Gambooshshu Addaraashuwanke Towaatanna Gatamara

Kolombiyaho heedhannoti Nikooli yinanni rodoo togo yitino: “Gambooshshu Addaraashenke lowo geeshsha baxeemma! Addaraashenke ammanate roduuwiꞌya ledo gamba yeemma dargaati.” Aterano hatto macciishshamannohe?

Alamete doyichora, Yihowa Farciꞌraasine mite 63,000 Gambooshshu Addaraashera gamba yitanno. Tini Addaraashuwa Magano magansiꞌrate injiitanno minnaati. Kayi kaaꞌlonsa hakkeeshsha calla diꞌꞌikkitino. Kolombiyaho heeꞌrannohu Deevidi yinanni suwisaanchi togo yiino: “Gambooshshu Addaraashuwanke rosiinseemmo roso gaamaarsitanno. Batinyu wosini Addaraashuwanke dancha gede assine amaxxineemmo gara lae dhagge assiꞌranno.” Kuni mulla kae ikkinore diꞌꞌikkino. Gambooshshu Addaraashuwanke feyatenna gatamarate lowore assineemmo. Konne looso loonseemmohu hiittoonniiti?

Gatamarshu Looso Qineessinanni Gara

Gambooshshu Addaraashe towaattannori hattee addaraashe horoonsidhanno songuwaati. Konnira, roduuwu Gambooshshu Addaraashe ganyite fiitanno. Qoleno shiimmaadda coyibba gatamartanno hattono bushinore biddi assitanno.

Songuwa Gambooshshu Addaraashe gatamadhitanno gede kaaꞌlate, Qooxeessunnihu Akeekunna Gimbaatu Goli (LDC) gatamarranni gara qajeelsitanno roduuwa woranno. Mittu mittunku gatamarshu qajeelsaanchi leetenni tonnete geya ikkitanno Addaraashuwa towaatanno. Kuni rodii Addaraashe noo gara mare laꞌꞌanno hattono roduuwa Addaraashensa amaxxitanno gara qajeelsanno. Sayikki sayikki diro, kuni rodii mitte mittenti Addaraashe noo gara keenanno hattono dano kalaqara dandaannori woy gatamarama hasiissannori nooronna teꞌee laꞌꞌanno.

Gatamarshu qajeelsaanchi aanno qajeelsha roduuwinke baasa naadanno. Hindete gobbara heedhannoti Induumaadi yinanni rodoo, “Qajeelshu dhagge ikkannoho. Addaraashenke dancha gede assine amaxxineemmo gara qajeela lowo geya hagiirsiissanno” yitino. Keeniyaho heeꞌrannohu Evaanzi yinanni rodii qole togo yiino: “Shiimu qarri batiꞌre lowo deerra iillikkinni biddi assa lowo woxi fulannota gatissannota ronsoommo.”

Fulanno Woxe

Gambooshshu Addaraashe towaatatenna gatamarate fulanno woxi lowo xibbe doolaarennia kayise lowo kume doolaare geeshsha ikkanno; fulanno woxi addaraashe noo bayichi, addaraashe keeshshitino dirinna horoonsidhanno songuwa kiiro garinni babbaxxanno. Konni loosira fushshineemmo woxe afiꞌneemmohu hiittoonniiti?

Gambooshshu Addaraashe gatamarrannihu mannu uminsa fajjonni fushshanno woxinniiti. Alekisaander yinannihu Kaazakistaanete heeꞌranno rodii togo yiino: “Gama woxe Interneetete, waahonna korreentete fushshinanni. Gama kayinni sooftete, guwantete, saamunahonna feyanchoho hattono qalamete fushshinanni.” Kuri coyibbara fushshineenna gatanno woxe, alamete doyichora rooru woxi hasiisanno gatamarshiranna jajjabba pirojektera horoonsiꞌnanni.

