lowo geeshsha quqquxamino. Moote Yooseefira haaqee tirate dandoo noosita afiti usuru mininni woshshiishe abbino. Yihowa kaaꞌleennasi Yooseefi haaqeete tiro kulino; hattono kaajja amaale amaalesi Feriooni maalaꞌlanno gede assino. Feriooni Yihowa konni wedellichi ledo noota afiti Gibitsete gobba baalate sagale beehanno gede shoominosi. (Kal. 41:38, 41-44) Gedensoonni Gibitsetenna Yooseefi maate heedhannote Kanaani gobbara buutote hude ubbu. Xa Yooseefi maatesi gatisa dandaanno; tini Buuramino Moote daanno kali gate saꞌꞌanno gede assitanno.

12. Yihowa Yooseefira qinaannosi gede assinohu hiitte doogganniiti?

¹² Hanni Yooseefira tuncu yiinosiha dhagge ikkanno coye hedi. Phoxifaari borojjichosi Yooseefi baxxino garinni laꞌꞌanno gede assinohu ayeti? Usuru mini roorrichi usuranya Yooseefi ayirrisanno gede assinohu ayeti? Feriooni yaachishshanno haaqee haaqiiꞌranno gede assinohunna Yooseefira tenne haaqee tirate dandoo uyinohu ayeti? Yooseefi Gibitsete gobbara sagale beehannoha asse shoomanno gede Feriooni kakkayisinohu ayeti? (Kal. 45:5) Yooseefira baalunku coyi qinaannosi gede assinohu Yihowaati. Yooseefi roduuwi iso shaate gano gantinoha ikkirono, Yihowa konne coye soorre isi hedinori woꞌmanno gede assino.

YIHOWA QINAANNOHE GEDE ASSANNOHU HIITTOONNIITI?

13. Yihowa iillannonkehu mittu mittunku coyira mereero eanno? Xawisi.

¹³ Yooseefi daafira kultanno xaggenni maa ronseemmo? Yihowa iillannonke coyi baalaho mereero dieanno. Isi iillannonkeha mitto mittonka busha coye danchurira qole soorranno? Disoorranno. Qullaawu Maxaafi hatto yee dirosiisanno. (Ros. 8:9; 9:11) Ikkirono, Yihowa qarru iillannonke woyite afannotanna kaaꞌlannonke gede raarreemmo raare macciishshannota anfoommo. (Far. 34:15; 55:22; Isa. 59:1) Hakkiino sae Yihowa iillannonke qarra qeelle saꞌneemmo gede kaaꞌlannonke. Hiittoonni?

14. Yihowa qarru yannara kaaꞌlannonkehu hiittoonniiti?

¹⁴ Yihowa kaaꞌlannonketi mitte doogo sheshonna jawaante afiꞌneemmo gede assate; isi duucha woyite tenne assannohu hasiisse noonke yannaraati. (2 Qor. 1:3, 4) Turkiministaanete heeꞌrannohu Iziizi yinanni rodii woꞌnaalshi tenne leellishanno; ammaꞌnasinni kainohunni iso lame diro usurroonnisi. Isi togo yiino: “Yoote minira haaꞌne haꞌnie barra mittu rodii, ‘Sammi yitine ane calla hexxitiniro, jawaantenna gato afidhinanni’ yaannoha Isayaasi 30:15 noo qummeeshsha leellishinoe. Kuni qummeeshshi woꞌmanka woyite wodanaaꞌmeemmonna baalunku coyira Yihowa addaxxeemmo gede kaaꞌlinoe. Konne qummeeshsha hiincaꞌya usurame noommo yanna baalantera kaaꞌlitinoe.” Roore hasiisse noohe yannara Yihowa sheshonna jawaante oye kaaꞌlinohe yanna qaagatto?

15-16. Toori woꞌnaalshinni maa rosootto?

¹⁵ Duucha woyite Yihowa qarra dandiine saꞌneemmo gede kaaꞌlinonketa huwanteemmohu qarru hoꞌlihu gedensaanniiti. Toori yinanni rodoo tini halaale ikkase huwattino. Qaaqqise Maasooni lee diro woꞌma kaanserete dhibbi waadisihu gedensaanni lubbamino. Toori lowo geeshsha xissiisidhinoti dihuluullissannote. Ise, “Mitte ama kawii saꞌe xissiisidhanno gede assannori no yee dihedeemma” yitino. Ise ledde togo yitino: “Qaaqqiꞌya qarramanna laꞌꞌammante ani qarramummaro woyyanno; wolootu annuwinna amuuwino tennera sumuu yitannoti dihuluullissannote.”

¹⁶ Toori iillinose qarri buutonniha ikkirono ise gedensoonni Yihowa konne qarra dandiite saꞌanno gede kaaꞌlinose gara huwattino. Ise togo yitino: “Hatte yanna hedeemma woyite, qaaqqiꞌya dhiwami yannara Yihowa shaqqillunni kaaꞌlinoe gara qaageemma. Lawishshaho Maasooni lowo geeshsha dhiwameenna mannu iso laꞌꞌara fajjinannikki yannara nafa, roduuwu lame saate woꞌma makeenunni hadhe iso laꞌꞌate hospitaale daggino. Hospitaale daye kaaꞌlannonke manna horo hoonge diegenninoommo. Qoleno roduuwu maalaamittete hasiisannonkere baala wonshitinonke. Lowo geeshsha qarrissanno yannara nafa woꞌmanka woyite hasiisannonkere afiꞌnoommo.” Yihowa Toorira qarra dandiite saꞌanno gede hasiisannosere uyinose; Maasoonino kaaꞌlinosi.—“Yihowa Hasiise Noonkere Uyinonke” yitanno saaxine lai.

YIHOWA ASSINOHERE HABBOOTI

17-18. Qarru yannara Yihowa kaaꞌlanni noonketa huwanteemmonna iso galaxxineemmo gede kaaꞌlannonkeri maati? (Faarso 40:5)

¹⁷ Faarso 40:5 nabbawi. Ilaala gooddiꞌranno manchi mixo ilaalu guunxo iillate. Ikkirono gooddiꞌranno woyite doogote uurre biifinore laꞌꞌanni hagiidha dandaanno. Hatteente gede, qarra dandiite noottoha ikkiro nafa Yihowa qinaannohe gede kaaꞌlanni noohehu hiittoonniitiro taxxi yite hedate woꞌmanka woyite yanna gaaꞌma dandaatto. Mittu mittunku barri jeefora ateneeto togo yite xaꞌmi: ‘Teyo Yihowa maassiꞌrinoehu ma garinniiti? Qarru iillanni nooeha ikkiro nafa dandee saeemmo gede Yihowa kaaꞌlanni nooehu hiittoonniiti?’ Yihowa qinaannohe gede kaaꞌlinoheha ajayi ajeenna mitto coye hedate woꞌnaali.

¹⁸ Iillinohe qarri hoꞌlanno gede huuccidhanni noottoha ikkara dandaanno. Hatto assakki garahonna hasiissannote. (Fil. 4:6) Ikkirono xa afiꞌnoommo atooteno wodancha hasiissannonke. Baalunkunni roore Yihowa jawaachishannonketanna qarra dandiine saꞌneemmo gede kaaꞌlannonketa kule qaale einonke. Hakko daafira woꞌmanka woyite Yihowa kaaꞌlora iso galaxxi. Hatto assittoro Yihowa Yooseefi kaaꞌlinte gede qarru yannara nafa qinaannohe gede kaaꞌlanni nooheta wodanchatto.—Kal. 41:51, 52.