Qullaawu Maxaafi Rosaanoꞌne Halaaleho Halantanno Gede Kaaꞌlensa

1-2. (a) Mite Qullaawu Maxaafi rosaano halaaleho halamate hobbi ruxxi yitannohu mayiraati? (b) Konni birxichira maa ronseemmo?

QULLAAWA MAXAAFA xiinxallitto waro Yihowa Farciꞌraasincho ikkate hobbi ruxxi yite egennootto? Ledokki loossannore, jaallakki woy minikki manna waajjoottoha ikkara dandaanno. Woy horo Maganu biddishshi garinni heeꞌra didandeemmo yite hedoottoha ikkara dandaanno. Hatto ikkiro, mite Qullaawu Maxaafi rosaano halaaleho halamate hobbi ruxxi yitannohu mayiraatiro leellannohe.

² Yesuusi togoo waajja ayyaanaamittetenni lophinannikki gede guficho ikkitannota afino. (Mat. 13:20-22) Kayinni Yesuusi iso haꞌrunsate hobbi ruxxi yitannore hexxo mudhe kaaꞌla diagurino. Hatteentenni isi, rosaanosi togoo manni (1) ayyaanaamittetenni lophannokki gede guficho ikkannonsare bade afanno gede, (2) Yihowa albinni roore baxanno gede, (3) balaxisiisa hasiissannonsare balaxisiisanno gedenna (4) qarra ikkannonsare dandee saꞌꞌanno gede kaaꞌlitanno gara kulinonsa. Qullaawu Maxaafi rosaano halaaleho halantanno gede kaaꞌlate Hegerera Hagiidhitanni Heeꞌra Dandaatto! yaanno maxaafa xiinxallinseemmo woyite, Yesuusi rosaanosira kulinore loosu aana hosiisa dandiineemmohu hiittoonniiti?

ROSAANCHIꞌNE GUFICHO IKKANNOSIRE BADE AFANNO GEDE KAAꞌLESI

3. Niqoodimoosi Yesuusi rosaancho ikkannokki gede guficho ikkinosiri maa ikkara dandaanno?

³ Ayihudennihu egennamino massagaanchi Niqoodimoosira Yesuusi rosaancho ikkannokki gede guficho ikkannori tuncu yiinosi. Niqoodimoosi, Yesuusi Maganu soyenna dayinoha ikkinota huwatinohu Yesuusi soqqansho hanafihunni lewu agani gedensaanni. (Yoh. 3:1, 2) Ikkirono Niqoodimoosi ‘Ayihudoota waajjinohura’ Yesuusi ledo mannu afisikkinni xaada doodhino. (Yoh. 7:13; 12:42) Isi Yesuusi rosaancho ikkummoro lowore hoogeemmo yee yaadinoha ikkara dandaanno.a

4. Yesuusi, Niqoodimoosi assa hasiissannosire huwatanno gede kaaꞌlinosihu hiittoonniiti?

⁴ Niqoodimoosi Seera afino; ikkirono Yihowa isi ma assara hasiꞌrannoro huwatanno gede kaaꞌlo hasiissinosi. Yesuusi iso kaaꞌlinohu hiittoonniiti? Isi yanna gaaꞌme Niqoodimoosi hashsha nafa hasaawisinosi. Qoleno Yesuusi Niqoodimoosi rosaancho ikkate ma assa hasiissannosiro xawise kulinosi; isi cubbisira maaro ea, wayinni cuuamanna Maganu Beetto ammanannota leellisha hasiissannosi.—Yoh. 3:5, 14-21.

5. Qullaawu Maxaafi rosaanchinke guficho ikkannosire bade afanno gede kaaꞌla dandiineemmohu hiittoonniiti?

⁵ Mittu Qullaawu Maxaafi rosaanchi Qullaawa Borro dancha gede huwatinoha ikkiro nafa, ayyaanaamittetenni lophannokki gede guficho ikkinosire bade afanno gede kaaꞌlo hasiissannosiha ikkara dandaanno. Maalaamittete looso loosanni yanna hooginohura woy maatesi gibbinosi daafira ayyaanaamittete mixo wonshiꞌra qarra ikkitinosiha ikkara dandaanno. Hakko daafira rosaanchoꞌne kaaꞌlate yanna gaaꞌme. Isi ledo mitteenni buna aga woy lekkatenni milli yaa dandiitinanni. Togoo yannara qarra ikkannosire kiꞌnera fushshe hasaapha shota ikkitasira dandiitanno. Rosaanchiꞌne kiꞌne hagiirsiisate yee ikkikkinni Yihowa baxanno daafira biddi assiꞌra hasiissannosire biddi assiꞌranno gede jawaachishshesi.

