Mimmitunniwa Gamba Yaa Woyyitannonke!

1-2. Yihowa albaanni lowo waaga afiꞌrinohu mittu coyi maati? Isi ninke ma assinammora hasiꞌranno?

WOLOOTA laꞌneemmo gari Yihowa albaanni lowo waaga afiꞌrino. Yesuusi olliichonke uminke gede assine baxa hasiissannonketa rosiisino. (Mat. 22:37-39) Tenne assate ammanatenni fiixxannonkekkirira nafa shaqqille leellisha hasiissannonke. Togoo shaqqille leellinsheemmoha ikkiro Maganu Yihowa lawishsha haꞌrunsinanni heeꞌnoommo; “isi bushuullehono danchuullehono arrishsho fushshanno; keeraanoteno keeraano ikkitinokkirirano xeena gananno.”—Mat. 5:45.

² Yihowa baalanka manna baxannoha ikkirono, roorenkanni gara ikkinore assitannore lubbora baxanno. (Yoh. 14:21) Isi lawishshasi haꞌrunsinammora hasiꞌranno. Yihowa ammanate roduuwinke ledo ‘seekkine baxammeemmo’ gedenna insa ‘lubbora banxeemmo’ gede amaalinonke. (1 Phe. 4:8; Rom. 12:10) Togoo baxilli banxeemmo fiixinkeranna muli jaalinkera leellinsheemmo baxilli ledo mittoho.

3. Baxillu daafira qaaga hasiissannonkeri maati?

³ Nafara kaasiꞌnoonni awawi gede baxilluno lophanno gede towaanyo hasiissanno. Soqqamaasinchu Phaawuloosi Kiristaana “Woꞌmanka woyite rodiimmate baxillinni heedhe” yee amaalino. (Ibi. 13:1) Yihowa wolootaho noonke baxilli lexxanno gede assiꞌnammora hasiꞌranno. Konni birxichira ammanate roduuwinkewa roore gamba yaa hasiissannonkehu mayiraatironna woꞌmanka woyite tenne assa dandiineemmo gara ronseemmo.

MIMMITUNNIWA ROORE GAMBA YAA HASIISSANNONKEHU MAYIRAATI?

4. Faarso 133:1 kultannonte gede ammanate roduuwinke ledo noonke mittimma albinni roore naada dandiineemmohu hiittoonniiti? (Misillano lai.)

⁴ Faarso 133:1 nabbawi. Faarsaanchu Yihowa baxxannori ledo addu jaalooma kalaqiꞌra ‘danchanna hagiirsiissannota’ ikkitinota coyiꞌrino; ninkeno tenne hedora sumuu yineemmo. Ikkollana mittu manchi mitte lowo geeshsha biiffino haqqicho barru baala laꞌꞌanno daafira biinfillese naada hoogara dandaannonte gede, ninkeno Kiristaanu mittimmanke naada hoongammora dandiineemmo. Ammanate roduuwinke ledo duucha hinge hattono lamalate giddo nafa haammata hinge xaandeemmoha ikkara dandaanno. Woꞌmanka woyite insa naandeemmota leellisha dandiineemmohu hiittoonniiti? Mittu mittunku ammanate rodiinke songotenna ninkera mageeshshi geeshsha kaaꞌlannoro yanna gaaꞌmine hendeemmoha ikkiro insara noonke baxilli lexxanno.

