Maganu Baxilli Hegereho

1-2. Batinyu Kiristaanira hiittoo qarri iillannonsa?

HANNI lowo dambali mereero noota mitte yowolo hedi. Kuni lowo dambali tenne yowolo haaꞌre alenna woro qolanni no. Mittu manchi yowolote cificho tuge yowolo uurrisa hoogiro dambalu hasiꞌriwa qole haaꞌre haꞌranno. Kuni cifichi yowolo noowa uurritanno gedenna dambalunni hembeelantannokki gede assanno.

² Dambalu gedee qarri iillanni nooheha ikkiro, tenne yowolo gede ikkoottohu gede assite hedatto ikkara dandaanno. Hedatto gari mule mulenni soorramara dandaanno. Mitto barra Yihowa baxannohetanna kaaꞌlannoheta addaxxatto; layinki barra qole isi iillanni noohere afinoronna teꞌee nafa huluullamattora dandaatto. (Fa. 10:1; 13:1) Mittu jaalikki sheshifachishannore coyiꞌre mite yanna geeshsha jawaachishahera dandaanno. (Law. 17:17; 25:11) Kayinni galagalte huluullama hanafatto. Yihowa albaanni waagu dinoe yite nafa hedattoha ikkara dandaanno. Fonqolu iillannohe woyte lawishshu yaattonni yowolote cificho tuga dandaatto ma garinniiti? Wole yaattonni Yihowa baxannohetanna kaaꞌlannoheta woꞌmanka woyite addaxxa dandaattohu hiittoonniiti?

3. Faarso 31:7 nna 136:1 kulloonnihu “bagamannokki baxilli” tiro maati? Konne baxille leellishate Yihowa ikkannohu dino yineemmohu mayiraati? (Misileno lai.)

³ Fonqolu iillannohe woyite hembeelamattokki gede kaaꞌlitannoheti mitte doogo Yihowaha bagamannokki baxille qaagate. (Faarso 31:7; 136:1 nabbawi.) ‘Bagamannokki baxille’ yitanno yaatto mitto mancho hegere geeshsha lubbora baxa yitanno tiro afidhino. Bagamannokki baxille leellishate Yihowa ikkannohu dino. Isinni Qullaawu Maxaafi ‘bagamannokki baxillisi batiꞌra’ ikkinota kulanno. (Ful. 34:6, 7) Qoleno Qullaawu Maxaafi Yihowa daafira kulanni, “Ati . . . woshshidhannoherira baalaho bagamannokkiha baxillekki leellishattonsa” yaanno. (Fa. 86:5) Hanni togo yaa mayyaatero hedi: Yihowa ammanantino soqqamaanosi horonta tuge diagurannonsa! Yihowa ammanaminoha ikkinota qaagakki dambalu gedee qarri iillannohe woyite hembeelamattokki gede kaaꞌlitannohe.—Fa. 23:4.

YIHOWA BAXILLI QULLAAWU MAXAAFIHU XINTU ROSI WIDO IKKINOTA QAAGI

4. Xinta ikkinoha mito Qullaawu Maxaafi roso kuli. Konne roso seekkine ammanneemmohu mayiraatiro xawisi.

⁴ Fonqolu iillannohe woyite hembeelamattokki gede kaaꞌlitannoheti wole doogo Yihowa baxilli Qullaawu Maxaafihu xintu rosi wido ikkinota hedate. “Xinta ikkinoha Qullaawu Maxaafi roso” yinanni woyite maa qaagatto? Maganu Qaali giddonni rosoottoha mito halaale qaagattoha ikkara dandaanno. Lawishshaho Maganu suꞌmi Yihowa ikkinota, Yesuusi Maganunniha mitto Beetto ikkinota, reyitinori mittoreno affannokkitanna mannu albillitte gannate ikkitino uullara hegerera heeꞌrannota rosootto. (Fa. 83:18; Ros. 9:5; Yoh. 3:16; Aju. 21:3, 4) Tini halaale ikkitinota ammante adhittohu gedensaanni ayino shiimurinni dogahera didandaanno. Mayira yiniro, kuni rosi taje nooha ikkinota huwatootto. Hanni Yihowa baxilli xinta ikkinohu Qullaawu Maxaafi rosi wido ikkinota huwatakki, ‘Yihowara iillanni nooe qarri dileellannosi woy aneri dihuluullannosi’ yite hedattokki gede kaaꞌlitannohehu hiittoonniitiro laꞌno.