6. Rosaanchikki halaaleho halamate worba ikkanno gede kaaꞌla dandaattohu hiittoonniiti? (1 Qorontoosi 16:13)

⁶ Mittu rosaanchi, Qullaawu Maxaafi biddishshi garinni heeꞌranno gede Yihowa kaaꞌlannosita addaxxiro rosanni noore loosu aana hosiisate worba ikkanno. (1 Qorontoosi 16:13 nabbawi.) Ati iso kaaꞌlate assattore rosu mini rosiisaanchi assannori ledo heewisiisa dandiinanni. Roso rositto waro roore baxattohu hiittoo rosiisaanchooti? Mitto coye assate dandoo nooheta huwatatto gede cince kaaꞌlinohe rosiisaancho ikkara dandaanno. Hatteente gede worbu Qullaawu Maxaafi rosiisaanchi, rosaanchisira Maganu isi maa assara hasiꞌrannoro calla ikkikkinni Yihowa kaaꞌlannosi daafira biddi assiꞌra hasiissannosire biddi assiꞌra dandaannota huwatanno gedeno kaaꞌlanno. Tenne assa dandaattohu hiittoonniiti?

ROSAANCHIꞌNE YIHOWA ALBINNI ROORE BAXANNO GEDE KAAꞌLESI

7. Yesuusi macciishshanni noosi manni albinni roore Yihowa baxanno gede kaaꞌlinohu hiittoonniiti?

⁷ Yesuusi Maganoho noonsa baxilli rosaanosi rossinore loosu aana hosiissanno gede kakkayisannonsata afino. Isi duucha woyite rosaanosi iimi Annansa albinni roore baxxanno gede assanno coye rosiisannonsa. Lawishshaho isi Yihowa oososira dancha coye aanno anni ledo heewisiisino. (Mat. 7:9-11) Yesuusi coyiꞌrannore macciishshanno manni giddo mitoho togoohu baxillaanchu anni noonsakkiha ikkara dandaanno. Yesuusi lowoha busha coye assanni keeshshino beetto anga fane haaꞌrinohu mararanno anni daafira kulanno lawishsha coyiꞌrita kuni manni mageeshsha hagiidhinoro hanni hedi! Insa Yihowa uullate aana noo oososi mararannota huwata dandiitanno.—Luq. 15:20-24.

8. Rosaanchikki albinni roore Yihowa baxanno gede kaaꞌla dandaattohu hiittoonniiti?

⁸ Atino rosiisatto woyite Maganu baxanno akatta luphi assite kulte rosaanchikki albinni roore Yihowa baxanno gede kaaꞌla dandaatto. Xiinxallitinanni kiiro, rosaanchikki rosanni noorinna Yihowa baxilli mereero noo xaadooshshe huwatanno gede kaaꞌlisi. Wodote daafira hasaabbinanni woyite wodo kaaꞌlitannosi gara luphi assite kuli. (Rom. 5:8; 1 Yoh. 4:10) Rosaanchikki Yihowa baxannosi gara hiinciro isino Yihowa baxate kaꞌꞌara dandaanno.—Gal. 2:20.

9. Mayikili yinanni manchi heeshshosi biddi assiꞌranno gede kaaꞌlinosiri maati?

⁹ Hanni Indooneezhiyaho heeꞌrannohu Mayikili woꞌnaalsha laꞌno. Isi lophinohu halaalu mine ikkirono dicuuamino. Mayikili 18 dirihu heeꞌre jawu makeeni oofaancho ikke loosoho wole gobba haꞌrino. Isi gedensoonni gobbasi hige mine kalaqiꞌrinoha ikkirono, maatesi agure galagale loosoho wole gobba haꞌrino. Hatte mereero minaamasinna qaaqqosi Qullaawa Maxaafa xiinxalle ayyaanaamittetenni lophi. Amasi lubbantuhu gedensaanni Mayikili annasi towaaxxate galagale gobbasi higino; hattono Qullaawa Maxaafa xiinxallate sumuu yiino. Hegerera Hagiidhitanni Heeꞌra Dandaatto! yaanno maxaafira roso 27 noohu “Ledde Xiinxalli” yaanno gafi Mayikili loosoho kakkayisinosi. Mayikili Yihowa Beettisi qarramanna lae hiitto ikkinoro hiinciti wiꞌla hanafino. Isi wodo lowo geeshsha naadannota leellishino; hattono heeshshosi biddi assiꞌre cuuamino.

