Qarru Amadannohe Woyte Iyyoobi Maxaafi Kaaꞌlahera Dandaanno

1-2. Iyyoobi maxaafa nabbawa hasiissannonke yineemmo gede assannonkeri maati?

MULI yannara Iyyoobi maxaafa nabbawootto? Borreessinoonnihu mitu 3,500 diri albaanni ikkirono, kuni hundi maxaafi xaa geeshsha borreessinoonnite dhagge ikkitanno maxaaffa widira kiiramanno. Konne maxaafa borreessi manchi huwatate qarrissannokkita, baxissannotanna wolqa afidhino qaalla horoonsiꞌrino daafira mannu, “worba borreessaanchooti” yee jajannosi. Konne dhagge ikkanno maxaafa borreessinohu Muse ikkirono, maxaafu Anni kayinni Magano Yihowaati.—2 Xi. 3:16.

² Iyyoobi maxaafi Qullaawu Maxaafi giddo kaajja maxaafaati. Mayra? Hedate dandoo noonsa kalaqama baala laꞌannota mitte majjata ikkitinokki haja yaano Yihowa suꞌmi qullaambe daafira huwanteemmo gede kaaꞌlannonkehuraati. Qoleno Yihowata dhagge ikkitanno akatta lawishshaho, baxillisi, hayyosi, taashshosinna wolqasi daafira rosiisannonke. Lawishshaho Iyyoobi maxaafi giddo Yihowa 29 baycho “Woꞌmanka Dandaannoho” yinoonni; wole gattino maxaaffara nooha baala gamba assineenna kageeshsha diꞌꞌikkanno. Iyyoobi maxaafi mannu heeshshote daafira xaꞌmannote batinye xaꞌmuwara dawaro qolanno; kuri giddo mitte, Maganu qarru heeꞌrara fajjinohu mayraati? yitannote xaa geeshsha lowo mannira huluullitanno xaꞌmooti.

3. Iyyoobi maxaafa xiinxalline afiꞌra dandiineemmoti mite horo maati?

³ Ilaalaho heeꞌne qooxeessinkera noore baala seekkine laꞌꞌa dandiineemmonte gede, Iyyoobi maxaafa nabbawanke iillannonke qarrira Yihowate gedee lao heedhannonke gede kaaꞌlitannonke. Hanni qarru amadannonke woyte Iyyoobi maxaafi kaaꞌlannonke gara laꞌno. Iyyoobi xagge Israeele ma garinni kaaꞌlitinonsaha ikkara dandaannoronna xaa yannara ninke kaaꞌlitannonkehu hiittoonniitiro ronseemmo. Qoleno tenne Qullaawu Maxaafi xagge woloota kaaꞌlate horoonsiꞌra dandiineemmo gara ronseemmo.

MAGANU IYYOOBIRA QARRU IILLARA FAJJINO

4. Iyyoobinna Gibitsete gobbara noo Israeele mereero noo badooshshi maati?

⁴ Israeele Gibitsete borojje ikkite shette noo yannara, Iyyoobi yinanni manchi Uutsi yinanni gobbara heeꞌranno; Uutsi noohu Hexxote Gobbara soojjaatoonninna Arawete gobbara aliyyenni ikkara dandaanno. Gibitsete gobbara noohu mitu Israeelete manni kaphu maganna magansiꞌra hanafino; Iyyoobi kayinni ammaname Yihowara soqqamanno. (Iya. 24:14; Hiz. 20:8) Yihowa Iyyoobi ‘isi gedee manchi wolu dino’ yiino.a (Iyo. 1:8) Iyyoobi hoqino dureessaatinna Soojjaato heeꞌranno manni baalunkunni roore ayirrado manchooti. (Iyo. 1:3) Sheexaanu kuni maccahunna ayirradu manchi ammaname Maganoho soqqamanna lae hanqinoti dihuluullissannote!

