Qullaawu Maxaafi Konne Maxaafa Borreessiisinohu Daafira Maa Kulannonke?

1. Qullaawu Maxaafi daafira Yihowa galatattohu mayiraati?

MAGANU YIHOWA Qullaawa Maxaafa uyinonke daafira lowo geya galaxxineemmosi! Isi Qullaawu Maxaafi widoonni xaa yannara iillannonke qarra dandiine saꞌneemmo gede kaaꞌlitannonketa kaajja amaale aannonke. Qoleno isi dhagge ikkitannota albillittete hexxo uyinonke. Baalunkunni roore Yihowa Qullaawu Maxaafi widoonni batinye akattasi anfeemmo gede assinonke. Isita baxissanno akatta hiincineemmo woyite wodaninke hagiidhanno; hattono isi ledo muli jaalooma kalaqiꞌne albinni roore isiwa shinqeemmo.—Far. 25:14.

2. Yihowa ayimmasi mannaho kulinoti addi addi doogga hiitteeti?

² Yihowa mannu iso afara hasiꞌranno. Hundi waro isi, mannu iso afanno gede assinohu haaqeete, ajuujatenni sokkaasinete widoonniiti. (Kir. 12:6; Soq. 10:3, 4) Kayinni borreessa hoongoommero mannu haaqeete, ajuujate woy sokkaasinete widoonni kulloonni sokka hiitto asse xiinxalla dandaanno? Yihowa anfammora hasiꞌrannore ‘maxaafaho borreessinanni’ gede assinohu iseraati. (Erm. 30:2) ‘Maganu doogo guuta’ ikkitino daafira, isi ledo konni garinni xaandeemmo gede assasi danchanna kaaꞌlitannonketa ikkitinota addaxxa dandiineemmo.—Far. 18:30.

3. Yihowa Qullaawu Maxaafi sokka baꞌukkinni keeshshitanno gede assinohu hiittoonniiti? (Isayaasi 40:8)

³ Isayaasi 40:8 nabbawi. Lowo kume diro, ammanamino labballinna meenti Maganu Qaalinni kaajja amaale afiꞌranni keeshshino. Kuni ikka dandiinohu hiittoonniiti? Lowo diri albaanni Qullaawa Borro borreessinoonnihu, mulenni baꞌꞌara dandaanno uduunnichi aanaati; hakko daafira hakkawaro borreessinoonniti hundi borro xaa yannara dino. Kayinni Yihowa mannu tenne borro galchanno gede assino. Tenne borro galchituri guuntete xeꞌne noonsare ikkiturono lowo geeshsha qorophite galchitino. Ibiraawootu Afiite Qullaawa Borro daafira mittu fullahaanchi togo yee borreessino: “Tenne borro geeshsha sokkase baꞌukkinni keeshshitinoti wole hundi borro dino yaa dandiinanni.” Hakko daafira tenne borro borreessininku lowo yanna saꞌinoha, borreessinoonnihu mulenni baꞌꞌara dandaannori aana ikkirono hattono galchituri guuntete xeꞌne noonsare ikkiturono, xaa yannara nooti Qullaawu Maxaafi sokka borreessiisino Maganihu Yihowata ikkitinota addaxxa dandiineemmo.

4. Konni birxichira maa ronseemmo?

⁴ Yihowa “dancha eltonna woꞌmu atooti baalu” Buichooti. (Yai. 1:17) Yihowa uyinonkete kaajja elto giddo mittu Qullaawa Maxaafaati. Mittu manchi mitore uyinkero tini isi ninkenna hasiisannonkeri daafira afinota leellishshanno. Qullaawa Maxaafa uyinonke Maganino ninkenna hasiisannonkeri daafira afino. Yihowa uyinonketa tenne elto xiinxalline isi daafira lowore ronseemmo. Isi ninkenna hasiisannonkeri daafira seekke afinota ronseemmo. Konni birxichira Qullaawu Maxaafi giddo kulloonnite sase Yihowa akattanni maa ronseemmoro laꞌneemmo; insano hayyote, taashshotenna baxilleho. Hanni balanxe Qullaawu Maxaafi Maganu hayyo daafira kulannonkehu hiitte doogganniitiro laꞌno.

