Heeshshonke Diro Woꞌma Bayiru Rosiisaanchinkewiinni Ronsoommo Roso

ANNIꞌYANNA AMAꞌYA DANCHA LAWISHSHA IKKITINOE

Anniꞌyanna amaꞌya 1950 jeefora Ixaaliyunni Kanaada hadhe Saskechiwani Kindersileyi yinanniwa heeꞌra hanaffu. Hakkiinni shiima yanna gedensaanni insa halaale rosi; kuni halaali heeshshonke giddo qara coye ikkino. Qaaqqu heeꞌre maateꞌya ledo barra woꞌma soqqameemmoti qulli yitannoe; hakko daafira settu dirihu heeꞌre haariimanni, “ani kaaꞌlaancho suwisaanchooti” yeemmo.

Anniꞌyanna amaꞌya angate anje noonsareeti; ikkirono insa Yihowara soqqamate uminsa horo agure dancha lawishsha ikkinoe. Lawishshaho, insa 1963 Yunayitidi Isteetisete Kalifoorniyaho Pasadeena yinanniwa assinoonniha daga dagiyyote gambooshshe haꞌrate ikkannonsa woxe afiꞌrate lowo jajjansa hirino. Hakkiinni 1972 Ixaaliyu Afoo coyiꞌranno mannira sabbakate Kanaadu gobbara Biriitishi Kolombiyaho 1,000 km xeertiꞌre nooha Tireeli yinanni qooxeessa haꞌnummo. Anniꞌya mine feyate looso loosanno. Isi ayyaanaamittete coye balaxisiisate yee roore woxe afiꞌranno gede assannosi looso giwino.

Anniꞌyanna amaꞌya aneranna sasu roduuwiꞌyara dancha lawishsha ikkinonke daafira galaxxeemmonsa. Insa lawishshi Yihowara soqqamate qajeeloommo qajeelshiranna heeshshoꞌya diro woꞌma afiꞌroommo rosira kaima ikkinoe; Gashshootesi balaxisiiseemmoha ikkiro Yihowa hasiisannoere asse towatannoe.—Mat. 6:33.

WOꞌMA YANNA SOQQANSHO HANANFUMMO

Hakkiinni 1980 ayyaanaamittete mixo noosete Deebi yinannite xuma rodoo ledo adhammummo. Woꞌma yanna soqqansho hanafa hasiꞌnoommo daafira, adhammummohunni sasu agani gedensaanni Deebi suwisaancho ikkitu. Adhammummohunni mittu diri gedensaanni kaaꞌlo hasiissannota mitte shiima songo haꞌnummo; hakkiicho anino suwisaancho ikke soqqama hanafummo.

Mite yanna gedensaanni hexxo mudhinoommo daafira agurre haꞌrate murciꞌnummo. Ikkirono balanxe woradu aliidi laꞌꞌaanchira kullummo. Isi baxillunni kayinni xawise togo yiinonke: “Qarra lexxitinanni heedhinoonniri kiꞌneeti. Iillinoꞌne qarri daafira gara ikkinokkire calla heddinanni heedhinoonni. Hatteentenni dancha danchare illachishshiniro dancha coye afidhinanni.” Tini hasiisse noonke amaaleeti. (Far. 141:5) Hakkiinni tenne amaale bayichonkonni loosu aana hosiinsummo; isinni batinyu danchu coyi noonketa huwantummo. Songote giddo batinyu roduuwi hattono Yihowa Farciꞌraasine ikkitinokki galte noonsari Yihowara albinni roore soqqama hasidhanno. Kuni ninkera kaajja rosooti. Dancha danchare hedanna fonqolo ikkinore Yihowa hoola geeshsha agadha hasiissannota ikkitinota rosoommo. (Mik. 7:7) Galagalle hagiirraamma ikkinoommo hattono coyi woyyaawino.

Umihu suwisaanote rosi mine rosiissinonkeri bashsho wole gobbara misiyoone ikkite soqqantinoreeti. Insa misiyoone ikkite soqqantino wari misilla leellishshunketanna iillinonsa qarranna afidhino atoote kultunketa ninkeno misiyoone ikkine soqqama hasiꞌnoommo. Hakko daafira misiyoone ikkine soqqamate mixo fushshiꞌnummo.

Tenne mixonke wonshiꞌrate 1984 Faransayete Afoo coyiꞌnanniwa Kiwubeeki haꞌnummo; kuni bayichi Biriitishi Kolombiyunni 4,000 kiilo meetire ale xeertiꞌranno. Hakkiicho haaro budenna qaale rosa hasiissinonke. Wolu qarra ikkinonke coyi woxe afiꞌrate. Mite yanna geeshsha mittu manchi gate uꞌminanna gatino dinnichi fishsha xinqiꞌne intoommo. Deebi dinnichunni addi addita coommitanno sagale loossanno! Qarra ikkannori heeꞌrirono hagiirrinke baꞌꞌannokki gede assiꞌrate dandiinummore baala assinoommo. Wolu baalunkunni roore Yihowa towaatanni noonketa huwantoommo.—Far. 64:10.