5. Yihowa Iyyoobira qarru iillara fajjinohu mayraati? (Iyo. 1:20-22; 2:9, 10)

⁵ Sheexaanu Iyyoobira qarru iillisiro Yihowa magansiꞌra aguranno yiino. (Iyo. 1:7-11; 2:2-5) Yihowa Iyyoobi lowo geeshsha baxannoha ikkirono, Sheexaanu Iyyoobi daafira coyiꞌrinori halaalehonso kaphohoro leellishate woꞌnaalara fajjino. (Iyo. 1:12-19; 2:6-8) Sheexaanu Iyyoobi saada adhinanni gede assino, tonne oososi shiino hattono Iyyoobi umisi qoonchinni kayse lekkasi hoowi geeshsha jaddote mada madiissinosi. Sheexaanu Iyyoobi ammanamannokki gede assate lowo qarra abbinosiha ikkirono diqiniinosi. (Iyyoobi 1:20-22; 2:9, 10 nabbawi.) Yannate gedensaanni Yihowa Iyyoobira jirosi, ordu fayyimmasinna ayirrinyesi qolino; hattono wole tonne ooso uynosi. Qoleno maalaletenni 140 diro ledeennasi oososi ooso 4 ilama geeshsha laino. (Iyo. 42:10-13, 16) Tini xagge hundi waro heedhinore kaaꞌlitinoha ikkara dandaannohu hiittoonniiti? Xaa yannara ninkeno kaaꞌlitankera dandiitannohu ma garinniiti?

6. Maganu qarru heeꞌrara fajjinohu mayraatiro afansa Israeele kaaꞌlitinonsaha ikkara dandaanohu hiittoonniiti? (Misileno lai.)

⁶ Israeele kaaꞌlitinoha ikkara dandaanno gara. Israeelete manni Gibitsete heeꞌrino heeshsho shota diꞌꞌikkitino. Lawishshaho, Iyyaasunna Kaaleebi wedellimmansa yannara Gibitsete borojje ikkite heedhino. Insa loossino soꞌro nookkiha ikkirono 40 diro halalla raataabbino. Israeele Iyyoobi qarrire kultanno xaggenna gedensiidi heeshshosi daafira affinoha ikkiro, tini insano, insa gedensaanni dagganno ilamano mannu oosora iillanno qarrira xaꞌmamannohu ayetiro huwattanno gede kaaꞌlitansara dandiitanno. Qoleno Maganu qarru heeꞌrara fajjinohu mayraatironna isi ammanante soqqantannosire lowo geeshsha naadannota roore huwattara dandiitanno.

7-8. Ninke giddo qarru iillanni noonsare Iyyoobi maxaafi kaaꞌlansara dandaanohu hiittoonniiti? Woꞌnaalsha kuli.

⁷ Ninke kaaꞌlitankera dandiitanno gara. Xaa yannara batinyu manni danchu mannira bushu coy iillannonsahu mayraatiro afinokki daafira Magano ammana agurino; tini dadillissannote. Hanni Ruwaandaho heedhannote Hazeelib lawishsha laꞌno. Ise anje heedhe Magano ammantanno. Yannate gedensaanni kayinni coy soorramino. Annisenna amase adhamansa diigino; hakko daafira ise losso annisewa lophitino; isi lowo geeshsha gadadisannose. Wedellite heedheenna ise seyantoonnise. Hazeeli shesho afiꞌrate magansidhanno baycho hadhinoha ikkirono, shesho afiꞌra didandiitino. Ise gedensoonni Maganoho sokka borreessitino. Ise togo yite borreessitino: “Magano, ani ate huucciꞌroomma, danchare assate woꞌnaaloomma, ati kayinni danchummaꞌyara bunshe assite qoloottoe. Xaate ani ate agure hagiirsiisannoere baala assate mixiꞌroomma.” Illannonsa qarrira xaꞌmamannohu Maganoho yine kaphunni ammansiinsoonnihu Hazeeli gedee manni lowo geeshsha mararsannonke!

⁸ Ninke kayinni Iyyoobi maxaafinni iillannonke qarrira xaꞌmamannohu Magano ikkikkinni Sheexaane ikkinota ronsoommo! Qoleno qarru amadinonsare, wixidhinore mixxitanni no yine heda hasiissannonkekkita ronsoommo. Qullaawa Borro, “Yannanna hendoonnikki coyi” aye manchirano aye yannara iillara dandaannota kultannonke. (Ros. 9:11; Iyo. 4:1, 8) Iillannonke fonqolo ammanamatenni cincine saꞌnummoro, Yihowa Sheexaanu xonora dawaro qoꞌlanno gede assinanni heeꞌnoommotano ronsoommo. Tini qolte Yihowa suꞌmi qullaawanno gede assitanno. (Iyo. 2:3; Law. 27:11) Ninkeranna banxeemmo mannira qarru iillannonsahu mayraatiro anfeemmo gede assinonkeha konne ronsoommo roso lowo geeshsha naandeemmo. Hazeeli gedensoonni Yihowa Farciꞌraasine ledo Qullaawa Maxaafa xiinxallituti iillinose qarrira xaꞌmamannohu Magano ikkinokkita huwattino. Ise togo yitino: “Galagale giddoꞌyata kule Magano huucciꞌroomma. Yihowara aguroommahe yoommahu addanka ikkinokkita kuloommasi. Hatto yoommahu isi ayimma afoommakki daafiraatilla. Xa Yihowa baxannoeta huwatoomma. Qoleno hagiirrenna harshammo afiꞌroomma.” Maganu qarru heeꞌrara fajjinohu mayraatiro anfeemmo gede kaaꞌlinonke daafira galanteemmosi! Hanni xa Iyyoobi maxaafi qarru iillannonke woyte, ninke mitto mittonka kaaꞌlankera dandaanno gara laꞌno.