QULLAAWU MAXAAFI MAGANU HAYYO DAAFIRA KULANNONKE

5. Qullaawu Maxaafi Maganu hayyo leellishannoti mitte doogo hiitteeti?

⁵ Yihowa isiti hayyo noo amaale hasiissannonketa afino. Yihowa uyinonke elto ikkinohu Qullaawu Maxaafi giddo isi hayyo woꞌmitino. Qullaawu Maxaafi amaale manna lowo geeshsha kaaꞌlitanno. Qullaawu Maxaafi mannu heeshsho biddi assanno. Umita Qullaawu Maxaafi maxaaffa borreessini yannara Muse Israeelete togo yiino: “Kuni qaali kiꞌnera seeda heeshsho aannoꞌneho ikkinnina, mullicho qaale diꞌꞌikkino.” (Mar. 32:47) Qullaawa Borro amaale harunsitannori qinaabbinotanna hagiirru noo heeshsho heedhanno. (Far. 1:2, 3) Maganu Qaali lowo dirira albaanni borreessinoonniha ikkirono xaano mannu heeshsho woyyeessate wolqa afiꞌrinoho. Lawishshaho jw.org aana aante aantete fulannohu “Qullaawu Maxaafi Heeshsho Biddi Assanno” yaanno birxichi no; hakkiicho Qullaawu Maxaafi amaale harunsino daafira heeshshonsa biddi assiꞌrino mannihu batinyu woꞌnaalshi no.—1 Tes. 2:13.

6. Qullaawu Maxaafi gedeehu wolu maxaafi dino yineemmohu mayiraati?

⁶ Maganu Qaali gedeehu wolu maxaafi dino. Togo yineemmohu mayiraati? Korkaatuno konne maxaafa borreessiisinohu Maganu Yihowa woꞌmanka dandaannoho, hegereho hattono hayyosira taalle dinooho. Wole batinye maxaafa qixxeessino manni reyihu gedensaanni nafa mannu hattenne maxaaffa nabbawanno; ikkollana hatte maxaaffa giddo noo amaale yannate gedensaanni kaaꞌlitannokkita ikkitanno. Qullaawu Maxaafi giddo noohu xintu seeri kayinni woꞌmanka woyite kaaꞌlannoho; kuni seeri baalante yannara heeꞌranno manna kaaꞌlannoha ikkinoti leeltino. Konne Qullaawa Maxaafa nabbambummoronna ronsoommore hiincinummoro, konne maxaafa borreessiisino Magani wolqaataamu qullaawu ayyaanisinni, giddosi noo amaale loosu aana hosiinseemmo gede kaaꞌlannonke. (Far. 119:27; Mil. 3:16; Ibi. 4:12) Addanko Qullaawa Maxaafa borreessiisinohu heeshshote Magani ninke kaaꞌlate quqquxamanno. Tini, Qullaawa Maxaafa ganyine nabbawate kaꞌneemmo gede assitannonke!

7. Qullaawu Maxaafi hundiwaro Maganu manni mitto ikkanno gede assinohu hiittoonniiti?

⁷ Qullaawu Maxaafi Maganu hayyo nooha ikkasi leellishshannoti wole doogo Maganu manni mitto ikkanno gede kaaꞌlasiiti. Israeele Hexxote Gobba eꞌu yannara heedhinohu addi addi qooxeessiraati. Mitu qulxuꞌme woshshaaxxitannore, mitu saada ceꞌannore, wolootu kayinni baatto loosidhe galtannore ikkitino. Mittu qooxeessira heedhanno Israeele wolu qooxeessira heedhanno Israeele daafira heda hooggara dandiitanno. Kayinni Yihowa Israeelete manni borreessinoonniha Qaalesi nabbambannanna xawinse kullanna macciishshate duucha hige gamba yaanno gede qixxaawo assino. (Mar. 31:10-13; Neh. 8:2, 8, 18) Hanni mittu ammanamino Israeelichi Yerusaalame mare hatte gobbanni add addi qooxeessinni dayinohu isinte gede Yihowa magansiꞌrannohu lowo miliyoone ikkanno manni ledo xaadanno woyite hiitto ikkannoro hedi! Konni garinni Yihowa mannisi mitto ikke heeꞌranno gede kaaꞌlino. Gedensoonni Kiristaanu songo xintantuta, songote giddo noo labballinna meenti coyiꞌranno afiinna lophino gari addi addiho hattono mitu buxanete mitu dureeyyete. Ikkirono insa Qullaawa Borro baxxanno daafira halaalaancho Magano mittimmatenni magansidhino. Ammanaasine ikkitinori Maganu Qaale huwata dandiitannohu ammanate roduuwinsa kaaꞌlitunsaronna insa ledo gamba yituro callaati.—Soq. 2:42; 8:30, 31.