ROSAANCHIꞌNE BALAXISIISA HASIISSANNOSIRE BALAXISIISANNO GEDE KAAꞌLESI

10. Yesuusi rosaanosi balaxisiisa hasiissannonsare balaxisiissanno gede kaaꞌlinonsahu hiittoonniiti? (Luqaasi 5:5-11) (Misileno lai.)

¹⁰ Yesuusi rosaano isi Buuraminoha ikkinota bayichonkonni huwattino; kayinni insa soqqansho balaxisiissanno gede kaaꞌlo hasiissinonsa. Yesuusi, Pheexiroosinna Indiriyaasi isi rosaano ikkituhunni shiima yanna gedensaanni woꞌma yanna haꞌrunsaano ikkitanno gede koyisinonsa. (Mat. 4:18, 19) Hatte yannara insa qulxuꞌme woshshaaxxate looso loossanni no; Yaaqoobinna Yohaannisino insa ledo loossannoha ikkara dandaanno. (Maq. 1:16-20) Pheexiroosinna Indiriyaasi “woshshaadonsa agurte” Yesuusa haꞌrunsitu yannara maatensara hasiisannore wonshate mixo fushshidhinoha ikkara dandaanno. Insa balaxisiisa hasiissannonsare balaxisiissanno gede kakkayisinonsari maati? Luqaasi Wongeelli giddo noo xagge leellishshannonte gede, Yesuusi loosino maalale Yihowa insara hasiisannonsare wonsha dandaannota albinni roore addaxxitanno assitinonsa.—Luqaasi 5:5-11 nabbawi.

11. Uminke woꞌnaalsha kulle rosaanchinke ammana kaajjisha dandiineemmohu hiittoonniiti?

¹¹ Ninke Yesuusi gede maalale loosa didandiineemmo; kayinni Yihowa heeshshonsa giddo iso balaxisiissannore kaaꞌlanno gara leellishanno woꞌnaalsha kullammonsara dandiineemmo. Lawishshaho, Yihowa gambooshshe haꞌra hanafitto yannara kaaꞌlinohe gara qaagatto? Loosatto loosi gambooshshe haꞌrattota hoolannohe daafira loosu saate gedensaanni loosa dandaattokkita loosiisaanchikkira kula hasiissinoheha ikkara dandaanno. Rosaanchikkira woꞌnaalshakki kulatto woyite, Yihowa iso balaxisiisate assoottore maassiꞌrino gara afakki ammanakki kaajjishshinohu hiittoonniitiro xawisse kulisi.

12. (a) Rosaanchonke xiinxallinseemmo woyite addi addi halashshaano koyisa hasiissannonkehu mayiraati? (b) Dancha gede xiinxallisate viidiyubba horoonsiꞌra dandaattohu hiittoonniiti? Lawishsha kuli.

¹² Wolu Kiristaani balaxisiisa hasiissannonsare balaxisiisinohu hiittoonniitiro macciishshasino rosaanchokki kaaꞌlitannosi. Hakko daafira Qullaawa Maxaafa xiinxallisatto woyite addi addi budi noonsa roduuwa koyisi. Insa halaale macciishshitinohu hiittoonniitironna heeshshonsa giddo Yihowa balaxisiisate assitinore xaꞌmi. Qoleno Hegerera Hagiidhitanni Heeꞌra Dandaatto! yaanno maxaafira “Ledde Xiinxalli” woy “Egenno Lexxi” yaanno gafira noo viidiyubba rosaanchikki ledo laꞌꞌate yanna gaaꞌmi. Lawishshaho roso 37 xiinxallitinanni woyite Yihowa Hasiisannonkere Aannonke yitanno viidiyonni afiꞌneemmo roso hasaawa dandiitinanni.

ROSAANCHIꞌNE GUFICHO IKKANNOSIRE QEELANNO GEDE KAAꞌLESI

13. Yesuusi rosaanosi mannu giwannonsa woyitira qixxaabbanno gede kaaꞌlinonsahu hiittoonniiti?

¹³ Yesuusi haꞌrunsaanosira, wole agurina fiixinsa nafa giwansara dandaannota hige hige kulinonsa. (Mat. 5:11; 10:22, 36) Yesuusi soqqanshosi jeefisara kaiti rosaanosira mannu shaansara nafa dandaannota kule qorowisiisinonsa. (Mat. 24:9; Yoh. 15:20; 16:2) Isi insa soqqantanno woyite qorophitanno gede kulinonsa. Hattono giwannonsa manni ledo yekkeerantannokki gedenna hayyotenni sabbaka agurtannokki gede amaalinonsa.

