Mundee Adhate Daafira Maganu Qaali Mayyaanno?

Qullaawu Maxaafi mayyaanno?

Qullaawu Maxaafi mundee ita hasiissannonkekkita kulanno. Hakko daafira, woꞌma mundeeno ikko qara qara mundeete beehache mundeete nigi widoonnino ikko wolu aye garinni adha dihasiissannonke. Hanni aante noo qummeeshshuwa laꞌno:

• Kalaqama 9:4. Maganu Baote Wayi gedensaanni Nohinna maatesi saadate maala ittara fajjinonsa; ikkirono, mundee ittannokki gede hajajinonsa. Maganu Nohi, “Mundeete giddo lubbo [“heeshsho,” Haaro Alame Tiro] noo daafira, mundee giddo noo maala ittinoonte” yiinosi. Mannu baalunku Nohi sircho ikkino daafira, manchu sirchi woꞌmunku tenne hajajo agadha hasiissannonsa.

• Leewaawoota 17:14. “Kalaqamu baalu lubbo mundeete giddo no. Kunni daafira, Israeeloota, ‘Mayi kalaqami maalano mundeete ledo ittinoonte; itannohu baalu manniꞌya ledo dikiiramanno’ yoommonsa.” Maganu, lubbo woy heeshsho mundeete giddo nootanna tinino isita ikkitinota coyiꞌrino. Kuni seeri Israeelete dagara calla uyinoonniha ikkirono, Maganu mundee intannita mageeshshi geeshsha giwannoro buuxisanno.

• Soqqamaasinete Looso 15:20. ‘Mundee agginoonte.’ Maganu Kiristaanaho uyino hajajo Nohira uyinote ledo mittete. Hundi Kiristaani mundee itannokkita, wole agurina xaginaateho nafa horoonsiꞌrannokkita xagge leellishshanno.

Maganu mundeetewiinni xeertiꞌneemmo gede hajajinohu mayiraati?

Mundee adha fayyimma gawajjitannota buuxissannoti sayinsete taje no. Ikkollana, Maganu mundeetewiinni xeertiꞌneemmo gede hajajinohu qaru korkaati, mundee riqibbannori yaano heeshsho isi albaanni qullaawa ikkitino daafiraati.—Leewaawoota 17:11; Qolasiyaasi Sokka 1:20.