5. Mittu manchi kaphu roso giwa dandaannohu hiittoonniitiro xawisi.

⁵ Umo Qullaawa Maxaafa xiinxallitto yannara kaphu roso giwatto gede kaaꞌlinoheri maati? Alba nootto ammaꞌno rosiissanno roso Qullaawa Borro rosiissanno rosi ledo heewisiisse laꞌꞌa kaaꞌlitinoheha ikkara dandaanno. Hanni mitto lawishsha laꞌno: Konni albaanni Yesuusi Woꞌmanka Dandaanno Maganooti yite ammanatto yine hendo. Qullaawa Maxaafa xiinxallittoti kayinni ateneeto togo yite xaꞌmitto: ‘Kuni rosi addinta garaho?’ Qullaawa Borro taje seekkite xiinxallittohu gedensaanni kuni rosi adda ikkinokkita huwatitto. Hakkiinni konne kaphu roso agurte Qullaawa Borro rosiissanno halaale ammanitto: Yesuusi “kalaqamu baalunkura bayiraho” isi ‘Maganunniho mitto Beettooti.’ (Qol. 1:15; Yoh. 3:18) Hige kaphu rosi ‘qiishote’ gede ikkinohura diigate qarrisanno. (2 Qo. 10:4, 5) Kayinni konne roso mitte higgella giwittoro galagalte hakko rosira dihigatto.—Fil. 3:13.

6. Yihowahu ‘bagamannokki baxilli hegereha’ ikkinota addaxxattohu mayiraati?

⁶ Qullaawu Maxaafi Yihowa baxilli daafira rosiisanno rosono hakko garinni laꞌꞌa dandaatto. Fonqolu iilleennahe Yihowa baxannoheta huluullama hanafittoro ateneeto togo yite xaꞌmi: ‘Hedanni noommori garaho?’ Huluullokki, konni birxichihu cuꞌmote qummeeshshira Faarso 136:1 Yihowa baxilli daafira kulloonniri ledo heewisiisi. Yihowa baxille ‘bagamannokkiho’ yinoonnihu mayiraati? ‘Bagamannokkihu baxillisi hegereho’ yitanno yaatto tenne faarsora 26 hinge qummi assinoonnihu mayiraati? Kageeshsha ronsummonte gede, Yihowa mannisira leellishannohu bagamannokki baxilli, ammane adhate qarrisinohekkihu wolu xinta ikkinohu Qullaawu Maxaafi rosi gedeeti. Yihowa albaanni waagu dinoe woy isi dibaxannoe yee heda digaraho. Wole kaphu roso tiyyidhe giwittonte gede tenne hedono giwi!

7. Yihowa baxannonketa buuxissannota mite qummeeshshuwa kuli.

⁷ Qullaawu Maxaafi giddo Yihowa baxannonketa buuxissannoti wole batinye hedo no. Lawishshaho, Yesuusi haꞌrunsaanosira “kiꞌne lowo gurrae roortinanni” yiino. (Mat. 10:31) Yihowa umisino mannisira togo yiino: “Ani jawaachisheemmohe, kaaꞌleemmohe; wolqaataame angaꞌyanni gargare gatiseemmohe.” (Isa. 41:10) Tini yaatto huluullammannire diafidhinote. Yesuusi ‘Kiꞌne roortinanniha ikkara dandaanno’ diyiino; Yihowano ‘Kaaꞌleemmoheha ikkara dandaanno’ diyiino. Hatteentenni Yesuusi “Roortinanni” yiino; Yihowano “Kaaꞌleemmohe” yiino. Qarru iilleennahe Yihowa baxannoheta huluullamittoro, kuri qummeeshshuwa Yihowa baxannoe yite hedatto gede calla ikkikkinni isi baxannoheta albinni roore addaxxatto gede kaaꞌlitannohe. Kuri qummeeshshuwa kultannori halaaleho. Huuccatto assidhe kuri qummeeshshuwa hiincakki atino 1 Yohaannisi 4:16 yitanno hedora sumuu yaatto gede kaaꞌlitannohe; qummeeshshu, “Maganu baxannonketa anfoommo; hattono ammannoommo” yaanno.a

8. Mito woyite Yihowa baxannoheta huluullamattoha ikkiro ma assa dandaatto?

⁸ Ikkirono mito woyite Yihowa baxannoheta huluullamattohalla ikki? Tenne macciishshantannohe hedo isi daafira afoottori ledo heewisiisi. Macciishshantannonke hedo addaxxinanni halaale diꞌꞌikkitino; Qullaawa Borro giddo kulloonnihu Yihowa baxilli kayinni addaxxinanni halaaleeti. Yihowa baxannonketa ammana hoongummoro isiha qara akata yaano baxillesi lashshi assinanni heeꞌnoommo.—1 Yo. 4:8.

