Alame Woꞌmate Massaara Qodhitinori Loossanno Jaddo—Qullaawu Maxaafi Mayyaanno?

Maaja 2022 giddo, alame woꞌmate massaara qodhitinori lowo manna shitino:

• “Jaappaanete egennaminoha poletiku mancho [albiha Xaphoomu Ministericha Shinzho Aabe] shineenna gobba woꞌma leephi yitanni no; alame woꞌmano baasa massino; hakko iso Jaappaanete hakkeya jaddo batidhannokkitanna tenne gobbara massaara qodhate daafira kotottote seeri noota hendiro togoo jaddo kalaqamase manna baasa jajjarsitino.”—Maaja 10, 2022, Ze Jaapaani Taymisi.

• “Denimaarkete gobbara mittu massaara qodhino manchi Koppenihageni katamira dikkote giddo sase manna sheenna gobba woꞌma tenqe yitanni no.”—Maaja 4, 2022, Royitersi.

• “Wodiidi Afirika: Soweeto katamira massaara qodhitino mannooti boohaarshu mine xiyyiite gante 15 manna shitino.”—Maaja 10, 2022, Ze Gaardiyani.

• “Ameerikaho Maaja 4nni ayirrinsoonni ayyaani woggara 220 saꞌꞌanno manna massaara tokkonse shinoonni.”—Maaja 5, 2022, CBS News.

Togoo jaddonna finqille heedhannokki yanna dagga ikka? Qullaawu Maxaafi mayyaanno?

Jaddo Heedhannokki Yanna Dagganno

Qullaawu Maxaafi giddo, tenne heeꞌnoommo yanna “goofimarchu barra” yinoonni; yannankera mannu aaraawannoha, godowa kaajjadonna haxawarra ikkino. (2 Ximootewoosi 3:1, 3) Tini mannu masillaawanni heeꞌranno gede assitino. (Luqaasi 21:11) Ikkollana, Qullaawu Maxaafi, jaddo heedhannokki yanna daggannota kulanno; qoleno, “[Mannu] yaaddonna qarru nookkiha heeꞌranno; mininsa keerunnihanna hobbaatenniha ikkanno” yaanno. (Isayaasi 32:18) Ikkina jaddo baꞌannohu hiittoonniiti?

Maganu busha mannano olu bagadono coꞌo asse hunanno.

• “Bushuulle kayinni Kaaliiqi baattote aaninni haaꞌre hoolanno.”—Lawishsha 2:22.

• “[Maganu] baattote qacce geeshsha nooha ola uurrisanno; digaana hiiqqanno; amaxxo cancananno; wonqono giire hunanno.”—Faarso 46:9.

Maganu jaddote kaima ikkinore hunate, mannu keere baxannoha ikkanno gede rosiisanno.

• “Qullaawu Ilaali aana gawajjannori diheeꞌranno; wayi baaraho woꞌmannonte gede, Kaaliiqa egennino mannino baatto woꞌmanno.”—Isayaasi 11:9.

• Xaa yannara nafa, Maganu alamete doyichora mannu jaddotewiinni xeertiꞌranno gedenna olu massaara qodhannokki gede rosiisanni no; Maganu rosiisino manni, “bisensa heellakkote, urdensa haantote [soorriꞌrino].”—Mikiyaasi 4:3.

Qullaawu Maxaafi waajjishannori heeꞌrannokki alame daggannota kulanno; tenne daafira ledde afate,“Beꞌe Yinummokki Heeꞌneemmo Alame Dagga Ikka?” yaanno birxicho nabbawi.

Jaddo woꞌmunni woꞌma baꞌanno yanna daafira ledde afate, “Uulla Woꞌma Keere Afidhanno Yanna Mule No!” yaanno birxicho nabbawi.