Adhanna Adhamate Daafira Qullaawu Maxaafi Mayyaanno?

Qullaawu Maxaafi mayyaanno?

Maganu umi labbaahanna meyata kalaqihu gedensaanni, lamenka galtenna gashshaanna assino. Isi mittu manchinna mitte mancho adhamanno woyite adhamansa geeddaranna oosonsara dancha xinta ikkitara hasiꞌranno.—Kalaqama 1:27, 28; 2:18.

Maganu minaanninna minaama hagiirraamma ikkara hasiꞌranno. (Lawishsha 5:18) Isi Qullaawu Maxaafi giddo, adhamino manni galanno wodho hattono adhanna adhama seekkanno gede kaaꞌlanno biddishsha worino.

Konni birxichira

• Maganu adhamino mannira fushshino wodho woy seeri hiikkoyeti?

• Babbaxxe heeꞌranna adhama diigana?

• Adhamanke Maganu albaanni ayirrado ikkitanno gede higge affinota assiꞌra hasiissanno?

• Qullaawu Maxaafi giddo galtetenna gashshaannira uyinoonni loosinna qeechi maati?

• Maganu xaa yannara adhamino manni ooso ila hasiissannonsa yiino?

• Qullaawu Maxaafi maateꞌyara kaaꞌlannohu hiittoonniiti?

• Adhamino mannira kaaꞌlitanno qummeeshshuwa

Maganu adhamino mannira fushshino wodho woy seeri hiikkoyeti?

Maganu umonni manna kalaqi woyite, mittu mittete ledo adhamanno gede assino. (Kalaqama 2:24) Maganu mitte sayinse adhinara, labbaahu labbaahu ledo woy meyati meyate ledo adhantara, woy adhammikki mitteenni heeꞌnara difajjino. (1 Qorontoosi 6:9; 1 Teselonqe 4:3) Yesuusi rosaanosi Maganu adhanna adhamate daafira fushshinota umi wodho harunsitanno gede rosiisino.—Maarqoosi 10:6-8.

Adhanna adhama Maganu albaanni geedote sheemaateeti. Mittu manchinna mitte mancho adhamanno woyite, lamunku lubbote heeꞌri geeshsha mimmitoho ammanamenna mitteenni heeꞌrate qaale eanno. Maganu insa konne qaalensa agadhite heedhara hasiꞌranno.—Maarqoosi 10:9.

Babbaxxe heeꞌranna adhama diigana?

Minaanninna minaama mito woyite, lawishshaho lamunku giddo mittu mudditannota maatete hajo biddi assate haꞌranno woyite, shiima yanna baxxara dandaanno. Ikkollana Qullaawu Maxaafi adhamate giddo kalaqamino qarrinni babbaxxine heeꞌra danchate diyaanno. Hatteentenni, togoo qarri tuncu yiinonsa minaanninna minaama kalaqamino qarra tire araaramanno gede jawaachishanno.—1 Qorontoosi 7:10.

Qullaawa Borro, adhama diigate korkaata ikkitannoti soorro calla ikkitinota kultanno. (Maatewoosi 19:9) Hakko daafira, galtenna gashshaanni foorretenni ikkikkinni wolu korkaatinni babbaxxe heeꞌrannoha woy adhamansa diigannoha ikkiro, wolu manni ledo baxillu jaalooma amadara woy adhamara Qullaawu Maxaafi difajjanno.—Maatewoosi 5:32; 1 Qorontoosi 7:11.

Adhamanke Maganu albaanni ayirrado ikkitanno gede higge affinota assiꞌra hasiissanno?

Maganu, gashshaasine adhamate daafira fushshitino seera ayirrinsammora hasiꞌranno. (Tiito 3:1) Adhama higge affinota assiꞌra dandiinanni gobbara minaanninna minaama hatto assiꞌrannoha ikkiro, tini insa gashshaasine ayirrisannota leellishshanno; qoleno Maganu adhama geedote sheemaate ikka hasiissanno yee fushshino wodho ayirrisannota leellishshanno.a

Qullaawu Maxaafi giddo galtetenna gashshaannira uyinoonni loosinna qeechi maati?