YIHOWA ‘BAXANNOHE’ GARA HIINCI

9-10. Yesuusi Yohaannisi 16:26, 27 “Anniꞌya umisi baxannoꞌne” yiinohu mayyaateeti? (Misileno lai.)

⁹ Yesuusi haꞌrunsaanosira yiinore xiinxalline Yihowa baxilli daafira lowore rosa dandiineemmo; isi “Anniꞌya umisi baxannoꞌne” yiino. (Yohaannisi 16:26, 27 nabbawi.) Isi hatto yiinohu mulla insa hagiirsiisate yee diꞌꞌikkino. Qooxeessaho noo hedo leellishshannonte gede hatte yannara Yesuusi coyiꞌranni noohu macciishshantannonsa hedo daafira diꞌꞌikkino. Hatteentenni isi wole haja yaano huuccattote daafira kulanni noonsa.

¹⁰ Hakkuyira albanni Yesuusi rosaanosira suꞌmisinni huucciꞌra hasiissannonsata, kayinni iso huucciꞌra hasiissannonsakkita kulinonsa. (Yoh. 16:23, 24) Insara tenne afa lowo geeshsha hasiissannonsa. Yesuusi reyotenni kaihu gedensaanni rosaanosi iso huucciꞌrate heddinoha ikkara dandaanno. Qoleno insa Yesuusa seekkite egentino hattono isi jaalansaati. Insa, Yesuusi lowo geeshsha baxannonsa daafira huuccattonsa macciishshe kaaꞌlansara Annasi xaꞌmannohu gede assite heddinoha ikkara dandaanno. Kayinni Yesuusi hakko garinni heda hasiissannonsakkita kulino. Mayira? Korkaatuno isi “Anniꞌya umisi baxannoꞌne” yiino. Kuni huuccattote daafira kulanno halaali xinta ikkinohu Qullaawu Maxaafi rosi widooti. Hanni tini kaaꞌlitannohe gara hedi: Qullaawa Maxaafa xiinxallakki Yesuusa afattonna baxatto gede assitinohe. (Yoh. 14:21) Kayinni umi xibbi diri rosaano gede atino Maganu ‘umisi baxannoheta’ addaxxite iso huucciꞌra dandaatto. Yihowa huucciꞌritto kiiro konne qaale ammanattota leellishatto.—1 Yo. 5:14.

HULUULLAMATTO GEDE ASSANNOHERI MAATIRO HUWATI

11. Yihowa baxannonketa huluullammummoro Sheexaanu hagiidhannohu mayiraati?

¹¹ Yihowa baxannonketa huluullammeemmo gede assannonkeri maati? Tennera kaimu Sheexaaneho yaattoha ikkara dandaanno; hatto yaakkino garaho. Sheexaanu ‘egemmankera hasiꞌranno’ hattono Yihowa baxannonketa huluullammummoro hagiidhanno. (1 Ph. 5:8) Yihowa baxannonke daafira wodo qixxeessinonke; Sheexaanu kayinni tini wodo hasiissannore diꞌꞌikkinoommo yine hendammora hasiꞌranno. (Ibi. 2:9) Kayinni Yihowa baxannonketa huluullammummoro hagiidhannohu ayeti? Sheexaaneho. Qoleno qarru iillannonke woyite hexxo mudhine Yihowara soqqama agurrummoro ayi hedinori woꞌmanno? Sheexaanu hedinori woꞌmanno. Sheexaanu Yihowa dibaxannonke yine hendammora hasiꞌranno; kayinni tini kaphoho. Yihowa baxannosikkihu Sheexaane umosiiti. Ikkirono, Sheexaanu horoonsiꞌranno “xagarro” giddo mitte Yihowa dibaxannonke yine hendeemmo gede assate woꞌnaalate. (Efe. 6:11) Diininke maa assate woꞌnaalanni nooro huwantummoro ‘Daawuloosi giwate’ albinni roore murciꞌneemmo.—Yaq. 4:7.

