Hanqite Fuu Yitino Qeesootira Gaꞌlabbi Yitino Dawaro Qoltu
Mitte hige, Armeeniyaho, Arteri yinannihu woradu aliidi laꞌꞌaanchi mitte Yihowa Farciꞌraasine songo towaatanni no. Kuni rodii hatti songo borrote gaare horoonsidhe gudumaaleho sabbaka hanaffinokkita afi. Songo konni garinni soqqantanno gede jawaachishate, Arterinna minaamasi Aana, Jireeri yinannihu wolu Yihowa Farciꞌraasinchi ledo mittu shiimu katamira borrote gaare uurrissu. Insa gaare uurrissinohu lowo manni lekkatenni haꞌrannowaati.
Doogo saꞌꞌanno manni bayichonko hagiidhe borro adha hanafi. Ikkollana, ninke gibbannorino hakkawoyintenni tenne affu. Lamu qeesooti gaarenniwa kaꞌe daggu; insa giddo mittu gaare lekkatenni gane tugi. Hakkiinni kuni qeesichi Arterira baqqaalla qawaadeenna maxanxaresi uulla ubbu. Arteri, Aananna Jireeri qeesoota hayi yitu; insa kayinni dimacciishshitino. Lamunku qeesooti gaare kakkaddu, borrono uulla billaallissu. Qeesootu roduuwa xontuhunna waajjishiishshuhu gedensaanni, agurte hadhu.
Arteri, Aananna Jireeri qeesootu assitinore kuꞌlate polisete xaawa martu. Insa ikkinore kultuhu gedensaanni, polisootahonna hakko loossannorira wolootaho haransite Qullaawu Maxaafire kultunsa. Hakkiinni sasenka polisete hajajaanchi biiro massininsa. Isi umo mayi ikkinoro calla afa hasiꞌrino. Ikkollana, polisete hajajaanchi Arteri forsanna jawaata ikke heeꞌrenni qawaandannasi sammi yee agurinota afiti, wolere agure Yihowa Farciꞌraasine ammana daafira xaꞌma hanafi. Konni garinni insa ledo shoole saate woꞌma hasaawino! Polisichu macciishshinori lowo geeshsha dhagge ikkinosi daafira togo yiino: “Ammanate yaa tenneeti! Eꞌniro kiꞌnewa eate!”
Arterinna Aana
Layinki barra, Arteri xaano gudumaaleho sabbakanni heeꞌreenna, beꞌro ikkinore lainohu mittu jawu manchi isiwa kae dayi. Kuni manchi, Arteri cincino daafiranna rabbisiꞌrinokki daafira galatisi. Qoleno beꞌro lainori qeesootaho noosi ayirrinyi baalu baꞌꞌanno gede assinosita coyiꞌrino.
Hakko barra hawarro polisete hajajaanchi Arteri wirro polisete xaawa daanno gede woshshi. Isi xaano qeesootu assitinore agure, Qullaawu Maxaafi daafira wole xaꞌmuwa xaꞌmisi. Wolu lamu polisootino hasaawa macciishshitino.
Aane noo barra, Arteri wirro polisete hajajaanchiwa mare Qullaawu Maxaafi aana xintantino viidiyubbanke leellishisi. Polisichu wolootu polisootino dagge viidiyo laꞌanno gede woshshino.
Qeesootu leellishshinohu bushu akati, batinyu polisooti mite yite Qullaawu Maxaafire rossanno gede faro fanino. Tini, polisootu Yihowa Farciꞌraasine dancha illenni laꞌanno gede assitino.