8. Qullaawu Maxaafi xaa yannara Yihowa manna mitto assinohu hiittoonniiti?

⁸ Hayyichu Maganinke Qullaawu Maxaafi widoonni mannasi rosiisanna mitto ikkanno gede assa diagurino. Qullaawu Maxaafi Yihowa daafira afa hasiissannonke halaale baala kulannonke. Songote, woradunna qoqqowu gambooshshiwa Qullaawa Borro nabbambannanna xawinse kulanna macciishshate ganyine gamba yineemmo. Hakko daafira Qullaawu Maxaafi Yihowa hedinori woꞌmanno gede yaano mannisi isira ‘mitteenni soqqamanno gede’ lowore kaaꞌlanno.—Sof. 3:9.

9. Qullaawu Maxaafi sokka huwatate hiikku akati hasiisanno? (Luqaasi 10:21)

⁹ Hanni Yihowa hayyo leellishshannota wole taje laꞌno. Isi Qullaawa Maxaafa borreessiisinohu umonsa heeshshi assanno manni callu huwata dandaanno garinniiti. (Luqaasi 10:21 nabbawi.) Baalankawa heeꞌranno manni Qullaawa Maxaafa nabbawanno. Mittu egennaami Qullaawu Maxaafi, “baalunku manni nabbawannoha calla ikkikkinni baalante maxaaffanni roore qorophine nabbambanniho” yiino. Kayinni Qullaawu Maxaafi yaannore addinta huwattannorinna loosu aana hosiissannori umonsa heeshshi assitannore callaho.—2 Qor. 3:15, 16.

10. Qullaawu Maxaafi Yihowa hayyo leellishannoti wole doogo hiitteeti?

¹⁰ Qullaawu Maxaafi giddo Yihowa hayyo daafira ronseemmoti wole doogono no. Yihowa Qullaawu Maxaafi widoonni gaamote deerrinni rosiisannonkeha calla ikkikkinni isi annu annu deerrinni biddishshano aannonke; hattono sheshifachishannonke. Yihowa Qaale nabbambeemmo woyite isi ninke mittu mittunkura hedannonketa wodancha dandiineemmo. (Isa. 30:21) Qarru amadiꞌne yannara duucha higgine Qullaawa Maxaafa nabbabbine hattono hakko qummeeshsha kiꞌnera borreessinoonnihu gede assitine heddine diegentinoonni? Ikkirono Qullaawa Maxaafa borreessinoonnihu lowo miliyoone ikkanno manni huwata dandaanno garinniiti. Ikkina xaa yannara ninke mitto mittonka kaaꞌlitannonke mashalaqqe amada dandiinohu hiittoonniiti? Kuni ikkara dandiinohu Qullaawa Maxaafa hayyote taalle nookki Magani borreessiisino daafira callaati.—2 Xim. 3:16,17.

