‘Olu Yihowaho’

Kisse hanaffinohu 1990 jeeforaati; hatte yannara Faransayete gashshooti Faransayenniti sinu biiro 1993nni 1996 geeshsha fushshotenni afidhino woxira garimale qaraxo baattanno gede kulino. Faransayennihu yoote mine taashsho afiꞌrate sharrammoommoha ikkirono diqiniinonke. Kado xaꞌmiꞌne qeelammummohu gedensaanni, Faransayete gashshooti 6,300,000 Ameeriku doolaare ikkanno woxe sinu biiro akkaawuntenni giddeesse adhino. Assa dandiineemmori Awuroppunnihu Kalaqamu Qoosso Yoo Minira haꞌra callate. Hajonke laꞌnara albaanni Awuroppunnihu Kalaqamu Qoosso Yoo Mini sumuu yineemmoronna teꞌee afate, Faransayete gashshootihu higgete egennaamminna Awuroppunnihu Kalaqamu Qoosso Yoo Mine riqibbe daggino mancho ledo xaande hasaambeemmo gede assinonke.

Awuroppu Yoo Mine riqibbe daggino mancho gama woxe baattine sumuu yitine agurre yitankeraati yine hendoommo. Ikkirono, shiima woxe nafa baata Qullaawu Maxaafiha xintu seera diiga ikkitinota huwantoommo. Roduuwu woxe fushshitannohu Maganu Gashshooti looso kaaꞌlateeti; hakko daafira kuni woxi gashshootunniha diꞌꞌikkino. (Mat. 22:21) Ikkirono Yoote Mini seera ayirrinsoommo daafira insa ledo gamba yinoommo.

Hajonke laꞌnara mitte biifado Yoote Mini kifilera gamba yinummo. Bayichonkonni Awuroppunnihu Yoote Mini riqiwaancho Yihowa Farciꞌraasine Faransayete gashshooti xaꞌminoha gama woxe baata hasiissannonsata coyidhu. Hakkiinni hedeweelcho ise togo yine xaꞌminummo: “Faransayete gashshooti baankete akkaawuntenkenni 6, 300,000 Ameeriku doolaare giddeesse adhinota afootta?”

Hakkiinni laꞌnanni heeꞌneennanni albise soorrami. Ise Faransayete gashshoote riqibbe dagginore xaꞌmite tenne buuxxuhu gedensaanni, tenne hajo daafira noose lao woꞌmunni woꞌma soorrantu. Ise insara hanqite coyidhe bayichonkonni gambooshshe uurrissu. Hakkiinni Yihowa ninke horo hendoommokki garinni yoote hajo woꞌmunni woꞌma soorrinota huwatoommo. Yoote mininni hagiidhinanni fulloommo; hattono hakko kalaqaminori dhagge ikkinonke.

Ella 30, 2011 Awuroppunnihu Kalaqamu Qoosso Yoo Mini ninkera kaaꞌlitanno yoo yiino. Yoote Mini kuni qaraxi garimale ikkinota coyiꞌrino hattono Faransayete gashshooti woxe qallonte ledo qolanno gede hajajino! Tini dhagge ikkitanno yoo xaa yanna geeshsha Faransayete gobbara Yihowa faajjetenni magansiꞌnanni gede lowore kaaꞌlitino. Hatti hedeweelcho xaꞌminoommo xaꞌmo Gooliyaadi umo gani kinchi gede coyi soorramanno gede assitino. Ninke qeelle afiꞌnoommohu mayiraati? Korkaatuno Daawiti Gooliyaadira yiinte gede, ‘olu Yihowaho.’—1 Sam. 17:45-47.

Qeelle afiꞌnoommohu tenne yannara calla diꞌꞌikkino. Ammaꞌnotenna poletiku massagaano lowo geeshsha gibbunkerono, xaa geeshsha 70 gobbara noohu aliidi yoo minenna alamete doyichora noohu batinyu yoote mine 1,225 hajo lainohunni Yihowa Farciꞌraasine kaaꞌlitanno yoo yinoonni. Tini qeelle kalaqamu qoossonke agarantanno gede assitino; lawishshaho, ammaꞌnonke higge affinota ikkitanno gede, faajjete sabbankeemmo gede, meessi gobba calla baxa giwatenna mundee adha giwate qoossonke agarantanno gede kaaꞌlitannonke.

