Sabbakate Loosira Kaaꞌlitanno Minna

Aliidi Bisi, Maganu Gashshoote duduwate loosira kaaꞌlitanno minna afiꞌneemmo gede assate lowo geeshsha hasiꞌranno. Lawishshaho, 2023 soqqanshote diro, Yihowa Farciꞌraasine horoonsidhannoti higge affino maamarra Gambooshshu Addaraashuwanna Jajjabbu Gambooshshi Addaraashuwa minate, hiratenna gatamarate 500 miliyoone doolaare saꞌꞌanno woxe fushshitino.a Kuni alamete doyichora noo songuwa Gambooshshu Addaraashuwa towaatate fushshitino woxeno agurranna fulinoho.

Hakkiinni saeno, fushshotenni gamba assinoonni woxe, sinu biiro minatenna towaatate horoonsiꞌnanni; togooti sinu biiro alamete doyichoha sabbakate looso qineessate kaaꞌlitanno. Noo woxi giddo gama Gambooshshu Addaraashuwanna Jajjabbu Gambooshshi Addaraashuwa minatenna gatamarate horoonsiꞌra dandiinanni gede, sinu biiro giddo looso loonseemmo gara woyyeessinoonni. Ikkirono, sinu biiro gatamarate, woy wolu bayichira sayisate lowo woxi hasiisanno. Kuni loosi hasiisannoha ikkinohu mayiraati? Sinu biiro qanchoho loonsanni heeꞌnoonniha kaajja looso irkissannohu hiittoonniiti? Hanni laꞌno.

“Mineho Diro Seedisanno”

Duucha sinu biiro minninku 30 woy 40 diro ale ikkanno! Alamete Doyichohu Akeekunna Gimbaatu Golira soqqamannohu Nikoolasi togo yiino: “Yanna saꞌu kiiro, dancha gede assine towaantanni mini nafa akkalanno hattono dhodhoohanno. Gatamarshu lowo diro horoonsiꞌra dandiinanni gede mineho diro seedisanno.”

Beeteelete minna dirijjitete giddo taashshinoonni coyibba ledo sumuu yaanno garinnino horoonsiꞌra hasiissanno. Alamete doyichora, batinye sinu biiro minni kawa halashshaanote kiiro lowo geeshsha lexxitino. Tenne lexxo ledo sumuu yaanno garinni, sinu biirora soqqantanno loosaasine leda hasiissino. Hakko daafira, alba ikkitanno yine minnoonniti Beeteelete minna xa baasa ruukkitino!

Wolu heda hasiissanno coyi gawajjo kalaqannore gargarate. Goofimarchu barruwa roore gooffe daggu kiiro, heeshsho gawajjitannoti kalaqamu dano roore lexxitanno. (Luqaasi 21:11) Gatamarshu yannara haarote daggino ogimma horoonsiꞌne, hatte minnara loossannore gawajjannori kalaqamannota ajishate woꞌnaalleemmo. Qoleno tenne minna kalaqamu dano iillitanno yannara kaaꞌlote looso qineessatenna dano iillituhu gedensaannino qanchoho loonsanni heeꞌnoonni looso irkisate injiitanno gede assine woyyeessineemmo.

“Yihowa Tenne Muro Maassiꞌrino”

Saihu 2023hu soqqanshote diro, Aliidi Bisi uyino biddishshi garinni, 43 sinu biiro minna gatamarre lowore biddi assinoonni. Hatto yaano, alamete doyichora noote baalante Beeteelete minna giddo darate meddi yitannota ajo batiꞌro gatamarroonni yaate. Hanni kuni loosi mageeshshi geya hasiisannohoro leellishannoha boode lawishsha laꞌno.

Angoola. Angoolunnite Sinu Biiro Komite miila ikkinohu Maati togo yiino: “Hage 2:7 noo masaalo baxxino garinni woꞌmitanna laꞌꞌate kaayyo afiꞌnoommo. Tonnu diri giddo calla, halashshaanote kiiro xibbunni 60 anga lexxitino! Tenne halashshaano irkisate, Beeteelete maate kiiro sase ero leda hasiissino. Ikkirono Beeteelete mininke ajino daafira, hasiꞌneemmo geeshshi roduuwa kawira koyisa didandiinoommo. Tini qolte, batinyu Beeteelete maate miilla lowo duha duqqitanno gedenna loosu saate gobbaannino loossanno gede assitino.”

Sinu biiro halashshate maa assa dandiinanniro xiinxallitanno roduuwa worroonni. Insa umi qara, tennera maltinotinna qarra rahe tirate kaaꞌlitannoti, noo mine gatamarre fadate yite heddino. Kayi coye ledde xiinxallituhu gedensaanni, noo mine gatamara dirijjitete woxe woyyino garinni horoonsiꞌrate kaaꞌlitannokkita wodanchitino. Hatteentenni, hakko qooxeessanko mine hirre ninke hasiꞌneemmo garinni gatamara woyyitanno yitino. Maati togo yiino: “Miname goofino mine hirre gatamara woyyitanno yitanno hedo umo Sinu Biiro Komitera shiqinshi yannara, togoo mini ninke uminke miꞌninoommo mini geeshsha diꞌꞌinjaanno yine huluullammoommo.” Isi lede togo yiino: “Xa kayi konni garinni woyyeessine qixxeessinoonni mini ninkera malinoha ikkinota wodanchinoommo. Yihowa tenne muro maassiꞌrino.”

