Olaho Hadhinannikkihu Mayiraati?
Yihowa Farciꞌraasine olaho gaaddannokki korkaati aane nooho:
Maganoho hajajantanno daafira. Qullaawu Maxaafi Maganu manni “bisensa maarashaho” soorrannotanna ‘olaho qixxaawannokkita’ kulanno.—Isayaasi 2:4.
Yesuusira hajajantanno daafira. Yesuusi soqqamaasincho Pheexiroosi togo yiino: “Bise fushshidhannori bisetenni reyitannona bisekki kou giddora qoli!” (Maatewoosi 26:52) Konni garinni Yesuusi iso harunsitannori olaho fultannokkita buuxisino.
Yesuusa harunsitannori ‘tenne gobbare (alamere) ikkitinokkita’ leellishate poletiku coyiwiinni xeertidhanno. (Yohaannisi 17:16) Insa gobbate olanto assitannore gibbe difinqiltanno woy olantote giddo eꞌe soqqama hasidhannore hoolate diwoꞌnaaltanno.
Manna baxxanno daafira. Yesuusi rosaanosi “Kiꞌne kiꞌneneewa baxamme!” yee hajajino. (Yohaannisi 13:34, 35) Konni daafira alamete deerrinni mitto ikkinoha roduuwu maamara kalaqiꞌra dandiitanno; konni maamari giddo mittuno rodoosi qasate olaho difulanno.—1 Yohaannisi 3:10-12.
Hundi Kiristaani faale hadhanno daafira. Insayikilopiidiya ofi Riliijini endi Woori yinanni maxaafi togo yaanno: “Hunditi Yesuusi rosaano olamanna olantote giddo eꞌꞌe soqqama gibbino”; korkaatuno togoo assooti “Yesuusi uyinohu baxillu seerinna diinnansa baxxanno gede uyinonsa hajajo ledo sumuu yaannokkita” huwattino. Qoleno Jarmanete gobbahu ammaꞌnote fullahaanchi Piteri Miniholti hundi Kiristaanire kulanni, “Hakkawaro Kiristaana ikkine heeꞌnenni olamaancho ikka xaadannokki coyeeti” yiino.
Dagooma kaaꞌlineemmo gara
Yihowa Farciꞌraasine dagooma lowore kaaꞌlitanno; qoleno heedhanno gobba hobbaate hunannore mittoreno diassitanno. Aante noote Qullaawu Maxaafi hajajo garinni, gashshoote ayirrinseemmo:
“Mannu baalu aleenni noo gashshaanora hajajama hasiissanno.”—Roomu Sokka 13:1.
“Qeesaariha Qeesaarira, Maganunniha Maganoho uuyye!”—Maatewoosi 22:21.
Konni daafira, gobbate seera ayirrinseemmo, giwire baanteemmo, hattono gashshootu mannu keere eꞌꞌe fulanno gede assate sharramanno sharrora buusammeemmo.