Ammaꞌnonna Yukireenete Kaino Ola—Qullaawu Maxaafi Isi Mayyaanno?

Konni woroonni, egennantinori ammaꞌnote murrootinna Yukireenete kaino oli daafira mayinoonniro wodanchi:

• “Ruusiyu Ortodokse Beetekiristaane murrichi Qeesichu Kiriili, Ruusiyu gashshooti assanni noore bushaho diyiino. . . . Beetekiristaanesi Yukireenete daafira kapho tareessitanno; Putiini qole Yukireene horrasi gara ikkitinota kulate insa tareessitanno totao horoonsiꞌranno.”—EUobserver, Badheessa 7, 2022.

• “Qeesichu Kiriili . . . Ruusiyu Yukireene horrasi cubbu ledo gaaramate ledo mitte ikkitino daafira bunshe diafidhino yiino.”—AP News, Badheessa 8, 2022.

• “Yukireenete Ortodoksete Beetekiristaane murrichi Metiropolitaani Epifaanesi Umihu, Sanyote barra mannisi ‘horritinonsata Ruusiyu olanto qasanno gede’ maassiꞌrino. . . . Qoleno Ruusiyu olamaasine shaa cubbo diꞌꞌikkitino yiino.”—Jerusaalem Poost, Badheessa 16, 2022.

• “Ninke [Yukireenete Beetekiristaannatenna Ammaꞌnote Uurrinshuwa Amaale Mini (UCCRO)] Yukireenete Olantoranna gobbanke daafira gaarantannorira baalaho kaaꞌlineemmo, insa Yukireene diinu anganni gatisate sharrantanno sharro maassiꞌneemmo, hattono insa daafira huuccatto assineemmo.”—UCCROa Lallawa, Ammajje 24, 2022.

Kuni coyi atera ma lawannohe? Yesuusi Kiristoosi ammannoommo yitanno ammaꞌno mannansa olamanno gede jawaachisha hasiissannonsa? Qullaawu Maxaafi isi tenne daafira mayyaanno?

Ammaꞌno olu yannara assitinore kultanno xagge

Xagge leellishshanno garinni, ammaꞌnote murrooti keereho sharrantannore labburono, duucha woyite olaho haꞌra bunshe afidhinokkita, dancha ikkitinota wole agurina hasiissannota ikkitinota coyidhanno. Yihowa Farciꞌraasine lowo diro tini ammaꞌnote bunshe xawo fultanno gede assitanni keeshshitino. Hanni borronke giddo kulloonniha mito lawishsha laꞌno.

• “Masqalu Ola—‘Dadillissannota Haaqeete Halcho’” yaanno birxichi Roomu Kaatolike Beetekiristaane, Maganonna Kiristoosi kulle lowo manna raafo ganni yannara olaho kaaꞌlitino gara xawisanno.

• “Kaatolikete Beetekiristaane Afirikaho” yaanno birxichi, ammaꞌno gaꞌrete mereero kaino ola wole agurina mitte gaꞌre coꞌo assine gudate assinoonnire hooltukki gattino gara kulanno.

• “Xaꞌmantannoti Ammaꞌnote?,” “Ammaꞌno Olu Giddo Eꞌe Assitinore” hattono “Ammaꞌno Mittu Widira Kaaꞌlitino” yitanno birxichuwa Kaatolikete, Ortodoksetenna Pirotestaantete qeesooti olu yannara lamunku widira kaaꞌlitino gara xawissanno.

Kiristaanu ammaꞌno olaho kaaꞌla hasiissannose?

Yesuusi togo yee rosiisino: “Olliichokki umikki gede assite baxi!” (Maatewoosi 22:39) “Baarigaaraꞌne baxxe.”—Maatewoosi 5:44-47.

Yesuusi togo yiino: “Ane Gashshooti tenne gobbaha diꞌꞌikkino. Gashshootiꞌya tenne gobbaha ikkoommero, olantoꞌya gaarante Ayihudete anganni gatissannoe.” (Yohaannisi 18:36) “Bise fushshidhannori bisetenni reyitanno.”—Maatewoosi 26:47-52.

Hanni tenne hedi: Kiristaanu Yesuusa gatisate nafa olamannokkiha ikkiro, wolu coyira olama hasiissannonsa? Hundi Kiristaani Yesuusi lawishshanna roso ammaname harunsino gara afate, “Olunna Kiristaanu Ammaꞌno Sumuu Yitanno?” yaanno birxicho nabbawi.

Olaho kaaꞌlantanno ammaꞌno albillitte hiikkitanno?

Yesuusa ammannoommoreeti yitanni heedhenni isi rosiisino rosi garinni heedhannokki ammaꞌno Magano hagiirsiissannokkita Qullaawu Maxaafi xawise kulanno.—Maatewoosi 7:21-23; Tiito 1:16.

• Ajuujate maxaafi, Maganu “baattote aana shinoonni manni baalu mundee” daafira togoo ammaꞌno xaꞌmannota kulanno. (Yohaannisi Ajuuja 18:21, 24) Mayira? Tenne afate, “Bayira Baabiloone Maati?” yaanno birxicho lai.

• Yesuusi busha laalo laaltannota busha haqqicho ‘murre giirate tunganninte’ gede, Magano hagiirsiissannokki ammaꞌno baalanti bushu loosinsanni kainohunni baꞌannota rosiisino. (Maatewoosi 7:15-20) Kuni ikkannohu hiittoonniitiro afate, “Kaphu Ammaꞌno Baꞌanno Yanna Gambissino!” yaanno birxicho nabbawi.

Fotote Buicho, guranni qiniiti widira: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images