Niyu Yorkete noote Yihowa Farciꞌraasinete Qara Biirora soqqamanni heeꞌre Awuroppunnite Yoote hajora eoommohu hiittoonniiti?

MISIYOONE IKKITE DIINAGGAABBE SOQQANTANNORI LOSSITINOE

Anniꞌya Joorjinna amaꞌya Lusili Giliyaadi rosi mine 12^ki kifile eꞌe maassantino; qoleno 1956 ani ilamummo woyite insa Itiyophiyaho soqqantanni no. Insa anera suꞌma Filippi yite fushshitinoe; kuni umi xibbi diro heeꞌrino wongeellaawichi Filiphoosi suꞌmaati. (Soq. 21:8) Aane noo diro hatte gobbara gashshootu Yihowa magansiꞌnannita hooli. Ani hakka waro qaaqqo ikkummorono maatenke maaxante magansidhannota qaageemmo. Qaaqqo ikkoommo daafira tini lowo geya dhagge ikkitinoe! Kayinni gashshaano 1960 hatte gobbanni fulleemmo gede assitunke.

Maatenke Ameerikaho Kansaasi Wichita yinanniwa hadhe heeꞌra hanaffu; ikkirono, anniꞌyanna amaꞌya Misiyoone ikke soqqamanno wari gede diinaggaawe soqqama diagurino. Insa halaale lowo geya naaddanno; qoleno ani, bayira rodooꞌya Judiinna maaꞌnu rodiiꞌya Leslii halaale banxeemmo gede assite lossitinonke; kuri roduuwiꞌyano ilaminohu Itiyophiyahooti. Cuuamoommohu 13 dirihu heeꞌreeti. Sasu diri gedensaanni maatenke sabbakkannori roore hasiissannowa Peeru Arekippa yinanniwa hadhu.

Hakkiinni 1974 ani 18 dirihu heeꞌreenna Peeru nooti sinu biiro anenna wole shoole roduuwa baxxitino suwisaano ikkine soqqammeemmo gede gaantunke. Andise Ilaalira noohu horo soqqamme egenninoonnikki qoqqowira sabbankeemmo. Kechiwanna Ayimara afoo coyiꞌranno mannirano sabbankeemmo. Bayichunni bayicho haꞌneemmohu gallanni bayichono afiꞌrino makeeninniiti. Hatte gobbara heeꞌranno mannira Qullaawa Maxaafa horoonsiꞌre Yihowa muli yannara buxima, dhibbanna reyo hunannota kula hagiirsiissannoeta qaageemmo. (Aju. 21:3, 4) Sabbankoommo sokka batinyu manni macciishshe adhino.

QARA BIIRORA SOQQAMEEMMO GEDE GAAMMIE

Alba Aliidi Bisi miila ikke soqqaminohu Alberti Shirooderi 1977 Peeru noota sinu biiro towaati yannara qara biirora noo Beeteelera soqqamate forme wonsheemmo gede jawaachishie. Hakko daafira forme wonshummo. Mulenni Ella 17, 1977 Birukiliini noo Beeteelera soqqama hanafummo. Hakkiicho shoole saꞌꞌanno diro mine feyatenna gatamarate looso loosoommo.

Hakkiinni Ella 1978 Luuziyaanaho Niwu Orliinsi assinoonnihu daga dagiyyote gambooshshiwa Elsaabeexi yinanni rodoo ledo egennammummo. Ane anninna ama gede iseno halaale lowo geya baxanno anninna ama lossinose. Hatte yannara Elsaabeexi shoolu diri geya woꞌma yanna suwisaancho ikkite soqqantino; qoleno ise heeshshose diro baala woꞌma yanna soqqansho soqqama hasidhanno. Mimmito seekkine egenninummo. Hakkiinni mulenni lowo geya baxammummo. Birra 20, 1979 adhamme mitteenni Beeteelete soqqama hananfummo.