5. Ammanate roduuwinke mereero noo baxilli woloota kaaꞌlannohu hiittoonniiti?

⁵ Gambooshshenke mite yee dayinohu mitu manni mereeronke noo baxille lae lowo geeshsha dhagge assiꞌrino. Insa tenne calla laꞌe halaale afidhinohu gede assite heddara dandiitanno. Yesuusi togo yiino: “Kiꞌne kiꞌneneewa baxantinanniha ikkiro, mannu baalu ane rosaano ikkitinoonnita tennenni afanno.” (Yoh. 13:35) Hanni Yihowa Farciꞌraasine ledo Qullaawa Maxaafa xiinxallitannotenna Yuniversitete rossannote Chayitira yinanni rosaancho woꞌnaalsha laꞌno. Ise qoqqowu gambooshshe dagganno gede koyinsiseta maahoyye yitino. Chayitira umi barriha qoqqowu gambooshshe hadhuhu gedensaanni, Qullaawu Maxaafi rosiisaanchosera togo yitino: “Anniꞌyanna amaꞌya horo rimmi asse hanqafe diegenninoe. Gambooshshiꞌnewa kayinni mitto barra calla 52 lamu manni rimmi asse hanqafinoe! Tini ayyaanaamittete maate Yihowa baxannoeta huwateemma gede assitinoe. Anino tenne maate wido ikka hasiꞌreemma.” Chayitira ayyaanaamittetenni lophite 2024 cuuantino. Addaho duucha woyite, haaruuddu dancha loosonkenna mereeronke noo baxille laꞌe Yihowara soqqamate kaꞌanno.—Mat. 5:16.

6. Ammanate roduuwinkewa gamba yaa agarooshshe ikkitannonkehu hiittoonniiti?

⁶ Ammanate roduuwinkewa gamba yaa agarooshshe ikkitankera dandiitanno. Phaawuloosi ammanate roduuwasi togo yee amaalino: “Kiꞌne giddonni ayino cubbunni dogame wodana dillaawannokki gede, . . . barru barrunku mimmitoꞌne jawaachishshe.” (Ibi. 3:13) Hexxo mudhine keeraanchimmate doogonni fula hananfummoro Yihowa mittu xiinxallu ammanate rodiinke widoonni kaaꞌlankera dandaanno. (Far. 73:2, 17, 23) Addanko, togoo jawaante lowo geeshsha hasiissannonke.

7. Baxillunna mittimma afidhino xaadooshshi maati? (Qolaasiyaasi 3:13, 14)

⁷ Mimmitoho baxille leellishate sharramanno manni wido ikkinoommo daafira lowo atoote afiꞌneemmo. (1 Yoh. 4:11) Lawishshaho, baxillu ‘mimmito dandiine heeꞌneemmo’ gede kakkayisannonke; tini mereeronke mittimma heedhanno gede assitanno. (Qolaasiyaasi 3:13, 14 nabbawi; Efe. 4:2-6) Hakko daafira gambooshshinkewa wolewa ayewano nookki hagiirre afiꞌneemmo.

MIMMITO AYIRRISSINANNITA LEELLISHSHE

8. Yihowa ammanate roduuwinke ledo mittimma heedhannonke gede kaaꞌlannonkehu hiittoonniiti?

⁸ Ammanate roduuwinke ledo noonke mittimma maalalete. Guuntete xeꞌne noonkere ikkinummorono Yihowa togoo mittimma heedhannonke gede assino. (1 Qor. 12:25) Qullaawu Maxaafi, ‘mimmitu ledo baxama Maganuwiinni ronsoommota’ kulanno. (1 Tes. 4:9) Togo yaa, Qullaawa Borro widoonni Yihowa ammanate roduuwinkewa gamba yaate maa assa hasiissannonkero kulinonke yaate. Maganu rosiisannore seekkine xiinxallinenna loosu aana hosiinse ‘isiwiinni ronsoommore’ ikka dandiineemmo. (Ibi. 4:12; Yai. 1:25) Yihowa Farciꞌraasine tenne assate sharrantanno.

9. Rooma 12:9-13 mimmito ayirrisate daafira maa ronseemmo?

⁹ Maganu Qaali mimmitunniwa gamba yaate daafira rosiisannonkehu hiittoonniiti? Rooma 12:9-13 kultannonte gede, hanni Phaawuloosi tenne daafira mayinoro laꞌno. (Qummeeshsha nabbawi.) Isi, “Mimmito ayirrisate umire ikke” yiinota wodanchi. Hatto yaa mayyaate? Uminkenni kaꞌne woloota gatona yine, wosinimma adhinenna insara shaqqille leellinshe ‘lubbora banxeemmonsata’ leellisha hasiissannonke. (Efe. 4:32) Ammanate roduuwikki atewa gamba yita geeshsha agara dihasiissannohe. Hatto assate ati ‘umiha ikki.’ Yesuusi, “Adhannonkunni aannohu roore hagiirraamoho” yiino.—Soq. 20:35.

