Haaro Songo Rosa Dandaattohu Hiittoonniiti?

Nikoliyaasiranna Seliinira wolu fonqoli tuncu yiinonsa. Faransayenniti sinu biiro insa haaro songo gaantinonsa. Insa togo yiino: “Umi qara lowo geeshsha hagiidhinoommoha ikkirono, gedensoonni jaallanke qalli assitinonke. Haaro songora noo roduuwiwa hakkeeshshi geeshsha dishinqoommo.”a Haaro songo haꞌra shota ikka hooggurono, hagiirrikki baꞌꞌannokki gede assiꞌra dandaattohu hiittoonniiti? Wolootu kaaꞌlitahera dandiitannoho hiittoonniiti? Haaro songo hadhiniro mimmito jawaachisha dandiitinannihu hiitte doogganniiti?

HAARO SONGO ROSSINANNI GEDE KAAꞌLANNOꞌNEHA SHOOLE XINTU SEERA

1. Yihowa addaxxe. (Far. 37:5) Jaappaanete heedhannoti Kaazuumi yinanni rodoo minaannise loosoho wole gobba haꞌrita, 20 diro heedhino songonni wole songo hadhino. Ise ‘doogose Yihowara eeggo uyidhinohu’ hiittoonniiti? Ise togo yitino: “Waajjishinoere, callatoomma garanna yaachishinoere duucha hige Yihowara hasaaphoomma. Hatto assumma kiiro isi hasiissannoe jawaante aannoe.”

Albinni roore Yihowa addaxxa dandiitinannihu hiittoonniiti? Muꞌro lophitannohu waanna addi addi shiilo afidhuro ikkinonte gede, ninkeno ammananke kaajjishiꞌrate ayyaanaamittete sagale sagaꞌla hasiissannonke. Aleenni kullihu Nikoliyaasi Maganu fajjo assate lowo coye assino manni lawishshaho, Abirihaami, Yesuusinna Phaawuloosi xagge hiincasi Yihowa kaaꞌlannosita albinni roore addaxxanno gede assitinosi. Ganyitine hojju xiinxallo assiꞌraꞌne heeshshoꞌne giddo tuncu yaannoꞌnere dandiitine saꞌinanni gede calla ikkikkinni haaro songoꞌnera noo roduuwa kaaꞌlitinanni gedeno assitannoꞌne.

2. Heewisiisa qorophe. (Ros. 7:10) Zhuuli yinanni rodii Beniininni Yunayitid Isteetise haꞌriti hakkiicho noo budi isihunni lowo geeshsha baxxinoha ikkinota wodanchino. Isi togo yiino: “Xaadummo manni baalaho heeshshoꞌya xagge kula hasiissannoe yee hedoommo.” Coyi isi rosinohunni baxxinoha ikkino daafira roduuwunniwa gambo giwino. Ikkirono isi roduuwu ledo roore egennamiti hedosi biddi assiꞌrino. Isi togo yiino: “Heeꞌnoommo bayichi ikkiwano ikkiro, mannu baalu mittu gariha ikkinota huwatoommo. Insa coyidhannorinna assitannori kayinni babbaxxara dandaanno. Mannu ayimma misha hooga danchate.” Hakko daafira, xa nootto songo albi songo ledo heewisiisa qorophi. Aniliizi yinanniti suwisaancho rodoo togo yitino: “Haaro qooxeessa dawoommahu agure dawoomma coye afiꞌrate ikkikkinni haaro coye afiꞌrateeti.”

Cimeeyyeno haaro songonsa bashsho songonsa ledo heewisiisa qoropha hasiissannonsa. Mitto looso loonsanni gari babbaxxino yaa soꞌro afiꞌrino yaa diꞌꞌikkitino. Kuni konneeti yaaꞌnera albanni hatte songo daafira afate woꞌnaala hayyote. (Ros. 3:1, 7b.) Songo kiꞌne hedora sumuu yitanno gede xixxiiwantenni lawishsha ikkaꞌne danchate.—2 Qor. 1:24.

3. Songote ledo mitteenni loosse. (Fil. 1:27) Wole qooxeessa haꞌrate yannanna wolqa hasiissanno; ikkirono dandiitinanniha ikkiro martinanni heedhinenni songote gambooshshe xaaddine assiꞌraꞌne danchate. Korkaatuno haaro songoꞌnera noo roduuwi kiꞌnenni xaada hoogguro kaaꞌlitaꞌnera didandiitanno. Lame qaaqquullise ledo Wodiidi Afirikira nooha jawa katama hadhinoti Lusinda togo yitino: “Roduuwu haaro songora noo roduuwiwa aaneemma gede, insa ledo soqqameemma gedenna gambooshshunniwa dawaro qoleemma gede amaaltinoe. Qoleno minenke qanchu soqqansho gambooshshe assinara fajjinoommo.”

Haaro songoꞌnera noo roduuwi ledo ayyaanaamittete looso “mitteenni loosaꞌne” kiꞌneno wolootano kaaꞌlitanno. Aleenni kullita Aniliizi cimeeyye baalunku mannira sabbakate sharrantanno gede jawaachishshinose. Tini mayi guma abbituyya? Ise “Tini songote noo roduuwi ledo egennamate lowo geeshsha kaaꞌlitannota bayichonkonni wodanchoomma” yitino. Qoleno, Gambooshshu Addaraashe feyatenna gatamarate ateneeto shiqishakki haaro songo songokki assiꞌroottota leellishshanno. Haaro songokkira noo roduuwi ledo mitteenni loositto kiiro insawa shiqatto hattono insa maatekki gede assite laꞌꞌatto.