14. Rosaanchinke mannu giwannosi woyitira qixxaawanno gede kaaꞌla dandiineemmohu hiittoonniiti? (2 Ximootewoosi 3:12)

¹⁴ Ledosi loossannori, jaallasinna fiixisi mayyaasira dandaannoro balaxe kulle rosaanchinke mannu giwannosi woyitira qixxaawanno gede kaaꞌla dandiineemmo. (2 Ximootewoosi 3:12 nabbawi.) Mitu ledosi loossannori isi bashshosi heeshsho agurino daafira haariinte osoꞌlitasira dandiitanno. Wolootu wole agurina fiixisi nafa Qullaawa Maxaafa xiinxallino daafira mishasira dandaanno. Rosaanonke mannu mishannonsa woyitira umonni qixxaabbanno gede kaaꞌlinummonsaro togoo coyi iillannonsa woyite dandiite saꞌꞌa qarra diꞌꞌikkitannonsa.

15. Mittu rosaanchi maatesi gibbannosita dandee saꞌꞌanno gede kaaꞌlannosiri maati?

¹⁵ Rosaanchoꞌne maatesi gibbusiro insa hanqitinohu mayira ikkara dandaannoro hedanno gede jawaachishshesi. Insa isi dogamino yite heddara woy Yihowa Farciꞌraasine mulla kaꞌe gibbara dandiitanno. Yesuusa nafa minisi manni giwinosi. (Maq. 3:21; Yoh. 7:5) Rosaanchiꞌne cincannoha ikkanno gede hattono wolootanna minisi manna hayyotenni hasaawisanno gede rosiissesi.

16. Rosaanchinke rosinore wolootaho hayyotenni kulanno gede kaaꞌla dandiineemmohu hiittoonniiti?

¹⁶ Rosaanchu fiixisi macciishshate hasatto noonsata leellishiro nafa baalankare mitte hige kula dihasiissannosi. Hatto assannoha ikkiro wole yannara hasaawisannonsa woyite macciishsha giwara dandaanno. Hakko daafira rosaanchiꞌne wole woyite hasaawate faro fananno garinni ammanasi daafira kulanno gede kaaꞌlesi. (Qol. 4:6) Isi fiixisi jw.org daaꞌꞌatanno gede kulara dandaanno. Tini insa hasidhu yannara albinni roore Yihowa Farciꞌraasine daafira affanno gede kaaꞌlitansara dandiitanno.

17. Rosaanchikki mannu Yihowa Farciꞌraasine daafira coyiꞌrannote soꞌrote hedora qixxaawanno gede kaaꞌla dandaattohu hiittoonniiti? (Misileno lai.)

¹⁷ Rosaanchikki fiixisi woy ledosi loosanno manni xaꞌmanno xaꞌmora dawaro qolanno gede kaaꞌlate jw.org aana aante aantete fulannoha “Duuchu Manni Xaꞌmanno Xaꞌmo” yaanno gafa horoonsiꞌra dandaatto. (2 Xim. 2:24, 25) Mitte mittente xiinxallo jeefora Hegerera Hagiidhitanni Heeꞌra Dandaatto! yaanno maxaafira nooha “Mitu Manni Togo Yaanno” yaanno gafa laꞌe. Rosaanchu dawaro umisi yaattonni qola rosiisiꞌranno gede jawaachishi. Rosinore kulanno gara woyyeessiꞌra hasiissusiro isira tenne kulate hobbi ruxxi yitooti. Konni garinni kaaꞌlakki rosaanchikki ammanasira waajjikkinni gaaramanno gede kaaꞌlitannosi.