12-13. Ragiꞌnoommo cubbi Yihowa baxannonketa huluullammeemmo gede assankera dandaannohu hiittoonniiti?

¹² Yihowa baxannonketa huluullammeemmo gede assannonkehu wolu coyino no. Kuni coyi maati? Ragiꞌnoommo cubbooti. (Fa. 51:5; Rom. 5:12) Cubbu mannu Kalaqaanchinsawiinni xeertiꞌranno gede assino. Qoleno kuni cubbi mannu surre, wodananna mannimma gawajjino.

¹³ Cubbu ninkeneeto bushiinsheemmo, yaandeemmo, beꞌe yineemmonna saalleemmo gede assanni gawajjannonke. Cubbo loonseemmo woyite togoori macciishshamankera dandaanno. Qoleno cubbo loonsummo kiiro togoo hedo dagganni waaddannonke; Maganu kalaqinonkehuno konni garinni heeꞌnammora diꞌꞌikkino. (Rom. 8:20, 21) Buukkino goommi makeenu garunni haꞌrannokki gede assannonte gede, ninkeno guuntete xeꞌne noonkere ikkanke Maganu heeꞌnammora hede kalaqinonke garinni heeꞌneemmokki gede assitannonke. Hakko daafira mito woyite Yihowa baxannonketa huluullama dhagge diꞌꞌikkitannonke. Togoo hedo waaddannonke woyite Yihowa ‘baxxannosiriranna hajajosi ayirrissannorira’ bagamannokki baxille leellishannoha ikkinota qaaga hasiissannonke.—Neh.1:5.

14. Wodote daafira hiincanke Yihowa baxannonketa huluullammeemmokki gede kaaꞌlitannonkehu hiittoonniiti? (Rooma 5:8) (“‘Cubbunnita Dogate Wolqa’ Qorophe” yitanno saaxineno lai.)

¹⁴ Yihowa baxannonke gedeere diꞌꞌikkinoommo yine hendeemmo woyiti nooti egennantinote. Noore coyiꞌniro tini garankolla; Yihowa baxilli baxxinoha ikkinohu iseraati. Yihowa baxannonke gede assiꞌrate ninke assa dandiineemmori dino. Ikkirono wodo cubbonke dibbino; Yihowa baxannonke daafira tenne qixxaawo qixxeessinonke. (1 Yo. 4:10) Yesuusi dayinohuno guuta manna ikkikkinni cubbaataamma gatisate ikkinota qaango. (Rooma 5:8 nabbawi.) Ninke giddo mitto coyeno guutu garinni assa dandaannohu dino; Yihowano guutu garinni asse diyaannonke. Ragiꞌnoommo cubbi Yihowa baxannonketa huluullammeemmo gede assannonketa huwantummoro, tenne gargadhate albinni roore murciꞌneemmo.—Rom. 7:24, 25.

AMMANANTE HEEꞌRA DOODHI

15-16. Yihowara ammanamme heeꞌneemmoha ikkiro maa addaxxa dandiineemmo? Mayira? (2 Saamueeli 22:26)

¹⁵ Yihowa isira ‘ammanammoommore ikkine’ gara ikkino doorsha doodhinammora hasiꞌranno. (Mar. 30:19, 20) Hatto assinummoro isino ninkera ammanaminoha ikke heeꞌrannota addaxxa dandiineemmo. (2 Saamueeli 22:26 nabbawi.) Yihowara ammanamme heeꞌnummo geeshsha isi iillannonkeha aye qarrano dandiine saꞌneemmo gede kaaꞌlannonketa addaxxa dandiineemmo.

¹⁶ Kageeshsha ronsummonte gede qarru iillannonke woyite hembeelammeemmokki gede assannonkehu ikkadu korkaati no. Yihowa baxannonketanna kaaꞌlannonketa anfoommo. Qullaawu Maxaafi rosiisanno rosi konneeti. Yihowa baxannonketa huluullammeemmo woyite macciishshantannonke hedo agurre anfoommo halaale hiinca dandiineemmo. Bagamannokkihu Yihowa baxilli hegereha ikkinota kulannoha Qullaawu Maxaafi aana xintamino halaale addaxxa agurroonke.