Poletiku Mannooti Armagedooni Daaraati Yitanni No—Qullaawu Maxaafi Mayyaanno?

Birra 10, 2022 Sanyote soodo Ruusiyu mangiste Yukireenete gobbara noota addi addi katamma misayiletenni gantino; konne assitinohu Yukireenete mangiste Kireemiyanna Ruusiya xaadisannoha jawa buusa bombunni gante diiggino daafiraati. Kuni baalu ikkinohu poletiku mannooti muli yannara Armagedooni daanno yaa hanaffuhunni shiima yanna gedensaanniiti.

• “[Ameeriku Pirezidaantichi Jooni] Kenedii yannara Kubaho misayile duunne waajjishiinshi yanna kawa, xaa gede Armagedooni daanno yinanni gede assannori kalaqame diegennino. . . . Niyukileerete massaara horoonsiꞌneenna Armagedooni oli kaikkinni gatanno gari nooha dilawaae.”—Ameeriku Pirezidaantichi Joo Baydeni, Birra 6, 2022.

• “Anino muli yannara Armagedooni oli kaꞌꞌanno yee hedeemmo; gobba woꞌmate goofo dagganno.”—Yukireenete Pirezidaantichi Volodimiiri Zeleniskii, niyukileerete massaara horoonsiꞌra abbitanno gawajjo daafira xaꞌmineenna coyiꞌrinore, BBC News, Birra 8, 2022.

Niyukileerete massaara horoonsiꞌra Armagedooni oli kaꞌꞌanno gede assitanno? Qullaawu Maxaafi tenne daafira mayyaanno?

Niyukileerete Massaari Armagedooni Ola Kayisanno?

Dikayisanno. “Armagedooni” yinanni qaali Qullaawu Maxaafi giddo Yohaannisi Ajuuja 16:16 calla no. Armagedooni dagate mereero kaꞌꞌanno ola ikkikkinni Maganunna “gosa baalate mootoolla” mereero kaꞌꞌanno olaati. (Yohaannisi Ajuuja 16:14) Maganu Armagedooni ola horoonsiꞌre mannu gashshoote baala hunanno.—Daanieeli 2:44.

Armagedooni oli baattote aana mayi ikkanno gede assannoro ledde afate, Armagedooni Oli Maati? yaanno birxicho nabbawi.

Niyukileerete oli baattonna baattote aana noore hunanno?

Dihunanno. Mannu ooso albillitte niyukileerete massaara horoonsidhara dandiitannoha ikkirono, Maganu baatto huntara kayinni wore dilaꞌꞌanno. Qullaawu Maxaafi togo yaanno:

• “Kalqe [baatto] kayinni noowa heedhanno.”—Rosiisaancho 1:4.

• “Keeraano baatto ragidhanno; ise aanano hegerera heedhanno.”—Faarso 37:29.

Ikkollana, Qullaawu Maxaafi masaalonna yannankera ikkanni noori muli yannara mannu ooso heeshsho gudise soorrannori daannota leellishanno. (Maatewoosi 24:3-7; 2 Ximootewoosi 3:1-5) Qullaawu Maxaafi albillittete heeshsho daafira mayyaannoro afate, Qullaawa Maxaafa woxe baaxxittokkinni ninke ledo xiinxalli.