IYYOOBI XAGGE CINCINEEMMO GEDE KAAꞌLITANNONKE GARA

9. Iyyoobi buluuloho ofolle heeꞌre hiitto ikkinoha lawannohe? (Yaiqoobi 5:11)

⁹ Iyyoobi biso madire goofe shetinohu callichisi buluulu aana ikke ofolle noo gara hedi. Dhibbunni kainohunni bisisi kolishshiꞌrino; hattono yarenna luqqae haqqaho fulino. Iyyoobi wolqa baino daafira baccichunni bisosi hangaadha agurranna woluri assa dandaannori nooha dilawanno; isi ofollinowa heeꞌre dhibbisinni kainohunni caaccaawe coyiꞌramanno. Iyyoobi mulla dandee heeꞌrinoha calla ikkikkinni ammanamatenni cincino. (Yaiqoobi 5:11 nabbawi.) Iyyoobi cincanno gede kaaꞌlinosiri maati?

10. Iyyoobira Yihowa ledo hiittoo jaaloomi noosi? Xawisi.

¹⁰ Iyyoobi giddosita gudise Yihowara hasaaphino. (Iyo. 10:1, 2; 16:20) Lawishshaho, fooliishsho sase Iyyoobi iillitinosi dano Yihowa abbinoete yee soꞌrotenni hedino daafira aaraawe coyiꞌraminota kultannonke. Isi sase jaallasi ledo wirro wirro heewisami woyte, Yihowara ammanaminoha ikkinota buuxisate gaaramino. Iyyoobi coyiꞌrinohu mitu coy isi Maganunni roore keeraancho ikkinohu gede asse hedinota leellishanno. (Iyo. 10:1-3; 32:1, 2; 35:1, 2) Ikkollana gedensoonni isi umisi ammanaminoha ikkinota buuxisate coyiꞌrinohu mitu coy ‘qasannoha ikkinota’ maaxikkinni coyiꞌrino. (Iyo. 6:3, 26) Fooliishsho 31 Iyyoobi Maganu keeraancho ikkinota buuxisasira hasiꞌrinota kultanno. (Iyo. 31:35) Hige Iyyoobi qarru iillinosihu mayraatiro Maganu xaaddote dawaro qolannosi gede xaꞌmasi soꞌrote.

11. Iyyoobi ammanamasi daafira coyiꞌrinorira Yihowa dawaro qolinohu hiittoonniiti?

¹¹ Iyyoobi Yihowara hakko garinni coyiꞌrinohu isi ledo kaajjadu jaaloomi noosihuranna Yihowa taalo yoo yaannosita addaxxino daafira ikkinota anfoommo. Gedensoonni Yihowa hombobolattete giddo heeꞌre Iyyoobira dawaro qoli woyte qarru iillinosihu mayraatiro mitto mittonka coye tittire dikulino. Koffeenya kuꞌlinotera woy isonooto keeraancho assinoterano diboroorinosi. Hatteentenni Yihowa Iyyoobi annu beettosi rosiisannohu gede ikke rosiisinosi. Iso kaaꞌlate maltinoti tenneeti. Hakko daafira, Iyyoobi umosi heeshshi asse gariri afinori nookkita ammanino; gara garimmo laikkinni coyiꞌrinorirano maaro eino. (Iyo. 31:6; 40:4, 5; 42:1-6) Tini xagge hundi waro heeꞌrino manna kaaꞌlitinoha ikkara dandaannohu hiittoonniiti? Xaa yannara ninke kaaꞌlitankera dandiitannohu magarinniiti?