4. Haaro jaalla kalaqidhe. (2 Qor. 6:11-13) Jaalla kalaqiꞌrate kaaꞌlitannoti baalanta roortanno doogo mannaho hendannita leellishate; hakko daafira gambooshshu albaanninna gedensaanni wolootu ledo hasaawatenna egennamate ikkitanno geeshshi yanna gaaꞌmi. Suꞌmansa afate sharrami. Mannu suꞌma qaagakki hattono faasiiqanna huxuxxi yinikki shinqanniha ikkakki wolootuno atewa shiqqanno gede assitanno; tini haaro jaalla kalaqiꞌratto gede kaaꞌlitannohe.

Wolootu baxxahera yite noohekki akata leellishsha agurte haaro songora noo roduuwi addu ayimmakki affanno gede assi. Lusinda lawishsha harunsi. Ise togo yitino: “Woloota mininkera koyinseemmo daafira muli jaalooma kalaqiꞌnoommo.”

‘MIMMITO ANGA FANTINE HAADHE’

Mitoota affinokki manni woꞌminowa Gambooshshu Addaraashe ea waajjishshansara dandiitanno. Ikkina songoꞌne dagganno roduuwa kaaꞌla dandiitinannihu hiittoonniiti? Soqqamaasinchu Phaawuloosi “Kiristoosi . . . haaꞌriꞌnente gede, kiꞌneno mimmitoꞌne haadhe” yee jawaachishinonke. (Rom. 15:7) Songote cimeeyye Kiristoosi lawishsha harunsite haaruudde anga fante haaꞌra dandiitanno. (“Haaro Songo Hadhinanni Woyite Qinaannoꞌne Gede Kaaꞌlannoꞌneri Maati?” yitanno saaxine lai.) Ikkirono songote giddo noori baalunku qaaqquulluno haaruudde anga fante haaꞌra dandiitanno.

Woloota anga fanne haaꞌrate insa mininkerano koyisa hasiissannonke; ikkirono wolere assineno kaaꞌla dandiineemmo. Lawishshaho, mitte rodoo yannase horoonsidhe ise noo qooxeessa daggino rodoora katama leellishshinose; hattono dagate hodhishsha horoonsidhanno gara kultinose. Ise assitinori tenne rodoo lowo geeshsha hagiirsiisinose hattono haaro qooxeessa rossanno gede kaaꞌlinose.

AYYAANAAMITTETENNI LOPHATE KAAꞌLITANNO FARO

Buuwa rosiisiꞌranni noohu ceate caacurrichi umi qara buuwate hobbi ruxxi yaara dandaanno. Kayinni mitte hige buuwiro wole woyiteno hasiꞌri gede buuwara dandaanno. Hatteente gede haaro songo hadhinanni woyite, soqqanshoꞌne halashshiꞌrate hobbi ruxxi yitinara dandiitinanni; kayinni waajja qeeꞌlitiniro hatto assa dandiitinanni. Nikoliyaasinna Seliini togo yitino: “Wole qooxeessa haꞌra dancha qajeelsha ikkitinonke. Haaro mannanna haaro qooxeessa rosanke haaro akatta lossiꞌneemmo gede kaaꞌlitinonke.” Hanafote kullihu Jiini Charlesi maatesi horo afidhino gara kulanni togo yiino: “Oosonke haaro songo hadhuti ayyaanaamittetenni roore gikki yitino hattono Yihowawa shiqqino. Boodu agani gedensaanni qaaqqonke Kiristaanu Heeshshonna Soqqansho Gambooshshiwa kifile shiqishshino; qoleno qaaqqinke cuuaminokki halashshaancho ikkino.”

Lawishshaho, sabbakkannori roore hasiissannowa hadhe soqqama dandaattokkihalla ikki? Hatto ikkiro, xa nootto songo haaro songo gede assite hedde aleenni kulloonni hedo loosu aana hosiisate woꞌnaali. Yihowa addaxxi, wolootu ledo soqqante songote loosiꞌra kaaꞌlami hattono haaro jaalla kalaqiꞌrate woy xa noohe jaalla ledo albinni roore jaalooꞌmate sharrami. Haaruuddeho woy kaaꞌlo hasiissannonsarira mitore assite kaaꞌla dandaatto? Addu Kiristaana bande anfannihu baxillunni ikkino daafira, hatto assakki ayyaanaamittetenni lophatto gede kaaꞌlitannoheti dihuluullissannote. (Yoh. 13:35) ‘Magano hagiirsiissannoti hattoo kakkalo’ ikkitinota addaxxa dandaatto.—Ibi. 13:16.

Haaro songo haꞌniro qarra ikkannori heeꞌrannoha ikkirono, batinyu Kiristaani haaro songo haꞌre hagiirraamma ikka dandiino; atino hagiirraamo ikka dandaatto! Aniliizi “Haaro songo haꞌraꞌya wodana halaꞌleemma gede kaaꞌlitinoe” yitino. Kaazuumi haaro songo haꞌra Yihowa anga baxxino garinni laꞌneemmo gede kaaꞌlitannonketa huwattino. Zhuuli qole togo yiino: “Xa jaalla kalaqiꞌroommo daafira callatoommoha dilawannoe. Isinni haaro songo lowo geeshsha rosoommo daafira insawiinni baxxa qarrissannoeha lawannoe.”