10. “Mimmito ayirrisate” chaachaaroota ikka dandiineemmohu hiittoonniiti? (Misileno lai.)

¹⁰ Phaawuloosi mimmito ayirrisate umire ikkineemmo gede kulihu gedensaanni, ‘chaachaaroota ikkinnina ceeꞌmaleeyye ikkineemmokki’ gede amaalinonke. Chaachaaru manchi laalaatannohonna diinaggaawannoho. Mitto looso uyinisiro isi diinaggaawe loosanno. Lawishsha 3:27, 28 “Kaaꞌlattonsara hasidhannorira, dandaattore assinsa” yite amaaltannonke. Hakko daafira mittu manchira kaaꞌlo hasiissinosita anfummoro, iso kaaꞌlate dandiinummore baala assineemmo. Techo gaꞌa diyineemmo; hattono iso wolu kaaꞌlanno yine dihendeemmo.—1 Yoh. 3:17, 18.

11. Mimmitunniwa gamba yineemmo gede kaaꞌlannonkeri maati?

¹¹ Woloota ayirrinseemmoti wole doogo koffi assitannonke woyite insa bayichonkonni gatona yaate. Efessooni 4:26 “Hanqitine heedhineenna arrishsho eꞌoonke” yitanno. Mayira? Kiiro 27 hatto assineemmoha ikkiro ‘Daawuloosira faro fanneemmota’ kultanno. Yihowa mimmito gatona yineemmo gede Qaalisi giddo hige hige kulinonke. Qolaasiyaasi 3:13 “mimmito mulla gatona yaa agurtinoonte” yite amaaltannonke. Ammanate roduuwinke soꞌro lashshi assine saꞌꞌa insawa gamba yaate kaaꞌlitannonkete kaajja doogooti. Togo assineemmoha ikkiro “gamba asse xaadisannohu keeru usuraasinchinni ayyaanu mittimma agarate” kaaꞌlammanni heeꞌnoommo. (Efe. 4:3) Ammanate roduuwanke gatona yaa mereeronke keerunna mittimma heedhanno gede assitanno.

12. Yihowa gatona yineemmore ikkineemmo gede kaaꞌlannonkehu hiittoonniiti?

¹² Xissiisinonke mancho gatona yaa qarra ikkitankera dandiitannoti egennantinote. Kayinni Maganunnihu qullaawu ayyaani kaaꞌlannonke daafira gatona yaa dandiineemmo. Qullaawa Borro ‘mimmitu ledo lubbora baxammeemmonna chaachaaroota’ ikkineemmo gede kultuhu gedensaanni “Ayyaanunni iibbe” yitanno. Ayyaanunni ‘iibbino’ mancho qullaawu ayyaani mittu coyira diinaggaawannonna laalaatanno gede kaaꞌlannosi. Hakko daafira Maganu ayyaani mimmito lubbora banxeemmo gedenna mulla gatona yineemmo gede kaaꞌlannonke. Konnira Yihowa kaaꞌlannonke gede eeggifante huucciꞌneemmo.—Luq. 11:13.

‘MEREEROꞌNE BABBADOOSHSHU HEEꞌROONKE’

13. Mereeronke babbadooshshe kalaqara dandaannori maati?

¹³ Songote giddo ‘duuchunku garihunna’ addi addi bude afiꞌrino manni no. (1 Xim. 2:3, 4) Hakko daafira lawishshaho, uddiꞌneemmonna seenseemmo gara, fayyimmanke towaaxxineemmo gara lainohunni woy boohaarsha lainohunni doodhineemmo doorshi babbaxxara dandaanno; qoropha hoongummoro togoo coyi mereeronke babbadooshshu kalaqamanno gede assara dandaanno. (Rom. 14:4; 1 Qor. 1:10) Maganu mimmito banxeemmo gede rosiisinonke daafira, wolootu ninke doodhinoommo gedee doorsha doodhitara xixxiimbeemmokki gede qoropha hasiissannonke.—Fil. 2:3.