Jajjabba Gatamarshu Pirojekte

Mitte Gambooshshu Addaraashera lamu woy sasu aganira hasiisanno woxinni roorino woxe hasiꞌranno gatamarshi hasiisiro, songote cimeeyye LDC wortinoha gatamarshu qajeelsaancho amaaꞌlitanno. LDC tenne pirojekte fajjituro, alamete doyicho loosira fushshinoonni woxi aaninni kayinse baantanni. Saihu 2023 soqqanshote diro, togoo pirojektuwa giddo 8,793 ikkitannota gundoonni; konni loosira 76.6 miliyoone doolaare fultino. Hanni tenne pirojektuwa giddo lame laꞌno.

Angoolaho, 15 diro keeshshitinoti mitte Gambooshshu Addaraashe biddi assa hasiissannoha lowo qarra afidhino. Korreentete shibba soorra hasiissannote, girgiddu dhodhoohino, olluu mannino addaraashete hoowenni fulanno wayi minira eanni noonke yee coyiꞌramino. Konne qarra tirate LDC roduuwi qixxaawo assitino. Konni loosira 9,285 doolaare fushshinoonni. Olluu manni tennera hagiidhino; qoleno loosu loosamino gari dhagge ikkinonsa.

Poolaandete gobbara, mitte Addaraashe xissitanni qarrissino, minxaafeno horo anganni fultino. Konnira LDC roduuwi addaraashe iimiido gatamarranni gedenna minxaafeno soorrinanni gede qixxaawo assitino. Konni loosira 9,757 doolaare fultino. Tenne addaraashe xa konni garinni gatamarroonni daafira, lowo diri geeshsha jawu gatamarshi dihasiisannose.

Yihowa Ayirranno Gede Assanno Gatamarsha

Gatamarshu lowo woxi fulannota gatisannoha calla ikkikkinni, Yihowa ayirranno gedeno assanno. Shoni yinannihu Tonga heeꞌranno rodii togo yiino: “Addaraashenke gatamarranninna towaantanni daafira, biifadonna ishintinokki addaraashera Yihowa magansiꞌra dandiinoommo; qoleno Addaraashenke noo gari qarqaru manni Yihowa daafira danchare hedanno gede assannoho. Manna Gambooshshu Addaraashenke daanno gede koyinseemmo woyite tashshi yaannonke.”

Kaaꞌla Dandaattohu Hiittoonniiti?

Ninke baalunku Magano magansiꞌneemmo bayicho feyanna towaata kaaꞌla dandiineemmo. Maarino yinannihu Awustiraaliyaho heeꞌrannohu gatamarshu qajeelsaanchi togo yiino: “Ninke baalunkura Gambooshshu Addaraashe towaata kaaꞌlate ayirrado qoosso noonke. Konni loosira kaaꞌlammeemmo woyite, hasiisannokki woxi fulannota gatisate lowore kaaꞌlineemmo; hatto ikkiro, Maganu loosira fushshinoonni woxe roore hasiisannowa horoonsiꞌra dandiinanni.”

Hindete gobbara heeꞌrannohu Jooeeli yinanni rodii, Gambooshshu Addaraashensa towaata baxanno. Togo yiino: “Roduuwiꞌya ledo loosa, haaro alamera ledonsa looseemmo woyite mageeshshi geeshsha hagiidheemmoro hedeemmo gede assitannoe.” Aleenni qummi assiniti Nikoolino togo yitino: “Muli yannara, roduuwu hayishshiꞌnanni kifilera dhoohino baamba biddi assitu woyite uulla hayishsha kaaꞌloomma. Dhoohino baamba biddi assa hoogummarono, dano kalaqantannota kayi hoola kaaꞌloomma.”

Gambooshshu Addaraasheꞌne towaatanna gatamara kaaꞌla hasiꞌrattoha ikkiro, songoꞌne cimeeyye hasaawisi. Qoleno fushshatto woxi, kiꞌne Addaraashe calla ikkikkinni alamete doyichora noota wole Gambooshshu Addaraashuwa towaatateno kaaꞌlanno. Fushshatto woxe addaraashete giddo fushshote saaxinera wora woy donate.jw.org widoonni soya dandaatto. Shaqqillunni aatto daafira lowo geya galanteemmohe.