Halaalu Isi Yannankerano Hasiisanno?

Yannankera halaalenna kapho bada roore qarra ikkitinoha lawannohe? Xaa yannara mannu halaalenna adda ikkinore agure uminsa hedonna wodaninsata ammananno. Alamete doyichora batinyu manni ‘Halaaleho yinanniri dino’ yee ammanannoha ikkino.

Togoo lao hige haaro diꞌꞌikkitino. Mitu 2,000 diri albaanni, Roomu Gashshaanchi Phanxiyosi Philaaxoosi Yesuusa ashshiishshanni “Halaalu maati?” yee xaꞌmino. (Yohaannisi 18:38) Philaaxoosi Yesuusi xaꞌmosira dawaro qolara agadhinokkiha ikkirono, xaꞌmosi dawaro afiꞌra hasiissannote. Qullaawu Maxaafi tenne xaꞌmora ammansiissanno dawaro qolanno; qolanno dawarono tenne mannu addanna xara bada hooge gurchaawino alamera halaale afatto gede kaaꞌlitahera dandiitanno.

Isi halaalu umisi nooyya?

Ee, no. Qullaawu Maxaafi “halaale” yaanno qaale adda ikkinorenna amanyootunni gara ikkinore kulate horoonsiꞌranno. Qoleno Magano Yihowaa “Halaalu Magano” yinoonni daafira, Qullaawu Maxaafi kulanno garinni halaalu Buicho Yihowaati. (Faarso 31:5) Qullaawu Maxaafi Maganuwiinni dayino halaale kulanno; qoleno tenne gurchaabbino alame aana massagannonke daafira, halaale xawaabbu ledo heewisiinsoonni.—Faarso 43:3; Yohaannisi 17:17.

Halaale afa dandaattohu hiittoonniiti?

Maganu Qullaawu Maxaafi kulanno halaale ille ximbiiꞌline ammannammora dihasiꞌranno. Hatteentenni, wodananke addaxxa agurre hedate dandoonke horoonsiꞌne xiinxallinammora hasiꞌranno. (Roomu Sokka 12:1) Yihowa iso seekkine anfammoranna ‘woꞌma hedonkenni’ banxammosira hasiꞌranno; qoleno Qullaawu Maxaafi kulannonkeri halaale ikkinota buuxiꞌnammora hasiꞌranno.—Maatewoosi 22:37, 38; Soqqamaasinete Looso 17:11.

Kaphu dayihu mamiinniitiyya?

Qullaawu Maxaafi kulanno garinni, umo kapho coyiꞌra hanafinohu Maganu diini Sheexaane Daawuloosiiti; Qullaawu Maxaafi isi “kaphu anna” ikkinota kulanno. (Yohaannisi 8:44) Isi umi mannira Maganu daafira kapho coyiꞌrino. (Kalaqama 3:1-6, 13, 17-19; 5:5) Sheexaanu hakkuyinku, kapho tuqisanna Maganu halaale diwa diagurino.—Yohaannisi Ajuuja 12:9.

Xaa yannara kaphu togo batiꞌrinohu mayiraati?

Tenne “goofimarchu barra” yinanni yannara, Sheexaanu albinni roore lowo manna doganninna soꞌrisiisanni no. Batinyu manni manna doge mitore afiꞌrate yee kapho coyiꞌranno. (2 Ximootewoosi 3:1, 13) Yannankera batinye ammaꞌno giddono kaphu halaꞌlino. Qullaawu Maxaafi giddo balanxe masaalloonninte gede, mannootu “halchitanno coye rosiissannonsare gamba assidhanno. Kunnira, halaale agurte, maatto macciishsha baxxanno.”—2 Ximootewoosi 4:3, 4.

Halaalu hasiisannohu mayiraati?

Halaalu mannu mimmito ammanannonna addaxxanno gede assanno. Ammanama hoogguro jaaloomunna dagoomu diigamanno. Qullaawu Maxaafi, Maganu halaalunni magansiꞌnammosira hasiꞌrannota kulanno. Togo yaanno: “Magansidhannosirino Ayyaanunninna halaalunni magansidhasira hasiisanno.” (Yohaannisi 4:24) Qullaawu Maxaafi halaali, ammaꞌno rosiissanno kapho badde afatto gedenna togoo kaphinni dogamattokki gede kaaꞌlannohe gara afate, “Magano Baxa Qarra Ikkitanno Gede Assino Kapho” yaanno umi hunda aante aantete fultino birxichuwa nabbawi.

Maganu halaale anfammora hasiꞌrannohu mayiraati?

Maganu gato afiꞌrattora hasiꞌranno; tennera kayinni halaale afa hasiissannohe. (1 Ximootewoosi 2:4) Maganu kuni danchaho kuni bushaho yee fushshino seera rosse hakko seerinni galattoha ikkiro, isira muli jaala ikkatto. (Faarso 15:1, 2) Mannu halaale afara yee Maganu Yesuusa uullara soyino. Maganu Yesuusi rosiisino roso baala macciishshinammora hasiꞌranno.—Maatewoosi 17:5; Yohaannisi 18:37.

Maganu kapho baala coꞌo asse hunanno yanna dagga ikka

Ee dagganno. Maganu mannu umisi qiniitira yee wole dogannota effire giwanno. Isi kaphonna sarxe coyidhanni heeꞌra doodhitinore baala baattote aaninni hunara qaale eino. (Faarso 5:6) Isi hatto assanno woyite, “Halaalu kayinni hegerera heeꞌranno” yitanno hexxono woꞌmitanno gede assanno.—Lawishsha 12:19.