14. Woꞌmanka woyite maa assate sharrama hasiissannonke? Mayira?

¹⁴ Qoleno woꞌmanka woyite woloota fooliishshiinsheemmorenna jawaachinsheemmore ikkate sharramme, songote giddo babbadooshshu kalaqamannokki gede assa dandiineemmo. (1 Tes. 5:11) Muli yannara, ayyaanaamittete qiiddinori woy songotenni fushshinoonniri batinyu roduuwi songo higgino. Insa anga fanne haaꞌneemmonsa! (2 Qor. 2:8) Hanni ayyaanaamittetenni qiiddinoti mitte rodoo tonnu diri gedensaanni songo higguta mayi ikkinoro laꞌno. Ise, “Baalunku hagiidhe muushshi yee keere haaꞌrinoe” yitino. (Soq. 3:19) Shiimare lawannohu togoo coyi ise kaaꞌlinosehu hiittoonniiti? Ise ledde togo yitino: “Tini Yihowa galagale hagiirraame ikkeemma gede kaaꞌlanni nooeta huwateemma gede assitinoe.” Baalanka manna jawaachinsheemmoha ikkiro, Kiristoosi ‘daafurtinorenna duhu ayirrinonsare’ fooliishshiishate horoonsiꞌrankera dandaanno—Mat. 11:28, 29.

15. Mittimma heedhanno gede assa dandiineemmoti wole doogo hiittenneeti? (Misileno lai.)

¹⁵ Mittimma heedhanno gede assa dandiineemmoti wole doogo coyiꞌneemmo coyinniiti. Iyyoobi 12:11 togo yitanno: “Arrawu sagale qamasannonte gede, macca coyiꞌnanni coye badde affanno.” Mittu sagale dancha gede qishanno manchi, itanno mannira shiqishara albaanni coommitinotanna teꞌee qamase laꞌꞌannonte gede, ninkeno mitto coye coyiꞌnammora albaanni seekkine heda hasiissannonke. (Far. 141:3) Mixonke woꞌmanka woyite coyiꞌnammora hendoommo coyi ‘macciishshanno manna dhaawannoha’ fooliishshiishannohanna “macciishshanno mannira kaaꞌlannoha” ikkanno gede assiꞌrate.—Efe. 4:29.

16. Jawaachishannore coyiꞌrate roorenkanni sharrama hasiissannonsari ayeooti?

¹⁶ Roorenkanni minaannuwu hattono annuwunna amuuwu dhaawannore coyiꞌrate sharrama hasiissannonsa. (Qol. 3:19, 21; Tit. 2:4) Songote cimeeyyeno Yihowa hoshsha towaattannore ikkitino daafira fooliishshotenna sheshote buicho ikka hasiissannonsa. (Isa. 32:1, 2; Gal. 6:1) Lawishshu maxaafi, “Yannasira coyiꞌnoonni coyi hiittoo danchaati!” yaanno.—Law. 15:23.

“BAXILLINKE HALAALUNNIHANNA LOOSUNNI LEELLANNOHA IKKO”

17. Ammanate roduuwinkera noonke baxilli addunniha ikkanno gede assiꞌra dandiineemmohu hiittoonniiti?

¹⁷ Soqqamaasinchu Yohaannisi “baxillinke halaalunnihanna loosunni leellannoha . . . ikkinnina, afuunninna suumetenni calla” leellannoha ikkannokki gede jawaachishinonke. (1 Yoh. 3:18) Ammanate roduuwanke godowinta baxa hasiꞌneemmo. Tenne assa dandiineemmohu hiittoonniiti? Ammanate roduuwinke ledo yanna sayinsummo kiiro mimmitunniwa albinni roore shinqeemmo hattono mereeronke noo baxilli lexxanno. Hakko daafira wolootu ledo yanna sayissinanni faro hasidhe; lawishshaho gambooshshunniwanna soqqanshonniwa tenne assa dandiitinanni. Wolootunniwa haꞌrate yanna gaaꞌme. Hatto assineemmoha ikkiro, ‘mimmitu ledo baxama Maganuwiinni ronsoommota’ leellinsheemmo. (1 Tes. 4:9) Qoleno ‘Maganu manni rodiimmate baxillinni suumuu yee mitteenni heeꞌriro, lowo geeshsha danchanna hagiirsiisannoha’ ikkinota uminke heeshshonni laꞌneemmo.—Far. 133:1.