Umo gaammoonninkete Birukiliini Ispaanishi yinanni songora noo roduuwi anga fante haadhinonke. Hakkunni gedensaanni wole sase songuwarano soqqammoommo; hakko noo roduuwino anga fante haadhinonke hattono Beeteelete soqqanshonke agurreemmokki gede jawaachishshinonke. Insanna geedhitino annuwankenna amuuwanke towaata kaaꞌlitinonke jaallankenna maatenke lowo geya galanteemmonsa.

HIGGETE GOLIRA SOQQAMA HANAFUMMO

Hakkiinni Arfaasa 1982 Beeteelete Higgete Golira soqqameemmo gede gaammieta dhagge assiꞌrummo. Sasu diri gedensaanni yuniversite eꞌꞌe rose higgete egennaamo ikkate fajjo fushshiꞌreemmo gede kullie. Roso rosanni heeꞌre Yunayitidi Isteetisetenna wole batinye gobbara heeꞌrannohu rooru manni, hasiꞌrinore assate qoosso afiꞌrinohu Yihowa Farciꞌraasine yoote mine qeelle afidhino daafira ikkinota afummoti lowo geya dhagge assiꞌroommo. Rosu yannara tenne lowo geeshsha hasiissanno hajo kayinse hasaambanni.

Sajjuu dirihu heeꞌre 1986 Higgete Golira aliidi laꞌꞌaancho ikke soqqameemmo gede shoommie. Tenne qoosso afiꞌroommo daafira hagiidhoommoha ikkirono, afoommokkihu batinyu coyi noohuranna kuni loosi shota ikkinokkita afoommo daafira yaadoommo.

Hakkiinni 1988 higgete egennaamo ikkummo; Ikkirono, hakka woyite rosoommo rosi ayyaanaamitteꞌya mageeshshi geeshsha gawajjinoro dihuwatoommo. Lowo rosi mittu manchi lowowa iillate hasatto heedhannosi gedenna konne roso rosinokki manna lowo geeshsha roorannohu gede asse hedanno gede assasira dandaanno. Elsaabeexi togoori iillannoekki gede gatissinoe. Ise higgete rosi minira eammora albaanni asseemmoha ayyaanaamittete coye galagale asseemmo gede kaaꞌlitinoe. Yanna hasiissinoeha ikkirono galagale ayyaanaamittetenni jawaatoommo. Heeshshote lowo geeshsha hasiisanno coyi lowo egenno afiꞌra ikkitinokkita huwatoommo. Addu hagiirre afiꞌnannihu Yihowa ledo muli jaalooma kalaqiꞌnirootinna isonna mannasi lubbora banxirooti.

DANCHU DUDUWIRA GAARAMANNA GASHSHOOTU AFINOHA ASSATE SHARRAMA

Higgete roso rose gudummohu gedensaanni, Beeteelete nooha higgete gola qineessa kaaꞌlanna yoote mine Maganu Gashshootira gaarama illachishummo. Alba higge hadhanni nootanna rakke lophitanni noota Yihowa dirijjite kaaꞌla hagiirsiissannote hattono shaaꞌꞌa looso diꞌꞌikkitino. Lawishshaho, konni albaanni borruwanke elleemmo woyite mannu woxe fushshanno gede xaꞌmineemmo. Kayinni Higgete Goli 1990 hananfe tenne assa agurranni gara malanno gede xaꞌminoonni. Hakkunni gedensaanni Yihowa Farciꞌraasine mannaho borro woxe baatikkinni uyitanno. Tini Beeteeletenna qanchoho loonsanni loosi shotanno gedenna xaa geeshsha hasiisannokki qaraxo baantannikki gede kaaꞌlitino. Mitu manni kuni biddi assinoonni coyi dirijjitete woxi goofanno gede assanno hattono soqqanshonkera guficho ikkanno yee hedino. Kayinni coyi insa hedi gede diꞌꞌikkino. Yihowara soqqamanno manni kiiro 1990 hanaffe lame ero lexxitino; qoleno xaa yannara mannu heeshsho gatissannota ayyaanaamittete sagale woxe baatikkinni afiꞌranno. Kuninna wolu batinyu Yihowa dirijjite biddi assitanno coyi qinaannohu, Yihowawiinni afiꞌneemmo jawaantenninna isi ammanamino borojjichi widoonni aannonke biddishshinni calla ikkinota umiꞌya heeshshonni laoommo.—Ful. 15:2; Mat. 24:45.