18. Rosaanchu soqqansho fule ammanasi daafira wolootaho kulanno gede jawaachisha dandaattohu hiittoonniiti? (Maatewoosi 10:27)

¹⁸ Yesuusi rosaanosi mannaho dancha duduwo dudubbanno gede jawaachishinonsa. (Maatewoosi 10:27 nabbawi.) Rosaanchikki mulenni rosinore wolootaho kula hanafiro albinni roore Yihowa addaxxa rosanno. Isi soqqansho hanafate mixo fushshiꞌranno gede kaaꞌla dandaattohu hiittoonniiti? Songoꞌnera soqqanshote gaadi noota egensiishsha kulliro, rosaanchikki halashshaancho ikkate ikkado ikka dandaannohu hiittoonniitiro hedanno gede jawaachishisi. Togoo gaadi yannara soqqansho hanafansa batinye halashshaano kaaꞌlitinonsa gara xawisse kulisi. Kiristaanu Heeshshonna Soqqansho Gambooshshi yannara kifile shiqishano kaaꞌlitasira dandiitanno. Togoo mixo wonshiꞌrate sharramannoha ikkiro ammanasi daafira waajjikki kulanno gara rosanno.

ROSAANCHIKKI AMMANATTOSITA AFANNO GEDE ASSI

19. Yesuusi rosaanosi ammanannonsata leellishinohu hiittoonniiti? Isi lawishsha haꞌrunsa dandiineemmohu ma garinniiti?

¹⁹ Yesuusi iimira haꞌrara albaanni rosaanosira galagale insa ledo xaadannota kulinonsa. Insa Yesuusi iimira hadhanno gede kulanni noonsata dihuwattino. Ikkirono Yesuusi huluullinonsa coye ikkikkinni ammanamansa illachishino. (Yoh. 14:1-5, 8) Isi, insa mito coye lawishshaho iimi hexxo daafira huwatate yanna hasiissannonsata afino. (Yoh. 16:12) Ninkeno rosaanonke Yihowa hagiirsiisa hasidhannota ammanneemmota leellisha dandiineemmo.

20. Malaawi gobbara heedhanno rodoo rosaanchose ammantannota leellishshinohu hiittoonniiti?

²⁰ Woꞌmanka woyite rosaanchinke gara ikkinore assa hasiꞌrannota hexxineemmo. Hanni Malaawi gobbara heedhannote Chifundo yinanni rodoo woꞌnaalsha laꞌno. Ise Kaatoolikete ammaꞌno haꞌrunsitannote Alinaafe yinanni manchora Hegerera Hagiidhitanni Heeꞌra Dandaatto! yaanno maxaafa xiinxallisa hanaffino. Chifundo 14^ki roso xiinxalle gudihu gedensaanni, misilla horoonsiꞌre magansiꞌrate daafira mayitannoro rosaanchose xaꞌmitu. Alinaafe lowo geya hanqite, “Tenne daafira eessannoheri dino!” yitino. Chifundo xaate xiinxallisa agura hasiissannoe yite heddino. Ikkirono Chifundo Alinaafera coyi barrunni mitto barra leellannose yite hexxite cincite xiinxallisa diagurtino. Boodu agani gedensaanni, Chifundo rosaanchose 34^ki rosira noota aante noo xaꞌmo xaꞌmituse: “Xaa geeshsha Qullaawa Maxaafa xiinxallakkinna halaalaanchu Magani Yihoware rosakki kaaꞌlitinohehu hiittoonniiti?” Chifundo, Alinaafe qoltino dawaro kultanni togo yitino: “Ise batinye dancha hedo coyidhino; lawishshaho Yihowa Farciꞌraasine Qullaawu Maxaafi hoolannoha aye coyeno assitannokki coyidhino.” Hakkunni gedensaanni mulenni Alinaafe misilla horoonsiꞌra agurtino; hattono cuuamate ikkado ikkitino.

21. Qullaawu Maxaafi rosaanchinkera halaaleho halamate hasattosi lexxitanno gede kaaꞌla dandiineemmohu hiittoonniiti?

²¹ ‘Lossannohu’ Yihowa ikkirono, Qullaawu Maxaafi rosaanchinke ayyaanaamittetenni lophanno gede ninkeno kaaꞌla dandiineemmo. (1 Qor. 3:7) Maganu, isi ma assara hasiꞌrannoro rosiisatenni sainore assineemmo. Rosaanchinke Yihowa godowinta baxanno gede kaaꞌlineemmo. Hattono balaxisiisa hasiissannosire balaxisiise Yihowara noosi baxille leellishanno gede jawaachinsheemmo. Qoleno qarru iillisiro Yihowa addaxxannohu hiittoonniitiro rosiinseemmosi. Rosaanchonke ammanneemmosita afanno gede assine, isino Yihowa biddishshi garinni heeꞌranna halaaleho halama dandaannota albinni roore addaxxanno gede kaaꞌlineemmosi.