• Lamunku assannore. Galtenna gashshaanni mimmito baxanna ayirrisa hasiissannonsa. (Efesooni Sokka 5:33) Kuꞌu kuꞌuyita siimu xaadooshshi hasatto baxillunni wonshanna baalante doogonni mimmitoho ammaname heeꞌra hasiissannonsa. (1 Qorontoosi 7:3; Ibiraawoota 13:4) Ooso ilinoha ikkiro, minaannino minaamano kaaꞌlame lossa hasiissannonsa.—Lawishsha 6:20.

  

  Qullaawu Maxaafi minaanni hiikkoye looso loosannoronna minaama hiikkoye looso loossannoro tittire dikulanno. Hakko daafira, maatensara malinore insanni hasaawe xaadisiꞌra dandaanno.

• Minaanni qeecha. Qullaawu Maxaafi “minaanni minaamara umo” ikkinota kulanno. (Efesooni Sokka 5:23) Minaanni umoho yaa, maatesi massaganno hattono minaamasiranna oosonsara kaaꞌlanno doorsha dooranno yaate.

  

  Qoleno maalaamittete, hagiirraamma ikkatenna ayyaanaamittete hasiisannonsare wonshate sharrama hasiissannosi. (1 Ximootewoosi 5:8) Minaamasi akattanna dandoose naadannota leellishate ise ledo kaaꞌlame loosanno; qoleno mitto coye muranno woyite ise yitannore seekke macciishshanno hattono hedose huwatate woꞌnaalanno. (Lawishsha 31:11, 28) Qullaawu Maxaafi minaanni qeechasi baxillunni wonsha hasiissannosita kulanno.—Qolasiyaasi Sokka 3:19.

• Minaama qeecha. Qullaawu Maxaafi “[Galte] minaannase ayirrisso” yaanno. (Efesooni Sokka 5:33) Maganu, minaama isi minaannisera uyino bayicho ayirrissanno woyite hagiidhanno.

  

  Ise qeechi minaannise maatete danchare dooranno gede kaaꞌlatenna umimmate silxaanesira kaaꞌlamate. (Kalaqama 2:18) Qullaawu Maxaafi, qeechase dancha gede wonshitanno minaama ayirrado ikkitinota kulanno.—Lawishsha 31:10.

Maganu xaa yannara adhamino manni ooso ila hasiissannonsa yiino?

Diyiino. Hundi waro, Maganu mite soqqamaasinesi ooso iltanno gede hajajino. (Kalaqama 1:28; 9:1) Ikkirono Kiristaanu hattee wodhonni galanno yaa diꞌꞌikkino. Yesuusi rosaanosi ooso iltanno gede horo dihajajino. Hundi rosaanosino adhamino manni ooso ila hasiissannonsa yite dirosiissino. Ooso ilannoronna teꞌee doodhannori minaannanna minaama umonsaati.

Qullaawu Maxaafi maateꞌyara kaaꞌlannohu hiittoonniiti?

Qullaawu Maxaafi adhanna adhama dancha safo aana xintantinota ikkitanno gede kaaꞌlanno biddishsha aanno. Qoleno, Qullaawu Maxaafi amaale qarra ikkannore hoolate woy qeelate kaaꞌlitanno.

Qullaawu Maxaafi biddishshi, minaanninna minaama . . .

• mimmitoho addu baxille leellishanno gede kaaꞌlanno.—1 Qorontoosi 13:4-7; Qolasiyaasi Sokka 3:14.

• mereeronsa noo badooshshe dandee heeꞌranno gede kaaꞌlanno.—1 Qorontoosi 10:24.

• mimmito dancha gede macciishshanno gede kaaꞌlannonsa.—Yaiqoobi 1:19.

• mimmito ayirrisanno gede kaaꞌlanno.—Rooma 12:10.

• gatona yaannore ikkanno gede kaaꞌlanno.—1 Pheexiroosi 4:8.

• mimmitoho ammanamanno gede kaaꞌlanno.—Maarqoosi 10:9.

• cincanno gede assanno.—Efesooni Sokka 4:2, 3.

• kaaꞌlame loosanno gede kaaꞌlannonsa.—Rosiisaancho 4:9.

• qaalensa agadhe heeꞌranno gede kaaꞌlanno.—Faarso Roore Faarso 8:7.