Dagoomittete Miidiyi Qaaqqoꞌne Gawajjanni Nookka?—⁠Annahonna Amate Kaaꞌlitannota Qullaawu Maxaafi Amaale

“Wedellootu aana leeltannoti surrete xisso horo yaachishshannota ikkitino; tennera kora ikkinohu qaru coyi giddo mittu dagoomittete miidiyaati.”—Dr. Viivek Murtii, Ameerikunnihu fayyimmate ogeessi, Niwu Yoorki Taymis, Ella 17, 2024.

Annuwunna amuuwu dagoomittete miidiyi oosonsa gawajjannota agara dandiitannohu hiittoonniiti? Qullaawu Maxaafi tennera kaaꞌlitanno amaale kulanno.

Annunna ama assa dandiitannore

Konni woroonni nooha Qullaawu Maxaafi biddishsha wodanchi.

“Egennaamu . . . layiꞌranni qaafanno.”—Lawishsha 14:15.

Dagoomittete miidiyi lowo qarra abbara dandaanno daafira, ‘Yanna abbitinoreetina, hiissine hoollanni?’ yitine heddinoonte. Oosoꞌne dagoomittete miidiya horoonsidhanno gede fajjitinara albaanni, insa horoonsidhara fajjitinoonninsa yanna ayirrisate, dancha jaalooma kalaqiꞌratenna maaeelu coyiwiinni xeertiꞌrate caakko dadhitinore ikkansa buuxxe.

• Ledde afate, “Qaaqqiꞌya Dagoomittete Miidiya Horoonsiꞌra Hasiissannosi?” yaannohanna “Qacale Oosoꞌne Dagoomittete Miidiya Qorophite Horoonsidhanno Gede Qajeelsa” yaanno birxicho nabbawi.

“Afidhinoonni yanna baalate giddo dancha looso loosse.”—Efesooni Sokka 5:16.

Qaaqqiꞌne dagoomittete miidiya horoonsiꞌrara fajjitinanniha ikkiro, ma garinni horoonsiꞌra hasiissannosiro kulanno seera worre; qoleno kuni seeri gawajjotenni agarannosi gara xawissine kullesi. Qaaqqiꞌne akati soorramanni nooronna teꞌee ille wortine laꞌe; akatisi soorramasi, dagoomittete miidiya horoonsiꞌranno yanna ajisha hasiissannoꞌneta leellishshannota ikkitara dandiitanno.

• Qaaqqiꞌne dagoomittete miidiya horoonsiꞌra ajisha hasiissannosihu mayiraatiro huwatanno gede kaaꞌlate, Dagoomittete Webisayite Horoonsiꞌratto Woyite Xiinxalla Ikki yitannota waajju saleedi viidiyo horoonsidhe.

Ledde rosi

Qullaawu Maxaafi, heeꞌnoommoti “qarrissanno yanna” ikkitinota kulanno. (2 Ximootewoosi 3:1-5) Ikkollana, qarra dandiine saꞌneemmo gede kaaꞌlitannota kaajja amaaleno kulanno. Konni birxichira qacale ooso surre fayyimma daafira annahonna amate hattono oosonsara kaaꞌlitannota Qullaawu Maxaafi aana xintantinota 20 saꞌanno birxichuwa afiꞌra dandiinanni.