12. Iyyoobi xagge Israeelete manna kaaꞌlitinoha ikkara dandaannohu hiittoonniiti?

¹² Israeele kaaꞌlitinoha ikkara dandaanno gara. Israeele Iyyoobira iillinorinni roso afidhinoha ikkara dandaanno. Hanni Muse lawishsha laꞌno. Muse Israeelete daga massaganni noo yannara hexxo mudhannonna dadillanno gede assannoha lowo qarra cince saꞌꞌa hasiissinosi. Israeele duucha woyte, qarru iillannonsa yannara Yihowara gunguntanno; Muse kayinni kaaꞌlannosi gede Yihowa huucciꞌranno. (Ful. 16:6-8; Kir. 11:10-14; 14:1-4, 11; 16:41, 49; 17:5) Muse seejjinisi woyteno cinca hasiissinosi. Lawishshaho, Israeele Qaadesi dukkaꞌnite heedheenna Muse “hiddannaawe” coyiꞌrino; hattono Yihowara ayirrinye uyikkinni gatino; kuni ikkinohu Israeele halalla raataabbinohu 40^ki diro ikkara dandaanno. (Fa. 106:32, 33) Konninni kainohunni Yihowa Muse Hexxote Gobba eara difajjinosi. (Mar. 32:50-52) Tini seejjo Muse xissiissinositi egennantinote; ikkirono isi umosi heeshshi asse seejjo adhino. Iyyoobi xagge gedensoonni daggannota Israeelete ilama iillinonsa qarra cincite saꞌanno gede kaaꞌlitinonsaha ikkara dandaanno. Ammanantinori tenne xagge hiincite, giddonsata Yihowara ma garinni xawisa dandiitannoronna isi albaanni insaneeto keeraanote gede assite coyiꞌra hasiissannonsakkita rosa dandiitanno. Qoleno umonsa heeshshi assite Yihowa seejjo adhitanno gara rosa dandiitanno.

13. Iyyoobi xagge cincineemmo gede kaaꞌlitankera dandiitannohu hiittoonniiti? (Ibiraawoota 10:36)

¹³ Ninke kaaꞌlitankera dandiitanno gara. Kiristaana ikkinoommo daafira ninkerano cinca hasiissannonke. (Ibiraawoota 10:36 nabbawa.) Lawishshaho, ninke giddo mito dhibbu woy quwa saꞌino yaaddo waaddannonsaha, maatensa giddo qarru kalaqaminoha, shiidhinoha woy wolu buutote qarri amadinonsaha ikkara dandaanno. Mito woyte wolootu coydhannori woy assitannori iillinonkere cinca shota ikkitannonkekki gede assara dandaanno. (Law. 12:18) Ikkirino Iyyoobi maxaafinni Yihowa macciishshannonketa addaxxine, giddonketa isira kuꞌla dandiineemmota ronseemmo. (1 Yo. 5:14) Huuccattotenni giddonketa Yihowara hasaaphineemmo yannara mito woyte Iyyoobi gede ‘qasanno coye’ coyiꞌnummoro nafa Yihowa diboroorannonke. Hatteentenni Maganu cincate hasiissannonke geeshshi jawaantenna hayyo aannonke. (2 Du. 16:9; Yaq. 1:5) Qoleno isi Iyyoobi assinte gede jilbunni seejjankera dandaanno. Iyyoobi maxaafinni Yihowa Qaali, dirijjitesi woy gikki yitino jaallanke seejjo woy amaale uytannonke woyte cincineemmo gara ronseemmo. (Ibi. 12:5-7) Iyyoobi umosi heeshshi asse seejjo adhe horo afiꞌrinte gede, ninkeno biddi yaate maahoyye yineemmoha ikkiro horo afiꞌneemmo. (2 Qo. 13:11) Iyyoobi maxaafinni lowoha kaaꞌlanno coye ronsoommo! Hanni xa Iyyoobi xagge woloota kaaꞌlate horoonsiꞌra dandiineemmo gara laꞌno.

WOLOOTA KAAꞌLATE IYYOOBI MAXAAFA HOROONSIDHE

14. Soqqammeemmo woyte qarru iillannonkehu mayraatiro xawisa dandiineemmohu hiittoonniiti?

¹⁴ Soqqanshonniwa ‘Qarrammeemmohu mayraati?’ yee xaꞌmanno manchinni xaadde egennootto? Dawaro mayte qolittosi? Qullaawu Maxaafi Edenete kaashshu basera ikkinori daafira kulannore xawisoottosiha ikkara dandaanno. Busha ayyaana ikkinohu Sheexaanu umi minaanninna minaamara kapho coyiꞌre Maganoho finqilanno gede assinonsata kulte hanafoottoha ikkara dandaanno. (Kal. 3:1-6) Addaaminna Heewani finqilihu gedensaanni, alamete aana shettonna reyo batidhinota kuloottosiha ikkara dandaanno. (Rom. 5:12) Jeefoteno Sheexaanu kaphi xawo fulanno gedenna mannu albillitte galagale guuta ikkannota kulannohu danchu duduwi halaꞌlanno gede, Maganu ikkitanno geeshshi yanna uynota kuloottosiha ikkara dandaanno. (Aju. 21:3, 4) Mannu qarramannohu mayraati yitanno xaꞌmora kuni kaajja xawishshaati; qoleno tini dancha guma abbitara dandiitanno.

