Mannu Reyanno Woyite Hiikkanno?

Qullaawu Maxaafi mayyaanno?

Qullaawu Maxaafi togo yaanno: “Lubbotenni noori reyitannota affino; reyitinori kayinni, mittoreno diaffanno.” (Rosiisaancho 9:5; Faarso 146:4) Konni daafira, reyineemmo woyite heeshsho nookkire ikkineemmo. Reyino manchi heda, loosa, dadilla woy hagiidha didandaanno.

“Galagalte bushsha higatto”

Maganu umi mancho Addaami coyishiishi yannara, mannu reyanno woyite hiikkannoro kulino. Addaami hajajama giwino daafira Maganu iso, “Ati bushshahona, galagalte bushsha higatto” yiinosi. (Kalaqama 3:19) Maganu Addaami “bushshunni” kalaqara albaanni, Addaami wolewa mittowano dino. (Kalaqama 2:7) Hakko daafira, Addaami reyi woyite, bushsha higino; yaano heeshsho nookkiha ikkino.

Xaa yannara reyanno mannino hattooti. Qullaawu Maxaafi mannunna saadate daafira kulanni togo yaanno: “Mannuno saadano . . . bushshunni kalaqantinohura galagalte bushsha higganno.”—Rosiisaancho 3:19, 20.

Reyo baalunku coyira goofimarchoho?

Qullaawu Maxaafi duucha woyite reyo goxichu gede asse kulanno. (Faarso 13:3; Yohaannisi 11:11-14; Soqqamaasinete Looso 7:60) Natare goxino manchi qooxeessaho ikkannore diafanno. Hatteente gede, reyino manchi mittoreno diafanno. Ikkirono, Maganu reyitinore goxxinowiinni kayisanni noohu gede asse kayise heeshsho aansara dandaannota Qullaawu Maxaafi kulanno. (Iyyoobi 14:13-15) Maganu reyotenni kayisanno mannira, reyo baalunku coyira goofimarcho diꞌꞌikkitino.