Mitto barra hedeweelcho silke dowwollinke. Dowwolloonninkehu Kanaadu Beeteelera soqqammeemmo gede koyinsoonninketa kullankeraati. Hakkuyira albaanni Giliyaadi Rosi Minira forme wonshinoommohura Beeteelete soqqammeemmo gede koyinsinketa gurchaamboommo. Ikkirono konni koyishshira maahoyye yinoommo. Hakkira iillinummoti Sinu Biiro Komite miila ikkinoha rodoo Keneezi Litili “Giliyaadi Rosi Minira eate forme wonshinewe heeꞌnoommo!” yinummo. Isi, “Hatti koyinsiꞌne woyitita ikkitona” yiinke.

Mitte lamala gedensaanni anenna Deebi Giliyaadi Rosi Minira koyinsinke. Hakko daafira mitte doodha hasiissinonke. Roduu Litili togo yiinonke: “Doodhitinanni doorshi ikkihano ikkiro mitto barra mayi wole doorshalla doodho yitinanniha ikkara dandaanno. Kuni woyyanno yinanni doorshi dino; Yihowa lamenka doorsha maassiꞌrara dandaanno.” Giliyaadi Rosi Minira koyinsoonninke koyishshira maahoyye yinoommo; hattono lowo diro Roduu Litili kulinonke amaale gara ikkase huwantoommo. Hiittee soqqansho soqqantannoro doodha hasiissinonsa roduuwira duucha woyite isi kulinonke amaale qummi assineemmonsa.

MISIYOONE IKKINE SOQQAMMOOMMO YANNA

Giliyaadi Rosi Mine 83^ki kifilera 24 rosaano ledo ronse lowo geeshsha hagiidhinoommo; konne roso Dotteessa 1987 Niwu Yorkete Birukiliini ronsoommo. Qara rosiisaanonke Rodoo Yuliseezi Gilaasinna Jaaki Redifordiiti. Ontu agani anfummokki iilleenna Wocawaaro 6, 1987 maassammoommo. Jooninna Maareyi Guudi ledo Heyiti gobbara soqqammeemmo gede gaammoonninke.

Heyiti gobbara 1962 misiyoone ikkitinori fulte hadhanno gede assini yannanni kayinse misiyoone hakkiira sonke diegenninoonni. Maassammummohunni sase lamala gedensaanni Heyiti haꞌne soqqama hananfoommo; gaammoonninkehu ilaalla batidhino qooxeessira 35 halashshaano noote shiima songoraati. Wedelloota ikkinoommo daafira woꞌnaalshu dinonke; heeꞌneemmohu callootinke misiyoone galtanno miniraati. Hakko qooxeessira heeꞌranno manni angate anje noonsareeti; hattono rooru manni nabbawa didandaannoho. Hakko heeꞌnoommo yannara dagate gaanci kaino, mannu gashshoote galchate sharramino, giira giire doogo cufino hattono hambabalatte kaꞌino.

Heyiti gobbara heedhannori hagiirraammunna worbuullu roduuwiwiinni lowore ronsoommo. Insa giddo batinyeho lowo qarri iillinonsa; ikkirono insa Yihowanna soqqansho baxxanno. Mitte jawa rodoo nabbawa didandiitanno; ikkirono 150 qummeeshsha qaagganno. Hakko qooxeessira barru baala laꞌneemmo coyi, mannu oosora iillanno qarrira malu Maganu Gashshoote ikkinota woꞌmanka woyite sabbakate albinni roore murciꞌneemmo gede assinonke. Alba Qullaawa Maxaafa xiinxallinseemmo manni woꞌma yanna suwisaano, baxxitino suwisaanonna songote cimeeyye ikke soqqamanna laꞌꞌa lowo geeshsha hagiirsiissinonke.

Heyiti heeꞌnoommo waro Mormoonete ammaꞌno misiyoone ikke soqqamannohu Tireeveri yinanni wedellichi ledo xaadoommo; isi ledo haammata hinge Qullaawu Maxaafi daafira hasaawate faro afiꞌnoommo. Lowo diri gedensaanni isi hedeweelcho borrote sokka soyie. Isi togo yee borreessino: “Aanannohu jawu gambooshshiwa cuuamammoraati! Galagale Heyiti hige alba Mormoonete misiyoone ikke soqqamoommo qooxeessira baxxino suwisaancho ikke soqqama hasiꞌreemmo.” Isi hakko qooxeessira lowo diro minaamasi ledo baxxino suwisaancho ikke soqqamino.

