Callimma Amaddino Manni Lexxanni No—Qullaawu Maxaafi Yaannore

Muli yannara, addi addi gobbara assinoonni xiinxalloa leellishshanno garinni, shoolu manni giddo mittu callimma amaddinoho.

• “Aye gobbarano heeꞌranno manchi, dirisi ikki geeshshihano ikkiro callataranna seeda yanna boorrasara dandaanno.”​—Chido Pemba, Alamennite Fayyimmate Uurrinsha Giddo Dagoomittete Aante Komishiinera waaxote qineessaancho.

Duuchu manni, callimma amaddannohu geerraho woy calla heeꞌranno mannaatilla yee hedanno; ikkollana wedellootu, dancha fayyimma noonsari, heeshsho qiniitinonsarinna galte kalaqidhinorino callattara dandiitanno. Mannu ledo xaada hooganna callimma manninatenna surrete fayyimma baasa gawajjitara dandiitanno.

• Ameerikaho dare xagisanno ogeessi Dokiter Vivek Murzii togo yiino: “Callimma mulla hisanyoote hooga calla diꞌꞌikkitino.” Ledeno togo yiino: “Mannu ledo xaadikki heeꞌranno manniti reyate kaayyonsa, barrunni 15 sijaara aganno mannite ledo taalote.”

Qullaawu Maxaafi kulannore

Kalaqaanchinke mannuwiinni baxxine heeꞌnammora dihasiꞌranno. Hundinni kayise Maganu hedo, mannu wolootu ledo danchanna hagiirsiissanno aante kalaqiꞌre heeꞌranno gedeeti.

• Qullaawu Maxaafi biddishsha: “Kaaliiqi Maganu, ‘Mannu callisi heeꞌra dancha diꞌꞌikkitino’ . . . yii.”​—Kalaqama 2:18.

Maganu isi ledo jaalooma kalaqiꞌnammora hasiꞌranno. Ninke isiwa shiqqi yaate sharrammummoro isino ninkewa shiqqi yaara qaale eino.​—Yaiqoobi 4:8.

• Qullaawu Maxaafi biddishsha: “Ayyaanaamittete coye goodhinori hagiirraammaho, gordu Gashshooti insahona.”​—Maatewoosi 5:3.

Maganu wolootu ledo gamba yine magansiꞌnammosira hasiꞌranno. Hatto assanke, roore hagiirraamma ikkineemmo gede assitannonke.

• Qullaawu Maxaafi biddishsha: “Baxille afiꞌratenna dancha looso loosate mimmitonke kakkayinso. . . . Ronsoommoha xaadonke agurroonke. . . . Mimmitonke albinni roorsine jawaachinsho.”​—Ibiraawoota 10:24, 25.

Callimma gargadha hasiissannota ikkitinohu mayiraatiro ledde afate, “Callimma—Xaadooshshu Buussa Woꞌmitino Alamera” yaanno birxicho lai.