QULLAAWU MAXAAFI MAGANU TAASHSHO LEELLISHANNO

11. Qullaawa Maxaafa borreessini yannara Yihowa mallaadannokkiha ikkinota leellishinohu hiittoonniiti?

¹¹ Yihowahu wolu akati taashshote. (Mar. 32:4) Taashsho mallaada hoogate ledo xaadooshshe afidhino; qoleno Yihowa dimallaadannoho. (Soq. 10:34, 35; Rom. 2:11) Isi Qullaawa Maxaafa lowo manni coyiꞌranno qaalinni borreessinanni gede assasi mallaadannokkiha ikkinota leellishshanno. Umita 39 Qullaawu Maxaafi maxaaffa borreessinoonnihu roore Ibiraawootu afiinniiti; hatte yannara konne afoo Maganu manni qarramikkinni huwata dandaanno. Ikkirono umi xibbi diro batinyu manni coyiꞌrannohu Giriikete afooti; hakko daafira jeefonnita 27 Qullaawu Maxaafi maxaaffa borreessinoonnihu konni afiinniiti. Yihowa Qaalesi mittu afiinni calla borreessinanni gede diassino. Xaa yannara uullate aana noohu sette biliyoone meddi yaanno manni duucha afoo coyiꞌranno. Ikkina lowo manni Yihowa daafira rosa dandiinohu hiittoonniiti?

12. Daanieeli 12:4 noo masaalo tenne goofimarchu yannara woꞌmitinota leellishshanno doogga giddo mitte hiitteeti?

¹² Yihowa masaalaanchu Daanieeli widoonni, goofimarchu yannara “addu egennono” yaano Qullaawu Maxaafi giddo noo egenno ‘woꞌmitannota’ kule qaale eino. Batinyu manni Qullaawa Borro huwatanno. (Daanieeli 12:4 (NW) nabbawi.b) Tini egeno woꞌmitino doogga giddo mitte tirotenna attamate loosooti; hattono Qullaawa Maxaafanna Qullaawu Maxaafi aana xinntantino borro mannaho tuqisate. Alamete aana Qullaawu Maxaafi geeshsha lowo afiinni tirroonnihunna tuqinsoonnihu wolu maxaafi dino. Qullaawa Maxaafa tirtannoti daddalu dirijjitta mito woyite Qullaawa Maxaafa lowo woxira hirtanno. Yihowa dirijjite Qullaawa Maxaafa woꞌma woy xea 240 saꞌanno afiinni tirtino; hattono mannu woxe baatikkinni adha dandaanno. Konni garinni baalante gaꞌre manni goofimarchu daara albaanni ‘Maganu Gashshootiha Dancha Duduwo’ rosanni no. (Mat. 24:14) Taashshote Magani dandaami deerrinni batinyu manni Qaalesi nabbawe iso afanno faro afiꞌrara hasiꞌranno. Isi hatto assannohu ninke baalanka lowo geeshsha baxannonke daafiraati.

QULLAAWU MAXAAFI MAGANU BAXANNONKETA LEELLISHSHANNO

13. Qullaawu Maxaafi Yihowa baxannonketa leellishanno yineemmohu mayiraati? (Yohaannisi 21:25)

¹³ Qullaawu Maxaafi baalanka roorannohu Yihowa akati yaano baxillu daafira kulannonke. (1 Yoh. 4:8) Hanni Yihowa Qullaawu Maxaafi giddo heeꞌranno gedenna heeꞌrannokki gede assino coye hendo. Yihowa Qaalisi giddo isi ledo danchu jaaloomi heeꞌrannonke gede assiꞌrate, xaa yannara hagiirru noo heeshsho heeꞌratenna hegere heeshsho afiꞌrate kaaꞌlannonkere kulinonke. Ikkirono Yihowa baxannonke daafira wolqankera aleenni ikkinore dikulinonke.—Yohaannisi 21:25 nabbawi.

14. Qullaawu Maxaafi giddo Yihowa baxannonketa leellishinonketi wole doogo hiitteeti?

¹⁴ Qoleno Yihowa ninke ayirrisannota leellishanno garinni hasaawise baxillesi leellishinonke. Isi Qullaawu Maxaafi giddo, assa hasiissannonkehanna assa hasiissannonkekkiha mitto mittonka coye kule gawalo nookki seera diuyinonke. Hatteentenni isi Qaalisi giddo addunnita heeshshote xagge, baxissanno masaalonna kaaꞌlitanno amaale kule danchare doodhineemmo gede kaaꞌlinonke. Konni garinni Maganu Qaali woꞌmu wodaninkenni iso banxeemmo gedenna isira hajajammeemmo gede assannonke.