Angoolunnite sinu biirora albillitte roore halaꞌlino mini hasiisannonsaha ikkara dandaanno. Ikkollana, xaahu haaru mini, Beeteelete hoowe giddoonni yannate geeshsha horoonsiꞌrate minnoonni minna, hattono gobbaanni karaayyaꞌnoonni minna, sinu biiro qanchoho leeltanni noote dhagge ikkitanno lopho ledo sumuu yaanno garinni loossanno gede kaaꞌlitanni no.

Jaappaane. Umiha sinu biiro mine minnoonnihu mitu 40 diri albaanniiti; qoleno konne mine biddiitto gatamarre diegenninoonni. Konne mine towaatate lowore assinoonni; ikkirono, togo daafurranni heeꞌneennanni minu gale hose akkalino. Hakko daafira, tenne minna biddiitto gatamarate lowo looso loonsanni heeꞌnoommo.

Dirra saꞌanni hadhuta, Beeteelete heeshshono soorrantino. Alba 2015 geeshsha, Beeteelete maatera afoo seekkidhannore, barri sagalenna hashshi hurbaate qinshe uyinanninsa. Hakko daafira, hakkawaro Jaappaanete Beeteelera gallanni mine sagale qishiꞌnanni base digarite. Xa kayinni Beeteelete maate roore anga sagale uminsa qishidhanno. Konnira, Beeteelete maate galtanno kifilera qarrantukkinni sagale qishiꞌra dandiitanno gede, gatamarroonni mini kusheenaho ikkanno bayicho afiꞌrino. Jaappaanete sinu biirora soqqantannoti Kumiiko yinanni rodoo togo yitino: “Kusheenu lowo geeshsha injiinoe; qoleno haaro Beeteelete qixxaawo woꞌmunni woꞌma irkiseemma gede kaaꞌlinoe.”

Jaappaanete sinu biirora loonsanni loosi alamete doyicho loosinkera lowore kaaꞌlannoho. (Maatewoosi 28:19, 20) Woꞌma Qullaawa Maxaafa attammannite lame sinu biironke giddo mitte Jaappaanete noote. Hakko daafira, gatamarshu loosi giddo mittu, woraqatu giggilonna buko gamba assitanno maashine qasate; tini, borro attammanniwa loossanno roduuwa gawajjannore hoolate kaaꞌlitanno. Tenne maashine hire qasate mitte miliyoone doolaare meddi yaanno woxe fushshinoonni; ikkirono tenne assanke sinu biiro ayyaanaamittete sagale woꞌmanka woyite attamanna tuqisa dandiitanno gede kaaꞌlitino.

Gatamarshu yannarano Qullaawa Maxaafa attamate loosi uurrannokki gede assate sharrammoonni. Jaappaanete Sinu Biiro Komite miili Tirey togo yiino: “Gatamarshu yannara, dirijjitenke Qullaawa Maxaafa batinyu afiinni tirte fushshitanni no; qoleno alamete doyichora Qullaawa Maxaafa hajaccanno manni kiiro roore lexxite no. Kawaa haaro maashine qansanni kaꞌaa borro attamme tuqisate, addi addihu loosu golinna kontiraata adhitino uurrinsha buusante loosa hasiissinonsa.” Togoori gooddo ikkannori heeꞌreennanni, gatamarshu loosi baasa batiꞌre noo yannara Badheessunni kayise Woxawaajje 2023 geeshsha, aganu aganunku 220,000 Qullaawa Maxaafa attammoonni. Kuni baalu loosi gatamarshaho wole woxe fushshinikki loosamino.

Gatamarshu yannara illachinshannihu wolu coyi korreentete wolqa daddaꞌlate woy mulla baꞌannota gargarate. Haaro soolaare paanele qasate hendoonni; tini qolte diru dirunku korreentete fulannoha 120,000 doolaare meddi yaanno woxe gatissanno. Qoleno korreentete wolqa daddaꞌlate, maskootete sase karo afidhino hincilaallono qansanni; tinino diru dirunku 10,000 doolaare fultannota gatissanno. Togooha korreentete wolqa daddaꞌlate kaaꞌlanno uduunne hirate lowo woxi fulannoha ikkirono, paanelenna hincilaalluwa noo geeshsha 3.5 miliyoone doolaare fultannota gatissanno yine hendanni. Qoleno togoo uduunni, miꞌnineemmo minnanni kainohunni qarqaru gawajjamannota gatisanno.

“Xaano Lowo Loosi Gate No”

Tenne lamente sinu biirora loonsoonni loosi, Beeteelete minnanke qanchu loosira roore kaaꞌlitanno gede mageeshshi looso loosa hasiissannoro leellishanno. Ikkollana, loosu xaano digoofino. Alamete Doyichohu Akeekunna Gimbaatu Golira soqqamannohu Aarooni, “Xaa geeshsha lowo loosi loosamino; kayi xaano lowo loosi gate no” yiino. Konne looso umo fushsha dandiinannihu hiittoonniiti? Isi lede togo yiino: “Konni hasiisanno loosira woxe fushshitannoreno ikko, uminsa fajjonni konne looso kaaꞌliturenna albillitteno kaaꞌla dandiitanno gede heeshshonsa giddo mitore biddi assidhanni noo roduuwanke baala lowo geeshsha galanteemmonsa. Roduuwinke wolqansanna woxensa uyite kaaꞌlitanno gara laꞌneemmo woyite, Yihowa konne looso maassiꞌranni noota wodanchineemmo.”​—Faarso 110:3.

Aye woyiteno Maganu mine miꞌnineemmohunna gatamadhineemmohu mannu uminsa fajjonni fushshanno woxinniiti; duuchu manni woxe fushshannohu donate.jw.org widoonniiti. Woꞌmanka woyite shaqqillunni woxe fushshitine kaaꞌlitinanni daafira, lowo geeshsha galanteemmoꞌne.