AWUROPPA—HAKIINNI AFIRIKA HAꞌNUMMO

Loosonke albi gede agawa agurroonnite mitte Awuroppu gobbara soqqammeemmo gede gaamminke. Hakkiinni 1992 Isiloveeniyaho Luubiyani yinanniwa iillinummo; kuni anniꞌyanna amaꞌya Ixaaliya hadhara albaanni heedhino bayichooti. Yuugozilaaviya yinanni qooxeessira hatte yannara olu diuurrino. Ostiriyaho Veena, Kiroeshiyaho Zagireebinna Serbiyaho Belgireedi yinanniwa nooti sinu biiro tenne gobbara loonsanni looso massagganni keeshshitino. Xa kayinni mitte mittente gobbara umiseti sinu biiro hasiissino.

Hakko daafira haaro afoonna bude rosa hasiissinonke. Qooxeessu manni “Yezhiki ye tezhiki” yaanno; hatto yaa “coyiꞌnanni qaali qarrisannoho” yaate. Tini garankolla. Dirijjite biddi assitinorira ammanante hajajantanno roduuwa lowonta naandoommo hattono Yihowa maassiꞌrinonsa gara huwantoommo. Qoleno Yihowa woꞌmanka woyite mitto coye baxillunni yannasira biddi assannota galagalle huwantoommo. Isiloveeniyaho heeꞌnoommo yannara lowo roso ronsoommo; kuni rosi iillinonke qarra dandiine saꞌneemmo gede kaaꞌlinonke.

Ikkollana wolewano gaammoonninke. Hakkiinni 2000 Galchimi Afirikira Koti Divoori gobbara soqqammeemmo gede gaamminke. Bocaasa 2002 dagate gaanci kaino daafira xoonqe Seraaliyone haꞌnummo. Hatte yannara Seraaliyonete gobbara 11 diro keeshshinohu dagate gaanci xaalla uurre no. Bayichonkonni Koti Divoorinni agurre haꞌra shota diꞌꞌikkitinonke. Ikkirono ronsoommo rosi hagiirrinke baikkinni heeꞌneemmo gede kaaꞌlinonke.

Hakko qoqqowira heeꞌrannohu batinyu manni halaale macciishsha hasiꞌranno hattono roduuwinke lowo diro ola dandiite saꞌino; ninke insa kaaꞌlate illachinshoommo. Insara angate anje noonsaha ikkirono noonsare wolootaho beeha hasidhanno. Mitte rodoo Deebira uddidhanno uduunne uyitinose. Deebi adhate hobbi ruxxi yituta rodoo togo yitino: “Olu yannara wole gobbara heedhannori ammanate roduuwinke kaaꞌlitinonke. Xa kayinni kaaꞌlineemmori ninkeeti.” Ninkeno insa lawishsha haꞌrunsa hasiꞌnoommo.

Jeefote galagalle Koti Divoori hingummo; ikkirono galagale poletiku gaanci kaino. Hakko daafira Bocaasa 2004 mittu mittunku 10 kiilo calla ikkanno uduunne borsaho wodhine horophillunni hatte gobbanni haꞌnummo. Hashsha Faransayete olanto kaampera uulla gonxe galloommo; hakkiinni layinki barra Siwizerilaande haꞌnummo. Hashshu taalo sinu biiro iillinummota Sinu Biiro Komite miillanna Soqqamaanote Qajeelshi Rosi Mine rosiissanno rosiisaanonna minaamuwinsa anga fante haadhinonke hattono iibbado sagalenna Siwizerilaandete chokkoleete uyitinonke. Lowo geeshsha hagiidhinoommo.

Yannate geeshsha Gaanaho soqqammeemmo gede gaammoonninke. Hakkiinni Koti Divoori dagate gaanci gaꞌlabbi yiita galagalle hakkiira hingummo. Mitte gobbanni wole gobba xooqa hasiissunkerono hattono addi addi gobbara soqqammeemmo gede gaamminkerono ammanate roduuwinke leellishshinonke danchumma lowo geeshsha kaaꞌlitinonke. Togoohu ammanate roduuwinke baxilli Yihowa dirijjite giddo rosaminoha ikkirono Aninna Deebi tenne horonta shiimuri gede assiꞌne dilaꞌneemmo. Isinni, hatti lowo geeshsha qarrissanno yanna kaaꞌlanno qajeelsha afiꞌneemmo gede assitinonke.