15. Qarru iillannonkehu mayraati yee xaꞌmanno mancho kaaꞌlate Iyyoobi maxaafa horoonsiꞌra dandiineemmohu hiittoonniiti? (Misillano lai.)

¹⁵ Mannaho, qarrammeemmohu mayraatiro xawisate Iyyoobi xaggeno horoonsiꞌra dandiineemmo. Tenne kaajja xaꞌmo xaꞌmino daafira iso galattesi hanafa dandaatto. Hakkiinni buutote qarri iillinosihu ammanamino manchi Iyyoobino togoo xaꞌmo xaꞌminota kulattosira dandaatto. Iyyoobi qarra abbinoehu Maganoho yee nafa hedino. (Iyo. 7:17-21) Hasaawissanni nootto manchi, mannu seedu diri albaanni isinte gede tenne xaꞌmo kaysinota afiro dhagge assiꞌrara dandaanno. Hakkiinni Iyyoobira qarru iillannosi gede assinohu Magano ikkikkinni Daawuloosi ikkinota hayyotenni xawisattosira dandaatto. Daawuloosi hatto assinohu, mannu Maganoho soqqamannohu umonsa baxanno daafiraati yee coyiꞌrinori halaale ikkinota leellisharaati. Qoleno togo yaa dandaatto: Iyyoobira qarru iillannosi gede assinohu Magano ikka hoogirono, isi ammanantinoti mannu ooso Sheexaanu kapho xawo fushshitannota addaxxannota leellishate qarru heeꞌrara fajjino. Jeefote Iyyoobi ammaname heeꞌrino daafira, Maganu maassiꞌrinosita xawisattosira dandaatto. Hakko daafira, qarra abbannohu Yihowa ikkinokkita buuxinse woloota sheshifachisha dandiineemmo.

16. Iyyoobi maxaafi qarru iillanni noosi mancho kaaꞌlasira dandaannota leellishanno woꞌnaalsha kuli.

¹⁶ Hanni Iyyoobi maxaafi Maariyo kaaꞌlinosi gara laꞌno. Mitto barra 2021 mitte rodoo silketenni farcidhanni no. Ise umo dowwoltu woyte Maariyora mitto qummeeshsha nabbabbe Maganu huuccattonke macciishshannota calla ikkikkinni albillittete hexxono uynonketa kultinosi. Ise hedosi coyiꞌrara xaꞌmitusita, Maariyo ise dowwoltusi woyte isonooto shaara hede maatesira mitore borreessanni noota kulinose. Isi, “Ani Magano ammanoommoho; kayinni techo soodo isi horo facci asse agurinoe yee hedoommo” yiino. Layinkimeeshsho dowwoltu woyte Iyyoobi qarrire kayisse hasaawissinosi. Maariyo woꞌma Iyyoobi maxaafa nabbawe guda hasiissannoe yee murciꞌrino. Hakko daafira rodoonke Qullaawa Borrota Haaro Alame Tiro linke sokkinosi. Tini may guma abbituyya? Maariyo Qullaawa Maxaafa xiinxallate sumuu yiino; qoleno isi daafira hedannohu baxillaanchu Magani daafira lede rosate quqquxamino.

17. Qullaawu ayyaaninni borreessamino Qaalisi giddo Iyyoobi maxaafi heeꞌranno gede assinotera Yihowa galata hasiissannohehu mayraati? (Iyo. 34:12)

¹⁷ Maganu Qaali qarru iillinonsareno ikko wole baalanka manna kaaꞌlate lowo wolqa noositi egennantinote. (Ibi. 4:12) Yihowa qullaawu ayyaaninni borreessamino Qaalisi giddo Iyyoobi xagge borreessinanni gede assinotera lowo geeshsha galanteemmosi! (Iyo. 19:23, 24) Iyyoobi maxaafi, ‘Maganu horonta busha coye assannokkita’ buuxisannonke. (Iyyoobi 34:12 nabbawi.) Qoleno kuni maxaafi, Maganu qarru heeꞌrara fajjinohu mayraatironna qarra cincine heeꞌra dandiineemmohu hiittoonniitiro rosiisannonke. Qarru iillinonsare sheshifachishateno kaaꞌlannonke. Aananno birxichira Iyyoobi maxaafi woloota danchu garinni amaalate kaaꞌlannonke gara ronseemmo.