Yoote mine qeelle afiꞌnoommohu worbuulle higgete egennaamma ikkinoommo daafira diꞌꞌikkino. Gashshootu aana noori duucha woyite Yihowa manna kaaꞌlannore assitannohu insaha dancha amanyoote laꞌeeti. Lawishshaho, 1998 sasu Aliidi Bisi miillanna minaamuwinsa Kubaho assinoonniha baxxino gambooshshe dayi yannara tenne huwatoommo. Ninke gambooshshunniwa coyiꞌneemmorinni roore insa shaqqille leellishansanna manna ayirrisansa gashshootu aana noori poletikaho anga wodhineemmokkita huwattanno gede assitino.

Ikkirono, mito woyite taalo yoo yaa hoonginkero, yoote minira marre ‘danchu duduwira gaarammeemmo hattono gashshootu afinoha assate sharrammeemmo.’ (Fil. 1:7) Lawishshaho, lowo diro Awuroppahonna Wodiidi Kooriyira noo gashshaasine olaho haꞌra giwate qoossonke diayirrissino. Hakko daafira Awuroppaho heedhannori 18,000 ikkitanno roduuwinkenna Wodiidi Kooriyira heedhannori 19,000 saꞌanno roduuwi tiiꞌꞌinsa olaho hadhanno gede fajjinonsakki daafira usurantino.

Jeefote Maaja 7, 2011 Awuroppunnihu Kalaqamu Qoosso Yoo Mini Armeeniyu gobbara heeꞌrannohu Bayaatiyani yinanni rodii kisse lainohunni dhagge ikkitanno yoo yiino; tini yoo Awuroppu gobbuwara heeꞌrannohu tiiꞌꞌinsa olaho haꞌrara fajjannonsakki manni olaho haꞌrate bayicho siviilete soqqansho soqqama dandaannota leellishshanno. Hakkiinni aane Wodiidi Kooriyi Gashshooti Yoo Mini Ella 28, 2018 mittu gari yoo yiino. Wedellu roduuwi giddo boodu nafa tennera anga uyitoommero tenne qeelle horo diafiꞌneemmo.

Qara biiroranna alamete doyichora noote sinu biirora higgete golira soqqantanno roduuwi Maganu Gashshootira halamate diinaggaabbe loossanno. Gashshaasine xiibbannonsa roduuwira gaarama ninkera lowo ayirrinyeeti. Yoote mine qeelle afiꞌnono hoongono Maganu Gashshootira halamanke gashshaanotenna mootoollate hattono dagate farciꞌneemmo faro fantannonke. (Mat. 10:18) Daanyootu, gashshaasine, tuqu xaadooshshinna dagoomu yoote minira shiqishiꞌnoommo borronna yekkeero giddo qummeessinoommo qummeeshshuwa laꞌꞌanna illachisha hasiissannonsa. Suwashshu wodani noonsa manni Yihowa Farciꞌraasine hiittoo mannaatironna ammaꞌnonsa buicho maatiro afanno. Insa giddo mitu ammanate roduuwanke ikkino.

YIHOWA GALANTEEMMOHE

Saihu 40 diri giddo alamete doyichora noote sinu biiro ledo higgete ledo xaadooshshe afidhino hajora kaaꞌlame loosatenna addi addihu aliidi yoo mine hattono lowo silxaane noonsa gashshaasine albira shiqate qoosso afiꞌroommo. Qara biirora Higgete Golira ledoꞌya soqqantanno roduuwanna alamete doyichora noore higgete golira soqqantanno roduuwa lowo geya baxeemmo hattono naadeemmo. Heeshshoꞌya atootunna hagiirru woꞌminote.

Elsaabeexi saihu 45 diri giddo faffoteno qarru yannarano ammanante baxillunni kaaꞌlitinoe. Wolqa baꞌanno gede assannose dhibbi waadiserono ise konni garinni kaaꞌlitinoehura lowo geeshsha galateemmose.

Jawaantenna qeelle afiꞌneemmohu uminke dandoonni ikkinokkita huwantoommo. Daawiti yiinonte gede, “Kaaliiqi mannisira wolqansaati.” (Far. 28:8) Addanko, ‘olu Yihowaho.’