15. (a) Qullaawu Maxaafi, Yihowa Qaalesi nabbawanno manni daafira hedannota leellishannohu hiittoonniiti? (b) Misilete aana noo qaaqqo, wedellichu rodiinna jawa rodoo Qullaawu Maxaafi giddo kulloonnita hiittee xagge hiincanni no? (Kal. 39:1, 10-12; 2 Mot. 5:1-3; Luq. 2:25-38)

¹⁵ Qullaawu Maxaafi Yihowa ninke daafira lowo geeshsha hedannota leellishanno. Hiittoonni? Qaalisi giddo ninke mannu oosora macciishshantannonke hedo leellishshannoti lowo xagge no. Qullaawu Maxaafi giddo kulloonni manni ‘ninke gedee manna’ ikkino daafira insara macciishshaminonsare huwata diqarrissannonke. (Yai. 5:17) Baalunkunni roore Yihowara ninke gedee manni ledo noosi aante xiinxalline, isi “sao agurannohanna mararannoha ikkinota” albinni roore huwata dandiineemmo.—Yai. 5:11.

16. Qullaawu Maxaafi giddo, soꞌro loosino manni daafira nabbambeemmo woyite Yihowa daafira maa ronseemmo? (Isayaasi 55:7)

¹⁶ Qullaawu Maxaafi Yihowa baxannonketa wole doogono kulannonke. Qullaawa Borro soꞌro loonseemmo woyite Maganu tuge agurannonkekkita buuxissannonke. Israeelete daga higge higge cubbo loose Yihowa dadillissino; ikkirono insa giddonsanni maaro eꞌu yannara Maganu gatona yiinonsa. (Isayaasi 55:7 nabbawi.) Umi xibbi diro heeꞌrino Kiristaanino Maganu lowo geeshsha baxannonsata huwatino. Soqqamaasinchu Phaawuloosi qullaawu ayyaani massageennasi, ammanate roduuwisi jawa cubbo loose maaro eꞌino mancho ‘saosi kiira agurte jawaachishshannosi’ gede kulinonsa. (2 Qor. 2:6, 7; 1 Qor. 5:1-5) Soqqamaanosi soꞌro loossino daafira calla Yihowa insa tuge diagurannonsa! Hatteentenni isi baxillunni kaaꞌlannonsa, seejjannonsa hattono galagalte isi ledo jaalooma kalaqidhanno gede assannonsa. Isi xaa yannarano cubbo loosse maaro eꞌannorira baalaho hatto assannonsata kule qaale eino.—Yai. 4:8-10.

DANCHA ELTO IKKINOHA MAGANU QAALE LOWORI GEDE ASSITINE LAꞌE

17. Qullaawu Maxaafi kaajja eltooti yineemmohu mayiraati?

¹⁷ Yihowa kaajja elto uyinonke. Togo yineemmohu mayiraati? Aleenni ronsummonte gede Qullaawu Maxaafi Maganu hayyo, taashshonna baxilli daafira kulannonke. Kuni Maxaafi, Yihowa ninke iso anfammora hasiꞌrannota leellishanno. Isi jaallasi ikkinammora hasiꞌranno.

18. Yihowa uyinonketa “dancha elto” naandeemmota leellisha dandiineemmohu hiittoonniiti?

¹⁸ “Dancha elto” ikkinoha Maganu Qaale mulluri gede assine dilaꞌneemmo. (Yai. 1:17) Hakko daafira Maganu Qaale woꞌmanka woyite naandeemmota leellinsho. Konne qullaawa qaale huuccatto assiꞌne nabbambenna nabbamboommore hiincine tenne assa dandiineemmo. Hatto assinummoro konne Qaale borreessiisino Magani assineemmore maassiꞌrannotanna ‘Maganu coyeno seekkine buunxeemmota dihuluullammeemmo.’—Law. 2:5.