MEREERIMI SOOJJAATO HAꞌNUMMO

Mereerimu Soojjaatira soqqammeemmo gede 2006 qara biironni borrote sokka sonkinke. Xaano haaro qooxeessa, qarra ikkannonke coye, haaro qaalenna haaro bude rosa hasiissinonke. Konni qooxeessira ammaꞌnotenninna poletikunni kainohunni lowo qarri no. Songote giddo noo roduuwi coyidhannoha addi addi afoo banxoommo; hattono Yihowa dirijjite uyitanno biddishsha haꞌrunsansa abbitino mittimma huwantoommo. Hakko heedhannori rooru roduuwi maatensa, ledonsa rossannori, ledonsa loossannorinna qooxeessinsa manni giwinsarono worbimmatenni qarra dandiite saꞌino gari dhagge ikkinonke.

Hakkiinni 2012 Israeelete Teeli Aviivi yinanniwa assinoonniha baxxino gambooshshe haꞌnoommo. Phenxeqosxete ayyaaniwa 33 M.D. assinoonni gambooshshi kawa hakko qooxeessira kageeshshihu Yihowa manni gamba yaanna tini umite. Hatti yanna horo dihambannite!

Hatte yannara loosonke agamboonnita mitte gobba towaanteemmo gede sonkinke. Hakkiira mite borruwanka haaꞌne haꞌnoommo, soqqansho fulloommo hattono shiimaadda woradu gambooshshuwa assiꞌnoommo. Lowoha olu massaara qodhitino olantonna qortote keelli marriwa baalawa no; kayinni millinseemmohu shiima halashshaano ledo calla qorophine ikkino daafira gawajjannori diꞌꞌiillinonke.

GALAGALLE AFIRIKA HINGUMMO

Hakkiinni 2013 wolu gari soqqansho soqqammeemmo gede kullinke, yaano Kongo Kinshaasaho noote sinu biirora soqqammeemmo gede gaamminke. Hatti gobba halaꞌladotenna biifadote; ikkirono buutote hude qarrissannote hattono massaara qodhino manni qarra kalaqannote. Umi qara “Afirika egenninoommo; haꞌrate qixxaamboommo” yinoommo. Ikkirono rosa hasiissannonkeri lowori no; hakko iso bayichunni bayicho haꞌrate doogga diꞌꞌinjiitanno. Illachisha hasiissannonkeha batinye dancha coye afiꞌnoommo; lawishshaho ammanate roduuwinke angate anje waaddannonsaha ikkirono hagiirrinsa baikkinni kaajjite uurritino gara, soqqansho baxxanno garanna songotenna jajjabba gambooshshe haꞌrate sharrantanno gara laꞌꞌanke lowo geeshsha hagiirsiissinonke. Yihowa kaaꞌlonninna isi maassiꞌrino daafira lowo manni dancha duduwo macciishshe adhanna uminke heeshshonni laꞌnoommo. Kongote woꞌma yanna soqqansho soqqammoommo diri giddo batinye kaajja roso ronsoommo hattono lowo jaalla kalaqiꞌnoommo.

Hakkiinni 2017 jeefora Wodiidi Afirikira soqqammeemmo gede gaamminke. Xaa geeshsha soqqammoommote sinu biiro giddo tini lowo geeshsha jawate; Beeteelete uyinoonninke loosino ninkera haaroho. Xaano rosa hasiissannonkehu lowo coyino; kayinni alba ronsoommo rosi lowo geeshsha kaaꞌlinonke. Lowo diro batinye qarra dandiite saꞌinore ammanate roduuwanke lowo geeshsha banxoommo. Beeteelete maate budinsanna sirchinsa addi addiha ikkirono mittimmatenni loossanno gari dhagge ikkinonke. Yihowa manni haaro mannimma uddiꞌrironna Qullaawu Maxaafiha xintu seera loosu aana hosiisiro isi keeresi oye maassiꞌrannoti xabbe leeltanno.

Lowo diro Deebiranna anera dhagge ikkannoha addi addi looso uyinoonninke; hattono addi addi budenna addi addi afoo ronsoommo. Woꞌmanka woyite tenne assa shota ikkitanno yaa diꞌꞌikkino; kayinni Yihowa dirijjitesinna ammanate roduuwinke widoonni woꞌmanka woyite ammanamino baxillesi leellishinonketa huwantoommo. (Far. 144:2) Woꞌma yanna soqqansho soqqammanni afiꞌnoommo qajeelshi worbuulle Yihowa soqqamano ikkineemmo gede assinonke yine hendeemmo.

Anniꞌyanna amaꞌya dancha gede asse lossinoe daafira, muxxe minaamaꞌya Deebi kaaꞌlitinoe daafiranna alamete doyichoti ayyaanaamittete maate dancha lawishsha ikkitinoe daafira lowo geeshsha tashshi yiinoe. Albillitteno woꞌmanka woyite Bayiru Rosiisaanchinkewiinni rosate murciꞌnoommo.