Uulla Keere Afidhannohu Hiittoonniiti?

Qullaawu Maxaafi mayyaanno?

Uullate aana keeru daannohu mannu sharronni ikkikkinni, Maganu Mangiste widoonniiti; konni iimi gashshooti Moote Kiristoosi Yesuusaati. Qullaawu Maxaafi tenne hagiirsiissanno hexxo daafira mayyaannoro wodanchi.

1. Maganu ‘baattote aana isi hagiidhannonsa baalira keeru iillanno’ gede assate, “baattote qacce geeshsha nooha ola uurrisanno.”—Faarso 46:9; Luqaasi 2:14.

2. Maganu Mangiste iima heedhe uulla woꞌma gashshitanno. (Daanieeli 7:14) Tini Mangiste alame woꞌma gashshitannota ikkitino daafira, mitte gosa woy mitte gobba bade baxate hedo huntanno; lowo gaancera kaima ikkitannoti togoo hedooti.

3. Maganu Mangiste Gashshaanchi Yesuusi ‘Keeru Roorrichaati’; hakko daafira isi “gashshootisira hegere keeri [woꞌmanno]” gede assanno.—Isayaasi 9:6, 7.

4. Olamanni heeꞌrate murciꞌrino manni Maganu gashshooti giddo heeꞌrara difajjinanni; korkaatuno Maganu “bunshenna beebba assa baxxannore . . . giwanno.”—Faarso 11:5; Lawishsha 2:22.

5. Maganu gashshootisi giddo heedhannorira keerunni heeꞌnanni gara rosiisanno. Qullaawu Maxaafi togoo rosi abbanno guma kulanni togo yaanno: “Bisensa maarashaho, urdensa haantote soorritanno. Gashshootu gashshootu aana ola dikayisanno; hakkunni gedensaanni olaho qixxaawannohu diheeꞌranno.”—Isayaasi 2:3, 4.

Alame woꞌmate noori lowo miliyoone ikkitannori Yihowa Farciꞌraasine xaanni keerunni heeꞌra dandiinanni gara Maganuwiinni rossanni no. Addi addi gaꞌrenni gamba yinoommorenna 240 gobbara heeꞌneemmore ikkinummorono, olunna gaancete giddora dieꞌneemmo.